Haña Goso den e Trabou di Hasi Disipel
Haña Goso den e Trabou di Hasi Disipel
“P’esei, bai i hasi . . . disipel.”—MAT. 28:19.
1-3. (a) Kiko hopi publikadó ta sinti ora nan tin un estudio di Beibel? (b) Ki preguntanan nos ta bai konsiderá?
UN RUMAN muhé na Merka ku ta sirbi den un grupo di abla hindi a skirbi: “Mi ta studiando ku un famia di Pakistan pa 11 luna kaba. Ta mas ku klaru ku nos a bira amigu. Pronto e famia akí ta bai Pakistan bèk. I ora mi pensa riba esei, mi wowo ta yena ku awa no solamente pasobra lo mi bai sinti nan falta sino tambe pasobra mi ta kòrda e goso ku mi tabatin ora mi tabata siña nan tokante Yehova.”
2 Bo a yega di sinti e goso akí ku un estudio di Beibel ta trese kuné? Tantu Hesus komo su disipelnan di promé siglo a haña un goso inmenso den e trabou di hasi disipel. Ora e 70 disipelnan ku Hesus a entrená a regresá ku un informe gososo, Hesus mes a “regosihá grandemente den spiritu santu.” (Luk. 10:17-21) Awendia tambe tin hopi publikadó ku ta haña goso inmenso den e trabou di hasi disipel. Na aña 2007, publikadónan a traha duru i a logra un averahe di seis mion i mei estudio di Beibel pa luna. Ki un goso!
3 Tòg, algun publikadó no a yega di sinti e goso di tin un estudio di Beibel. Otro publikadónan kisas no tabatin un estudio den e último añanan. Ki reto nos ta enfrentá segun ku nos ta hasi esfuerso pa studia Beibel ku hende? Kon nos por vense e retonan ei? Anto ki rekompensa nos ta risibí ora nos hasi nos máksimo esfuerso pa obedesé Hesus su mandamentu di “bai i hasi . . . disipel”?—Mat. 28:19.
Retonan Ku Por Kita Nos Goso
4, 5. (a) Kon hopi hende ta reakshoná na sierto partinan di mundu? (b) Ki retonan publikadónan ta enfrentá otro kaminda?
4 Na sierto partinan di mundu, hende ta aseptá nos literatura ku smak i ta ansioso pa nos studia Beibel ku nan. Un pareha oustraliano ku a sirbi pa un tempu na Zambia a skirbi: “No ta wega. Zambia ta manera un paradeis pa loke ta trata e predikashon. Ta masha dushi pa prediká riba kaya! Hende ta aserká nos, i algun asta ta pidi nos sierto revistanan spesífiko.” Den un aña resien, e rumannan na Zambia a kondusí mas ku 200.000 estudio di Beibel, un averahe di mas ku ún estudio pa publikadó.
5 Sinembargo, tin otro kaminda ku ta difísil pa laga literatura i pa studia Beibel ku hende riba un base regular. Dikon? Pasobra hopi bes ora e publikadónan ta traha di kas pa kas, nan no ta haña hende na kas. I si nan haña un hende mes, podisé e no ta interesá den religion. Kisas el a lanta den un famia inkrédulo òf por ta e ta disgustá ku e hipokresia ku tin den religion falsu. Hopi hende a keda heridá den sentido spiritual, komo si fuera soyá i plamá pa motibu di wardadónan falsu. (Mat. 9:36) Ta di komprondé ku hende asina ta masha kouteloso pa kòmbersá tokante Beibel.
6. Kiko por stroba algun publikadó?
6 Tin publikadó fiel ku ta enfrentá otro tipo di reto ku por kita nan goso. Maske un tempu nan tabata masha aktivo den e trabou di hasi disipel, awor problema ku salú òf edat avansá ta stroba nan di hasi loke nan ta deseá. Konsiderá tambe algun manera ku nos por stroba nos mes. Por ehèmpel, bo ta pensa ku bo no ta kapas pa studia Beibel ku hende? Podisé bo ta sinti manera Moisés a sinti ora Yehova a mand’é bai papia ku fárao. Moisés a bisa: “Pa fabor, Señor, nunka mi no tabata un hende elokuente.” (Eks. 4:10) E sintimentu di ta inkapas ta estrechamente ligá ku miedu di frakasá. Kisas nos ta preokupá ku e persona lo no bira un disipel pasobra nos no ta un maestro perfekto. Pa evitá di pasa den e eksperensia ei, kisas nos ta disidí di no studia Beibel ku hende. Kon nos por trata ku e retonan ei?
