Hesus​—E Ehèmpel Perfekto pa Sigui

LO BO deseá di ta un mihó persona i mas felis? Apòstel Pedro ta splika kon nos por logra esei. El a skirbi: “Kristu tambe a sufri pa boso, lagando un ehèmpel pa boso, pa boso sigui den su pasonan.” (1 Pedro 2:21) Sí, dor ku Hesukristu a hiba un bida fuera di lo komun, nos por siña hopi kos for di dje. Si nos siña tokante Hesus i purba biba manera el a biba, nos por tin sigur ku nos ta bira un mihó persona i mas felis. Laga nos wak mas djaserka algun kualidat ku e gran hòmber akí tabatin i mira kon nos por benefisiá di su ehèmpel.

Hesus tabata balansá. Maske Hesus a bisa ku e no tabatin “ningun lugá pa pone su kabes,” e no a boga pa un estilo di bida rígido ni e no a hiba un bida asina. (Mateo 8:20) Hesus a yega di bai bankete. (Lukas 5:29) Su promé milager registrá den Beibel—ora el a kambia awa den biña na un fiesta di kasamentu—ta mustra ku e no tabata un asosial ni un persona severo ku su mes. (Juan 2:1-11) Sinembargo, Hesus a mustra bon kla kiko tabata mas importante p’e. El a bisa: “Mi kuminda ta pa hasi e boluntat di esun ku a manda mi, i pa kumpli ku su trabou.”—Juan 4:34.

□ Bo a analisá bo bida pa mira kon bo por balansá metanan materialista i spiritual?

Hesus tabata aserkabel. Beibel ta deskribí Hesus komo un hòmber kaluroso i amabel. Ora hende a aserk’é ku problema òf pregunta difísil, e no a sintié iritá. Na un okashon ora e tabata rondoná pa un multitut, un señora ku tabata sufri di un aflikshon pa 12 aña a mishi ku su paña, ku e speransa di haña alivio. E no a rechasá e señora pa algu ku otro hende kisas lo a konsiderá un akto di arogansia, sino mas bien, el a bis’é bondadosamente: “Mi yu, bo fe a salba bo.” (Marko 5:25-34) Mucha tambe tabata sinti nan kómodo den su kompania, sin miedu ku lo e ignorá nan. (Marko 10:13-16) E tabata papia ku su disipelnan na un manera habrí i amigabel. Nan no tabatin miedu di aserk’é.—Marko 6:30-32.

□ Ta fásil pa otro hende aserka bo?

E tabatin empatia i kompashon. Un di Hesus su birtutnan di mas grandi tabata ku e por a pone su mes den sapatu di otro hende, sinti loke nan ta sinti i yuda nan. Apòstel Juan ta konta ku ora Hesus a mira Maria yora pa motibu ku su ruman hòmber, Lázaro, a muri, Hesus a “bira profundamente konmoví den spiritu i masha emoshoná” i “a yora.” Hende ku tabata presente por a ripará fásilmente ku Hesus tabatin hopi kariño pa e famia ei, un kariño ku e no tabatin bèrgwensa di demostrá. Esta un gran kompashon el a demostrá ora el a lanta su amigu for di morto!—Juan 11:33-44.

Na un otro okashon, un hòmber ku tabata sufri di lepra—un malesa repugnante  ku a pone ku e mester a biba den karentena—a roga Hesus: “Señor, si bo kier, bo por hasi mi bira limpi.” Hesus su reakshon tabata realmente emoshonante: “Hesus a saka su man i a mishi kuné, bisando: ‘Mi kier! Sea limpi!’” (Mateo 8:2, 3) Hesus no a kura hende simplemente pa kumpli ku profesia. E kier a kita lágrima for di nan wowo. Tur loke el a hasi tabata drei rònt di un di su dichonan bon konosí: “Meskos ku boso kier pa hende hasi ku boso, boso tambe hasi ku nan.”—Lukas 6:31.

