Pakiko Mantené Bo Integridat?

“Husgá mi, o Yehova, . . . konforme mi integridat.”—SAL. 7:8, NW.

1, 2. Menshoná algun situashon komun ku ta pone un kristian su integridat na prueba.

VISUALISÁ e siguiente tres situashonnan: Algun kompañero di skol ta tenta un mucha hòmber. Nan ta trata di pon’é rabia, kisas p’e papia palabra malu òf bringa. Kiko lo e hasi? Lo e tuma vengansa, òf lo e dominá su mes i kana bai? Un esposo ta su so na kas, i e ta hasiendo algun investigashon riba Internet. Diripiente un propaganda pa un website vulgar ta aparesé riba su screen. Lo e kai den tentashon i bai na e site ei, òf lo e hasi sigur di evit’é? Un ruman muhé kristian ta kòmbersando ku algun ruman muhé ora ku e kòmbersashon ta bira negativo, ya ku nan a kuminsá hasi redu riba un ruman muhé den e kongregashon. Kiko lo e hasi? Lo e partisipá den esei, òf lo e purba kambia e tópiko?

² Ounke e situashonnan akí ta distinto for di otro, nan tin algu en komun. Nan tur tres ta enserá e lucha pa mantené integridat kristian. Abo ta pensa riba bo propio integridat ora bo ta trata ku bo preokupashon-, nesesidat- i metanan den bida? Diariamente hende ta preokupá ku nan aparensia, nan salú, e reto pa gana nan pan di kada dia, e kosto di bida haltu i kisas asta ku nan relashon amoroso. Kisas nos ta duna e asuntunan ei mashá atenshon. Pero, kiko Yehova ta prinsipalmente interesá den dje ora e ta analisá nos kurason? (Sal. 139:23, 24) Esei ta nos integridat.

3. Kiko Yehova ta laga pa nos mes disidí, i kiko nos lo konsiderá den e artíkulo akí?

³ Yehova, e Dunador di “tur bon regalo i tur don perfekto,” a duna nos kada un masha hopi regalo. (Sant. 1:17) Danki na dje, nos tin e regalonan, manera un kurpa, un mente, un sierto grado di salú i vários abilidat. (1 Kor. 4:7) Apesar di esei, Yehova no ta obligá nos pa desplegá integridat. E ta laga nos mes disidí si nos ke kultivá e kualidat akí. (Deu. 30:19) P’esei, nos tin ku analisá kiko ta integridat. Ademas, nos lo konsiderá tres motibu pakiko e kualidat akí ta sumamente importante.

Kiko Ta Integridat?

4. Kiko integridat ta enserá, i kiko nos por siña for di Yehova su lei relashoná ku sakrifisio di animal?

⁴ Ta parse ku hopi hende tin un idea vago di loke integridat ta enserá. Por ehèmpel, ora polítikonan ta broma ku nan ta personanan íntegro, hopi bes ta parse ku ta di onestidat nan ta papia. E kualidat ei ta importante, pero e ta djis un parti di integridat. Segun Beibel, integridat ta enserá loke ta kompletu i puru den sentido moral. E palabranan hebreo relashoná ku “integridat” ta bini di un palabra ku ta nifiká puru, kompletu òf sin defekto. Beibel ta usa un di e palabranan akí relashoná ku e sakrifisionan ku hende mester a ofresé na Yehova. E persona ku a ofresé sakrifisio di animal por a haña Yehova su aprobashon solamente si e animal tabata sin defekto òf kompletu. (Lesa Levítiko 22:19 i 20.) Ku firmesa Yehova a sensurá e personanan ku deliberadamente a desobedesé su instrukshon dor di ofresé animalnan lam, malu òf siegu komo sakrifisio.—Mal. 1:6-8.

5, 6. (a) Ki ehèmpelnan ta mustra ku hopi bes nos ta balorá loke ta hinté, òf kompletu? (b) Hende mester ta perfekto pa por mantené nan integridat? Splika.

