Bo Ta Usa Bo “Don” Korektamente?
Bo Ta Usa Bo “Don” Korektamente?
“Stima otro ku amor fraternal; duna preferensia na otro den onor.”—ROM. 12:10.
1. Ki siguransa e Palabra di Dios ta duna nos?
E PALABRA DI DIOS bes tras bes ta duna nos e siguransa ku Yehova lo yuda nos ora nos ta desanimá òf kibrá. Tuma nota por ehèmpel di e palabranan animante akí: “SEÑOR ta sostené tur ku kai, i ta lanta tur ku ta abatí.” “E ta kura esnan di kurason kibrá, i ta mara nan heridanan.” (Sal. 145:14; 147:3) Ademas, nos Tata selestial Yehova mes a bisa: “Ami ta SEÑOR bo Dios, kende ta sostené bo man drechi, kende ta bisa bo: ‘No tene miedu, lo mi yuda bo.’”—Isa. 41:13.
2. Kon Yehova ta sostené su sirbidónan?
2 Pero kon Yehova, kende ta biba den shelu, ta ‘sostené nos man’? Kon e ta “lanta tur ku ta abatí” pa motibu di angustia òf sufrimentu? Yehova Dios ta duna nos e sosten ei den vários manera. Por ehèmpel, e ta duna su pueblo “poder mas ayá di loke ta normal” mediante su spiritu santu. (2 Kor. 4:7, NW; Juan 14:16, 17) Ademas, e mensahe ku tin den Beibel, e Palabra inspirá di Dios, ta animá sirbidónan di Dios. (Heb. 4:12) Tin un manera mas ku Yehova ta fortalesé nos? Nos ta haña e kontesta den e buki di Promé Pedro.
E “Bondat Inmeresí di Dios Ekspresá den Vários Manera”
3. (a) Kiko apòstel Pedro ta bisa tokante prueba? (b) Kiko apòstel Pedro ta trata den e último parti di su promé karta?
3 Den su karta na kristiannan ungí, apòstel Pedro a bisa ku nan tabatin bon motibu pa ta gososo, ya ku bendishon riku tabata spera nan. El a sigui bisa: “Ounke ku awor pa un tempu kòrtiku, si ta nesesario, boso [ta] wòrdu afligí pa medio di vários prueba.” (1 Ped. 1:1-6) Tuma nota di e palabra “vários.” E ta indiká ku lo tin vários prueba. Sinembargo, Pedro no ta keda te ei, es desir, e no ta laga su rumannan keda den duda si nan lo por trata ku e diferente pruebanan ei òf nò. Al kontrario, Pedro ta indiká ku kristiannan por tin sigur ku Yehova lo yuda nan perseverá, sin importá ki tipo di prueba nan haña nan kuné. Nos ta haña e siguransa ei den e último parti di apòstel Pedro su karta, kaminda e ta trata asuntunan ku tin di haber ku e “fin di tur kos.”—1 Ped. 4:7.
4. Dikon e palabranan na 1 Pedro 4:10 ta animá nos?
4 Pedro a bisa: “Komo ku kada un a risibí un don spesial, us’é pa sirbi otro komo bon mayordomonan di e [“bondat inmeresí di Dios ekspresá den vários manera,” NW].” (1 Ped. 4:10) Pedro a bolbe usa e palabra “vários.” Loke e tabata ke men ta ku ‘prueba ta bini den diferente forma, pero Dios su bondat inmeresí tambe ta ser ekspresá den diferente forma.’ Dikon loke el a bisa ta animá nos? Pasobra esei ta nifiká ku sin importá ki tipo di prueba nos ta pasando aden, semper lo tin un ekspreshon di Dios su bondat inmeresí ku lo yuda nos want’é òf vens’é. Pero, bo a ripará den Pedro su deklarashon kon Yehova ta ekspresá su bondat inmeresí na nos? Wèl, e ta ekspresá esei mediante nos kompañeronan kristian.
“Sirbi Otro”
5. (a) Kiko kada kristian mester hasi? (b) Ki preguntanan ta lanta?
