Komprondé i Apresiá Hesus Su Papel Úniko den Dios Su Propósito
Komprondé i Apresiá Hesus Su Papel Úniko den Dios Su Propósito
“Ami ta e kaminda, i e bèrdat, i e bida; ni un hende no ta bin serka e Tata, sino pa medio di mi.”—JUAN 14:6.
1, 2. Dikon nos mester ta interesá pa analisá Hesus su papel úniko den Dios su propósito?
ATRAVES di siglonan, hopi hende a hasi masha esfuerso pa sobresalí riba otro hende rònt di nan. Pero ta masha tiki hende a logra esei. Asta tin ménos hende ainda ku por bisa ku bon motibu ku nan ta úniko den maneranan signifikativo. Sinembargo, Hesukristu, e Yu di Dios, sí ta úniko den hopi manera.
2 Dikon nos mester ta interesá den Hesus su papel úniko? Pasobra nos relashon ku nos Tata selestial, Yehova, ta enbolbí! Hesus a bisa: “Ami ta e kaminda, i e bèrdat, i e bida; ni un hende no ta bin serka e Tata, sino pa medio di mi.” (Juan 14:6; 17:3) Laga nos analisá algun manera den kua Hesus ta úniko. Esaki lo yuda nos komprondé i apresiá su papel den Dios su propósito.
“E Yu Unigénito”
3, 4. (a) Dikon nos por bisa ku Hesus ta úniko den su papel komo e Yu unigénito? (b) Den ki sentido Hesus su papel den e kreashon tabata úniko?
3 Hesus no ta djis un yu di Dios. E ta “e Yu unigénito di Dios.” (Juan 3:16, 18) E palabra griego tradusí komo “unigénito” ta ser definí komo “úniko di su klase” òf “e úniko miembro di un famia òf un sorto.” Yehova tin sientos di miónes di yu spiritual. Ta den ki sentido anto Hesus ta “úniko di su klase”?
4 Hesus ta úniko den e sentido ku e ta e úniko kreashon direkto di su Tata. E ta e Yu primogénito. De echo, e ta “e primogénito di henter kreashon.” (Kol. 1:15) E ta “e prinsipio di e kreashon di Dios.” (Rev. 3:14) E papel ku e Yu unigénito a hunga den e kreashon tambe ta úniko. E no tabata e Kreador ni e Originador di e kreashon. Pero Yehova a us’é komo e agente, òf e medio, pa krea tur otro kos. (Lesa Juan 1:3.) Apòstel Pablo a skirbi: “Pa nos tin ún Dios so, e Tata, for di kende tur kos ta bin, i nos ta eksistí p’e; i ún Señor, Hesukristu, pa medio di kende tur kos ta eksistí, i nos ta eksistí pa medio di dje.”—1 Kor. 8:6.
5. Kon e Skritura ta enfatisá ku Hesus ta úniko?
5 Sinembargo, Hesus ta úniko den hopi manera mas. E Skritura ta usa hopi título pa referí na dje i esakinan ta enfatisá su papel úniko den Dios su propósito. Awor, laga nos analisá sinku otro título ku e Skritura Griego Kristian ta usa pa Hesus.
“E Palabra”
6. Dikon ta apropiá pa Beibel yama Hesus “e Palabra”?
6 Lesa Juan 1:14. Dikon Beibel ta yama Hesus “e Palabra,” òf Lógos? E título akí ta mustra kiko ta e funshon ku el a kuminsá ehersé for di tempu ku otro kriaturanan inteligente a bini na eksistensia. Yehova a usa su Yu pa transmití informashon i instrukshon na otro yunan spiritual, meskos ku Dios a usa e Yu ei pa duna Su mensahe na hende riba tera. E echo ku Hesus ta e Palabra, òf Dios su Bosero, ta ser reflehá den loke Kristu a bisa su oyentenan hudiu: “Mi siñansa no ta di mi, ma di esun ku a manda mi. Si un hende kier hasi Su boluntat, e lo sa di e siñansa, si ta di Dios e ta, òf si ta mi mes ta papia.” (Juan 7:16, 17) Hesus ta sigui karga e título “e Palabra di Dios” asta despues ku el a bolbe na gloria selestial.—Rev. 19:11, 13, 16.
