Kon Bo Por Perseverá den e Trabou di Prediká?

BO A yega di sinti bo asina kansá i desanimá ku bo kier a stòp di prediká? Ora nos haña nos ku hende ku no ta reakshoná bon riba nos predikashon, ku oposishon fuerte, ansiedat, problema ku salú òf preshon di pareunan por ta difísil pa perseverá. Pero pensa riba e ehèmpel di Hesus. El a perseverá bou di e pruebanan di mas severo “pa motibu di e goso poní su dilanti.” (Heb. 12:2) E tabata sa ku dor di duna prueba ku e akusashonnan ku Satanas a lansa kontra Dios ta totalmente infundá, e tabata hasi Yehova su kurason kontentu.​—Pro. 27:11.

Bo tambe por hasi Yehova su kurason kontentu dor di perseverá den bo ministerio. Sinembargo, kiko bo por hasi ora opstákulonan ta parse di kaba ku bo energia pa prediká? Krystyna, kende ta di edat avansá i tin problema ku salú, a atmití: “Mi sa sinti mi kansá i desanimá. Mi problemanan debí na edat, manera malesa i ansiedatnan tokante asuntunan diario, por mengua mi zelo temporalmente.” Kon bo por perseverá den e trabou di prediká apesar di opstákulonan asina?

Imitá e Profetanan

Pa fiel publikadónan di Reino por perseverá den e trabou di prediká, nan tin ku hasi esfuerso pa imitá e aktitut mental di profetanan di antigwedat. Tuma por ehèmpel, Jeremias. Na promé instante, ora Dios a skoh’é p’e sirbi komo profeta, el a vasilá. Sinembargo, Jeremias por a perseverá i kumpli ku su asignashon difísil pa mas ku 40 aña pasobra el a siña pone pleno konfiansa den Dios.​—Jer. 1:6; 20:​7-11.

E ehèmpel di Jeremias a animá Henryk. El a bisa: “Tabatin biaha, durante mi ministerio di mas ku 70 aña, ku mi tabata sinti mi desanimá debí na e reakshon di e hendenan; nan tabatin un aktitut hostil òf desinteresá. Na e momentonan ei, mi ta hasi esfuerso pa kòrda riba Jeremias su ehèmpel. Su amor pa Yehova i su spiritualidat fuerte, esta, su bon relashon ku Yehova debí na su fe i pleno konfiansa den Yehova, a dun’é e forsa pa sigui profetisá.” (Jer. 1:17) E ehèmpel di Jeremias a fortalesé Rafał tambe. El a bisa: “Jeremias no a enfoká riba su mes ni su sintimentunan. Mas bien, el a dependé riba Dios. El a sigui padilanti sin miedu apesar di e hostilidat ku tabatin tur kaminda. Mi ta trata di tene esei na mente.”

Un otro profeta kende su ehèmpel ta yuda hopi ruman perseverá den e trabou di prediká ta Isaias. Ora Dios a dun’é e asignashon pa bai prediká na su paisanonan, mesora el a kontestá: “At’ami aki! Manda ami!” Pero Yehova a bis’é tambe: “Hasi kurason di e pueblo akí insensitivo, hasi nan orea surdu.” Esei a nifiká ku nan lo no a skuch’é. (Isa. 6:​8-10) Isaias tabata destiná pa frakasá? No for di Dios su punto di bista! Ta p’esei Isaias a kumpli fielmente ku su asignashon. Ta asina abo tambe ta reakshoná riba e mandato pa prediká?

Pa nos por perseverá den e trabou di prediká meskos ku Isaias apesar di e indiferensia di nos oyentenan, nos mester evitá di enfoká riba e reakshonnan negativo ku nos ta haña. Rafał ta trata ku desanimashon di e manera akí: “Mi ta trata di no keda pensa riba e remarkenan grosero ku e hendenan ta hasi. E hendenan den mi teritorio tin derechi di reakshoná manera nan ke.” Anna a agregá: “Mi ta hasi esfuerso pa no sigui pensa riba nada desagradabel ni desanimante. E echo ku mi ta hasi orashon i konsiderá e teksto di dia promé ku mi bai den sirbishi di vèlt ta yuda mi. Kualke pensamentu negativo ta disparsé mesora.”

Profeta Ezekiel a sirbi entre hudiunan kabesura ku tabata prezu na Babilonia. (Eze. 2:6)  E no a keda sin papia e palabra di Dios ku e pueblo. Pasobra si un malbado lo a muri sin tende e spièrtamentu, Ezekiel lo tabata personalmente responsabel pa e morto di e persona ei. Yehova a bisa Ezekiel: “Su sanger lo mi eksigí for di bo man.”​—Eze. 3:​17, 18.

Henryk ta hasi esfuerso pa e tin e mesun punto di bista ku Ezekiel. El a bisa: “Mi kier ta liber di sanger di tur hende. Bida humano presioso ta den wega.” (Echo. 20:​26, 27) Zbigniew ta pensa meskos; el a bisa: “Ezekiel mester a sigui padilanti apesar di loke otronan tabata pensa. Esaki ta yuda mi mira e trabou di prediká manera e Kreador ta mir’é.”

Bo No Ta Bo So

Ora bo ta prediká, bo no ta bo so. Nos por bisa meskos ku apòstel Pablo, kende a bisa: “Nos ta Dios su kolaboradónan.” (1 Kor. 3:9) Krystyna, kende ta atmití ku de bes en kuando e ta bira desanimá, a bisa: “Ta p’esei mi ta sigui roga Yehova p’e duna mi forsa. I nunka e ta laga mi na kaya.” Sí, nos tin mester di Dios su spiritu pa apoyá nos den nos ministerio!​—Zak. 4:6.

