Sea Determiná pa Duna Testimonio Kabal
Sea Determiná pa Duna Testimonio Kabal
“El a manda nos prediká pa e pueblo i pa duna testimonio [kabal].”—ECHO. 10:42.
1. Ki mandato Pedro a enfatisá ora el a papia dilanti di Cornelio?
E FUNSHONARIO di ehérsito italiano a reuní su famia- i amigunan pa un evento ku a trese un kambio grandi den Dios su trato ku hende. E hòmber temeroso di Dios ei tabata Cornelio. Apòstel Pedro a bisa e grupo presente ku e apòstelnan a haña e mandato pa “prediká pa e pueblo i pa duna testimonio” kabal tokante Hesus. Pedro su testimonio a produsí hopi fruta. Personanan no-hudiu insirkunsidá a risibí Dios su spiritu, nan a batisá i a bira prospektivo reinan pa goberná ku Hesus den shelu. Asina, e testimonio kabal ku Pedro a duna tabatin ekselente resultado.—Echo. 10:22, 34-48.
2. Kon nos por sa ku e mandato pa duna testimonio no tabata pa e 12 apòstelnan so?
2 Esei a sosodé na aña 36 di nos era. Rònt di dos aña promé, un opositor ferviente di kristianismo tabatin un eksperensia ku a kambia su bida. Saulo di Tarso tabata riba kaminda pa Damasko ora ku Hesus a aparesé na dje i a bis’é: “Bai den stat, i lo wòrdu bisá na bo kiko bo mester hasi.” Hesus a sigurá disipel Ananias ku Saulo lo a duna testimonio “na e paganonan i reinan i e yunan di Israel.” (Lesa Echonan 9:3-6 i 13-20.) Ora Ananias tabata serka Saulo, el a bisa Saulo: “E Dios di nos tatanan a skohé bo . . . pasobra pa tur hende lo bo ta su testigu.” (Echo. 22:12-16) Kon serio Saulo, kende despues a bira konosí komo Pablo, a tuma e mandato di duna testimonio?
El A Duna Testimonio Kabal!
3. (a) Riba ki relato en partikular nos lo enfoká? (b) Kon e ansianonan di Efeso a reakshoná riba Pablo su mensahe, i ki bon ehèmpel nan a pone?
3 Lo ta masha interesante pa hasi un estudio detayá di loke Pablo a hasi despues di esei. Pero pa aworakí, laga nos enfoká riba un diskurso, deskribí den Echonan kapítulo 20, ku Pablo a duna na aña 56 di nos era. Pablo a duna e diskurso akí kasi na fin di su di tres biahe di misionero. El a desembarká na Mileto, un haf di Laman Egeo i a manda buska e ansianonan di e kongregashon di Efeso. E stat Efeso tabata situá un 50 kilometer mas leu, pero debí na e kamindanan yen di bògt, e biahe tabata mas largu. Bo por imaginá bo kon emoshoná e ansianonan di Efeso a bira ora nan a risibí Pablo su mensahe? (Kompará ku Proverbionan 10:28.) Pero pa emoshoná ku nan tabata, nan tabatin ku plania nan biahe pa Mileto. Algun di nan mester a tuma liber for di trabou òf sera nan negoshinan? Awendia, hopi kristian ta hasi esei pa nan ta sigur ku nan lo no pèrdè niun seshon di nan kongreso di distrito anual.