Prepará Bo Kurason
7. Kiko a motivá Hesus den su ministerio?
7 E promé kos ku nos tin ku hasi ta prepará nos kurason. Hesus a bisa: “For di e abundansia di kurason [e] boka ta papia.” (Luk. 6:45) Loke a motivá Hesus den su ministerio ta su interes sinsero den e bienestar di otro hende. Por ehèmpel, ora el a mira e hudiunan ku a alehá for di Dios, “el a sinti kompashon pa nan.” El a bisa su disipelnan: “E kosecha ta masha grandi . . . Pidi e Señor di kosecha pa manda trahadó na su kosecha.”—Mat. 9:36-38.
8. (a) Ta bon pa nos pensa riba kiko? (b) Kiko e komentario di un studiante di Beibel ta siña nos?
8 Segun ku nos ta partisipá den e trabou di hasi disipel, ta bon pa nos pensa profundamente riba tur e benefisionan ku nos a haña dor ku un hende a tuma tempu pa studia Beibel ku nos. Pensa tambe riba e hendenan ku nos lo topa den sirbishi i kon nan lo benefisiá di e mensahe ku nos ta trese pa nan. Un señora a skirbi e sukursal den e pais kaminda e ta biba: “Mi kier a laga boso sa ku mi ta masha gradisidu na e Testigunan ku a studia Beibel ku mi na mi kas. Mi sa ku tin bes mi a molestiá nan ku mi tantísimo preguntanan i semper mi tabata pone nan keda mas tantu. Pero nan tabatin pasenshi ku mi i tabata ansioso pa kompartí loke nan a siña ku mi. Mi ta gradisí Yehova i Hesus ku mi a siña konosé e hendenan akí.”
9. Riba kiko Hesus a enfoká, i kon nos por imit’é?
9 Klaru ku no ta tur hende den tempu di Hesus a bira su siguidó. (Mat. 23:37) Algun hende a siguié pa un tempu pero despues a rechasá su siñansanan i “no tabata kana kuné mas.” (Juan 6:66) Sinembargo, Hesus no a laga e reakshon desfaborabel di algun hende pon’é sinti ku su mensahe no tabata importante. Mayoria di e simianan ku el a planta no a produsí disipel. Apesar di esei, Hesus tabata enfoká riba e bon ku e tabata hasi. El a mira ku e kunukunan tabata kla pa kosechá i e tabata haña goso inmenso den yuda ku e kosecha. (Lesa Juan 4:35 i 36.) En bes di enfoká riba e parti infruktífero di nos teritorio, no ta mihó pa nos tambe konsentrá riba e posibel kosecha? Laga nos wak kon nos por mantené un aktitut positivo asina.
Sembra ku e Meta pa Kosechá
10, 11. Kiko bo por hasi pa mantené bo goso?
10 Un kunukero ta planta ku e meta pa kosechá. Asina tambe, nos mester prediká ku e meta pa kuminsá estudio di Beibel. Pero kiko si bo ta partisipá regularmente den sirbishi di vèlt i tòg ta haña masha poko hende na kas òf ta parse ku bo no por logra haña bo rebishitanan na kas? Esaki por desepshoná bo. Pero esei ta nifiká ku bo tin ku stòp di bai di kas pa kas? Klaru ku no! Te ainda nos ta logra haña hopi hende via e método akí di prediká; e ta un método ku nos a usa pa hopi tempu i ku a resultá di ta efikas.
11 Sinembargo, pa bo mantené bo goso, lo bo por amplia bo métodonan di prediká, kisas purbando otro maneranan pa alkansá hende. Por ehèmpel, bo a purba prediká riba kaya òf den teritorio di negoshi? Lo bo por purba haña hende via telefòn òf pidi esnan ku bo a yega di prediká na dje nan number di telefòn pa bo yama nan? Nos tin ku perseverá i nos mester ta fleksibel den e ministerio pa nos por eksperensiá e goso di haña hende ku ta reakshoná positivo riba e mensahe di Reino.
