Jòb A Onra Yehova Su Nòmber

‘Bendishoná sea e nòmber di Yehova.’​—JÒB 1:21.

1. Ken probablemente a skirbi e buki di Jòb, i na ki tempu el a hasié?

MOISÉS tabatin rònt di 40 aña di edat ora el a hui for di Egipto pa Fárao no mat’é i a bai biba na Madian. (Echo. 7:​23, 29) Tempu ku e tabata biba den e pais ei, probablemente el a tende di e pruebanan di Jòb, kende tabata biba na Uz, un pais bisiña. Añanan despues, na final di nan biahe den desierto, Moisés i e nashon di Israel tabata den serkania di Uz. Kisas ta e tempu ei Moisés a tende di Jòb su último añanan. Segun historia di hudiunan, Moisés a skirbi e buki di Jòb un poko tempu despues di Jòb su morto.

2. Den ki manera e buki di Jòb ta fortalesé fe di Yehova su sirbidónan den nos tempu?

² E buki di Jòb ta fortalesé fe di Dios su sirbidónan den nos tempu. Den ki manera? E relato ta enfatisá e kuestion importante di Dios su soberania universal i e ta yuda nos komprondé susesonan masha importante i signifikativo ku a tuma lugá den shelu. Ademas, e relato di Jòb ta yuda nos komprondé mihó loke mantené integridat ta enserá i e ta yuda nos komprondé tambe pakiko Yehova sa permití su sirbidónan sufri. Es mas, e buki di Jòb ta identifiká Satanas e Diabel komo Yehova su Atversario prinsipal i e enemigu di hende. E buki ta mustra tambe ku hende imperfekto manera Jòb por keda leal na Yehova apesar di pruebanan severo. Laga nos analisá algun suseso ku e buki di Jòb ta deskribí.

Satanas A Pone Jòb na Prueba

3. Kiko nos sa di Jòb, i dikon Satanas a mek riba dje?

³ Jòb tabata un hòmber riku i prominente, un kabes di famia ku tabatin normanan moral haltu. Evidentemente, e tabata un konsehero ku hende a respetá i ku tabata yuda hende den nesesidat. Loke ta mas importante, Jòb tabata teme Dios. Beibel ta deskribí Jòb komo un hòmber “perfekto [“sin kulpa,” NW] i rekto, un hende ku tabata teme Dios i ku tabata apartá su mes for di maldat.” Pues, Jòb a bira e blanko di e atakenan di Satanas e Diabel pa motibu di su deboshon na Dios i no pa motibu di su rikesa ni su prominensia.​—Jòb 1:1; 29:​7-16; 31:1.

4. Kiko ta integridat?

⁴ E introdukshon di e buki di Jòb ta deskribí un reunion ku a tuma lugá den shelu. Durante e reunion akí, e angelnan a presentá nan mes dilanti Yehova. Satanas tambe tabata presente, i el a akusá Jòb. (Lesa Jòb 1:​6-11.) Ounke Satanas a papia di Jòb su pertenensianan, e tabata mas interesá pa kuestioná Jòb su integridat. E palabra “integridat” ta karga e idea di ser íntegro òf rekto, sin kulpa, hustu i intachabel. Segun Beibel, den kaso di hende, integridat ta indiká un deboshon di henter kurason na Yehova.

5. Kiko Satanas a pretendé den kaso di Jòb?

⁵ Satanas a pretendé ku Jòb a adorá Dios pa motibunan egoista. El a pretendé ku Jòb lo a keda leal na Dios basta Yehova a sigui rekompens’é i proteh’é. Pa duna un kontesta riba e akusashon di Satanas, Yehova a permití Satanas ataká e hòmber fiel ei. Komo resultado di esei, riba un solo dia, Jòb a haña sa ku hende a hòrta òf mata su bestianan, asesiná mayoria di su sirbidónan i ku su dies yunan a muri. (Jòb 1:​13-19) Satanas su atake a kibra Jòb su  integridat? Beibel ta deskribí e manera ku Jòb a reakshoná ora el a hañ’é ku kalamidat. Jòb a bisa: “SEÑOR a duna i SEÑOR a kita. Bendishoná sea e nòmber di [Yehova].”​—Jòb 1:21.

6. (a) Kiko a sosodé durante un otro reunion den shelu? (b) Ken Satanas tabatin na mente ora el a kuestioná Jòb su integridat na Yehova?