5 Pedro a bisa tur miembro di e kongregashon kristian: “Riba tur kos, keda ferviente den boso amor pa otro.” El a bisa nan tambe: “Komo ku kada un a risibí un don spesial, us’é pa sirbi otro.” (1 Ped. 4:8, 10) Pues, kada persona den kongregashon mester edifiká su kompañeronan kristian. Yehova a konfia nos ku algu di dje ku ta masha balioso, i e ta algu ku nos mester usa na benefisio di otronan. Kiko a ser konfiá na nos? Pedro a bisa ku e ta “un don.” Kiko e don òf regalo akí ta? Kon nos por “us’é pa sirbi otro”?
6. Kua ta algun don ku kristiannan a ser konfiá kuné?
6 E Palabra di Dios ta bisa: “Tur bon regalo i tur don perfekto ta for di ariba.” (Sant. 1:17) Sí, tur don ku Yehova a konfia su pueblo kuné ta un ekspreshon di su bondat inmeresí. Un don maravioso ku Yehova ta duna nos ta e spiritu santu. E don ei ta yuda nos kultivá kualidatnan ku ta agradá Dios, manera amor, bondat i mansedumbre. Na nan turno, e kualidatnan akí ta konmové nos pa mustra amor sinsero na nos rumannan den fe i pa ta semper kla pa duna un man. Berdadero sabiduria i konosementu tambe ta donnan ekselente ku nos ta atkerí ku yudansa di spiritu santu. (1 Kor. 2:10-16; Gal. 5:22, 23) En realidat, nos por konsiderá tur nos energia, abilidat- i talentonan komo donnan ku nos tin ku usa pa duna alabansa i onor na nos Tata selestial. I Dios ta ferwagt ku nos ta usa nos abilidatnan i kualidatnan, ekspreshonnan di Dios su bondat inmeresí, na benefisio di nos rumannan den fe.
Kon Nos Por “Us’é pa Sirbi Otro”?
7. (a) Kiko 1 Pedro 4:10 ta indiká tokante e “don” ku nos a risibí? (b) Ki preguntanan nos mester hasi nos mes, i dikon?
7 E palabranan na 1 Pedro 4:10 ta indiká ku kada un di nos a risibí “un don,” esta, kualidat- i abilidatnan; nos por tin diferente don i na sierto grado. Sea kual sea e don, Beibel ta urgi kada un di nos pa “us’é pa sirbi otro.” Ademas, e ekspreshon “us’é . . . komo bon mayordomonan” ta un mandato. Pues, nos mester puntra nos mes: ‘Di bèrdat mi ta usa e donnan ku mi a haña pa fortalesé mi rumannan den fe?’ (Kompará ku 1 Timoteo 5:9 i 10.) ‘Òf mi ta usa e abilidatnan ku mi a haña for di Yehova prinsipalmente pa benefisiá mi mes—kisas pa haña rikesa òf posishon sosial?’ (1 Kor. 4:7) Si nos usa nos donnan “pa sirbi otro,” nos ta agradá Yehova.—Pro. 19:17; lesa Hebreonan 13:16.
8, 9. (a) Kua ta algun manera ku kristiannan rònt mundu ta sirbi nan rumannan den fe? (b) Kon e rumannan den bo kongregashon ta yuda otro?
8 E Palabra di Dios ta menshoná ku kristiannan di promé siglo a sirbi otro den vários manera. (Lesa Romanonan 15:25 i 26; 2 Timoteo 1:16-18.) Awe tambe, kristiannan berdadero gustosamente ta obedesé e mandato pa usa nan donnan na fabor di nan rumannan den fe. Konsiderá algun manera ku nan ta hasi esei.
