E Sirbidó di Yehova—“Traspasá pa Nos Transgreshonnan”
E Sirbidó di Yehova—“Traspasá pa Nos Transgreshonnan”
“El a wòrdu traspasá pa nos transgreshonnan, el a wòrdu gòlpiá pa nos inikidatnan; . . . pa medio di su heridanan nos ta kurá.”—ISA. 53:5.
1. Kiko nos mester tene na mente ora nos ta konmemorá e morto di Kristu, i kua profesia lo yuda nos hasi esei?
E MEMORIAL ta pa nos konmemorá e morto di Kristu i kòrda riba tur loke su morto i resurekshon a logra. Tambe e ta rekordá nos di e vindikashon di e soberania di Yehova, di e santifikashon di su nòmber i di e kumplimentu di su propósito, inkluso e salbashon di humanidat. Probablemente no tin ningun otro profesia den Beibel ku ta duna un mihó deskripshon di Kristu su sakrifisio i di loke esei a logra ku esun na Isaias 53:3-12. Isaias a profetisá tokante e sufrimentu di e Sirbidó i a duna detayenan spesífiko tokante e morto di Kristu i e bendishonnan ku su morto lo trese pa su rumannan ungí i pa su “otro karnénan.”—Juan 10:16.
2. E profesia di Isaias ta prueba di kiko, i ki efekto lo e tin riba nos?
2 Sheteshen aña promé ku Hesus a nase riba tera, Yehova a inspirá Isaias pa profetisá ku Su Sirbidó skohí lo a keda fiel asta bou di e prueba di mas severo. E profesia akí ta proba bon kla ku Yehova tabatin pleno konfiansa den e lealtat di su Yu. Segun ku nos ta analisá e profesia akí, nos kurason lo yena ku gratitut i nos fe lo bira mas firme.
“Despresiá” i Konsiderá “Komo di Ningun Importansia”
3. Dikon e hudiunan lo mester a risibí Hesus ku brasa habrí, pero kon nan a risibié?
3 Lesa Isaias 53:3. Djis imaginá kiko lo e mester a nifiká pa e Yu unigénito di Dios bandoná e goso di sirbi huntu ku su Tata i bini na tera pa duna su bida komo sakrifisio pa salba humanidat for di piká i morto! (Fil. 2:5-8) Su sakrifisio tabata pa duna humanidat berdadero pordon di piká, algu ku e sakrifisionan di bestia ofresé bou di e Lei di Moisés solamente a prefigurá. (Heb. 10:1-4) E hendenan, por lo ménos e hudiunan, kendenan tabata spera e Mesias primintí, lo no mester a risibié ku brasa habrí i onr’é? (Juan 6:14) Na lugá di esei, e hudiunan a “despresiá” Kristu i nan “a konsider’é komo di ningun importansia” (NW), nèt manera Isaias a profetisá. Apòstel Juan a skirbi: “El a bini serka esnan ku tabata di dje, i esnan ku tabata di dje no a risibié.” (Juan 1:11) Apòstel Pedro a bisa e hudiunan: “E Dios di nos tatanan . . . a glorifiká su Yu [“Sirbidó,” NW] Hesus, kende boso a entregá i a nenga dilanti di Pilato, ora ku el a disidí di pon’é den libertat. Ma boso a nenga esun santu i hustu.”—Echo. 3:13, 14.
4. Den ki sentido Hesus a bira konosí ku enfermedat?
4 Isaias a profetisá tambe ku Hesus lo tabata “konosí ku enfermedat.” (NW) Tabatin okashon durante Hesus su sirbishi riba tera ku el a kansa, pero no tin ningun indikashon ku el a bira malu. (Juan 4:6) Pero sí e tabata konosí ku e enfermedatnan di e hendenan ku el a prediká na dje. El a sinti duele di nan i a kura hopi. (Mar. 1:32-34) Asina Hesus a kumpli ku e profesia ku a bisa: “Siguramente e mes a karga nos enfermedatnan, i el a karga nos tristesa.”—Isa. 53:4a; Mat. 8:16, 17.
Komo si Fuera “Sutá pa Dios”
5. Kon hopi hudiu a konsiderá e morto di Hesus, i kiko a kous’é mas doló ainda?
5 Lesa Isaias 53:4b. Hopi di e hendenan den tempu di Hesus no a komprondé pakiko el a sufri i muri. Nan a kere ku ta Dios a kastig’é. (Mat. 27:38-44) E hudiunan a akusá Hesus di blasfemia. (Mar. 14:61-64; Juan 10:33) Klaru ku Hesus no tabata pekadó ni blasfemadó. Pero debí na e gran amor ku e tabatin pa su Tata, e idea so ku lo el a muri akusá di blasfemia mester a kous’é mas doló ainda komo Yehova su Sirbidó. Apesar di esei, e tabata dispuesto pa someté su mes na e boluntat di Yehova.—Mat. 26:39.
