Yuda Nan Bolbe Sin Tarda!

“Serka ken nos lo bai? Abo tin e palabranan di bida eterno.”​—JUAN 6:68.

1. Kiko Pedro a bisa ora hopi disipel a bandoná Hesus?

NA UN okashon, hopi disipel di Hesukristu ku a rechasá un di su siñansanan a bandon’é. El a puntra su apòstelnan: “Boso tambe kier bai anto?” Anto Pedro a kontest’é: “Señor, serka ken nos lo bai? Abo tin e palabranan di bida eterno.” (Juan 6:​51-69) No tabatin otro kaminda pa bai. E tempu ei, hudaismo no tabatin “e palabranan di bida eterno.” I awe, di ningun manera lo bo no por haña e palabranan ei den Babilonia e Grandi, e imperio mundial di religion falsu. “Ya ta ora” pa kualke kristian ku a dual bai for di e tou di Dios pero ku ke agradá Yehova “lanta for di soño” i bolbe na e tou.​—Rom. 13:11.

2. Kiko nos mester tene na mente relashoná ku asuntunan konfidensial òf hudisial?

² Yehova a mustra interes den e karnénan pèrdí di Israel. (Lesa Ezekiel 34:​15 i 16.) Asina tambe, ansianonan kristian tin e deseo i tambe e responsabilidat di yuda hende semehante di karné ku a dual bai for di e tou. Si un publikadó haña e asignashon pa studia ku un persona inaktivo ku ta deseá yudansa, kiko e publikadó tin ku hasi si e haña sa ku e ruman akí a kometé un piká serio? En bes di duna konseho tokante kualke asuntu hudisial òf konfidensial, e publikadó tin ku sugerí e ruman p’e papia ku e ansianonan. Pero si e no hasié, e publikadó mes tin ku informá e ansianonan.​—Lev. 5:1, NW; Gal. 6:1.

3. Kon e hòmber ku 100 karné a reakshoná ora el a haña esun pèrdí?

³ E artíkulo anterior a referí na Hesus su ilustrashon tokante un hòmber ku tabatin 100 karné. Ora tabata falta ún den e tou, el a laga e 99 otronan i a bai buská esun pèrdí. E hòmber a  keda masha kontentu ora el a hañ’é. (Luk. 15:​4-7) Di mes manera, nos tambe ta alegrá ora ku un karné di Dios ku tabata pèrdí bolbe na e tou. Motivá pa amor, probablemente e ansianonan i otro miembronan di e kongregashon a bishitá e ruman inaktivo akí. Nan tambe ke mira e persona bèk den e tou pa asina e por disfrutá di Dios su apoyo, protekshon i bendishon. (Deu. 33:27; Sal. 91:14; Pro. 10:22) Si nan tin e oportunidat pa yuda un ruman bolbe na e kongregashon, kiko nan por hasi?

4. Kiko nos por komprondé for di Galationan 6:2 i 5?

⁴ Podisé nan por animá un ruman pa bolbe na e kongregashon dor di mustr’é bondadosamente ku Yehova ta stima Su karnénan i no ta rekerí mas di loke nos por hasi. Loke e ta rekerí di nos ta, entre otro, studia e Skritura, asistí na e reunionnan kristian i prediká e bon notisia di Reino. Podisé ta bon pa lesa Galationan 6:2 i 5 i menshoná ku kristiannan por yuda karga peso di otro, pero ku “kada un lo karga su mes karga” di responsabilidat spiritual. Niun hende no por ta fiel na Dios pa nos.

“Preokupashonnan di Bida” A Pone Nan Dual?

5, 6. (a) Dikon ta importante pa nos skucha ku atenshon ora rumannan inaktivo ta ekspresá nan mes? (b) Kon lo bo por yuda rumannan inaktivo mira ku e echo ku nan no ta asosiá ku e kongregashon no a benefisiá nan?

⁵ Pa por diserní kon pa yuda rumannan inaktivo, ansianonan i otro publikadónan madurá mester skucha ku atenshon ora e personanan ei ta deshogá nan mes. Suponé ku komo ansiano bo ta di bishita serka un parehá kasá ku pa motibu di “preokupashonnan di bida” no ta asosiá ku e kongregashon. (Luk. 21:34) Kisas, problemanan finansiero òf responsabilidatnan di famia ku a oumentá a pone ku gradualmente nan a stòp ku nan aktividatnan kristian. Podisé nan ta haña ku nan mester tuma un pousa pa aliviá nan mes di sierto responsabilidatnan. Pero abo por laga nan komprondé ku dor di isolá nan mes, nan no ta solushoná e problema. (Lesa Proverbionan 18:1.) Kisas ku takto lo bo por puntra nan: “Boso ta mas felis desde ku boso a stòp di asistí na e reunionnan? Boso bida di famia a bira mihó? Ainda boso tin e goso ku nos ta haña dor di konfia den Yehova?”​—Neh. 8:10.