4. Ki kustumber Pablo tabatin ora e tabata na Efeso pa algun aña?
4 Kiko bo ta kere Pablo a hasi na Mileto durante e tres òf kuater dianan promé ku e ansianonan a yega? Kiko abo lo a hasi? (Kompará ku Echonan 17:16 i 17.) Pablo su palabranan na e ansianonan di Efeso ta yuda nos haña e kontesta. El a deskribí su kustumber di prediká atraves di añanan—inkluso e tempu ku e tabata na Efeso mas promé. (Lesa Echonan 20:18-21.) Ku e konfiansa ku ningun hende por a kontradisié, el a bisa: ‘Boso mes sa ku for di e promé dia ku mi a pone pia na Asia, mi a duna testimonio kabal.’ Sí, e tabata determiná pa kumpli ku e asignashon ku Hesus a dun’é. Kon el a kumpli ku esaki na Efeso? Un manera ku el a hasié tabata dor di prediká na e hudiunan, ya ku el a bai kaminda e por a haña hopi di nan. Lukas a skirbi ku ora Pablo tabata na Efeso rònt di aña 52-55 di nos era, e “tabata rasoná i konvensé nan” den e snoa. Ora e hudiunan “tabata hasi nan kurason duru i tabata bira desobedesidu,” Pablo a dirigí su atenshon na otro hende. Pues, el a bai otro kaminda den e stat i a sigui prediká. Asina, el a duna testimonio na tantu hudiu komo griego den e stat grandi ei.—Echo. 19:1, 8, 9.
5, 6. Dikon nos por ta sigur ku ora Pablo a prediká di kas pa kas ta hende no-kreyente el a papia kuné?
5 Ku tempu, algun persona ku a bira kristian a kualifiká pa bira ansiano. Ta ku nan Pablo a papia na Mileto. Pablo a kòrda nan riba e método ku el a usa: “Mi no a laga di deklará nada ku tabata di probecho pa boso i tabata siña boso públikamente i di kas pa kas.” Algun hende den nos tempu ta pretendé ku aki Pablo tabata referí simplemente na hasimentu di bishita di pastoreo serka kreyentenan. Pero esei no ta e kaso. E ekspreshon ‘siña públikamente i di kas pa kas’ ta apliká prinsipalmente na dunamentu di testimonio na hende no-kreyente. E siguiente palabranan di Pablo ta mustra esei bon kla. Pablo a bisa ku e tabata duna testimonio, “tantu na hudiu komo na griego, di repentimentu pa ku Dios i di fe den nos Señor Hesukristu.” Ta klaru anto ku Pablo tabata duna testimonio na hende no-kreyente, kendenan mester a repentí i pone fe den Hesus.—Echo. 20:20, 21.
6 Den un análisis ekstenso di e Skritura Griego Kristian, un eksperto di Beibel a bisa lo siguiente di Echonan 20:20: “Pablo a keda tres aña na Efeso. El a bishitá kada kas, òf por lo ménos a prediká na tur hende di e pueblo (versíkulo 26). Esaki ta e base bíbliko pa e evangelisashon di kas pa kas i pa e reunionnan públiko.” Sea ku Pablo a hasi manera e eksperto akí a bisa, esta, di literalmente bishitá kada kas òf nò, Pablo no tabata ke pa e ansianonan di Efeso lubidá kon el a duna testimonio i ki resultado esaki a produsí. Lukas a skirbi: “Tur esnan ku tabata biba na Asia a tende e palabra di Señor, tantu hudiu komo griego.” (Echo. 19:10) Pero kon “tur esnan” na Asia por a tende e mensahe, i kiko esaki kisas ta indiká tokante e testimonio ku nos ta duna?
