Un Kreador Ku Ta Digno di Nos Alabansa
Hala Serka Dios
Un Kreador Ku Ta Digno di Nos Alabansa
BO A yega di punta bo mes, ‘Kiko ta e propósito di bida?’ E hendenan ku ta kere ku bida ta produkto di evolushon no ta logra haña kontesta pa e pregunta ei. Pero esnan ku ta aseptá e bèrdat bon establesí, esta, ku Yehova Dios ta e Fuente di bida, no tin e problema ei. (Salmo 36:9) Nan sa ku el a krea nos ku un propósito. Revelashon 4:11 ta deklará kiko e propósito ei ta. Laga nos ban wak kon e palabranan ei, ku apòstel Juan a skirbi, ta mustra pakiko nos ta aki.
Juan ta skirbi ku un koro selestial ta duna alabansa na Dios, bisando: “Digno bo ta, nos Señor i nos Dios, pa risibí gloria i onor i poder; pasobra abo a krea tur kos, i pa motibu di bo boluntat nan tabata eksistí, i a wòrdu kreá.” Ta Yehova so ta digno, òf ta meresé, di risibí e homenahe ei. Dikon? Pasobra e ta esun ku “a krea tur kos.” Ki efekto esei mester tin riba su kriaturanan inteligente?
Beibel ta bisa ku Yehova ta digno di “risibí” gloria, onor i poder. Sin duda, é ta e Personahe mas glorioso, onorabel i poderoso den universo. Sinembargo, e mayoria di humanidat no ta rekonosé realmente ku e ta e Kreador di tur kos. Apesar di esei, tòg tin hende ku ta mira Dios su “atributonan [òf kualidatnan] invisibel” pa medio di e kosnan ku el a traha. (Romanonan 1:20) Motivá pa un kurason yen di apresio nan ta duna Yehova gloria i onor. Nan ta prediká na tur hende ku ke tende tokante e evidensia impreshonante ku Yehova ta esun ku a traha tur kos na un manera maravioso i pa e motibu ei ta meresé nos rèspèt profundo.—Salmo 19:1, 2; 139:14.
Pero ta kon Yehova por risibí poder for di su sirbidónan? Klaru ku ningun hende no por duna poder na e Kreador todopoderoso. (Isaias 40:25, 26) Sinembargo, siendo kreá den e imágen di Dios, nos a haña un midi di Dios su atributonan, entre otro poder. (Génesis 1:27) Si di bèrdat nos ta apresiá loke nos Kreador a hasi pa nos, nos lo sinti nos konmoví pa usa nos poder i energia pa onr’é i glorifik’é. En bes di usa nos energia solamente pa nos propio interesnan, nos ta sinti ku Yehova Dios ta digno di risibí tur nos poder miéntras nos ta sirbié.—Marko 12:30.
Pues, pakiko nos ta aki? E último parti di Revelashon 4:11 ta duna kontesta: “Pa motibu di bo boluntat nan [tur kos kreá] tabata eksistí, i a wòrdu kreá.” No ta pa motibu di nos mes boluntat nos a yega na eksistensia, sino pa motibu di Dios su boluntat. Ta p’esei, un bida ku ta drei rònt di interes personal so ta bashí i no ta duna satisfakshon. Pa haña pas mental, goso, satisfakshon i kontentamentu, nos mester siña kiko ta Dios su boluntat i pone nos bida na armonia kuné. Ta únikamente asina nos lo haña sa e propósito di bida, esta, pakiko nos a ser kreá i ta eksistí.—Salmo 40:8.
[Rekonosementu pa Potrèt na página 31]
NASA, ESA i A. Nota (STScI)