⁶ Ora rumannan inaktivo meditá riba e preguntanan ei, kisas esaki lo por yuda nan mira ku nan spiritualidat i felisidat a mengua debí ku nan no ta asosiá ku e kongregashon. (Mat. 5:3, NW; Heb. 10:​24, 25) Kisas ta posibel pa yuda nan realisá ku nan a pèrdè goso debí ku nan no ta prediká e bon notisia. (Mat. 28:​19, 20) Pues anto, kiko ta e kos sabí pa e rumannan inaktivo hasi?

7. Kiko nos por animá rumannan ku a dual bai for di e tou pa hasi?

 ⁷ Hesus a bisa: “Tene kuidou pa boso kurason no ta kargá pa kousa di paranda i buracheria i e preokupashonnan di bida . . . Ma sea alerta tur ora bai, hasiendo orashon pa boso por tin forsa pa skapa di tur e kosnan akí ku ta bai tuma lugá.” (Luk. 21:​34-36) Nos por animá rumannan ku a dual bai for di e tou pero ku ke disfrutá di e felisidat ku nan tabatin ántes pa nan resa pidi pa spiritu santu i yudansa di Dios i pa nan aktua na armonia ku nan orashonnan.​—Luk. 11:13.

Nan A Trompeká?

8, 9. Kon un ansiano lo por rasoná ku un persona ku a trompeká?

⁸ Debí na imperfekshon humano, desakuerdonan ta surgi entre hende di diferente personalidat, i esaki por laga un persona trompeká. Algun ruman a trompeká ora ku un persona respetá den e kongregashon no a aktua konforme prinsipio bíbliko. Si un ruman inaktivo a ser afektá di e forma ei, e ansiano ku bishit’é por hala su atenshon na e echo ku no ta Yehova ta pone hende trompeká. Pues, un ruman no tin ningun motibu pa kibra su relashon ku Dios i Su pueblo. Mas bien, e tin ku sigui sirbi Dios ku e konfiansa ku “e Hues di henter mundu” sa loke a tuma lugá i ku lo e trata e asuntu na e manera korekto. (Gén. 18:25; Kol. 3:​23-25) Ora un persona trompeká i kai literalmente, e no ta keda deliberadamente den e posishon ei sin hasi esfuerso pa lanta.

⁹ Den un intento pa yuda un ruman bolbe, un ansiano lo por menshoná ku atraves di tempu, algun ruman ku a trompeká ta ripará ku loke a pone nan trompeká no ta parse masha importante mas. De echo, e situashon ku a pone nan stòp di sirbi Yehova kisas no ta eksistí mes mas. Si un persona a trompeká pasobra el a risibí disiplina, orashon ku meditashon por yud’é mira ku den sierto sentido el a meresé e disiplina i ku e no mester laga esaki pon’é trompeká.​—Sal. 119:165; Heb. 12:​5-13.

Un Siñansa Bíbliko Tabata e Problema?

10, 11. Ki rasonamentu lo por ta efikas ora di purba yuda un ruman ku tabatin un komprondementu distinto di sierto siñansa bíbliko?

¹⁰ Podisé algun ruman a bandoná e tou di Dios pasobra nan no tabata di akuerdo ku sierto siñansa bíbliko. Despues ku Dios a libra e israelitanan for di sklabitut na Egipto, nan “a lubidá su obranan” ku el a hasi pa nan benefisio i “no a spera riba su konseho.” (Sal. 106:13) Kisas ta bon pa rekordá un ruman inaktivo ku “e esklabo fiel i prudente” ta perkurá kuminda spiritual ekselente i ku ta via e kanal ei el a siña e bèrdat originalmente. (Mat. 24:45) Pues, pakiko no tuma e desishon pa kana den e bèrdat atrobe?​—2 Juan 4.

¹¹ Ora un ansiano ta hasi esfuerso pa yuda rumannan ku a dual bai for di e tou di Dios, e por referí na e disipelnan ku a bandoná Hesus pasobra nan a rechasá un di su siñansanan. (Juan 6:​53, 66) Dor di kibra nan relashon ku Kristu i su siguidónan fiel, nan a pèrdè nan goso i apresio pa kosnan spiritual. E rumannan ku a stòp di asistí na e reunionnan di kongregashon a haña un otro lugá kaminda tin kuminda spiritual nutritivo? Nò, no tin!

Nan A Kometé Piká Serio?

