Dios Ta un Persona Real?

Kontestanan komun:

▪ “E ta tur kaminda, den tur kos. E ta manera bientu.”

▪ “E ta un forsa apstrakto inteligente i poderoso.”

Kiko Hesus a bisa?

▪ “Den kas di mi Tata tin hopi lugá-di-biba.” (Juan 14:2) Den un sentido Hesus a indiká ku Dios tin un kas, òf lugá di biba.

▪ “Mi a sali for di e Tata i a bin den mundu; mi ta sali for di mundu atrobe i ta bai serka e Tata.” (Juan 16:28) Pa Hesus, Dios tabata un Persona real ku tin un lugá di biba spesífiko.

HESUS nunka a referí na Dios komo un forsa apstrakto. Al kontrario, el a papia ku Dios i a hasi orashon na dje. Hopi bes el a yama Yehova su Tata selestial, un ekspreshon ku ta indiká ku e tabatin un laso íntimo ku Dios.​—Juan 8:​19, 38, 54.

Ta bèrdat ku “ningun hende no a mira Dios nunka” i ku “Dios ta Spiritu.” (Juan 1:18; 4:24) Pero esei no ke men ku e no tin ningun tipo di kurpa òf forma. Beibel ta bisa nos: “Si tin un kurpa natural, tin un kurpa spiritual tambe.” (1 Korintionan 15:44) Pues Yehova tin un kurpa spiritual?

Sí. Ora Hesus a resusitá, el “a drenta . . . den cielu mes, pa presenta awó dilanti cára di Dios pa nos.” (Hebreonan 9:24, E Testament Nobo [TN]) Esaki ta siña nos dos kos importante tokante Dios. Di promé, e tin un lugá di biba. Di dos, ta bisto ku Dios ta un persona i no un forsa indefinibel ku ta biba tur kaminda, sino kon Hesus por a presentá “dilanti cára di Dios”?

Awor, kon Dios por kontrolá kos tur kaminda? Dios por manda su spiritu santu, òf su poder, na kualke parti den universo. Manera un tata ku ta saka su man pa konsolá i sostené su yu, asina Dios ta usa su spiritu santu pa logra su propósito.​—Salmo 104:30; 139:7.

E echo ku Dios ta un Persona ta nifiká ku e tin un personalidat. Pues, tin kos ku e ta gusta i tin kos ku e no ta gusta i tambe e tin sintimentu. Beibel ta bisa nos ku e ta stima su pueblo, ta alegrá den su obranan, ta odia idolatria i ta sintié tristu ora hende ta kometé maldat. (Génesis 6:6; Deuteronomio 16:22; 1 Reinan 10:9; Salmo 104:31) Na 1 Timoteo 1:11 (TN), e ta ser yamá “Dios bienaventurá [felis].” Pues no ta nada straño ku Hesus a bisa ku nos por siña stima e Dios akí ku henter nos kurason!​—Marko 12:30. *

[Nota]

 [Komentario na página 5]

Meskos ku un tata ku ta saka su man pa yuda su yu, Dios ta usa su spiritu santu pa logra su propósito