⁶ Despues, tabatin un otro reunion den shelu. Satanas a bolbe akusá Jòb; el a bisa: “Kueru pa kueru! Sí, tur loke un hende tin e lo duna pa su bida. Ma saka bo man awor i mishi ku su wesu i ku su karni; e lo maldishoná bo den bo kara.” Tuma nota ku Satanas a inkluí otro hende tambe den su akusashonnan. Ora Diabel a bisa ku ‘tur loke un hende tin lo e duna pa su bida,’ el a kuestioná no solamente e integridat di Jòb sino e integridat di tur “hende” ku ta adorá Yehova. Despues di esei, Dios a permití Satanas dal Jòb ku un malesa doloroso. (Jòb 2:​1-8) Pero esei no ta tur; Jòb a hañ’é ku mas prueba.

Ki Lès Nos Por Siña for di Jòb Su Aktitut?

7. Den ki maneranan Jòb su esposa i su bishitantenan a pone preshon riba dje?

⁷ Na prinsipio di Jòb su pruebanan, su esposa a sufri meskos kuné. E morto di su yunan i e pèrdida di e rikesa di famia lo mester a lag’é aplastá. Lo e mester a sintié masha afligí ora el a mira kon su esposo tabata sufri di un malesa doloroso. El a sklama na bos haltu i a bisa Jòb: “Ainda bo ta mantené bo integridat? Maldishoná Dios i muri!” Despues a bini tres hòmber—Elifaz, Bildad i Sofar—supuestamente pa konsolá Jòb. Pero en bes di esei, nan a usa rasonamentunan engañoso i a resultá di ta ‘konsoladónan miserabel’ òf molestoso. Por ehèmpel, Bildad a indiká ku Jòb su yunan a hasi malu i a meresé loke a pasa ku nan. Elifaz a insinuá ku Jòb su sufrimentu tabata un kastigu pa pikánan ku Jòb a kometé den pasado. El a asta kuestioná Yehova; el a insinuá ku E no ta balorá hende ku ta mantené nan integridat. (Jòb 2:​9, 11; 4:8; 8:4; 16:2; 22:​2, 3) Bou di tur e preshon fuerte ei, Jòb a mantené su integridat. Ta sierto ku el a aktua robes ora el a kuminsá “hustifiká su mes dilanti di Dios.” (Jòb 32:2) Sinembargo, el a keda fiel apesar di tur kos.

8. Ki bon ehèmpel Eliú a pone pa esnan ku ta duna konseho awe?

⁸ Despues di esei, nos ta lesa di Eliú, kende tambe a bin bishitá Jòb. Loke Eliú a hasi promé tabata skucha e argumentonan di Jòb i su tres kompañeronan. Ounke Eliú tabata mas yòn ku e kuater hòmbernan ei, el a desplegá mas sabiduria ku nan. El a papia ku Jòb ku rèspèt. Eliú a elogiá Jòb pa su bida rekto. Pero el a bisa tambe ku Jòb tabata demasiado preokupá pa proba ku e tabata un hòmber rekto i sin kulpa. Despues, Eliú a sigurá Jòb ku semper ta bale la pena pa sirbi Dios fielmente. (Lesa Jòb 36:​1 i 11.) Eliú ta un ekselente ehèmpel  pa esnan ku tin ku duna otro hende konseho awe. El a mustra pasenshi, a skucha ku atenshon, a duna elogio kaminda tabata posibel i a duna konseho edifikante.​—Jòb 32:6; 33:32.

9. Kon Yehova a yuda Jòb?

⁹ Finalmente, Jòb tabatin un eksperensia inkreibel ora Yehova a papia kuné! Beibel ta bisa: ‘Yehova a kontestá Jòb for di e warwarú.’ Usando un seri di pregunta, na un manera bondadoso pero tòg firme, Yehova a yuda Jòb korigí su manera di pensa. Jòb a aseptá e reprendementu di buena gana i a atmití: “Ami ta insignifikante . . . [mi] ta repentí den stòf i shinishi.” Despues ku Yehova a kaba di papia ku Jòb, El a ekspresá Su rabia kontra e tres kompañeronan di Jòb pasobra nan no a papia “loke ta rekto.” Jòb mester a hasi orashon pa nan. Despues, Yehova mes ‘a restorá e rikesanan di Jòb ora ku el a hasi orashon pa su amigunan, i Yehova a duna Jòb dòbel di tur loke e tabatin promé.’​—Jòb 38:1; 40:4; 42:​6-10.