7. Kon nos por imitá e humildat ku Hesus a desplegá den su papel komo “e Palabra”?
7 Djis pensa un ratu riba loke e título akí ta enserá. Ounke Hesus ta e kriatura di mas sabí di tur Yehova su kriaturanan, e no ta dependé riba su propio sabiduria. E ta papia manera su Tata ta instruyé. Semper e ta hala atenshon na Yehova i no na su mes. (Juan 12:50) Ki un maravioso ehèmpel pa nos imitá! Nos tambe a ser konfiá ku e presioso privilegio di por “trese notisianan alegre di kosnan bon.” (Rom. 10:15) Apresio pa Hesus su ehèmpel di humildat mester motivá nos pa evitá di papia kosnan ku ta bini di nos mes. Ora nos ta transmití e mensahe salbadó di bida ku e Skritura ta kontené, nos no ke “pasa límite di loke tin skirbí.”—1 Kor. 4:6, BPK.
“E Amèn”
8, 9. (a) Kiko e palabra “amèn” ta nifiká, i dikon Beibel ta yama Hesus “e Amèn”? (b) Kon Hesus a kumpli ku su papel komo “e Amèn”?
8 Lesa Revelashon 3:14. Dikon Beibel ta yama Hesus “e Amèn”? E palabra tradusí komo “amèn” ta un transliterashon di un palabra hebreo ku ta nifiká “sea asina,” òf “siguramente.” E palabra original na hebreo for di kual e ta bini ta nifiká “sea fiel” òf “konfiabel.” Beibel ta usa e mesun palabra pa deskribí e fieldat di Yehova. (Deu. 7:9; Isa. 49:7) Pues, den ki manera Hesus ta úniko ora e Beibel ta referí na dje komo “e Amèn”? Tuma nota kon 2 Korintionan 1:19 i 20 ta kontestá e pregunta ei: “E Yu di Dios, Kristu Hesus, kende a wòrdu prediká meimei di boso . . . no tabata Sí i Nò, sino Sí den dje. Pasobra tur e promesanan di Dios den dje ta Sí, i den dje ta Amèn, pa e gloria di Dios.”
9 Hesus ta “e Amèn” pa tur e promesanan di Dios. E bida sin piká ku el a hiba ora e tabata riba tera, inkluso su morto komo un sakrifisio, a konfirmá e promesanan di Yehova Dios i a hasi nan kumplimentu posibel. Debí ku Hesus a keda fiel, el a proba tambe ku loke Satanas a pretendé den e buki di Jòb ta mentira. Satanas a pretendé ku ora Dios su sirbidónan haña nan ku difikultat, sufrimentu i prueba, nan lo nenga Dios. (Jòb 1:6-12; 2:2-7) Di tur e kriaturanan di Dios, ta e Yu primogénito so por a duna e kontestá di mas irefutabel riba e akusashon ei. Ademas, relashoná ku e kuestion prinsipal tokante Yehova su derecho di ta e Soberano universal, Hesus ta esun ku a duna e mihó testimonio na fabor di su Tata.
10. Kon nos por imitá Hesus den su papel úniko komo “e Amèn”?
10 Kon nos por imitá Hesus den su papel úniko komo “e Amèn”? Nos por hasi esei dor di keda fiel na Yehova i apoyá su soberania universal. Asina, nos ta reakshoná na un manera positivo riba e petishon na Proverbionan 27:11, ku ta bisa: “Sea sabí, mi yu, i hasi mi kurason kontentu, pa mi por kontestá esun ku reprochá mi.”
“E Mediadó di un Aliansa Nobo”
11, 12. Den ki sentido Hesus su papel komo Mediadó ta úniko?
11 Lesa 1 Timoteo 2:5 i 6. Hesus ta e úniko ‘mediadó entre Dios i hende.’ E ta “e mediadó di un aliansa nobo.” (Heb. 9:15; 12:24) Sinembargo, Beibel ta yama Moisés tambe un mediadó—e mediadó di e pakto di Lei. (Gal. 3:19) En bista di esei, den ki sentido Hesus su papel komo Mediadó ta úniko?
12 E palabra den e idioma original ku a ser tradusí komo “mediadó” ta un término hurídiko. E ta referí na Hesus komo un Mediadó legítimo (òf, den un sentido, komo un abogado) di e aliansa, òf pakto, nobo ku a habri kaminda pa e nasementu di un nashon nobo, “e Israel di Dios.” (Gal. 6:16) E nashon akí ta konsistí di kristiannan ungí ku spiritu santu ku ta forma un “saserdosio real” i selestial. (1 Ped. 2:9; Eks. 19:6) E pakto di Lei, di kua Moisés tabata e mediadó, no por a produsí un nashon manera esei.
13. Kiko Hesus su papel komo Mediadó ta enserá?
13 Kiko Hesus su papel komo Mediadó ta enserá? Wèl, Yehova ta apliká e balor di Hesus su sanger na esnan ku wòrdu yamá pa bira parti di e aliansa nobo. Di e manera akí, Yehova ta deklará nan hustu. (Rom. 3:24; Heb. 9:15) E ora ei, Dios por konsiderá nan digno di drenta e aliansa nobo ku e speransa di bira rei- i saserdotenan den shelu! Komo nan Mediadó, Hesus ta yuda nan mantené un posishon limpi den bista di Dios.—Heb. 2:16.