⁵ E idea di buska i balorá loke ta hinté, òf kompletu, no ta algu straño. Por ehèmpel, imaginá bo lo siguiente: Despues di a buska pa basta ratu, un kolekshonista ta haña un buki di masha balor. Pero, no ta dura mashá ku e ta ripará ku e buki falta vários página masha importante. Debí ku el a keda desapuntá, kisas e ta pone e buki bèk riba rèki. Òf, imaginá bo un hende muhé ku ta kana na un playa ta piki  algun kokolishi ku olanan a benta na kantu. Fasiná ku e variedat i bunitesa di e kreashonnan akí, e ta bùk de bes en kuando pa analisá ún. Kua di nan e ta keda kuné? Esnan ku ta intakto, hinté, òf kompletu. Di mes manera, Dios ta buskando hende ku tin un kurason kompletu pa kuné.—2 Kró. 16:9.

⁶ Pero, kisas bo ta puntra bo mes si un hende mester ta perfekto p’e por desplegá integridat. Debí na piká i imperfekshon, nos por tin e tendensia di pensa ku nos ta manera un buki ku falta página òf un kokolishi ku falta pida. Bo sa sinti asina de bes en kuando? Bo por ta sigur ku Yehova no ta spera pa nos ta perfekto den e sentido apsoluto. Nunka e ta spera pa nos hasi mas di loke nos por. * (Sal. 103:14; Sant. 3:2) Sinembargo, e ta rekerí sí pa nos mantené nos integridat. Akaso tin un diferensia entre perfekshon i integridat? Sí. Laga nos ilustr’é: Un yònkuman ta stima un mucha muhé ku e ta bai kasa kuné. Lo ta bobo di su parti p’e ferwagt ku lo e haña un kasá perfekto. Pero e por ferwagt sí ku e mucha muhé ta stim’é di henter su kurason, esta, ku e tin amor romántiko pa e so. Den un manera similar, Yehova ta “un Dios yalurs,” esta, un Dios ku ta eksigí deboshon eksklusivo. (Eks. 20:5) E no ta spera pa nos ta perfekto, pero sí ku nos ta stim’é di henter nos kurason i ku nos ta adorá e so.

7, 8. (a) Ki ehèmpel Hesus a pone relashoná ku integridat? (b) Kiko integridat ta enserá segun Beibel?

⁷ Tal bes nos ta kòrda riba e kontesta ku Hesus a duna ora un persona a puntr’é kua ta e mandamentu di mas importante. (Lesa Marko 12:28-30.) Hesus no solamente a duna un kontesta, e mes tambe a biba di akuerdo ku loke el a bisa. El a pone e mihó ehèmpel den stima Yehova ku henter su mente, kurason, alma i forsa. El a mustra ku integridat no ta ser ekspresá simplemente ku palabra, sino mediante akshonnan positivo ku ta resultado di un motivashon puru. Pa nos mantené nos integridat, nos tin ku sigui Hesus su pasonan.—1 Ped. 2:21.

⁸ P’esei anto, segun Beibel, integridat ta enserá: deboshon di henter kurason na un Persona selestial, Yehova Dios, i na su boluntat i propósito. Pa mantené nos integridat ta nifiká ku den nos bida di tur dia, nos tin ku hasi esfuerso pa, mas ku tur kos, nos agradá Yehova Dios. Loke ta mas importante p’e lo ta mas importante pa nos tambe. Laga nos konsiderá tres motibu pakiko esaki ta asina importante.

1. Nos Integridat i e Kuestion di Soberania

9. Kiko nos integridat personal tin di haber ku e kuestion di soberania universal?

⁹ Yehova su soberania, esta, su derecho di goberná, no ta dependé di nos integridat. Su soberania ta hustu, eterno i universal. I semper lo e keda asina, sin importá loke kualke kriatura bisa òf hasi. Sinembargo, Dios su soberania a ser difamá seriamente, tantu den shelu komo riba tera. P’esei, su gobernashon mester ser vindiká dilanti tur kriatura inteligente. Es desir, nan tur mester haña e konfirmashon ku Yehova ta e Soberano i ku su gobernashon ta rekto, hustu i amoroso. Komo Testigunan di Yehova, nos ta gusta papia tokante Dios su soberania universal ku tur hende ku ke skucha. Pero, kon nos por demostrá mediante nos eskoho- i echonan ku nos ta skohe Yehova komo nos propio Soberano? Dor di mantené nos integridat.

