Rekonosé i Apresiá e Moisés Mayor

“SEÑOR Dios lo lanta un profeta pa boso, manera ami, for di boso rumannan; na dje boso mester skucha.”​—ECHO. 3:22.

1. Den ki sentido Hesus a influensiá historia?

DOS mil aña pasá, e nasementu di un yu hòmber a impulsá un multitut di angel pa alabá Dios. I algun wardadó di karné den sabana a tende nan. (Luk. 2:​8-14) Trinta aña despues, e yu hòmber ei, awor komo un adulto, a kuminsá un ministerio ku a dura solamente tres aña i mei. Apesar di esei, el a trese un kambio grandi den historia di humanidat. E famoso historiadó di siglo 19, Philip Schaff, a sintié motivá pa deklará lo siguiente tokante e yònkuman akí: “E mes no a skirbi niun solo frase. Pero loke el a bisa i hasi a sirbi komo tema pa hopi sermon, diskurso, kòmbersashon, buki intelektual, obra di arte i kantika di alabansa. I esaki ta mas ku tur e gran hòmbernan di antigwedat i esnan di nos tempu huntu por a logra.” Ta klaru ku e hòmber sobresaliente ei tabata Hesukristu.

2. Kiko apòstel Juan a bisa di Hesus i Su ministerio?

² Apòstel Juan a skirbi un relato di Hesus su ministerio i den su konklushon el a bisa: “Tin hopi kos mas ku Hesus a hasi, ku si nan a wòrdu skirbí un pa un, mi ta suponé ku ni mundu henter lo no por a kontené e bukinan ku lo a wòrdu skirbí.” (Juan 21:25) Debí ku Hesus a bisa i hasi asina tantu kos durante e tres añanan i mei ei, Juan tabata sa ku ta solamente un parti chikitu di tur e kosnan ei e por a registrá. Apesar di esei, e susesonan históriko ku Juan a relatá den su Evangelio ta di gran balor.

3. Kon nos por haña un mihó komprondementu di Hesus su papel den Dios su propósito?

³ Fuera di e kuater relatonan importante di Evangelio, tin otro pasashinan di Beibel ku ta duna detaye tokante Hesus su bida ku ta fortalesé nos fe. Por ehèmpel, e relatonan bíbliko tokante algun hòmber fiel ku a biba promé ku Hesus ta kontené informashon ku ta yuda nos haña un mihó komprondementu di Hesus su papel den Dios su propósito. Laga nos konsiderá algun di esakinan.

 Hòmbernan Fiel Ku A Prefigurá Kristu

4, 5. Ken a prefigurá Hesus, i den ki maneranan?

⁴ Juan i e tres otro eskritornan di Evangelio a señalá na Moisés, David i Salomon komo hòmbernan ku a prefigurá Hesus komo e Ungí di Dios i futuro Rei. Den ki manera e sirbidónan ei di Dios a prefigurá Hesus, i kiko nos por siña for di e relatonan akí?

⁵ Brevemente, laga nos menshoná algun papel spesífiko ku nan tabatin. Beibel ta bisa ku Moisés tabata profeta, mediadó i libertadó. Hesus tambe a sirbi komo tal. David tabata un wardadó di karné i un rei ku a derotá Israel su enemigunan. Hesus tambe ta un rei viktorioso, i e ta un wardadó den e sentido ku e ta guia Dios su pueblo. (Eze. 37:​24, 25) Tanten ku Salomon tabata fiel, e tabata un gobernante sabí, i Israel tabatin pas bou di su reinado. (1 Rei. 4:​25, 29) Hesus tambe ta sumamente sabí i Beibel ta yam’é “Prens di Pas.” (Isa. 9:6) Ta klaru anto ku Kristu Hesus su papel ta similar na esun di e hòmbernan ei ku a biba promé kuné. Pero Hesus su papel den Dios su propósito ta superior. Na promé lugá, laga nos kompará Hesus ku Moisés i wak kon e komparashon ei ta yuda nos rekonosé i apresiá Hesus su papel den Dios su propósito mas plenamente.