12, 13. Kon por yuda un persona ku a dual bai for di e tou i ku a atmití ku el a kometé un piká serio?

¹² Algun ruman ta stòp di prediká i di asistí na e reunionnan pasobra nan a kometé un piká serio. Podisé nan ta pensa ku si nan konfesá nan maldat na e ansianonan, nan ta ser ekspulsá. Pero nan lo no ser ekspulsá for di e kongregashon si nan a stòp ku e práktika no-bíbliko i a repentí di bèrdat. (2 Kor. 7:​10, 11) Mas bien, ora nan bolbe, nan ta ser risibí kalurosamente, i e ansianonan lo duna nan e yudansa spiritual nesesario.

¹³ Si bo ta un publikadó madurá ku a haña asignashon pa yuda un persona inaktivo, kiko bo mester hasi si e bisa bo ku el a kometé un piká serio? Manera paragraf dos ta bisa, en bes di enbolbé bo mes mas aleu den e situashon,  animá e persona pa papia ku e ansianonan. Si e no ke hasié, lo bo tin ku sigui e instrukshon di Dios relashoná ku e asuntunan ei. Asina bo ta demostrá bo preokupashon pa Yehova su nòmber i e bienestar spiritual di e kongregashon. (Lesa Levítiko 5:1. *) E ansianonan lo sa kon pa yuda kualke persona ku ke bolbe i biba na armonia ku e boluntat di Dios. Kisas lo e tin ku haña disiplina amoroso. (Heb. 12:​7-11) Si e persona atmití ku el a peka kontra Dios, pero a stòp ku e maldat i a repentí di bèrdat, e ansianonan lo yud’é i e por risibí e pordon di Yehova.​—Isa. 1:18; 55:7; Sant. 5:​13-16.

Yu Ku Bolbe Ta Trese Goso

14. Relatá den bo mes palabranan e ilustrashon di Hesus tokante e yu pèrdí.

¹⁴ Ora un ruman asigná ta hasi esfuerso pa yuda un karné ku a dual, e por referí na e ilustrashon di Hesus na Lukas 15:​11-24. Den e parábola ei, un hòmber hóben a malgastá su herensia dor di a hiba un bida inmoral. Ku tempu, el a kuminsá aboresé e manera di biba desenfrená ei. Su stoma tabata bashí, e tabata sinti falta di kas, i p’esei el a disidí di bai su kas bèk. For di aleu su tata a mir’é ta bini, i el a kore bai top’é, a bras’é i a sunch’é tiernamente i a alegrá masha hopi. Meditashon riba e ilustrashon akí lo por motivá un ruman ku a drif bai for di e kongregashon pa bolbe na e tou. Siendo ku e sistema di kosnan akí lo ser destruí pronto, e mester bolbe na e kongregashon sin tarda.

15. Dikon algun ruman ta drif bai for di e kongregashon?

¹⁵ Mayoria di hende ku drif bai for di e kongregashon no ta eksaktamente manera e yu pèrdí. Den algun kaso, e personanan ei ta drif bai gradualmente, meskos ku un boto ku ta drif pokopoko bai for di kosta. Otronan ta asina kargá ku preokupashonnan di bida ku nan ta neglishá nan relashon ku Yehova. Tin otronan ku ta permití komportashon di un miembro di e kongregashon trompeká nan òf ta bandoná e kongregashon pasobra nan no ta di akuerdo ku un sierto siñansa bíbliko. Tin algun ku ta enbolbé nan mes den práktikanan ku Beibel ta kondená. Sinembargo, e konsehonan relashoná ku kada un di e kasonan presentá den e artíkulo akí lo por yuda bo pa abo yuda esnan ku a bandoná e tou, pa e motibunan ei òf pa otro motibu. Asina nan por bolbe promé ku ta demasiado lat.

“Bon Biní, Mi Yu!”

16-18. (a) Kon un ansiano a yuda un ruman hòmber ku tabata inaktivo pa hopi aña? (b) Dikon e ruman hòmber akí a bira inaktivo, ki yudansa el a haña i kon e kongregashon a risibié?

¹⁶ Un ansiano kristian a bisa: “Nos kuerpo di ansiano ta hasi hopi esfuerso pa bishitá rumannan inaktivo. Mi ta kòrda un ruman hòmber  ku mi a studia kuné i a yud’é haña konosementu di e bèrdat. E tabata inaktivo pa mas o ménos 25 aña i tabata den un situashon masha difísil. P’esei, mi a splik’é kon aplikashon di prinsipionan bíbliko por a yud’é. Despues di algun tempu, el a kuminsá bini Salòn di Reino i a aseptá un estudio di Beibel pa yud’é fortalesé su determinashon pa bolbe na e tou.”