Kon pa Trata ku Indiferensia
12. Kiko nos por hasi si hopi hende den nos teritorio ta parse indiferente?
12 Kiko si hopi hende den bo teritorio no ta interesá den religion? Bo por papia riba algu ku sí por lanta nan interes? Apòstel Pablo a skirbi na su rumannan den fe na Korinto: “Pa e hudiunan mi a bira manera un hudiu . . . Pa esnan ku ta sin lei, mi a bira manera un hende sin lei, ounke mi no ta sin lei di Dios.” Dikon Pablo a hasi esei? El a bisa: “Mi a bira tur kos pa tur hende, pa di tur manera mi por salba algun.” (1 Kor. 9:20-22) Nos tambe lo por buska tópikonan ku lo interesá e hendenan den nos teritorio? Hopi hende ku no ta religioso ke mehorá nan bida di famia. Kisas nan ta buskando un propósito den bida tambe. Nos por presentá e mensahe di Reino na e hendenan ei den un manera ku lo atraé nan?
13, 14. Kon nos por logra haña mas goso den e trabou di hasi disipel?
13 Mas i mas publikadó a logra haña mas goso den e trabou di hasi disipel, asta den áreanan kaminda mayoria di hende ta parse indiferente. Kon? Wèl, nan a siña un otro idioma. Un pareha di 60 i piku aña a ripará ku tabatin míles di studiante chines i nan famia ta biba den nan teritorio. E esposo a bisa: “Esaki a motivá nos pa siña chines. I maske esaki a nifiká ku tur dia nos mester a dediká tempu na studia e idioma, e resultado tabata ku hopi hende chines den nos área a kuminsá studia Beibel.”
14 Si no ta posibel pa bo siña un otro idioma, bo por hasi bon uso di e foyeto chikí Bon Nobo pa Hende di Tur Nashon ora bo topa hende di otro idioma. Por lo general, lo bo por haña literatura den nan idioma. Ta bèrdat ku mas tempu i esfuerso ta nesesario pa komuniká ku hende di un otro idioma i kultura. Pero no lubidá e prinsipio bíbliko akí: “Esun ku ta sembra generosamente lo kosechá generosamente tambe.”—2 Kor. 9:6.
Henter e Kongregashon Ta Enbolbí
15, 16. (a) Dikon ta henter e kongregashon ta enbolbí den e trabou di hasi disipel? (b) Ki papel rumannan di edat avansá ta hunga?
15 En realidat, pa un hende bira disipel no ta dependé di un solo persona. Mas bien, ta henter e kongregashon ta yuda un hende bira disipel. Dikon? Wèl, Hesus a bisa: “Na esaki tur hende lo sa ku boso ta mi disipel, si boso tin amor un pa otro.” (Juan 13:35) En bèrdat, ora studiantenan di Beibel asistí na e reunionnan, hopi bes nan ta keda impreshoná pa e amor ku nan ta mira. Un studiante di Beibel a skirbi: “Mi ta disfrutá masha hopi mes di e reunionnan. E hendenan ta pone bo sinti ku bo ta bonbiní!” Hesus a bisa ku esnan ku bira su siguidó lo por haña oposishon di nan famia. (Lesa Mateo 10:35-37.) Sinembargo, el a primintí ku nan lo haña hopi “ruman hòmbernan i ruman muhénan i mamanan i yunan” spiritual den e kongregashon.—Mar. 10:29, 30.
16 Nos rumannan di edat avansá ta hunga un papel masha importante den yuda studiantenan di Beibel progresá. Den ki manera? Asta si algun ruman di edat avansá no por studia Beibel ku hende, nan komentarionan edifikante na e reunionnan di kongregashon ta fortalesé fe di tur esnan presente. E echo ku nan ta kanando “den e kaminda di hustisia” pa hopi tempu kaba ta hasi e kongregashon mas atraktivo i ta atraé hende sinsero na Dios su organisashon.—Pro. 16:31.
