“Bin, Sigui Mi”
“Bin, Sigui Mi”
“Si un hende kier bin mi tras, lag’é nenga su mes i hisa su [staka di tormento] tur dia i sigui mi.”—LUK. 9:23.
1, 2. (a) Ki invitashon bondadoso Hesus a ekstendé? (b) Kon bo a reakshoná riba Hesus su invitashon?
NA FINAL di Hesus su ministerio, el a prediká na Perea, un área pariba di riu Hordan, nortost di Hudea. Un yònkuman a aserk’é i a puntr’é kiko e tin ku hasi pa heredá bida eterno. Despues ku Hesus a realisá ku e yònkuman tabata kumpli ku e Lei di Moisés, Hesus a ekstendé un invitashon importante na dje. El a bis’é: “Bai i bende tur loke bo tin, i duna na hende pober, i lo bo tin tesoro den shelu; i bin, sigui mi.” (Mar. 10:21) Figurá bo—un invitashon pa sigui Hesus, e Yu unigénito di e Dios Haltísimo!
2 E yònkuman a rechasá Hesus su invitashon, pero otro hende sí a asept’é. Promé ku esei, Hesus a bisa Felipe: “Sigui mi!” (Juan 1:43) Felipe a aseptá i despues a bira un apòstel. Hesus a ripití e invitashon na Mateo; e tambe a asept’é. (Mat. 9:9; 10:2-4) En realidat, Hesus a ekstendé e mesun invitashon na tur amante di hustisia ora el a bisa: “Si un hende kier bin mi tras, lag’é nenga su mes i hisa su [“staka di tormento,” NW] tur dia i sigui mi.” (Luk. 9:23) P’esei, kualke hende por bira un siguidó di Hesus si e realmente kier esei. Abo tin e deseo ei? Mayoria di nos a aseptá Hesus su invitashon, i nos ta ekstendé e invitashon ei na otro hende den sirbishi di vèlt.
3. Kon nos por evitá di yega te na e punto ku nos ta stòp di sigui Hesus?
3 Lástimamente, algun hende ku a mustra interes den e bèrdat bíbliko no ta sigui studia. Mas bien, nan ta floha i dado momento ta “apartá . . . for di e kaminda” i no ta sigui Hesus mas. (Heb. 2:1) Kon nos por evitá di kai den e trampa ei? Loke por yuda nos ta si nos puntra nos mes: ‘Pakiko realmente mi a skohe pa sigui Hesus? Kiko siguié ta enserá?’ Ora nos tene e dos preguntanan ei na mente, esei lo yuda nos keda riba e bon kaminda ku nos a skohe i animá otro hende pa sigui Hesus.
Pakiko Sigui Hesus?
4, 5. Dikon Hesus ta kualifiká pa ta Lider?
4 Profeta Jeremias a deklará: “O SEÑOR, mi sa ku e kaminda di hende no ta di dje mes; tampoko no ta keda na hende pa dirigí su pasonan.” (Jer. 10:23) Historia a konfirmá ku loke Jeremias a bisa ta bèrdat. Ta bira mas i mas bisto ku hende imperfekto no por dirigí nan mes ku éksito. Nos a aseptá e invitashon pa sigui Hesus pasobra nos a haña sa ku e ta kualifiká pa ta nos Lider. I hamas niun otro lider lo por ta manera é. Konsiderá algun kualifikashon di Hesus.
5 Di promé, Yehova mes a skohe Hesus komo Mesias, e Lider. Por tin un persona ku sa mihó ku nos Kreador ken pa nombra komo nos Lider? Di dos, Hesus tin kualidatnan ku nos por atmirá i imitá. (Lesa Isaias 11:2 i 3.) E ta un ehèmpel perfekto. (1 Ped. 2:21) Di tres, Hesus ta profundamente interesá den esnan ku ta siguié; el a demostrá esei ora el a entregá su bida pa nan. (Lesa Juan 10:14 i 15.) I e ta un wardadó ku ta interesá den nos pasobra e ta mustra nos kon pa haña felisidat awor i den futuro un glorioso bida eterno. (Juan 10:10, 11; Rev. 7:16, 17) Pa e motibunan akí i hopi otro motibu mas, nos a tuma un desishon sabí ora nos a skohe pa siguié. Pero kiko sigui Hesus ta enserá?