6, 7. Den ki sentido Yehova a ‘aplastá’ su fiel Sirbidó, i dikon esaki a duna Dios “plaser”?
6 Nos por komprondé dikon e profesia di Isaias ta bisa ku hende lo a pensa ku Kristu a ser “sutá pa Dios,” pero kisas ta un sorpresa pa nos ku e profesia ta bisa tambe: “Tabata e boluntat di SEÑOR pa herid’é” òf segun Tradukshon di Mundu Nobo: “Yehova mes tabatin plaser den aplast’é.” (Isa. 53:10) Siendo ku Yehova a deklará tambe: “Ata mi sirbidó . . . mi skohí, den kende mi alma tin delisia,” kon por ta ku Yehova “tabatin plaser den aplast’é”? (Isa. 42:1) Den ki sentido nos por bisa ku esei a duna Yehova goso?
7 Pa komprondé e parti akí di e profesia, nos mester kòrda ku ora Satanas a desafiá e soberania di Yehova, el a kuestioná e lealtat di tur sirbidó di Dios, tantu den shelu komo riba tera. (Jòb 1:9-11; 2:3-5) Hesus, dor di keda fiel te na morto, a perkurá e kontesta perfekto riba e desafio di Satanas. Pues, ounke Yehova a permití Kristu muri na man di su enemigunan, no tin duda ku Yehova a sufri ora el a mira nan mata su Sirbidó skohí. Sinembargo, ora Yehova a mira kon su Yu a keda kompletamente fiel, esei a dun’é gran plaser. (Pro. 27:11) Ademas, Yehova tabata sa ku e morto di su Yu lo a trese hopi benefisio pa humanidat arepentí i esei tambe a dun’é gran goso.—Luk. 15:7.
“Traspasá pa Nos Transgreshonnan”
8, 9. (a) Kon Hesus a ser “traspasá pa nos transgreshonnan”? (b) Kon Pedro a konfirmá esaki?
8 Lesa Isaias 53:6. Meskos ku karné pèrdí, hende pekaminoso a kana dual, buskando liberashon for di enfermedat i morto heredá di Adam. (1 Ped. 2:25) Siendo imperfekto, ni ún desendiente di Adam no por a kumpra bèk loke Adam a tira afó. (Sal. 49:7) Sinembargo Yehova, den su gran amor, “a hasi e inikidat di nos tur baha riba dje,” esta, riba su Yu stimá i Sirbidó skohí. Kristu a bai di akuerdo pa e ser “traspasá pa nos transgreshonnan” i “gòlpiá pa nos inikidatnan,” i asina el a karga nos pikánan riba staka i a muri na nos lugá.
9 Apòstel Pedro a skirbi: “Boso a wòrdu yamá pa e propósito akí, komo ku Kristu tambe a sufri pa boso, lagando un ehèmpel pa boso, pa boso sigui den su pasonan, i e mes a karga nos pikánan den su kurpa na e [“staka,” NW], pa nos, siendo morto pa piká, por a biba pa hustisia.” Anto, sitando for di e profesia di Isaias, Pedro a agregá: “Pasobra pa medio di su heridanan boso a wòrdu kurá.” (1 Ped. 2:21, 24; Isa. 53:5) Esaki a habri kaminda pa hende pekadó por rekonsiliá ku Dios, manera Pedro a sigui bisa: “Kristu tambe a muri pa piká un biaha i pa semper, e hustu pa e inhustu, pa e por a trese nos serka Dios.”—1 Ped. 3:18.
“Manera un Lamchi Ku Ta Wòrdu Hibá pa Mata”
10. (a) Kon Juan Boutista a deskribí Hesus? (b) Dikon e palabranan di Juan a resultá di ta apropiá?
10 Lesa Isaias 53:7 i 8. Ora Juan Boutista a mira Hesus ta bini, el a grita: “Ata e Lamchi di Dios ku ta kita piká di mundu!” (Juan 1:29) Refiriendo na Hesus komo un Lamchi, Juan lo por tabatin na mente e palabranan di Isaias: “E tabata . . . manera un lamchi ku ta wòrdu hibá pa mata.” (Isa. 53:7) Ademas, Isaias a profetisá: “El a drama su bida te na morto.” (Isa. 53:12) Ta interesante pa nota ku e anochi ku Hesus a instituí e Konmemorashon di su morto, el a duna un kopa di biña na e 11 fiel apòstelnan i a deklará: “Esaki ta mi sanger di e aliansa, ku ta wòrdu dramá pa hopi pa pordon di piká.”—Mat. 26:28.