9 Hopi ruman ta dediká un gran kantidat di ora pa luna na preparashon di partinan pa reunion. Na e reunionnan, ora nan kompartí algun di e hoyanan spiritual ku nan a haña durante nan estudio di Beibel, nan palabranan ku ta reflehá disernimentu ta motivá henter e kongregashon pa perseverá. (1 Tim. 5:17) Masha hopi ruman ta konosí pa nan amor i kompashon ku nan ta mustra na nan rumannan den fe. (Rom. 12:15) Tin di nan regularmente ta bishitá esnan ku ta falta ánimo òf ku ta deprimí, i ta hasi orashon ku nan. (1 Tes. 5:14) Otronan ta tuma tempu pa skirbi algun palabra di animashon pa rumannan den fe ku ta pasando den prueba. Anto tin ruman tambe ku bondadosamente ta yuda esnan ku tin limitashon físiko pa nan por asistí na e reunionnan di kongregashon. Míles di Testigu ta yuda nan rumannan den fe rekonstruí nan kasnan ku a keda afektá pa desaster natural. E amor ku e rumannan akí ta mustra i e yudansa práktiko ku nan ta duna, tur ta manifestashonnan di e “bondat inmeresí di Dios ekspresá den vários manera.”—Lesa 1 Pedro 4:11.
Kua Ta Mas Importante?
10. (a) Pablo a konsentrá riba ki dos aspekto di su sirbishi na Dios? (b) Kon nos por imitá Pablo awendia?
10 Dios su sirbidónan a ser konfiá no solamente ku un don ku nan tin ku usa na fabor di nan rumannan den fe sino tambe ku un mensahe ku nan tin ku kompartí ku nan próhimo. Apòstel Pablo a rekonosé ku e tabatin ku kumpli ku e dos aspektonan akí di su sirbishi na Yehova. El a skirbi e kongregashon na Efesio tokante “e mayordomia di e grasia di Dios” ku a ser duná na dje pa nan benefisio. (Efe. 3:2) Sinembargo, el a bisa tambe: “Nos a wòrdu aprobá dor di Dios pa wòrdu konfiá ku e evangelio.” (1 Tes. 2:4) Meskos ku Pablo, nos tambe ta rekonosé ku nos a ser konfiá ku e asignashon di sirbi komo predikadó di e Reino di Dios. Mediante nos predikashon zeloso, nos ta hasi esfuerso pa imitá e ehèmpel ku Pablo a pone komo un proklamadó inkansabel di e bon nobo. (Echo. 20:20, 21; 1 Kor. 11:1) Nos sa ku predikashon di e mensahe di Reino por salba bida. Sinembargo, nos ta hasi esfuerso tambe pa imitá Pablo ora nos ta buska oportunidat pa “kompartí algun don spiritual” ku rumannan den fe.—Lesa Romanonan 1:11 i 12; 10:13-15.
11. Kon nos mester konsiderá nos asignashon di prediká i esun di edifiká nos rumannan?
11 Kua di e dos aktividatnan kristian akí ta mas importante? E pregunta akí ta kasi meskos ku e pregunta: Kua ala di un para ta mas importante? E kontesta ta bisto. Un para mester di tur dos ala pa e por bula. Di mes manera, nos mester partisipá den tur dos aspekto di nos sirbishi na Dios pa nos por kumpli ku tur loke Yehova ta rekerí di nos. Pues, en bes di konsiderá nos asignashon di prediká e bon nobo i esun di edifiká nos rumannan den fe komo asignashonnan ku no tin nada di haber ku otro, nos ta mira nan manera apòstel Pedro i Pablo a mira nan, esta, komo responsabilidatnan ku ta relashoná ku otro. Den ki manera?
12. Kon nos por ta manera un instrumento den man di Yehova?
12 Komo predikadó, nos ta usa tur nos abilidatnan komo maestro pa purba yega na kurason di nos próhimo ku e mensahe edifikante di e Reino di Dios. Di e manera ei, nos ta spera ku nos lo por yuda nan bira disipel di Kristu. Ademas, nos ta usa kualke abilidat òf don ku nos tin pa purba animá nos rumannan den fe ku palabranan edifikante i bon obra. Tur esakinan ta ekspreshonnan di Dios su bondat inmeresí. (Pro. 3:27; 12:25) Di e manera ei, nos ta spera ku nos ta yuda nan keda disipel di Kristu. Den ámbos kaso—tantu ora nos ta prediká komo ora nos ta “sirbi otro”—nos tin e gran onor di ta manera un instrumento den man di Yehova.—Gal. 6:10.