6. Kiko sigui Hesus ta enserá?
6 Ser un siguidó di Kristu no ta djis un asuntu di bisa ku nos ta kristian. Alrededor di dos mil mion hende ta yama nan mes kristian, pero nan echonan ta mustra ku nan ta ‘hasidó di inikidat.’ (Lesa Mateo 7:21-23.) Ora un persona mustra interes den e invitashon pa sigui Hesus, nos ta splik’é ku kristiannan berdadero ta pone henter nan bida na armonia ku e ehèmpel i siñansanan di Hesus, i nan ta hasi esei dia aden dia afó. Pa nos komprondé kiko esaki ke men, laga nos konsiderá algun kos ku nos sa di Hesus.
Imitá Hesus den Desplegá Sabiduria
7, 8. (a) Kiko ta sabiduria, i dikon Hesus tabatin asina tantu sabiduria? (b) Kon Hesus a desplegá sabiduria, i kon nos por imit’é?
7 Hesus a desplegá hopi kualidat sobresaliente, pero nos lo enfoká riba kuater: su sabiduria, su humildat, su zelo i su amor. Laga nos konsiderá su sabiduria promé, esta, su kapasidat di apliká konosementu i komprondementu na un manera práktiko. Apòstel Pablo a skirbi: “Den [Hesus] tur e tesoronan di sabiduria i konosementu ta skondí.” (Kol. 2:3) For di ken Hesus a haña e sabiduria ei? Hesus mes a bisa: “Mi ta papia e kosnan akí manera e Tata a siña mi.” (Juan 8:28) Ta Yehova a dun’é e sabiduria ei, p’esei nos no ta keda sorprendí ku Hesus tabata tuma bon desishon.
8 Por ehèmpel, Hesus a demostá ku e tabatin bon disernimentu ora el a skohe su rumbo den bida. El a disidí di hiba un bida simpel, enfokando riba un kos so: hasimentu di e boluntat di Dios. El a dediká su tempu i energia sabiamente na promové interesnan di Reino. Nos ta sigui e ehèmpel di Hesus dor di hasi esfuerso pa mantené un ‘wowo simpel.’ Si nos hasi esei, nos ta evitá di pone karga innesesario riba nos lomba; kosnan ku ta rekerí demasiado energia i atenshon. (Mat. 6:22, NW) Pa dediká mas tempu na e ministerio, hopi kristian a dal paso pa simplifiká nan bida. Tin di nan a kuminsá sirbi komo pionero. Si bo ta un di nan, bo a tuma un bon desishon. “Buska promé e reino di Dios” ta trese gran felisidat i satisfakshon.—Mat. 6:33.
Sea Humilde Manera Hesus
9, 10. Kon Hesus a demostrá su humildat?
9 E di dos aspekto di Hesus su personalidat ku nos lo konsiderá ta su humildat. Ora hende imperfekto haña outoridat, hopi bes nan ta bira halsá. Hesus tabata kompletamente diferente! Apesar di su ròl sumamente importante den kumplimentu di e propósito di Yehova, Hesus no tabata arogante. I un animashon ta bai na kada un di nos pa imit’é den e aspekto ei. Apòstel Pablo a skirbi: ‘Laga tin den boso e aktitut akí ku tabatin tambe den Kristu Hesus ku a bandoná su mes gloria, tumando forma di un sirbidó, siendo trahá den e semehansa di hende.’ (Fil. 2:5, 7) Kiko esei ke men?
10 Hesus a disfrutá di e privilegio glorioso di biba serka su Tata den shelu, pero boluntariamente el “a bandoná su mes gloria.” Dios a transferí e bida di Hesus pa e matris di un bírgen hudiu, kaminda el a desaroyá durante nuebe luna te ora el a nase komo un beibi indefenso i a bira parti di e famia di un humilde karpinté. Den Hosé su kas, Hesus gradualmente a krese bira un mucha chikitu, i despues un tiner. Hesus tabata sin piká. Tòg, el a pasa henter su hubentut sumiso na mayornan humano ku tabata pekadó. (Luk. 2:51, 52) Ki un humildat ekstraordinario!
11. Den ki maneranan nos por imitá Hesus su humildat?
11 Nos ta imitá e humildat di Hesus ora ku boluntariamente nos ta aseptá asignashonnan ku por parse inferior. Por ehèmpel, konsiderá nos asignashon di prediká e bon nobo. Lo e por parse un trabou inferior, spesialmente ora hende ta reakshoná indiferente, ku bofon òf na un manera agresivo. Sinembargo, ora nos perseverá den e trabou di prediká, hende ta haña e oportunidat di reakshoná faborabel riba e invitashon di Hesus pa siguié. Pues, nos ta yuda salba bida. (Lesa 2 Timoteo 4:1-5.) Un otro ehèmpel ta mantenshon di nos Salòn di Reino. Esei por enserá benta sushi afó, bari, dueila i limpia baño. Tur esakinan ta trabounan humilde! Sinembargo, nos ta rekonosé ku mantenshon di nos Salòn di Reino—e sentro di adorashon puru den nos bisindario—ta parti di nos sirbishi sagrado. Ora nos ta kumpli boluntariamente ku asignashonnan ku ta parse inferior, nos ta demostrá humildat, i asina nos ta sigui e pasonan di Kristu.