Moisés A Prefigurá Hesus

6. Kon apòstel Pedro a splika su oyentenan ku ta importante pa skucha Hesus?

⁶ Djis despues di Pentekòste di aña 33 di nos era, apòstel Pedro a sita un profesia ku Moisés a duna i ku a kumpli den Hesukristu. Pedro tabata pará dilanti un multitut di hudiu den e tèmpel. E hendenan a keda “tur strañá” ora Pedro i Juan a kura un limosnero ku a nase lam. P’esei, nan tur a kore bini pa wak ta kiko a pasa. Pedro a splika nan ku e akto asombroso akí tabata resultado di Yehova su spiritu santu ku ta obra mediante Hesukristu. Despues, el a sita for di e Skritura Hebreo i a bisa nan: “Moisés a bisa: ‘SEÑOR Dios lo lanta un profeta pa boso, manera ami, for di boso rumannan; na dje boso mester skucha den tur kos ku e ta bisa boso.’”​—Echo. 3:​11, 22, 23; lesa Deuteronomio 18:​15, 18 i 19.

7. Dikon Pedro su oyentenan por a komprondé su deklarashon tokante e profeta mas grandi ku Moisés?

⁷ Probablemente, Pedro su oyentenan tabata konosé e palabranan ei di Moisés. Komo hudiu, nan tabatin masha rèspèt pa Moisés. (Deu. 34:10) Ku masha anhelo nan tabata spera e binida di un profeta ku tabata mas grandi ku Moisés. E profeta ei lo no tabata djis un sirbidó nombrá di Dios meskos ku Moisés. Mas bien lo e tabata e Mesias, “e Kristu di Dios, [Yehova] su Skohí.”​—Luk. 23:35.

Similaridat Entre Hesus i Moisés

8. Menshoná algun similaridat entre e bida di Moisés i esun di Hesus.

⁸ Den algun aspekto, Hesus su bida riba tera tabata similar na esun di Moisés. Por ehèmpel, ora nan tabata beibi, tantu Moisés komo Hesus a skapa di morto na man di un gobernante tirano. (Eks. 1:​22–2:10; Mat. 2:​7-14) Ademas, nan tur dos ‘a wòrdu yamá for di Egipto.’ Profeta Oseas a skirbi e siguiente palabranan di Yehova: “Tempu ku Israel tabata mucha, mi tabata stim’é, i for di Egipto mi a yama mi yu hòmber.” (Ose. 11:1) Oseas su palabranan ta referí na e tempu ku Yehova a usa Moisés, e lider ku El a nombra, pa guia Su “yu hòmber,” e nashon di Israel, i sak’é for di Egipto. (Eks. 4:​22, 23; 12:​29-37) Sinembargo, e palabranan di Oseas no a referí solamente na un suseso ku a pasa kaba sino tambe na algu ku lo mester a sosodé ainda. Loke el a bisa tabata un profesia ku a kumpli ora Hosé ku Maria a bolbe ku Hesus for di Egipto despues di morto di Rei Herodes.​—Mat. 2:15, 19-23.

9. (a) Ki milagernan Moisés i Hesus a hasi? (b) Menshoná otro similaridat entre Hesus i Moisés. (Wak e kuadro “Mas Similaridat Entre Hesus i Moisés,” na página 26.)

⁹ Tantu Moisés komo Hesus a hasi milager, i asina nan a demostrá ku nan tabatin e apoyo di Yehova. Segun Beibel, Moisés tabata e promé hende ku a hasi milager. (Eks. 4:​1-9) Moisés a hasi milager ku a enbolbé awa. Por ehèmpel, el a laga e awa di Riu Nilo i su plasnan di awa bira sanger; el a parti Laman Kòrá na dos i el a laga awa basha for di baranka den desierto. (Eks. 7:​19-21; 14:21; 17:​5-7) Hesus tambe a hasi milager ku awa. Su promé milager tabata ora el a laga awa bira biña na un fiesta di kasamentu. (Juan 2:​1-11) Despues, el a kalma e awanan turbulento di Laman di Galilea. I na un okashon, el a asta kana riba awa! (Mat. 8:​23-27; 14:​23-25) Bo por haña mas similaridat entre Moisés i Hesus, e Moisés Mayor, den e kuadro na página 26.