□ Bo echonan ta demostrá ku bo tin kompashon pa otro hende?

Hesus tabatin komprenshon i disernimentu. Maske Hesus tabata un hòmber ku no a kometé eror, nunka el a spera perfekshon for di otro hende òf hasi komo si fuera e tabata mihó ku otro hende; ni e no tabata aktua si e no tabatin un bista di henter e situashon. Un biaha, tabatin un muhé ‘ku tabata un pekadó den un stat,’ kende a mustra su fe i apresio dor di laba Hesus su pia ku su awa di wowo. E anfitrion, kende a husga e muhé na un manera severo, a keda sorprendí ora Hesus a laga e muhé laba su pia. Hesus a diserní ku e señora tabata sinsero i p’esei e no a kritik’é pa su pikánan. Mas bien, el a bis’é: “Bo fe a salba bo; bai na pas.” Dor ku Hesus a reakshoná na un manera bondadoso, e señora ei probablemente a sintié konmoví pa kambia su bida.—Lukas 7:37-50.

□ Bo ta konosí komo un hende ku ta lihé pa duna elogio i slow pa kritiká?

E tabata imparsial i respetuoso. Kisas dor ku Hesus tabata bai bon ku Juan i tambe dor di posibel lasonan familiar, Hesus tabatin un kariño spesial pa disipel Juan. * No opstante, Hesus no a trat’é ku parsialidat, ni no a fabores’é riba e otro disipelnan. (Juan 13:23) En realidat, ora Juan i su ruman Santiago a pidié pa duna nan e mihó puestonan den e Reino di Dios, Hesus a kontestá: “Pa sinta na mi man drechi òf na mi man robes, esaki no ta keda na mi pa duna.”—Marko 10:35-40.

Semper Hesus a mustra rèspèt pa otro hende. Ora e tabata riba tera e no tabatin prehuisio kontra hende, ounke hende rònt di dje sí tabatin prehuisio. Por ehèmpel, por lo general tabata trata hende muhé komo inferior. Sinembargo, Hesus sí tabata mustra e debido rèspèt na hende muhé. E promé biaha ku el a deklará  abiertamente ku e ta e Mesias, el a bisa esei no na un hende muhé hudiu sino na un samaritano, kende e hudiunan en general tabata menospresiá i no tabata saludá di ningun manera. (Juan 4:7-26) I ta na hende muhé Hesus a duna e privilegio di bira e promé testigunan di su resurekshon.—Mateo 28:9, 10.

□ Bo ta imparsial den bo trato ku hende di otro rasa, sekso, idioma òf nashonalidat?

El a kumpli ku su deber komo yu i ruman. Hesus su tata di kriansa, Hosé, aparentemente a muri ora Hesus tabata hóben ainda. Probablemente, Hesus tabata hasi trabou di karpinté pa sostené su mama i su rumannan hòmber i muhé mas chikitu. (Marko 6:3) Durante e último momentonan di su bida, el a enkargá su disipel Juan ku kuido di Su mama.—Juan 19:26, 27.

□ Bo por imitá Hesus dor di kumpli ku bo responsabilidat di famia?

Hesus tabata un berdadero amigu. Hesus tabata sobresaliente komo amigu. Dikon? Wèl, e no tabata rechasá su amigunan djis pasobra nan tabata hasi fout, asta ora tabata e mesun fout. No ta semper su disipelnan tabata aktua manera el a deseá. Pero el a demostrá ku e ta nan amigu dor di konsentrá riba nan bon kualidatnan en bes di asumí ku nan tin mal intenshon. (Marko 9:33-35; Lukas 22:24-27) Sin imponé su opinion, el a invitá nan pa ekspresá nan mes libremente.—Mateo 16:13-15.

E kos prinsipal ta ku Hesus tabata stima su amigunan. (Juan 13:1) Kuantu? El a bisa: “Ni un hende no tin amor mas grandi ku esaki, ku un hende ta duna su bida pa su amigunan.” (Juan 15:13) Un hende por ofresé su amigunan algu mas balioso ku su propio bida?