“Stima Otro”
13. Kiko lo sosodé si nos keda sin “sirbi otro”?
13 Pablo a urgi su rumannan den fe: “Stima otro ku amor fraternal; duna preferensia na otro den onor.” (Rom. 12:10) Sí, nos amor pa nos rumannan ta konmové nos pa usa nos donnan pa sirbi nan ku henter nos kurason komo mayordomo di e bondat inmeresí di Dios. Nos sa ku si Satanas logra stroba nos di “sirbi otro,” lo e debilitá nos union. (Kol. 3:14) I si nos no ta uní, nos lo no prediká ku entusiasmo. Satanas sa masha bon ku e tin ku heridá djis ún di nos alanan so, na moda di papia, p’e stroba nos di kumpli ku nos asignashon.
14. Ken ta benefisiá ora nos ta “sirbi otro”? Duna un ehèmpel.
14 Ora nos ta “sirbi otro,” tantu esun ku ta risibí Dios su bondat inmeresí komo esun ku ta refleh’é ta benefisiá. (Pro. 11:25) Ryan ku su esposa Roni, di Illinois (Merka), ta un bon ehèmpel di esei. Ora ku nan a tende ku Orkan Katrina a destruí sentenáres di kas di nan rumannan Testigu, amor fraternal a konmové nan pa kita for di trabou, sali for di nan apartamento, kumpra un trailer segunda mano i drech’é pa nan por biba aden. Despues nan a muda bai Louisiana ku ta keda 1.400 kilometer leu. Pa mas ku ún aña nan a biba einan i a usa nan tempu, energia i rekursonan pa yuda nan rumannan. Ryan, ku tin 29 aña, a bisa: “E trabou akí a yuda mi hala mas serka Dios. Mi a mira kon Yehova ta perkurá pa su pueblo.” Ryan a sigui bisa: “Trahando ku rumannan di mas edat a siña mi hopi enkuanto kon pa kuida e rumannan. Mi a ripará tambe ku tin hopi kos di hasi den Yehova su organisashon pa nos ku ta hóben.” Roni, ku tin 25 aña, a bisa: “Mi ta gradisidu ku mi por a yuda otro hende. Nunka mi a sinti mi asina felis den mi bida. Mi sa ku lo mi sigui benefisiá pa hopi aña di e maravioso eksperensia akí.”
15. Ki bon motibu nos tin pa sigui usa nos donnan korektamente?
15 Sí, ora nos obedesé Dios su mandato pa prediká e bon nobo i edifiká nos rumannan den fe, tur esnan enbolbí ta risibí bendishon. Esnan ku nos ta yuda ta haña fortalesa spiritual, i nos mes tambe ta eksperensiá un goso profundo ku nos por a yuda nan. (Echo. 20:35) Henter e kongregashon ta bira mas kariñoso ora kada miembro ta mustra amor i interes pa otro. Ademas, e amor i kariño ku nos ta mustra otro ta identifiká nos komo kristiannan berdadero. Hesus a bisa: “Na esaki tur hende lo sa ku boso ta mi disipel, si boso tin amor un pa otro.” (Juan 13:35) I mas ku tur kos, onor ta bai pa nos amoroso Tata, Yehova, ora su sirbidónan riba tera ta reflehá su deseo pa fortalesé esnan den nesesidat. Pues, nos tin bon motibu pa usa nos ‘donnan’ korektamente, esta, “pa sirbi otro komo bon mayordomonan” di e bondat inmeresí di Dios! Lo bo sigui hasi esei?—Lesa Hebreonan 6:10.
Bo Ta Kòrda?
• Den ki maneranan Yehova ta fortalesé su sirbidónan?
• Kiko a ser konfiá na nos?
• Kua ta algun manera ku nos por sirbi nos rumannan den fe?
• Kiko ta motivá nos pa sigui usa nos donnan “pa sirbi otro”?
[Preguntanan di Estudio]
[Plachinan na página 19]
Bo ta usa bo “don” pa sirbi otro hende òf pa agradá bo mes?
[Plachinan na página 21]
Nos ta prediká e bon nobo na otro hende i sostené nos rumannan kristian