 Apresiá Kristu Komo un Profeta

10. Kiko ta un profeta berdadero, i dikon Moisés tabata un profeta asina?

¹⁰ Mayoria di hende ta pensa ku un profeta ta un persona ku ta profetisá futuro, pero esei no ta e úniko responsabilidat di un profeta. Un profeta berdadero ta sirbi komo un bosero pa Yehova i ta proklamá “e echonan poderoso di Dios.” (Echo. 2:​11, 16, 17) Algun di e kosnan ku un profeta por hasi ta anunsiá futuro susesonan, revelá aspektonan di Yehova su propósito òf proklamá Dios su huisio. Moisés tabata un profeta asina. El a profetisá kada un di e Dies Plaganan ku a bini riba Egipto. El a presentá e pakto di Lei na Sinaí. Ademas, el a siña e pueblo kiko ta Dios su boluntat. Sinembargo, tabatin un profeta mas grandi ku Moisés ku mester a bini despues.

11. Kon Hesus a kumpli ku e papel di Moisés Mayor komo profeta?

¹¹ Den siglo un promé ku nos era, Zakarias a sirbi komo un profeta ora el a revelá Dios su propósito relashoná ku su yu, Juan. (Luk. 1:76) E yu ei a bira Juan Boutista, kende a anunsiá e binida di e profeta mas grandi ku Moisés ku hende a spera asina tantu tempu—Hesukristu. (Juan 1:​23-36) Komo profeta, Hesus a profetisá hopi kos. Por ehèmpel, ora el a papia di su propio morto, el a bisa di antemano kon lo el a muri, unda lo el a muri i ken lo a mat’é. (Mat. 20:​17-19) Hesus su oyentenan a keda masha asombrá ora el a profetisá tambe ku Yerusalèm i su tèmpel lo a ser destruí. (Mar. 13:​1, 2) Su profesianan ta kumpli te den nos tempu.​—Mat. 24:​3-41.

12. (a) Kon Hesus a pone e base pa e trabou mundial di prediká? (b) Kon nos ta sigui Hesus su ehèmpel awe?

 ¹² Ademas di a profetisá futuro susesonan, Hesus a fungi tambe komo un predikadó i un maestro. El a prediká e bon nobo di e Reino di Dios, i no tabatin ningun hende ku a papia ku mas kurashi ku Hesus. (Luk. 4:​16-21, 43) E tabata un maestro úniko. Algun hende ku a tend’é a bisa: “Nunka un hende no a papia manera e hòmber akí ta papia.” (Juan 7:46) Hesus a hasi esfuerso pa plama e bon nobo ku zelo, i el a impulsá su disipelnan pa nan desplegá e mesun zelo ei pa e Reino. Asina, el a pone e base pa un trabou mundial di prediká i di hasi disipel ku ta sigui te awe. (Mat. 28:​18-20; Echo. 5:42) Aña pasá, 7.124.443 siguidó di Kristu a dediká 1.488.658.249 ora den e trabou di prediká e bon nobo di Reino i di siña hende ku a mustra interes den bèrdatnan bíbliko. Abo ta hasi bo máksimo esfuerso pa partisipá den e trabou ei?

13. Kiko lo yuda nos keda “alerta”?

¹³ No tin duda, Yehova a kumpli ku e profesia ku a bisa ku lo el a lanta un profeta manera Moisés. Ki efekto esaki tin riba bo? E no ta duna bo mas konfiansa ku Yehova lo kumpli ku profesianan inspirá ku tin di haber ku nos futuro serkano? Sí, meditashon riba e ehèmpel di e Moisés Mayor ta motivá nos pa keda “alerta i sobrio” relashoná ku loke Dios lo hasi pronto.​—1 Tes. 5:​2, 6.

Balorá Kristu Komo Mediadó

14. Den ki manera Moisés tabata mediadó entre e israelitanan i Dios?

¹⁴ Hesus tabata un mediadó meskos ku Moisés. Un mediadó ta intermediá entre dos partido. Yehova a usa Moisés komo mediadó ora El a sera e pakto òf aliansa di Lei ku e israelitanan. Si e israelitanan, òf yunan di Jakòb, lo a obedesé e leinan di Dios, nan lo a keda Dios su tesoro òf propiedat spesial, esta, su kongregashon. (Eks. 19:​3-8) E pakto ei tabata na vigor for di aña 1513 promé ku nos era te ku e promé siglo di nos era.