10. Ki akusashon Satanas a hasi relashoná ku hende su integridat, i kon abo lo reakshoná riba esei?

¹⁰ Konsiderá kon bo integridat ta enbolbí den e asuntu akí. Básikamente, Satanas a pretendé ku ningun hende lo no apoyá Dios su soberania, esta, ku ningun hende lo sirbi Yehova motivá pa amor inegoista. Den presensia di un gran multitut di kriatura spiritual ku tabata skucha, Diabel a bisa Yehova: “Kueru pa kueru! Sí, tur loke un hende tin e lo duna pa su  bida.” (Jòb 2:4) Tuma nota ku no ta e hòmber hustu Jòb so Satanas a akusá falsamente, sino humanidat en general tambe. P’esei, Beibel ta yama Satanas, “e akusadó di nos rumannan.” (Rev. 12:10) El a desafiá Yehova dor di pretendé ku kristiannan—inkluso abo—lo no keda fiel. Satanas ta pretendé ku abo lo traishoná Yehova pa bo skapa bo bida. Kon e akusashonnan ei ta laga bo sinti? Lo bo no deseá di tin un oportunidat pa proba ku Satanas ta un mentiroso? Wèl, dor di mantené bo integridat, bo por hasié.

11, 12. (a) Ki ehèmpelnan ta mustra ku desishonnan ku nos tuma den nos bida diario tin di haber ku e kuestion di integridat personal? (b) Dikon ta un privilegio pa nos mantené nos integridat?

¹¹ Pues, den e kuestion di bo integridat, bo kondukta i loke bo ta skohe den bo bida diario ta masha importante. Konsiderá atrobe e tres situashonnan ku nos a menshoná anteriormente. Kon e personanan akí lo mantené nan integridat? E mucha hòmber, ku su kompañeronan di skol ta tenta, ta sinti masha gana di tuma vengansa, pero e ta kòrda riba e spièrtamentu akí: “Nunka no venga boso mes, stimánan, ma laga lugá pa e furia di Dios, pasobra ta pará skirbí: ‘Ta di mi vengansa ta, ami lo paga bèk,’ Señor [Yehova] ta bisa.” (Rom. 12:19) I e ta kana bai laga nan. E esposo ku ta riba Internet por a sinta wak kosnan erótiko, pero e ta kòrda riba e prinsipio den e palabranan di Jòb: “Mi a sera un aliansa ku mi wowonan; kon anto mi por a wak un bírgen?” (Jòb 31:1) Di mes manera, e esposo ta nenga di wak imágennan inmoral i ta evitá nan komo si fuera ta venenu nan ta. E mucha muhé ku ta kòmbersá den un grupo kaminda lo e por tende un boka di redu ta kontené su mes, ya ku e ta kòrda riba e instrukshon: “Laga kada un di nos agradá su próhimo pa su bon, pa su edifikashon.” (Rom. 15:2) Si e plama e redu, esaki lo no edifiká ningun hende. Ademas, esei lo daña nòmber di su ruman muhé kristian,  i su Tata selestial lo no keda kontentu. P’esei, e ta dominá su lenga i ta kambia e tópiko di e kòmbersashon.

¹² Den kada un di e situashonnan ei, e kristian a skohe, de echo, pa bisa: ‘Yehova ta mi Gobernante. P’esei, lo mi purba hasi loke ta agrad’é den e asuntu akí.’ Bo tambe ta hasi esfuerso pa agradá Yehova ora di hasi eskoho i tuma desishon personal? Si ta asina, realmente bo ta obedesiendo e palabranan konmovedor na Proverbionan 27:11, ku ta bisa: “Sea sabí, mi yu, i hasi mi kurason kontentu, pa mi por kontestá esun ku reprochá [“desafiá,” NW] mi.” Nos tin e gran privilegio di por hasi Dios su kurason kontentu. I pa e motibu ei, kualke esfuerso pa mantené nos integridat ta bale la pena, no ta bèrdat?

