BO A yega di sinti miedu?— * Mayoria di nos a yega di sinti miedu. Ora bo tin miedu, kiko bo por hasi?— Bo por bai serka un hende ku ta mas grandi i mas fuerte ku bo. Podisé bo mama òf bo tata por yuda bo. E relato di David por mustra nos serka ken nos por bai pa yudansa. El a kanta na Dios: “Lo mi konfia den bo. . . . Den Dios mi a pone mi konfiansa; lo mi no tin miedu.—Salmo 56:3, 4.

Ken bo ta kere a siña David pa no tene miedu? Ta su mayornan?— Sin duda nan a siñ’é esei. Su tata, Isaí, tabata un antepasado fiel di Hesukristu, e “Prens di Pas” ku Dios a primintí. (Isaias 9:6; 11:1-3, 10) Isaí su tata—e tawela (opa) di David—tabata Obed. Un di e bukinan di Beibel tin e nòmber di Obed su mama. Bo sa kon yam’é?— E yama Ruth, un señora leal ku tabata kasá ku Boaz.—Ruth 4:21, 22.

Klaru ku Ruth i Boaz a muri hopi tempu promé ku David a nase. Kisas bo sa e nòmber di Boaz su mama, David su bisa-bisawela. E tabata biba na Jeriko i el a yuda algun spion israelita skapa. Ora e murayanan di Jeriko a basha abou, el a haña protekshon pa su famia pasobra el a kologá un kordon òf kabuya kòrá na su bentana. Kon yam’é?— E yama Rahab, kende a bira un adoradó di Yehova. Beibel ta papia di dje komo un bon ehèmpel di kurashi pa kristiannan.—Josué 2:1-21; 6:22-25; Hebreonan 11:30, 31.

Nos por tin sigur ku David su tata i mama a siñ’é tokante tur e sirbidónan fiel di Yehova ei, ya ku Dios a duna mayornan e mandamentu pa siña nan yunan e kosnan ei. (Deuteronomio 6:4-9) Tempu a pasa, anto e dia a yega ku Dios su profeta Samuel mester a bai pa skohe David, e yu hòmber di mas chikí di Isaí, pa bira rei di Israel den futuro.—1 Samuel 16:4-13.

Un dia, Isaí a manda David bai hiba kuminda pa su tres ruman hòmbernan mas grandi ku tabata bringa kontra e filisteonan ku tabata enemigu di Dios. Ora David a yega, el a kore bai na e liña di bataya i a tende e gigante Goliat tene mofa di “e ehérsitonan di e Dios bibu.” Nan tur tabatin miedu di aseptá  Goliat su reto pa bringa kontra dje. Rei Saul a tende ku David ta dispuesto pa bringa kontra Goliat i p’esei el a manda yam’é. Pero ora Saul a mira David, el a bis’é: “Abo ta un hóben ainda.”

David ta splika Saul ku el a yega di mata un leon i un ber ku a purba kome karné di su famia. Goliat “lo ta manera un di nan,” David a bisa. Saul a kontest’é: “Bai, i ku SEÑOR sea ku bo.” David a buska sinku piedra lizu, pone nan den su tas di wardadó, kue su slenger, i sali pa bai bringa kontra e gigante. Ora Goliat a mira ku ta un simpel hóben ta biniendo, el a grit’é: “Bin serka mi, i lo mi duna bo karni na e paranan.” David a kontest’é: ‘Ami ta bin riba bo den e nòmber di Yehova,’ i despues ku siguransa el a grita: “Lo mi dal bo mata.”

Despues di esei, David a kore bai den direkshon di Goliat. El a saka un piedra for di su tas, hink’é den su slenger i a manda e piedra ku a bai dal Goliat den su frenta. Ora e filisteonan a mira ku e gigante ta morto, nan a kore bai morto spantá. E israelitanan a kore nan tras i a gana e bataya. Boso lo por lesa henter e historia akí huntu komo famia na 1 Samuel 17:12-54.

Komo un hóben, tin bes bo por tin miedu di obedesé Dios su mandamentunan. Jeremias tambe tabata un hóben ku tabatin miedu na promé instante ora Dios a mand’é hasi algu, pero Dios a bis’é: “No tene miedu . . . pasobra ami ta ku bo.” Jeremias a tuma kurashi pa vense su miedu i a prediká manera Dios a mand’é. Meskos ku David i Jeremias, si bo konfia den Yehova, abo tambe por siña pa no tene miedu.—Jeremias 1:6-8.