Ademas, ora nos ta den sirbishi di vèlt, spiritu santu ta yuda nos desplegá e kualidatnan di e ‘fruta di spiritu.’ (Gal. 5:​22, 23) Eseinan, na nan turno, ta yuda nos perseverá den e trabou di prediká maske kon hende reakshoná. Henryk a bisa: “E trabou di prediká ta yuda mi traha riba mi personalidat. E ta siña mi mustra pasenshi i komprenshon i pa no entregá lihé.” Ora bo ta partisipá den e ministerio apesar di vários opstákulo, esaki por yuda bo kultivá e fruta di spiritu abundantemente.

Yehova ta usa su angelnan pa dirigí e trabou úniko akí. (Rev. 14:6) Beibel ta bisa ku tin “dies mil biaha dies mil i míles i míles” di e kriaturanan spiritual akí. (Rev. 5:11) Bou di Hesus su guia, e angelnan ta yuda Dios su sirbidónan riba tera. Bo ta kòrda riba esaki ora bo ta den sirbishi?

Anna a bisa: “Meditashon riba e echo ku e angelnan ta ku nos den e ministerio ta un fuente di animashon. Mi ta balorá e yudansa ku e angelnan ta duna nos bou di supervishon di Yehova i Hesus.” Nos tin e gran privilegio di por traha ku angelnan fiel!

Kiko di nos kompañeronan publikadó di Reino? Nos ta bendishoná ku nos konosé un multitut di Testigu fiel. Sin duda bo a eksperensiá ku e proverbio bíbliko akí ta bèrdat: “Manera heru ta mula heru, asina un hende ta mula kara di su amigu.”​—Pro. 27:17.

Ora nos ta prediká huntu ku otro publikadónan, nos tin e maravioso oportunidat di por opservá métodonan efikas ku nan ta usa ku, kisas, ta nobo pa nos. Elżbieta a bisa: “Ora mi ta traha ku diferente publikadó, mi ta haña oportunidat pa demostrá mi amor tantu na mi rumannan kreyente komo na e hendenan ku nos topa.” Hasi esfuerso pa traha ku diferente publikadó den e trabou di prediká. Esei lo hasi bo ministerio mas interesante.

Perkurá Bon pa Bo Mes

Pa mantené nos entusiasmo den e trabou di prediká, nos tin ku plania bon, sosegá sufisiente i mantené un bon rutina di estudio personal. Ku otro palabra, nos mester perkurá bon pa nos mes, tantu spiritualmente komo físikamente.

Beibel ta bisa: “E plannan di hende balente siguramente ta kondusí na abundansia.” (Pro. 21:5) Zygmunt, kende awor tin 88 aña di edat, a bisa: “E echo ku mi tin un bon programa di sirbishi ta yuda mi alkansá mi metanan. Mi ta plania mi tempu kuidadosamente pa mi por tin sufisiente tempu pa prediká.”

Konosementu profundo di e Skritura ta fortalesé nos i ekipá nos pa e trabou di prediká. Meskos ku nos tin ku kome tur dia pa nos por sigui funshoná, nos tin ku alimentá nos mes regularmente ku kuminda spiritual pa nos por sigui partisipá den e trabou di prediká. Ora nos ta alimentá nos mes diariamente ku Dios su Palabra, nos ta alimentá nos mes ku e “kuminda na su debido tempu,” i esei ta duna nos energia pa sigui den e ministerio.​—Mat. 24:​45-47.

Elżbieta a hasi kambionan fundamental den su estilo di bida pa e por a mehorá su ministerio.  El a bisa: “Mi a redusí konsiderablemente e kantidat di ora ku mi tabata wak televishon pa mi por tin mas tempu pa prepará pa e trabou di prediká. Tur anochi ora mi ta lesa Beibel, mi ta kòrda riba e hendenan ku mi a topa den teritorio. Mi ta buska tekstonan di Beibel i artíkulonan ku lo por yuda nan.”

Si bo ta sosegá bon, esei lo yuda bo mantené un nivel haltu di energia asina ku bo por partisipá plenamente den e ministerio. Di otro banda, demasiado rekreo por tin un efekto negativo riba e kualidat di bo trabou. Andrzej, un publikadó zeloso, a bisa: “Falta di sosiegu ta hiba na kansansio, i esei ta djis un stap for di desanimashon. Mi ta hasi tur loke mi por pa evitá esei.”​—Ekl. 4:6.

Apesar di nos esfuersonan sinsero, mayoria di hende no ta aseptá e bon nobo. Sinembargo, Yehova nunka lo lubidá nos trabou. (Heb. 6:10) Asta si hopi hende no ke papia ku nos, kisas nan lo papia di nos bishita despues ku nos bai. Nos bishita por tin un efekto similar na loke nos ta lesa relashoná ku Ezekiel, esta ku hende “lo sa ku tabatin un profeta meimei di nan.” (Eze. 2:5) Ounke ta sierto ku nos trabou di prediká no ta algu fásil, e ta duna nos benefisionan supstansial i e hendenan ku ta skucha nos tambe ta benefisiá.

Zygmunt a remarká: “E trabou di prediká ta yuda nos bisti e personalidat nobo i demostrá nos amor pa Dios i pa nos próhimo.” Andrzej a agregá: “Ta un privilegio pa partisipá den e trabou di salba bida akí. Nunka mas lo e ser ripití na e eskala akí ni den e sirkunstansianan akí.” Si bo perseverá den e trabou di prediká awe, bo tambe por haña hopi bendishon.​—2 Kor. 4:​1, 2.

[Plachinan na página 31]

Si nos ta perkurá pa nos nesesidatnan spiritual i físiko, esei ta yuda nos perseverá den e trabou di prediká