2. E Base pa Huisio Divino

13. Kon e palabranan di Jòb i David ta mustra ku Yehova ta husga nos a base di nos integridat?

¹³ Nos ta komprondé anto ku ta nos integridat ta pone ku nos por apoyá Yehova su soberania. P’esei, ta a base di nos integridat Dios por husga nos. Jòb a komprondé esaki bon kla. (Lesa Jòb 31:6.) Jòb tabata sa ku Dios ta pisa tur hende riba “balansa eksakto;” Yehova ta usa su normanan perfekto di hustisia pa midi nos integridat. David a bisa algu similar; el a bisa: “Yehova mes lo dikta sentensia riba e pueblonan. Husgá mi, o Yehova, konforme mi hustisia i konforme mi integridat ku ta den mi. . . . I Dios komo esun hustu ta pone kurason i nir na prueba.” (Sal. 7:8, 9, NW) Nos sa ku Dios por wak te den e profundidat di nos ser, den e “kurason i nir” figurativo. Pero nos tin ku kòrda tambe kiko e ta buska. Manera David a bisa, Yehova ta husga nos a base di nos integridat.

14. Dikon nos no mester asumí nunka ku debí na nos naturalesa imperfekto i pekaminoso nos no por mantené nos integridat?

¹⁴ Suponé ku Yehova Dios ta analisá míles di miónes di kurason di hende awe. (1 Kró. 28:9) Kuantu biaha e ta haña un hende ku ta mantené integridat kristian? Relativamente poko biaha! Apesar di esei, nos no mester asumí ku debí na nos imperfekshon nos no por mantené nos integridat. Al kontrali, meskos ku David i Jòb, nos tin bon motibu pa konfia ku Yehova lo haña nos ta mantené nos integridat ounke nos ta imperfekto. Kòrda, nos no mester ta perfekto pa mantené nos integridat. Ta tres hende perfekto so a yega di biba riba tera, i dos di nan, Adam ku Eva, no a mantené nan integridat. No opstante, miónes di hende imperfekto sí a logra hasi esei. Abo tambe por.

3. E Ta di Vital Importansia pa Nos Speransa

15. Kon David a mustra ku integridat ta di vital importansia pa nos speransa pa futuro?

¹⁵ Integridat ta di vital importansia pa nos speransa pa futuro, pasobra ta a base di nos integridat Yehova ta husga nos. David tabata sa ku esaki ta asina. (Lesa Salmo 41:12.) E tabatin e speransa di risibí Dios su aprobashon pa semper. Meskos ku kristiannan berdadero djawe, David tabatin e speransa di biba pa semper i di sigui hala mas i mas serka Yehova Dios segun ku e tabata sirbié. David tabata sa ku e mester a mantené su integridat si e kier a mira kumplimentu di e speransa ei. Asina tambe, Yehova ta apoyá nos, siña nos, guia nos i bendishoná nos segun ku nos ta mantené nos integridat.

16, 17. (a) Dikon bo ta desididu pa semper mantené bo integridat? (b) Ki preguntanan e siguiente artíkulo lo trata?

¹⁶ Speransa ta di vital importansia pa nos felisidat aktual. E por duna nos e goso ku nos tin mester pa pasa dor di tempunan difísil. Ademas, speransa por protehá nos manera di  pensa. Kòrda ku Beibel ta kompará speransa ku un hèlm. (1 Tes. 5:8) Meskos ku un hèlm ta protehá kabes di un sòldá ku ta den guera, speransa ta protehá nos mente di pensamentunan negativo i pesimista ku Satanas ta promové den e mundu bieu i muribundo akí. Sí, bida no tin nifikashon ora nos no tin speransa. P’esei, nos tin ku analisá nos mes onestamente i kuidadosamente pa sa kon firme nos integridat i e speransa ku ta konektá kuné ta. No lubidá ku dor di mantené bo integridat, bo ta apoyá Yehova su soberania i protehá bo speransa presioso pa futuro. Ohalá ku semper bo mantené bo integridat!

¹⁷ Siendo ku integridat ta asina importante, tin algun pregunta mas ku nos tin ku konsiderá. Kon nos por kultivá integridat? Kon nos por manten’é? I kiko un hende por hasi si pa un tempu e no a mantené su integridat? E siguiente artíkulo lo konsiderá e preguntanan akí.

[Nota]

Kon Lo Bo Kontestá?

• Kiko ta integridat?

• Kiko integridat tin di haber ku e kuestion di soberania universal?

• Den ki sentido integridat ta sirbi komo un base pa nos speransa?

[Preguntanan di Estudio]

[Plachinan na página 13]

Den bida di tur dia, nos ta konfrontá hopi reto ku ta pone nos integridat na prueba