Kon Profundo Nos Amor pa Yehova Ta?

10. Dikon Yehova no a ignorá Satanas òf destruyé?

¹⁰ Yehova ta e Kreador di universo i e Soberano di tur kreashon. Dikon e no a ignorá e akusashon di Diabel? Yehova tabata sa ku lo e no a resolvé e kuestion ku Satanas a lanta si el a ignorá Satanas òf destruyé. Diabel a pretendé ku Jòb, un sirbidó sobresaliente di Yehova, lo no a keda fiel si e pèrdè su rikesa. Pero Jòb a keda fiel apesar di prueba. Mas despues, Satanas a pretendé ku kualke hende lo bandoná Dios si nan mester sufri físikamente. Jòb a sufri, pero e no a kibra su integridat. Pues, Satanas a resultá di ta un mentiroso den kaso di e hòmber akí, kende a keda fiel ounke e tabata imperfekto. Kiko di otro adoradónan di Dios?

11. Den ki manera Hesus a duna un kontesta kompletu na e kuestion ku Satanas a lanta?

¹¹ De echo, kada sirbidó di Dios ku mantené su integridat apesar di kiko ku Satanas bin kuné ta demostrá den su kaso ku e akusashonnan di e enemigu kruel akí ta falsu. Hesus a bini na tera i a duna un kontesta kompletu na e kuestion ku Satanas a lanta. Hesus tabata un hòmber perfekto meskos ku nos promé tata, Adam. E echo ku Hesus a keda fiel te na morto a demostrá bon kla ku Satanas ta un mentiroso i ku su akusashonnan ta falsu.​—Rev. 12:10.

12. Ki oportunidat i responsabilidat kada sirbidó di Yehova tin?

¹² Sinembargo, Satanas ta sigui pone Yehova su adoradónan na prueba. Nos kada un tin e oportunidat i e responsabilidat di demostrá mediante nos integridat ku nos ta sirbi Yehova pasobra nos ta stim’é i no pa motibunan egoista. Kon nos ta mira e responsabilidat ei? Nos ta mir’é komo un privilegio pa demostrá nos lealtat na Yehova. Ademas, ta un konsuelo pa sa ku Yehova ta duna nos e fortalesa pa perseverá i ku, meskos ku tabata den kaso di Jòb, E ta permití nos pruebanan yega te na un límite.​—1 Kor. 10:13.

Satanas Ta un Apóstata i Atversario Rebelde

13. Ki detayenan e buki di Jòb ta revelá tokante Satanas?

¹³ Den e Skritura Griego Kristian, nos ta haña hopi informashon relashoná ku Satanas su oposishon kontra Yehova. I e buki di Revelashon ta siña nos ku pronto Yehova lo vindiká su soberania i finalmente destruí Satanas. E Skritura Hebreo tambe ta duna detaye di e manera bergonsoso ku Satanas a desafiá  Yehova i desviá humanidat. Den e buki di Jòb, nos ta haña mas detaye relashoná ku Satanas su proseder rebelde. Ora Satanas a presentá na e reunionnan den shelu, e no a asistí ku e intenshon di onra Yehova. E Diabel tabatin un aktitut malisioso i su intenshon tabata maligno. Despues ku el a akusá Jòb, i Yehova a permitié pone Jòb na prueba, “Satanas a bai for di e presensia di SEÑOR.”​—Jòb 1:12; 2:7.

14. Kon Satanas a trata ku Jòb?

¹⁴ Pues, e buki di Jòb ta identifiká Satanas komo e enemigu kruel di hende. Durante e lapso di tempu entre e reunion menshoná na Jòb 1:6 i esun deskribí na Jòb 2:1, Satanas a pone Jòb kruelmente na prueba. Beibel no ta bisa sí kuantu tempu esaki a dura. Debí na Jòb su fieldat, Yehova por a bisa Satanas: “Ainda [Jòb] ta mantené su integridat, maske ku bo a pone mi kontra dje, pa ruin’é sin motibu.” Pero Satanas no a atmití ku su akusashonnan kontra Jòb tabata falsu. Al kontrali, el a eksigí p’e pone Jòb bou di un otro prueba severo. Pues, Diabel a pone Jòb na prueba ora e tabata riku i tambe ora e tabata pober. Ta bisto anto ku Satanas no tin kompashon ni sikiera ku hende pober òf ku ta víktima di kalamidat. E tin rabia riba hende ku ta mantené nan integridat. (Jòb 2:​3-5) Di otro banda, Jòb su fieldat a mustra ku Satanas ta un mentiroso.