7. Kon bin Pablo su predikashon por tabatin un efekto asta riba hende ku e no a prediká direktamente na dje?
7 Mediante Pablo su predikashon na sitionan públiko i di kas pa kas, hopi hende a tende su mensahe. Kiko abo ta pensa? Bo ta kere ku tur e personanan ku a tende e mensahe a keda na Efeso sin ku ningun di nan a bai otro kaminda pa hasi negoshi, pa ta serka nan famianan òf pa skapa di e aktividatnan agitá di e bida den un stat grandi? Siguramente ku nò. Awendia, hopi hende a muda pa e motibunan ei; kisas, abo tambe. Ademas, e tempu ei, hende for di otro partinan a bishitá Efeso pa motibunan sosial òf komersial. Miéntras nan tabata einan, kisas nan a topa ku Pablo òf a tend’é duna testimonio. Kiko lo a pasa ora nan a regresá kas? Esnan ku a aseptá e bèrdat lo a duna testimonio na otro hende. Otronan ku podisé no a bira kristian, kisas tòg a papia ku otro hende di loke nan a tende miéntras nan tabata na Efeso. Konsekuentemente, nan famia-, bisiña- òf klientenan a tende e bèrdat, i podisé algun a asept’é. (Kompará ku Marko 5:14.) Kiko esaki ta indiká tokante e efektonan ku bo dunamentu di testimonio kabal lo por tin?
8. Di ki manera kisas hende den henter e distrito di Asia a tende di e bèrdat?
8 Relashoná ku su sirbishi mas promé na Efeso, Pablo a skirbi ku ‘un porta pa hasi un gran trabou a habri hanchu hanchu p’e.’ (1 Kor. 16:8, 9, BPK) Kua porta a habri, i kon esaki a habri p’e? Pablo su sirbishi kontinuo na Efeso a resultá den plamamentu di e bon nobo. Tuma por ehèmpel, Kolosas, Laodisea i Hierápolis, tres stat ku tabata situá mas den interior kompará ku Efeso. Ounke nunka Pablo a bishitá nan, tòg e bon nobo a yega serka nan. (Kol. 2:1; 4:12, 13) Epafras a bini di e área ei. Ta na Efeso Epafras a tende Pablo duna testimonio ku el a bira un kristian? Beibel no ta bisa esei spesífikamente. Pero kisas Epafras a sirbi komo representante di Pablo ora el a plama e bèrdat den su área natal. (Kol. 1:7) Podisé ta durante e tempu ku Pablo a duna testimonio na Efeso, e mensahe kristian a yega na statnan manera Filadelfia, Sardis i Tiatira tambe.
9. (a) Kiko tabata Pablo su deseo sinsero? (b) Kiko lo ta e teksto di aña pa 2009?
9 P’esei, e ansianonan di Efeso tabatin tur motibu pa kere Pablo su deklarashon ora el a bisa: “Mi no ta konsiderá mi alma di ningun balor, komo algu presioso pa mi, kon tal ku mi terminá mi karera i e ministerio ku mi a risibí di Señor Hesus, pa duna testimonio kabal di e bon nobo dje bondat inmeresí di Dios.” E versíkulo ei ta kontené e teksto di aña animante i motivador pa 2009: “Duna testimonio kabal di e bon nobo.”—Echo. 20:24, NW.
Duna Testimonio Kabal Awe
10. Kon nos por sa ku nos tambe tin ku duna testimonio kabal?
10 E mandamentu pa ‘prediká pa e pueblo i duna testimonio kabal’ no a konta pa e apòstelnan so, sino pa otro hende tambe. Ora Hesus resusitá a papia ku su disipelnan—probablemente 500 di nan—ku a reuní na Galilea, el a bisa nan: “Bai i hasi tur e nashonnan disipel di mi, i batisá nan den nòmber di e Tata i di e Yu i di e spiritu santu, i siña nan pa kumpli ku tur loke mi a ordená boso.” E mandato ei ta konta pa tur kristian berdadero djawe, pasobra Hesus su palabranan a indiká esei ora el a bisa: “Mira, mi ta ku boso semper, te na fin di mundu.”—Mat. 28:19, 20.