11, 12. (a) Kiko e echo ku Isaak tabata dispuesto pa ser sakrifiká ta ilustrá tokante e sakrifisio di Kristu? (b) Kiko nos mester tene na mente tokante Yehova, e Abraham Mayor, ora nos ta tene e Memorial?
11 Meskos ku Isaak, Hesus tabata dispuesto pa ofresé su mes komo un sakrifisio. (Gén. 22:1, 2, 9-13; Heb. 10:5-10) Ounke Isaak a bai di akuerdo pa ser sakrifiká, ta Abraham tabata esun ku a purba ofresé e sakrifisio. (Heb. 11:17) Asina tambe, Hesus boluntariamente a aseptá ku e mester a muri, pero ta Yehova tabata esun ku a determiná kon mester a paga e reskate. E sakrifisio di su Yu tabata un muestra di Dios su amor profundo pa humanidat.
12 Hesus mes a deklará: “Dios a stima mundu asina tantu, ku el a duna su Yu unigénito, pa ken ku kere den dje no bai pèrdí, ma tin bida eterno.” (Juan 3:16) Apòstel Pablo a skirbi: “Dios ta demostrá su mes amor pa ku nos den esaki, ku tempu nos tabata pekadó ainda, Kristu a muri pa nos.” (Rom. 5:8) P’esei, ounke nos ta onra Kristu mediante e konmemorashon di su morto, nunka nos no mester lubidá ku esun ku a hasi e sakrifisio posibel tabata Yehova, e Abraham Mayor. Nos ta tene e Memorial na su alabansa.
E Sirbidó Lo “Hustifiká Hopi Hende”
13, 14. Kon e Sirbidó di Yehova a “hustifiká,” òf duna un posishon hustu, na hopi hende?
13 Lesa Isaias 53:11 i 12. Yehova a bisa di su Sirbidó skohí: “Esun hustu, mi sirbidó, lo hustifiká hopi hende.” Den ki manera? E último parti di versíkulo 12 ta duna nos un idea kon e ta hasié. E Sirbidó “a intersedé pa e transgresornan.” Tur desendiente di Adam ta nase pekadó—nan ta “transgresornan”—i p’esei nan ta risibí “e pago di piká,” esta, morto. (Rom. 5:12; 6:23) Rekonsiliashon entre Yehova i hende pekaminoso ta nesesario. Kapítulo 53 di e profesia di Isaias ta duna un bunita deskripshon di e manera ku Hesus a “intersedé” na fabor di humanidat pekaminoso, bisando: “E kastigu ku a trese pas pa nos tabata riba dje, i pa medio di su heridanan nos ta kurá.”—Isa. 53:5.
14 Kristu a “hustifiká,” òf duna un posishon hustu, na hopi hende dor di tuma nos pikánan riba dje i muri na nos lugá. Pablo a skirbi: “Dios a mira ku tabata bon pa tur plenitut biba den [Kristu], i mediante dje pa rekonsiliá atrobe ku su mes tur otro kos, dor di hasi pas mediante e sanger ku el a drama riba e staka di tormento, sin importá ku nan ta e kosnan riba tera òf e kosnan den shelu.”—Kol. 1:19, 20, NW.
15. (a) Ken ta “e kosnan den shelu” ku Pablo a menshoná? (b) Ken so tin derecho di kome i bebe di e emblemanan di Memorial, i dikon?
15 “E kosnan den shelu” ku ta ser rekonsiliá ku Yehova mediante e sanger ku Kristu a drama ta e kristiannan ungí, yamá pa reina ku Kristu den shelu. Dios ta deklará e kristiannan ku ta “partisipantenan den un yamada selestial” hustu pa bida. (Heb. 3:1; Rom. 5:1, 18) E ora ei Yehova ta aseptá nan komo su yunan spiritual. Spiritu santu ta duna nan testimonio ku nan ta “ko-heredero ku Kristu,” yamá pa bira rei i saserdote den su Reino selestial. (Rom. 8:15-17; Rev. 5:9, 10) Nan ta bira parti di Israel spiritual, “e Israel di Dios,” i nan ta drenta den e “aliansa nobo.” (Jer. 31:31-34; Gal. 6:16) Komo miembro di e aliansa nobo, nan tin derecho di kome i bebe di e emblemanan di Memorial, inkluso di e kopa di biña kòrá di kua Hesus a bisa: “E kopa akí, ku a wòrdu dramá pa boso, ta e aliansa nobo den mi sanger.”—Luk. 22:20.