15. Kiko hende apóstata den nos tempu tin en komun ku Satanas?

¹⁵ Satanas tabata e promé kriatura ku a bira apóstata. Apóstatanan den nos tempu ta desplegá karakterístikanan similar na esnan di Diabel. Kisas nan mente ta venená debí na nan aktitut krítiko pa ku otro persona den e kongregashon, e ansianonan kristian òf e Kuerpo Gobernante. Algun apóstata ta kontra e uso di e nòmber divino, Yehova. Nan no ta interesá pa siña di Yehova òf pa obedes’é. Meskos ku nan tata, Satanas, hende apóstata intenshonalmente ta mek riba hende di integridat. (Juan 8:44) P’esei, no ta nada straño ku sirbidónan di Yehova ta evitá tur kontakto ku nan.​—2 Juan 10, 11.

Jòb A Onra Yehova Su Nòmber

16. Ki aktitut Jòb a desplegá pa ku Yehova?

¹⁶ Jòb a usa i onra e nòmber di Yehova. Asta ora e tabata aplastá debí na e notisia di e morto di su yunan, e no a atribuí nada inapropiá na Dios. Ounke Jòb eróneamente a asumí ku ta Dios a kousa su kalamidatnan, semper el a onra Yehova su nòmber. Despues, Jòb a deklará: “Mira, e temor di [Yehova], ta esei ta sabiduria; i pa apartá for di maldat ta komprondementu.”​—Jòb 28:28.

17. Kiko a yuda Jòb mantené su integridat?

¹⁷ Kiko a yuda Jòb mantené su integridat? Ta bisto ku el a kultivá un relashon íntimo ku Yehova promé ku el a hañ’é ku kalamidat.  Ounke nos no tin ningun evidensia ku Jòb tabata sa ku ta Satanas a desafiá Yehova, Jòb tabata determiná pa keda leal. El a bisa: “Te na mi morto lo mi no bandoná mi integridat.” (Jòb 27:5) Kon Jòb por a kultivá e relashon íntimo akí? Sin duda, el a balorá loke el a tende tokante e manera ku Yehova a trata ku Abraham, Isaak i Jakòb, kendenan tabata su famia djaleu. I dor di opservá e kreashon, Jòb por a diserní hopi kualidat di Yehova.​—Lesa Jòb 12:​7-9, 13 i 16.

18. (a) Kon Jòb a demostrá su deboshon na Yehova? (b) Den ki maneranan nos ta imitá Jòb su ekselente ehèmpel?

¹⁸ Loke Jòb a haña sa a dun’é e deseo di agradá Yehova. Regularmente e tabata ofresé sakrifisio por si akaso su miembronan di famia a hasi algu ku a desagradá Dios òf “a maldishoná Dios den nan kurason.” (Jòb 1:5) Asta ora Jòb tabata bou di prueba severo, el a sigui papia bon di Yehova. (Jòb 10:12) Ki un ekselente ehèmpel! Nos tambe mester atkerí konosementu eksakto di Yehova i di su propósito regularmente. P’esei, nos tin bon kustumbernan ku ta fortalesé nos relashon ku Yehova. Esakinan ta entre otro, e kustumber di studia Beibel, asistí na e reunionnan, hasi orashon i prediká e bon nobo. Es mas, nos ta hasi tur loke ta na nos alkanse pa laga otro hende konosé e nòmber di Yehova. I meskos ku Jòb su integridat a hasi Yehova kontentu, e integridat di Dios su sirbidónan djawe tambe ta hasi Yehova su kurason kontentu. Esei ta e tema ku nos lo trata den e siguiente artíkulo.

Bo Ta Kòrda?

• Dikon Jòb a hala atenshon di Satanas e Diabel?

• Ki pruebanan Jòb a soportá, i kon el a reakshoná?

• Kiko lo yuda nos mantené nos integridat meskos ku Jòb?

• Kiko e buki di Jòb ta siña nos tokante Satanas?

[Preguntanan di Estudio]

[Plachi na página 12]

E relato di Jòb ta hala nos atenshon riba e kuestion importante di Dios su soberania universal

[Plachi na página 14]

Ki sirkunstansianan por pone bo integridat na prueba?