11. Testigunan di Yehova ta konosí pa kua trabou importante?
11 Kristiannan entusiasmá ta sigui obedesé e mandato ei, hasiendo esfuerso pa “duna testimonio kabal di e bon nobo.” E método prinsipal pa hasi esaki ta loke Pablo a menshoná na e ansianonan di Efeso, esta e predikashon di kas pa kas. Den un buki di 2007 tokante trabou di misionero efikas, David G. Stewart, Jr., a bisa: “E método ku Testigunan di Yehova ta usa pa siña nan miembronan kon pa kompartí nan kreensianan ku otro hende ta muchu mas efikas ku e método vago i teorétiko [ku ta ser urgí for di prekstul]. Pa hopi Testigu di Yehova, nan aktividat faborito ta di kompartí nan kreensianan ku otro hende.” Kiko ta e resultado? “Na 1999, solamente 2 pa 4 porshento di e hendenan ku a partisipá den un enkuesta ku mi a hasi den dos stat kapital na Ost Europa a informá ku e Santunan di e Último dianan òf misioneronan ‘Mormon’ a yega di aserká nan. Pero mas ku 70 porshento a informá ku Testigunan di Yehova a yega di aserká nan personalmente, i ku hopi bes, esaki a sosodé na vários okashon.”
12. (a) Dikon nos ta yama na “vários okashon” na e kasnan den nos teritorio? (b) Bo por konta un eksperensia di un persona ku su aktitut pa ku nos mensahe a kambia?
12 Kasi sigur, hende den bo área tin e mesun eksperensia. I probablemente bo a kontribuí na esei. Segun ku abo ‘personalmente ta aserká’ hende den bo ministerio di kas pa kas, bo ta papia ku hende hòmber, muhé i hóbennan na nan kas. Tin algun hende ku no ta skucha ounke ku bo a aserká nan na “vários okashon.” Otronan kisas ta skucha brevemente segun ku bo ta kompartí un teksto di Beibel òf un pensamentu bíbliko ku nan. Sinembargo, serka otronan bo ta haña oportunidat pa duna un ekselente testimonio, i nan ta aseptá e mensahe. Tur eseinan ta situashonnan ku nos por haña nos kuné segun ku nos ta “duna testimonio kabal di e bon nobo.” Manera bo sa probablemente, tin hopi ehèmpel di personanan ku a mustra masha poko interes ora nos a aserká nan na “vários okashon,” pero ku despues a kambia. Kisas algu a pasa ku nan òf ku un ser kerí di nan, i esei a habri nan mente i kurason pa e bèrdat. I awor, nan ta nos rumannan kristian. P’esei, asta si últimamente bo no a haña hende ku kier skucha bo, no entregá. Nos no ta ferwagt ku tur hende ta bini den e bèrdat. Pero loke Dios sí ta ferwagt di nos ta ku nos ta sigui duna testimonio diligentemente i ku entusiasmo.
Resultado Ku Kisas Nos No Sa di Dje
13. Kon testimonio ku nos duna por produsí resultado ku kisas nos no sa di dje?
13 Pablo su ministerio no solamente tabatin efekto riba e hendenan ku el a yuda direktamente bira kristian, sino riba otro hende tambe. Den nos kaso tambe ta asina. Nos ta hasi esfuerso pa partisipá regularmente den e sirbishi di kas pa kas, dunando testimonio na mas tantu hende ku ta posibel. Nos ta papia di e bon nobo ku nos koleganan di trabou, kompañeronan di skol, bisiña- i famianan. Nos sa kiko ta resultado di tur e esfuersonan ei? Algun kaso por produsí bon resultado mesora. Den otro kasonan, e simia di e bèrdat kisas no ta saka rais pa un tempu, pero despues e ta saka rais den e persona su kurason i ta krese. Asta si esei no sosodé, kisas e personanan ku nos papia kuné ta papia ku otro hende di loke nos a bisa, loke nos ta kere i e manera ku nos ta aktua. Sí, sin ku nan sa, kisas nan ta duna e simianan chèns di saka rais den kurason di otro hende.
14, 15. Ki resultado e testimonio di un ruman hòmber tabatin?