Imitá Hesus Su Zelo
12, 13. (a) Kon Hesus a demostrá zelo, i kiko a motiv’é? (b) Kiko lo motivá nos pa demostrá zelo den e ministerio?
12 Laga nos konsiderá awor Hesus su zelo den e ministerio. Hesus a hasi hopi kos ora e tabata riba tera. Na prinsipio di su bida, probablemente el a traha komo un karpinté huntu ku Hosé, su tata di kriansa. Durante su ministerio, Hesus a hasi milager, inkluso kura hende enfermo i lanta hende for di morto. Pero su trabou prinsipal tabata di prediká e bon nobo i siña esnan ku tabata dispuesto pa tende. (Mat. 4:23) Komo su siguidónan, nos tin e mesun trabou pa hasi. Pues, kon nos por sigui su ehèmpel? Nos por hasi esei dor di laga loke a motivá Hesus motivá nos tambe pa hasi e trabou akí.
13 Mas ku tur kos, amor pa Dios ta loke a motivá Hesus pa prediká i siña hende. Pero Hesus a stima e bèrdatnan ku el a siña hende tambe. Pa Hesus, e bèrdatnan ku el a kompartí tabata tesoronan sumamente balioso, i e tabata ansioso pa kompartí nan ku otro hende. Nos tambe ta sinti asina komo maestro. Djis pensa riba algun di e bèrdatnan balioso ku bo a siña for di e Palabra di Dios! Nos sa di e kuestion di soberania universal i kon lo e ser resolvé. Nos ta komprondé bon kla kiko e Skritura ta siña tokante e kondishon di e mortonan i e bendishonnan ku lo tin den Dios su mundu nobo. Sea ku nos a siña e bèrdatnan ei resientemente òf hopi tempu pasá, nan no ta pèrdè balor nunka. Sea ku e bèrdatnan ei ta nobo òf bieu, nan ta tesoronan sumamente balioso. (Lesa Mateo 13:52. *) Ora nos ta prediká ku berdadero entusiasmo, nos ta transmití na otro hende e amor ku nos tin pa loke Yehova a siña nos.
14. Kon nos por imitá Hesus su manera di siña hende?
14 Tuma nota tambe di e manera ku Hesus a siña hende. E tabata dirigí atenshon di su oyentenan konstantemente na e Skritura. Ku frekuensia e tabata introdusí un punto importante bisando: “Ta pará skirbí.” (Mat. 4:4; 21:13) Den su palabranan registrá, el a sita direktamente for di mas ku mitar di e Skritura Hebreo òf a referí indirektamente na nan. Meskos ku Hesus, nos tambe ta usa Beibel hopi den nos ministerio i ta hasi esfuerso pa habri Beibel ora ta posibel. Di e manera ei, nos ta laga personanan di kurason onrado mira pa nan mes ku nos ta siña hende e pensamentunan di Dios i no di nos mes. Nos ta keda kontentu ora un persona bai di akuerdo pa lesa for di Beibel i kòmbersá tokante e balor i nifikashon di e Palabra di Dios! Anto ora ku e personanan ei aseptá e invitashon pa sigui Hesus, nos ta bira sumamente kontentu.
Sigui Hesus Ta Enserá Stima Otro Hende
15. Kiko tabata un kualidat sobresaliente di Hesus, i ki efekto e por tin riba nos ora nos meditá riba dje?
15 E último aspekto di Hesus su personalidat ku nos lo trata ta esun di mas konmovedor, esta, su amor pa hende. Apòstel Pablo a skirbi: “E amor di Kristu ta obligá nos.” (2 Kor. 5:14) Ora nos reflekshoná riba e amor ku Hesus tin pa humanidat en general i pa nos individualmente, esei ta konmové nos i nos ta sinti nos obligá di sigui su ehèmpel.
16, 17. Kon Hesus a mustra su amor pa otro hende?