14. Dikon tur kristian, sin importá ki speransa nan tin, mester realmente apresiá Hesus su papel komo Mediadó?
14 Kiko di hende ku no ta den e aliansa nobo, esta, esnan ku tin speransa di biba pa semper riba tera, i no den shelu? Ounke nan no ta partisipá den e pakto nobo, nan ta benefisiá di dje sí. Nan ta risibí pordon pa nan pikánan i nan ta ser deklará hustu komo amigunan di Dios. (Sant. 2:23; 1 Juan 2:1, 2) Sea ku nos tin e speransa di biba den shelu òf riba tera, nos kada un tin bon motibu pa apresiá Hesus su papel komo e Mediadó di e aliansa nobo.
E “Sumo Saserdote”
15. Den ki sentido Hesus su papel komo Sumo Saserdote ta diferente for di tur e otro hòmbernan ku a sirbi komo sumo saserdote?
15 Den pasado, hopi hende a sirbi komo sumo saserdote, pero Hesus su papel komo Sumo Saserdote ta realmente úniko. Den ki sentido? Pablo a splika: “[E] no tin mester di trese sakrifisionan tur dia, manera e sumo saserdotenan ei, promé pa su mes pikánan i despues pa e pikánan di e pueblo, pasobra esaki el a hasi un biaha pa semper, ora ku el a sakrifiká su mes. Pasobra Lei ta nombra hòmbernan komo sumo saserdote, kendenan ta débil, ma e palabra di huramentu, ku a bin despues di Lei, ta nombra un Yu, kende a wòrdu hasí perfekto pa semper.”—Heb. 7:27, 28. *
16. Dikon Hesus su sakrifisio ta realmente úniko?
16 Hesus tabata un hòmber perfekto, e ekivalente eksakto di Adam promé ku Adam a peka. (1 Kor. 15:45) Komo tal, Hesus tabata e úniko hende ku por a ofresé un sakrifisio perfekto i kompletu—e klase di sakrifisio ku no tin nodi di ser ripití. Bou di e Lei di Moisés, nan tabata ofresé sakrifisio tur dia. Pero, e sirbishi di e saserdotenan i tur e sakrifisionan ei tabata djis un sombra di loke Hesus lo a logra. (Heb. 8:5; 10:1) Pues, debí ku Hesus por logra mas ku e otro sumo saserdotenan i lo sigui sirbi pa semper, su funshon komo Sumo Saserdote ta úniko.
17. Dikon nos mester rekonosé i apresiá Hesus su papel komo nos Sumo Saserdote, i kon nos por hasi esei?
17 Nos mester di Hesus su sirbishi komo Sumo Saserdote pa yuda nos haña un posishon aprobá dilanti di Dios. I nos tin un Sumo Saserdote realmente maravioso! Pablo a skirbi: “Nos no tin un sumo saserdote ku no por kompadesé di nos debilidatnan, sino un ku a wòrdu tentá den tur kos meskos ku nos, ma tòg sin piká.” (Heb. 4:15) Sin duda, e echo ku nos ta rekonosé i apresiá esaki mester motivá nos pa ‘no biba mas pa nos mes, ma pa esun ku a muri pa nos.’—2 Kor. 5:14, 15; Luk. 9:23.
E “Simia” Profetisá
18. Kua profesia Dios a duna despues ku Adam a peka, i ki informashon relashoná ku e profesia akí a ser revelá mas despues?
18 Den Edén, ora a parse ku humanidat a pèrdè tur kos, esta, nan relashon aprobá ku Dios, bida eterno, felisidat i e Paradeis, Yehova Dios a profetisá ku lo a bini un Libertadó. Beibel a referí na e persona akí komo e “simia.” (Gén. 3:15) Atraves di siglonan, e Simia anónimo akí a bira tema di hopi profesia bíbliko. E mester tabata un desendiente di Abraham, Isaak i di Jakòb. E mester a bini tambe for di e famia di Rei David.—Gén. 21:12; 22:16-18; 28:14; 2 Sam. 7:12-16.
19, 20. (a) Ken ta e Simia primintí? (b) Dikon nos por bisa ku, fuera di Hesus, tin mas persona ta forma parti di e simia profetisá?