Kon pa Vense Miedu
17. Kiko nos por hasi si nos ta sinti ku nos no ta kapas pa studia Beibel ku un hende?
17 Kiko si bo ta sinti ku bo no ta kapas pa studia Beibel ku un hende? Kòrda ku Yehova a yuda Moisés mediante e spiritu santu i un ayudante, Aaron, su ruman hòmber. (Eks. 4:10-17) Hesus a primintí ku Dios su spiritu lo sostené nos trabou di prediká. (Echo. 1:8) Ademas, Hesus a manda su disipelnan pa bai prediká dos-dos. (Luk. 10:1) P’esei, si bo ta haña ku ta un reto pa studia Beibel ku un hende, pidi Dios den orashon pa duna bo sabiduria mediante su spiritu santu. Despues, buska un kompañero di sirbishi ku por duna bo e konfiansa ku bo tin mester i kende lo por yuda bo ku su eksperensia. Bo ta fortalesé bo fe ora bo kòrda ku Yehova a skohe hende komun i koriente—“e kosnan débil di mundu”—pa kumpli ku e trabou importantísimo akí.—1 Kor. 1:26-29.
18. Kiko si bo tin miedu ku lo bo no por yuda un studiante di Beibel?
18 Kiko si bo tin miedu ku lo bo frakasá den yuda un studiante di Beibel progresá? Ta bon pa kòrda ku hasi disipel no ta meskos ku prepará un kuminda. Si e kuminda lo sali bon òf nò ta dependé prinsipalmente di ún hende: e kòki. Sinembargo, no ta ún persona so ta enbolbí den hasimentu di disipel. Yehova ta hasi e parti di mas importante, esta, hala hende serka dje. (Juan 6:44) Tantu nos komo e otro personanan den kongregashon ta hasi e esfuerso nesesario pa usa e arte di siña pa yuda studiantenan progresá. (Lesa 2 Timoteo 2:15.) I e studiante mes tambe mester apliká loke e ta siña. (Mat. 7:24-27) Si un hende stòp di studia Beibel, nos por keda desepshoná. Nos ta spera ku studiantenan di Beibel lo skohe bon, pero kada hende mester “duna kuenta di su mes na Dios.”—Rom. 14:12.
Ki Rekompensa Nos Lo Haña?
19-21. (a) Ki benefisio nos lo haña si nos studia Beibel ku hende? (b) Kon Yehova ta mira tur esnan ku ta partisipá den e trabou di prediká?
19 Ora nos studia Beibel ku hende, nos ta sigui pone e Reino na promé lugá. Ademas, e ta graba e bèrdatnan di e Palabra di Dios mas profundo den nos mente i kurason. Kon asina? Un pionero ku yama Barak a splika: “Ora bo ta studia Beibel ku hende, bo mester ta un mihó studiante di e Palabra di Dios. Mi ta haña ku pa mi por bai siña un otro hende, mi mes mester ta firmemente konvensí promé.”
20 Si bo no tin un estudio di Beibel, esei ta nifiká ku bo sirbishi na Dios no tin balor? Klaru ku no! Yehova ta apresiá profundamente e esfuerso ku nos ta hasi pa alab’é. Tur esnan ku ta partisipá den e trabou di prediká ta “Dios su kolaboradónan.” Sinembargo, nos ta haña mas goso ainda ora nos mira kon Dios ta laga e simia ku nos a planta krese. (1 Kor. 3:6, 9) Un pionero ku yama Amy a bisa: “Ora bo mira un studiante di Beibel progresá, bo ta sinti un gratitut inmenso pa e echo ku Yehova a usa abo pa duna e persona un regalo maravioso—e oportunidat di konosé Yehova i risibí bida eterno.”
21 Ora nos hasi nos bèst pa kuminsá estudio di Beibel i sigui studia ku e personanan, esei lo yuda nos pa keda enfoká riba sirbi Dios awor i lo fortalesé nos speransa di sobrebibí i drenta den e mundu nobo. Ademas, ku Yehova su respaldo, nos lo por yuda salba tambe esnan ku ta skucha nos. (Lesa 1 Timoteo 4:16.) Esei sigur lo trese masha goso!
Bo Ta Kòrda?
• Ki retonan por stroba algun publikadó di studia Beibel ku hende?
• Kiko nos por hasi si hopi hende den nos teritorio ta parse indiferente?
• Ki rekompensa nos lo haña ora nos ta studia Beibel ku hende?
[Preguntanan di Estudio]
[Plachinan na página 15]
Bo ta amplia bo métodonan di prediká pa haña mas tantu hende sinsero?