14 Pa menshoná djis un ehèmpel, konsiderá Ryan i su esposa, Mandi, kendenan ta biba na Flórida, Merka. Ryan a duna testimonio informal na un di su kompañeronan di trabou. E hòmber ei, kende tabatin un background hindú, a keda mashá impreshoná ku Ryan su manera di bisti i di ekspresá su mes. Durante nan kòmbersashonnan, Ryan a papia, entre otro, di resurekshon i di e kondishon di e mortonan. Un anochi den yanüari, e hòmber a puntra su esposa, Jodi, kiko e tabata sa di Testigunan di Yehova. E esposa tabata katóliko, i el a bisa su esposo ku e úniko kos ku e tabata sa di e Testigunan ta ku nan ta “prediká di kas pa kas.” Pues, Jodi a buska e nòmber “Testigunan di Yehova” riba Internet, i el a haña nos website www.watchtower.org. Pa vários luna, Jodi a lesa informashon—inkluso Beibel i artíkulonan interesante—riba e site ei.
15 Ku tempu, Jodi a topa ku Mandi, ya ku nan tur dos tabata verplegster. Ku plaser, Mandi a kontestá Jodi su preguntanan. Ku tempu, nan a kòmbersá riba hopi tópiko di Beibel, i manera Jodi mes a bisa, nan a papia “di Adam te Armagedón.” Jodi a aseptá e oferta pa un estudio di Beibel na kas. No a dura mashá, ku el a kuminsá bai Salòn di Reino. Na òktober, Jodi a bira un publikadó no-batisá, i na febrüari, el a batisá. El a skirbi: “Awor ku mi konosé e bèrdat, mi ta sinti mi masha felis i satisfecho.”
16. Kiko e eksperensia di un ruman hòmber na Flórida ta indiká di nos esfuersonan pa duna testimonio kabal?
16 Ryan no tabatin ni e mínimo idea ku su testimonio na un hòmber lo a pone ku un otro persona a bini den e bèrdat. Klaru ku den su kaso, el a haña sa e resultado di e echo ku e tabata determiná pa “duna testimonio kabal.” Pero, por sosodé tambe ku bo ta duna testimonio di kas pa kas, na trabou, na skol òf di un manera informal, i sin ku bo sa, esaki ta habri kaminda pa otro hende haña e bèrdat. Meskos ku Pablo no tabata sa kiko tabata tur e resultadonan di e testimonio ku el a duna den e distrito di “Asia,” kisas bo no por haña sa kiko ta tur e bon resultadonan ku bo testimonio kabal a produsí. (Lesa Echonan 23:11; 28:23.) Apesar di esei, ta di vital importansia pa bo sigui duna testimonio kabal!
17. Kiko bo ta determiná pa hasi durante aña 2009?
17 Durante aña 2009, laga nos tur tuma na serio nos asignashon pa duna testimonio di kas pa kas i den e otro maneranan. Konsekuentemente, nos lo por ekspresá sintimentunan similar na esnan di Pablo: “Mi no ta konsiderá mi alma di ningun balor, komo algu presioso pa mi, kon tal ku mi terminá mi karera i e ministerio ku mi a risibí di Señor Hesus, pa duna testimonio kabal di e bon nobo dje bondat inmeresí di Dios.”
Kon Lo Bo Kontestá?
• Kon apòstel Pedro i Pablo i otronan den e promé siglo a duna testimonio kabal?
• Dikon nos dunamentu di testimonio por tin mas efekto di loke nos ta pensa?
• Kiko ta e teksto di aña pa 2009, i dikon bo ta haña ku e ta apropiá?
[Preguntanan di Estudio]
[Komentario na página 27]
E teksto di aña pa 2009 lo ta: “Duna testimonio kabal di e bon nobo.”—Echo. 20:24, NW.
[Plachi na página 25]
E ansianonan di Efeso tabata sa di Pablo su kustumber di duna testimonio di kas pa kas
[Plachi na página 26]
Kon leu e efektonan di bo dunamentu di testimonio kabal lo yega?