16 Kon Hesus a demostrá amor na otro hende? E echo ku e tabata dispuesto pa duna su bida pa nos tabata e ekspreshon supremo di su amor. (Juan 15:13) Pero durante su ministerio, Hesus a demostrá amor den otro manera tambe. Por ehèmpel, el a sinti kompashon pa hende ku tabata sufri. Ora Hesus a mira Maria i e hendenan ku tabata huntu kuné ta yora e morto di Lázaro, nan tristesa a afekt’é asina tantu ku el a bira sumamente emoshoná. Ounke e tabata na punto di resusitá Lázaro, Hesus tabata asina konmoví ku el “a yora.”—Juan 11:32-35.
17 Na prinsipio di Hesus su ministerio, un leproso a aserká Hesus i a bis’é: “Si bo kier, bo por hasi mi bira limpi.” Kon Hesus a reakshoná? E relato ta bisa ku Hesus tabata “yen di kompashon.” Anto el a hasi un kos ekstraordinario. “El a saka su man, i a mishi kuné i a bis’é: ‘Mi kier, sea limpi.’ I mesora e lepra a kita for di dje i el a keda limpi.” Bou di e Lei di Moisés, leprosonan tabata impuru, i siguramente Hesus por a kura e hòmber akí sin mishi kuné. Sinembargo, na momento ku Hesus tabata kura e leproso, Hesus a mishi kuné i probablemente esei tabata algu ku pa hopi tempu e leproso no a eksperensiá. Esta kompasivo nò!—Mar. 1:40-42.
18. Kon nos por demostrá ku nos tin “kompashon”?
18 Komo siguidó di Kristu, nos mester demostrá amor dor di tene “kompashon ku otro.” (1 Ped. 3:8) Kisas no ta fásil pa komprondé e sintimentunan di un ruman ku ta sufri di un malesa króniko òf di depreshon pisá, foral si nos mes no a yega di sufri di e malesanan ei. Sinembargo, Hesus a sinti pa hende enfermo maske e mes nunka tabata malu. Kon nos por kultivá e mesun tipo di empatia? Nos mester skucha ku pasenshi ora hende ku ta sufri ta deshogá nan mes. Nos lo por puntra nos mes: ‘Si ami tabata den nan situashon, kon lo mi a sinti?’ Si nos bira mas konsiente di e sintimentunan di otro hende, nos lo ta mihó prepará pa “enkurashá esnan ku ta falta ánimo.” (1 Tes. 5:14) Es mas, nos lo ta siguiendo e pasonan di Hesus.
19. Ki efekto e ehèmpel di Hesus tin riba nos?
19 Loke Hesukristu a bisa i hasi ta un tereno masha interesante pa analisá! Mas nos siña tokante dje, mas nos ke imit’é. Anto mas nos lo ke yuda otro hende tambe hasi meskos. Di tur manera anto, laga nos haña goso den sigui e Rei Mesiániko, awor i pa semper!
[Nota]
^ par. 13 E palabra griego pa “eskriba” por referí tambe na instruktor públiko.
Bo Por Splika?
• Kon nos por desplegá sabiduria meskos ku Hesus?
• Den ki maneranan nos por demostrá humildat?
• Kon nos por kultivá zelo pa e ministerio?
• Kon nos por imitá Hesus den mustra amor na otro hende?
[Preguntanan di Estudio]
[Kuadro/Plachi na página 11]
UN BUKI KU TA YUDA NOS IMITÁ KRISTU
Na e kongreso di distrito 2007, a presentá e buki di 192 página “Bin, Sigui Mi.” E publikashon akí ta prepará pa yuda kristiannan enfoká riba Hesus, spesialmente riba su kualidat- i akshonnan. Tin dos kapítulo di introdukshon. Despues ta sigui e promé sekshon ku ta duna un resúmen di Hesus su kualidatnan sobresaliente, esta, su humildat, kurashi, sabiduria, obedensia i perseveransia.
Kaba ta sigui e sekshonnan ku ta trata Hesus su aktividat komo maestro i predikadó di e bon nobo i algun manera ku el a demostrá su gran amor. E informashon den henter e buki ta pa yuda un kristian imitá Hesus.
Nos tin konfiansa ku e buki akí lo motivá nos tur pa puntra nos mes: ‘Di bèrdat mi ta siguiendo Hesus? Kon mi por siguié mas mihó?’ Ademas, e buki lo yuda “tur esnan ku [tin] e disposishon korekto pa bida eterno” pa nan por bira siguidó di Kristu.—Echo. 13:48, NW.
[Plachi na página 10]
Hesus a bai di akuerdo pa bin tera i nase komo un beibi. Ki kualidat e mester tabatin?
[Plachi na página 12]
Kiko lo motivá nos pa demostrá zelo den e ministerio?