Nos Lektornan Ta Puntra

Dikon Testigunan di Yehova No Ta Usa Imágen den Nan Adorashon?

Rònt mundu, hende di religion hindú, budista, katóliko i òrtodòks ta konsiderá uso di ídolo, imágen òf prenchi komo un parti importante di nan adorashon. Den algun parti di Afrika, hende ta adorá figuranan trahá di palu i di piedra debí ku nan ta kere ku un dios òf e spiritu di un dios ta biba den e kosnan akí.

Na kontraste ku esei, Testigunan di Yehova no ta usa ningun sorto di imágen ni prenchi den nan adorashon. Si bo bishitá nan lugá di reunion, konosí komo Salòn di Reino, lo bo no haña prenchi di “santu” ni imágen di Hesus òf Maria. * Dikon nò? Laga nos wak kiko Beibel ta bisa di e tópiko akí.

Kiko Dios A Rekerí di e Israelitanan?

Despues ku Yehova Dios a libra e israelitanan for di Egipto, el a duna nan instrukshon bon kla di e manera ku e tabata ke pa nan ador’é. E di dos mandamentu di e asina yamá Dies Mandamentu ta bisa: “No traha ningun imágen grabá pa bo mes, ni nada semehante na loke tin ariba den shelu, ni abou riba tera, ni den e awa bou di tera. No adorá nan ni sirbi nan, pasobra ami, SEÑOR bo Dios, ta un Dios yalurs [ku “no ta tolerá ningun otro dios,” BPK].”​—Eksodo 20:​4, 5.

Na mes momento ku Dios tabata duna Moisés e mandamentunan akí, e israelitanan tabata traha un bisé di oro, probablemente imitando e adorashon di bestia den Egipto. Pero nan no a duna e imágen nòmber di un dios egipsio. En bes di esei, nan a konekt’é ku adorashon di Yehova. (Eksodo 32:​5, 6) Kon Dios a reakshoná? El a rabia mashá ku esnan ku tabata adorá e imágen, i Moisés a destruí e imágen.​—Eksodo 32:​9, 10, 19, 20.

Mas despues, Yehova Dios a agregá mas detaye na e di dos mandamentu. Mediante Moisés, el a rekordá e israelitanan ku nan no mester a traha pa nan mes ‘un imágen grabá den forma di un figura, den semehansa di hòmber òf muhé, den semehansa di un bestia ku tin riba tera, den semehansa di un para ku ala ku ta bula den laira, den semehansa di un bestia ku ta lastra riba suela, den semehansa di un piská ku tin den e awa bou di tera.’ (Deuteronomio 4:​15-18) Ta klaru anto ku e israelitanan no tabatin mag di usa ningun sorto di imágen den nan adorashon na Dios.

Apesar di esei, e pueblo di Israel a kai despues den idolatria. Pa korigí nan, Yehova a manda profetanan ku a spièrta nan di e kastigu ku lo a bini riba nan pa motibu di nan adorashon di ídolo, òf imágen. (Jeremias 19:​3-5; Amos 2:8, BPK) Pero mayoria hende di e nashon di Israel a ignorá e spièrtamentunan di Dios. P’esei, na aña 607 promé ku nos era, Yehova a permití e babilonionan destruí Yerusalèm i hiba e nashon den koutiverio.​—2 Krónikanan 36:​20, 21; Jeremias 25:​11, 12.

 Kiko e Kristiannan di Promé Siglo A Pensa di Imágen?

Den promé siglo, ora hende no-hudiu a kombertí na kristianismo nan no a sigui usa imágen den nan adorashon na Dios. Ripará kiko Demetrio, un platé ku tabata traha imágen na Efeso, a bisa tokante Pablo su predikashon: “Hòmbernan, boso sa ku nos prosperidat ta dependé di e trabou akí. I boso ta mira i ta tende ku no solamente na Efeso, ma na kasi henter Asia e Pablo akí a konvensé masha hopi hende, i a hasi nan desviá dor di bisa ku diosnan trahá ku man no ta dios.”​—Echonan 19:​25, 26.

Pablo su propio palabranan ta konfirmá e akusashon ku Demetrio a hasi. Ora Pablo tabata papia ku e griegonan na Atenas, el a bisa: “Nos no mester pensa ku e Naturalesa [“Ser,” NW] Divino ta manera oro òf plata òf piedra, un imágen formá dor di arte i imaginashon di hende. I Dios, pasando por alto e tempunan di ignoransia, awor ta deklará na hende ku tur hende na tur kaminda mester repentí.” (Echonan 17:​29, 30) Pablo a skirbi kristiannan na Tesalónika tokante e mesun tópiko i a elogiá nan ku e palabranan: “Boso a kombertí boso di e diosnan falsu na Dios.”​—1 Tesalonisense 1:9

No ta Pablo so a spièrta kristiannan kontra uso di imágen den nan adorashon, apòstel Juan tambe a hasi esei. Na fin di promé siglo, Juan a bisa nan na un manera firme: “Warda boso di ídolonan.”​—1 Juan 5:21.

Testigunan di Yehova ta obedesé e instrukshon bon kla ku Dios a duna pa no usa ningun sorto di imágen ora nan ta ador’é. Nan ta kere loke Yehova Dios mes ta bisa, esta: ‘Ami ta Yehova, esei ta mi nòmber; lo mi no duna mi gloria na un otro, ni mi alabansa na imágennan grabá.’​—Isaias 42:8.

[Nota]

[Komentario na página 10]

‘Ami ta Yehova, esei ta mi nòmber; lo mi no duna mi gloria na un otro, ni mi alabansa na imágennan grabá.’ —Isaias 42:8