19 Ken tabata e Simia primintí akí? Nos por haña kontesta pa e pregunta akí na Galationan 3:16. (Les’é.) Sinembargo, mas despues den e mesun kapítulo, apòstel Pablo a bisa e kristiannan ungí: “Si boso ta pertenesé na Kristu, e ora ei boso ta desendiente di Abraham, herederonan segun promesa.” (Gal. 3:29) Kon bin Kristu ta e Simia primintí, i tòg e Simia ta inkluí otro hende?
20 Miónes di hende ta pretendé ku nan ta desendiente di Abraham, i algun ta asta aktua komo profeta. Algun religion ta duna masha importansia na e idea di ku nan profetanan ta desendiente di Abraham. Pero ta tur e personanan akí ta forma parti di e Simia primintí? Nò. Manera apòstel Pablo a señalá bou di inspirashon, no ta tur e desendientenan di Abraham por bisa ku nan tin derecho di forma parti di e Simia primintí. Yehova no a usa e desendientenan di e otro yu hòmbernan di Abraham pa bendishoná humanidat. E simia di bendishon mester a bini únikamente mediante Isaak. (Heb. 11:18) Al fin i al kabo, e parti prinsipal di e simia profetisá ta un solo hòmber, Hesukristu, kende su liña di desendensia for di Abraham ta dokumentá den Beibel. * Tur e otro personanan ku despues a bira e parti sekundario di e simia di Abraham a haña e privilegio ei pasobra nan “ta pertenesé na Kristu.” Sí, Hesus su papel den kumplimentu di e profesia akí ta realmente úniko.
21. Kiko relashoná ku Hesus su manera di kumpli ku su papel úniko den Yehova su propósito a impreshoná bo?
21 Kiko nos a siña for di e repaso breve akí di Hesus su papel úniko den Yehova su propósito? For di tempu ku e Yu unigénito di Dios a ser kreá, e tabata realmente úniko. Sinembargo, semper e Yu úniko akí di Dios, ku despues a bira Hesus, a sirbi humildemente na armonia ku e boluntat di su Tata. Nunka el a buska gloria pa su mes. (Juan 5:41; 8:50) Ki un ekselente ehèmpel pa nos awe! Meskos ku Hesus, laga nos pone komo nos meta pa ‘hasi tur kos pa e gloria di Dios.’—1 Kor. 10:31.
[Nota]
^ par. 15 Segun un eksperto di Beibel, e palabra tradusí komo “un biaha pa semper” ta ekspresá un konsepto bíbliko importante ku “ta indiká ku e morto di Kristu tabata sierto, úniko òf singular.”
^ par. 20 Ounke e hudiunan den promé siglo di nos era tabata pensa ku nan, komo e desendientenan literal di Abraham, lo tabata e pueblo privilegiá, nan tabata spera riba un persona ku lo a bini komo e Mesias, òf Kristu.—Juan 1:25; 7:41, 42; 8:39-41.
Bo Ta Kòrda?
• Kiko bo a siña di Hesus su papel úniko for di e títulonan ku e tin? (Mira e kuadro.)
• Kon bo por imitá e ehèmpel di Yehova su Yu úniko?
[Preguntanan di Estudio]
[Kuadro/Plachi na página 23]
Algun Título Ku Ta Reflehá Hesus Su Papel Úniko den Dios Su Propósito
▪ E Yu Unigénito. (Juan 1:3) Hesus ta e úniko kreashon direkto di su Tata.
▪ E Palabra. (Juan 1:14) Yehova ta usa su Yu komo Bosero pa transmití informashon i instrukshon na e otro kriaturanan.
▪ E Amèn. (Rev. 3:14) E bida sin piká ku Hesus a hiba ora e tabata riba tera, inkluso su morto komo un sakrifisio, a konfirmá e promesanan di Yehova Dios i a hasi nan kumplimentu posibel.
▪ E Mediadó di e Aliansa Nobo. (1 Tim. 2:5, 6) Komo un Mediadó legítimo, Hesus a habri kaminda pa e nasementu di un nashon nobo, “e Israel di Dios.” E nashon akí ta konsistí di kristiannan ku lo forma un “saserdosio real” selestial.—Gal. 6:16; 1 Ped. 2:9.
▪ E Sumo Saserdote. (Heb. 7:27, 28) Hesus tabata e úniko hende ku por a ofresé un sakrifisio perfekto i kompletu, e klase di sakrifisio ku no mester a ser ripití. E por limpia nos di piká i libra nos di morto ku ta resultado di piká.
▪ E Simia Primintí. (Gén. 3:15) E parti prinsipal di e simia profetisá ei ta un solo hòmber, Hesukristu. Tur e otro hendenan ku despues a bira e parti sekundario di e Simia di Abraham “ta pertenesé na Kristu.”—Gal. 3:29.