□ Bo ta keda amigu di un hende asta ora ku e iritá bo òf ofendé bo?

E tabata un hòmber responsabel i ku kurashi. Hesus tabata hopi diferente for di e manera débil i pasivo ku pintornan ta pint’é. E Evangelionan ta deskribié komo un hòmber fuerte i dinámiko. Dos bes, Hesus a saka komersiantenan ku nan merkansia for di tèmpel. (Marko 11:15-17; Juan 2:14-17) Ora un multitut violento a bin arestá “Hesus di Názarèt,” el a identifiká su mes ku kurashi i a protehá su disipelnan, deklarando firmemente: “Ami t’e; p’esei, si ta ami boso ta buska, laga esakinan bai.” (Juan 18:4-9) No ta nada straño ku ora Ponsio Pilato a mira Hesus su kurashi ora nan a arest’é i maltrat’é, ku el a bisa: “Ata e Hòmber!”—Juan 19:4, 5.

□ Bo ta aktua sin vasilá i ku kurashi ora bo ta mira loke bo mester hasi?

Debí na e kualidatnan sobresaliente akí i tambe otro kualidatnan di Hesus, é ta e ehèmpel perfekto pa nos. Si nos laga su kondukta influensiá nos, nos lo ta un mihó persona i mas felis. Ta p’esei apòstel Pedro a urgi kristiannan pa fiha bista riba Hesus. Bo ta purba sigui Hesus su pasonan mas kuidadosamente posibel?

E Tabata Mas Ku Djis un Ehèmpel

Sinembargo, Hesus tabata hopi mas ku djis un ehèmpel. El a bisa: “Ami ta e kaminda, i e bèrdat, i e bida; ni un hende no ta bin serka e Tata, sino pa medio di mi.” (Juan 14:6) No solamente Hesus a papia ku otro hende tokante Dios i di e manera ei habri kaminda pa hende hala serka Dios, sino tambe el a duna su bida pa hende fiel haña bida.—Juan 3:16.

 En konekshon ku e motibu akí pa bini na tera, Hesus a bisa: “E Yu di hende no a bin pa wòrdu sirbí, ma pa sirbi, i pa duna su bida komo preis di reskate pa hopi.” (Mateo 20:28) Ora Hesus a ofresé su bida komo sakrifisio, el a pone fundeshi pa hende haña bida eterno. Kiko kada un di nos mester hasi pa benefisiá di e provishon ei? Hesus a splika: “Esaki ta bida eterno, ku nan por konosé bo, e úniko Dios berdadero, i Hesukristu, kende bo a manda.”—Juan 17:3.

Sí, pa un hende haña bida eterno e tin ku siña konosé Hesus, imit’é i pone fe den su morto komo sakrifisio. Nos ta invitá bo pa tuma tempu pa studia e fuente di e konosementu ei, Beibel, i hasi esfuerso pa praktiká loke e ta bisa, meskos ku Hesus a hasi. *

Hesus su bida ehemplar ta siña nos ki sorto di persona nos mester ta. E echo ku el a duna su bida komo sakrifisio por libra nos for di piká i su pago, morto. (Romanonan 6:23) Ki tristu nos situashon lo ta sin e influensia poderoso di Hesukristu! Nunka nos no mester laga preokupashonnan i ansiedatnan di bida stroba nos di probechá di e oportunidat di konsiderá i sigui kuidadosamente e ehèmpel di e hòmber mas importante ku a yega di biba—Hesukristu.

[Nota]

[Kuadro/Plachinan na página 7]

▪ Hesus tabata imparsial i respetuoso ku tur hende

▪ E tabata un berdadero amigu te na final

▪ E tabatin kurashi

Bo ta purba sigui Hesus su pasonan mas kuidadosamente posibel?

[Plachinan na página 5]

Hesus tabata balansá . . .

aserkabel . . .

kompasivo