¹⁷ Dikon e ruman hòmber a bira inaktivo? El a atmití: “Mi a kuminsá presta mas atenshon na asuntunan mundano ku na kosnan spiritual. Despues mi a stòp di studia, di partisipá den sirbishi i di asistí na e reunionnan. I te ku mi a realisá, mi no tabata parti di e kongregashon kristian mas. Pero e interes personal i sinsero ku e ansiano a mustra den mi a yuda mi bolbe.” E ruman akí su problemanan a kuminsá mengua despues ku el a aseptá un estudio di Beibel. El a bisa: “Mi a realisá ku loke mi bida tabata falta ta e amor i guia di Yehova i su organisashon.”

¹⁸ Kon e kongregashon a risibí e ruman akí? El a bisa: “Mi ta sinti mi manera e yu pèrdí ku Hesukristu a papia di dje. De echo, un ruman muhé di edat avansá ku 30 aña pasá tabata den e kongregashon i ku ainda ta sirbi Yehova fielmente a bisa mi: “Bon biní, mi Yu!” E palabranan ei a ègt konmové mi kurason. Mi a sinti mi realmente na kas. I mi ke ekspresá mi apresio sinsero pa e amor, kalor, pasenshi i interes ku e ansiano ei i henter e kongregashon a mustra na mi. Nan amor pa Yehova i pa nan próhimo realmente a yuda mi bolbe na e tou.”

Urgi Nan pa Tuma Akshon Mesora!

19, 20. Kon bo por yuda rumannan inaktivo bolbe na e tou sin tarda, i kon bo por mustra nan ku Dios no ta ferwagt demasiado di nos?

¹⁹ Nos ta bibando den e último dianan, i e fin di e sistema aktual ta masha serka. P’esei, animá rumannan inaktivo pa asistí na e reunionnan kristian. Urgi nan pa kuminsá asistí mesora. Rekordá nan ku Satanas ta purba di destruí nan relashon ku Dios i laga nan pensa ku nan por haña sierto alivio di e karganan di bida dor di bandoná e adorashon berdadero. Bo por duna nan e siguransa ku ta solamente komo siguidónan fiel di Hesus nan por disfrutá di berdadero sosiegu, esta, refreskamentu.​—Lesa Mateo 11:​28-30.

²⁰ Rekordá rumannan inaktivo ku Dios ta ferwagt ku nos ta hasi loke nos por. Ora ku algun di e disipelnan a kritiká Maria ruman muhé di Lázaro pasobra el a ungí Hesus ku e zeta perfumá kostoso, Hesus a bisa: “Lag’é; . . . El a hasi loke e tabata por.” (Mar. 14:​6-8) Ademas, Hesus a elogiá e biuda pober ku a duna un kontribushon masha chikitu na e tèmpel. E tambe a hasi loke e tabata por. (Luk. 21:​1-4) Mayoria di nos por asistí na e reunionnan kristian i partisipá den e trabou di prediká e Reino. Ku Yehova su yudansa, hopi di e rumannan ku ta inaktivo aktualmente tambe por hasi e kosnan ei.

21, 22. Ki siguransa bo por duna rumannan ku bolbe na Yehova?

²¹ Si un persona semehante di karné ku a dual bai for di e tou tin miedu di enfrentá su rumannan kristian atrobe, lo bo por kòrd’é riba e alegria ku a reina ora e yu pèrdí a bolbe kas. Rumannan ku ta bolbe na e kongregashon ta kousa e mesun goso. Animá nan pa aktua awor pa resistí Diabel i hala serka Dios.​—Sant. 4:​7, 8.

²² Un resepshon kaluroso ta spera esnan ku bolbe na Yehova. (Lam. 3:40) Sin duda, nan tabatin masha goso den pasado tempu ku nan tabata sirbi Dios. Pues, tin masha bendishon ta spera rumannan ku bolbe na e tou sin tarda.

[Nota]

Kon Lo Bo Kontestá?

• Kon lo bo por yuda un kristian ku a trompeká i bira inaktivo?

• Ki rasonamentu lo por yuda un persona ku a bandoná e tou di Dios debí na un punto di bista personal relashoná ku un siñansa bíbliko?

• Kon nos lo por yuda un persona ku ta vasilá pa bolbe na e kongregashon?

[Preguntanan di Estudio]

[Plachi na página 15]

Skucha ku atenshon ora un ruman inaktivo ta ekspresá su mes

[Plachi na página 17]

Meditashon riba Hesus su ilustrashon di e yu pèrdí por motivá algun ruman pa bolbe na e tou