16. Kiko ta “e kosnan riba tera,” i den ki manera nan ta risibí un posishon hustu dilanti di Yehova?
16 “E kosnan riba tera” ta e otro karnénan di Kristu, kendenan tin e speransa di biba pa semper riba tera. Yehova su Sirbidó skohí ta duna nan tambe un posishon hustu dilanti di Yehova. Komo ku nan tin fe den e sakrifisio di reskate di Kristu i p’esei “a laba nan pañanan i a hasi nan blanku den e sanger di e Lamchi,” Yehova ta deklará nan hustu; pero no komo su yunan spiritual, sino komo su amigunan, i e ta duna nan e speransa maravioso di sobrebibí “e gran tribulashon.” (Rev. 7:9, 10, 14; Sant. 2:23) Komo ku e otro karnénan akí no ta den e aliansa nobo i pues no tin e speransa di biba den shelu, nan no ta kome ni bebe di e emblemanan di Memorial sino mas bien nan ta asistí komo opservadó respetuoso.
Tur Nos Gradisimentu Ta Bai na Yehova i na e Sirbidó Ku E Ta Aprobá!
17. Kon un estudio di e profesianan di Isaias ku ta enfoká riba e Sirbidó a yuda nos prepará nos mente pa e Konmemorashon?
17 E análisis ku nos a hasi akí di e profesianan di Isaias ku ta enfoká riba e Sirbidó ta un bon manera pa prepará nos mente pa e Konmemorashon di e morto di Kristu. Esei a yuda nos ‘fiha nos wowo riba e outor i kumplidó di fe.’ (Heb. 12:2) Nos a siña ku e Yu di Dios no ta rebelde. Distinto for di Satanas, e sí tin delisia den laga Yehova siñ’é, i ta rekonosé Yehova komo e Señor Soberano. Nos a mira ku durante Hesus su sirbishi riba tera, el a mustra kompashon na e hendenan ku el a prediká na dje, i a kura hopi di nan tantu físikamente komo spiritualmente. Pues, el a demostrá kiko lo e hasi komo Rei Mesiániko di e sistema nobo ora ku lo e “establesé hustisia riba tera.” (Isa. 42:4) E entusiasmo ku el a demostrá ora e tabata prediká e Reino, komo “un lus pa e nashonnan,” ta un rekordatorio pa su siguidónan pa nan tambe prediká e bon notisia rònt mundu ku e mesun entusiasmo.— Isa. 42:6.
18. Dikon e profesia di Isaias ta yena nos kurason ku gratitut pa Yehova i pa su fiel Sirbidó?
18 E profesia di Isaias tambe ta profundisá nos komprondementu di e gran sakrifisio ku Yehova a hasi ora el a manda su Yu stimá na mundu pa sufri i muri pa nos. Yehova tabatin plaser, no den mira su Yu sufri, sino den opservá kon Hesus a keda kompletamente fiel te na morto. Meskos ku Yehova, nos tambe mester ta kontentu i rekonosé tur loke Hesus a hasi pa duna prueba ku Satanas ta un mentiroso i pa santifiká e nòmber di Yehova, i asina konfirmá ku Yehova tin derecho di ta e Soberano universal. Ademas, Kristu a tuma nos pikánan riba dje i a muri na nos fabor. Di e manera ei, el a habri kaminda pa e tou chikitu di su rumannan ungí i e otro karnénan por tin un posishon hustu dilanti di Yehova. Pues anto, ora nos reuní huntu pa e Memorial, laga nos kurason ta yen di gratitut pa Yehova i pa su fiel Sirbidó.
Komo Repaso
• Den ki sentido Yehova ‘tabatin plaser den aplastá’ su Yu?
• Kon Hesus a ser “traspasá pa nos transgreshonnan”?
• Kon e Sirbidó a “hustifiká,” òf duna un posishon hustu, na hopi hende?
• Kon un estudio di e profesianan tokante e Sirbidó a prepará bo mente i kurason pa Memorial?
[Preguntanan di Estudio]
[Plachi na página 27]
“El a ser despresiá i nos a konsider’é komo di ningun importansia”
[Plachi na página 28]
“El a drama su bida te na morto”
[Plachi na página 29]
E “otro karnénan” ta asistí na Memorial komo opservadó respetuoso