Un Kreensia Masha Komun

“Mi tabata haña nagmèri tokante fièrnu di kandela! Mi tabata soña ku mi ta ser tirá den un lugá di kandela i tabata spièrta na gritamentu. Ta di komprondé anto ku mi tabata purba tur manera pa no peka.”​—Arline.

ABO ta kere ku fièrnu ta un lugá di tormento pa pekadó? Tin hopi hende ta kere esei. Por ehèmpel, na 2005 un erudito na e Universidat di St. Andrew, Eskosia, a saka afó ku un tersera parti di guia religioso eskoses ta kere ku hende ku ta alehá for di Dios lo sufri “angustia mental den fièrnu pa eternidat.” Un kinta parti ta kere ku esnan den fièrnu lo sufri tormento físiko.

Den hopi pais e kreensia di fièrnu ta masha komun. Por ehèmpel, un enkuesta ku nan a tene na Merka na 2007 a revelá ku rònt di 70 porshento di hende ku nan a entrevistá ta kere den fièrnu. Asta den paisnan kaminda mayoria di hende no ta dje religioso ei, tòg tin hende ta kere den fièrnu. Na 2004, un enkuesta na Canada a mustra ku 42 porshento di hende ta kere den fièrnu. I na Gran Bretaña, 32 porshento tabata sigur ku fièrnu ta eksistí.

Loke Guianan Religioso Ta Siña Hende

Hopi guia religioso a stòp di siña hende ku fièrnu ta un lugá di tormento literal. Mas bien, nan ta promové e definishon ku tin den Katisashi di Iglesia Katóliko, publiká na 1994 (na ingles). E katisashi ta bisa: “E kastigu prinsipal di fièrnu ta separashon eterno for di Dios.”

Tòg, hopi hende ta sigui kere ku fièrnu ta un lugá di tormento mental òf físiko. E hendenan ku ta promové e doktrina akí ta pretendé ku e siñansa ei ta basá riba Beibel. Albert Mohler, presidente di e Seminario Teológiko di Boutistanan di Zùit, ta deklará: “E ta simplemente un siñansa bíbliko.”

Dikon Loke Bo Ta Kere Ta Importante?

Si fièrnu ta realmente un lugá di tormento, sigur lo bo mester tin miedu di dje. Sinembargo, si e siñansa akí no ta bèrdat, lidernan religioso ku ta siña hende e doktrina ta krea konfushon i kousa miedu innesesario. Ademas, nan ta difamá Dios.

Kiko Beibel, e Palabra di Dios, ta bisa di e tópiko akí? E siguiente artíkulonan lo usa diferente tradukshon di Beibel pa kontestá e tres preguntanan akí: (1) Kiko ta pasa realmente ora un hende muri? (2) Kiko Hesus a siña hende tokante fièrnu? (3) Ki efekto e bèrdat tokante fièrnu por tin riba bo?