15. Den ki sentido Hesus ta un mediadó superior?

¹⁵ Na aña 33 di nos era, Yehova a sera un mihó pakto ku un Israel nobo, “e Israel di Dios,” ku a bira e kongregashon mundial ku ta konsistí di kristiannan ungí. (Gal. 6:16) Ounke e pakto pa kual Moisés a sirbi komo mediadó a inkluí leinan ku Dios a skirbi riba piedra, e pakto pa kual Hesus a sirbi komo mediadó ta superior. Dikon? Pasobra Dios a skirbi e leinan di e pakto akí den kurason di hende. (Lesa 1 Timoteo 2:5 i Hebreonan 8:10.) Pues, awor ta “e Israel di Dios” ta Dios su propiedat spesial, ‘un nashon ku sí ta produsí fruta’ di e Reino Mesiániko. (Mat. 21:43) Miembronan di e nashon spiritual ei ta e partisipantenan den e pakto nobo. Sinembargo, no ta nan so ta benefisiá di e pakto. Un multitut inkontabel di hende, sí, inkluso hopi hende ku ta morto aktualmente, lo risibí bendishonnan eterno for di e pakto superior ei.

Balorá Kristu Komo Libertadó

16. (a) Den ki maneranan Yehova a usa Moisés pa libra e pueblo di Israel? (b) Segun Eksodo 14:13, ken ta e Fuente di salbashon?

¹⁶ Algun desendiente di Israel tabata den peliger serio riba e último anochi promé ku nan salida for di Egipto. Tabata falta masha poko pa Dios su angel pasa dor di Egipto i mata tur primogénito. Yehova a bisa Moisés ku e primogénitonan di Israel por a skapa. Pero pa esei a sosodé, e israelitanan mester a kohe un poko sanger di e lamchi di Pasku i sprengu esaki riba e parti ariba i e dos bandanan di e kozein di e porta di e kasnan. (Eks. 12:​1-13, 21-23) I asina a sosodé tambe. Poko tempu despues, henter e nashon tabata den peliger serio. Nan a keda atrapá entre Laman Kòrá i e garoshinan di guera egipsio ku tabata persiguí nan. E biaha akí tambe Yehova a perkurá liberashon mediante Moisés, kende milagrosamente a parti e awanan di e laman ei na dos.​—Eks. 14:13, 21.

17, 18. Den ki maneranan Hesus ta un libertadó mas grandi ku Moisés?

¹⁷ E aktonan di liberashon ei tabata realmente grandioso. Pero e liberashon ku Yehova ta efektuá  mediante Hesus ta muchu mas grandi ainda. Mediante Hesus, hende obediente ta ser liberá for di sklabitut na piká. (Rom. 5:​12, 18) I e liberashon ei ta un liberashon òf “redenshon eterno.” (Heb. 9:​11, 12) E nòmber Hesus ta nifiká “Yehova Ta Salbashon.” Komo nos Libertadó òf Salbadó, Hesus ta libra nos for di nos pikánan di pasado i ta habri kaminda pa nos por tin un mihó futuro. Dor di libra su siguidónan for di sklabitut na piká, Hesus ta skapa nan di e furia di Dios i duna nan e oportunidat pa disfrutá di un relashon ku Yehova basá riba amor.​—Mat. 1:21.

¹⁸ Na su debido tempu, e liberashon for di piká ku Hesus ta perkurá lo libra nos for di e efektonan kruel di piká, manera malesa i asta morto. Pa bo por visualisá loke esei lo nifiká, konsiderá loke a pasa ora Hesus a bai kas di un sierto hòmber ku yama Jairo, kende su yu muhé di 12 aña a muri. Hesus a sigurá Jairo: “No tene miedu mas; kere solamente, i e lo wòrdu salbá.” (Luk. 8:​41, 42, 49, 50) I manera el a bisa, e mucha a lanta for di morto! Bo por imaginá bo kon kontentu su mayornan a keda? Si bo por imaginá bo esei, bo por tin un idea tambe kon kontentu nos lo ta ora “tur ku ta den graf lo tende [Hesus] su bos, i lo sali” ora e resurekshon tuma lugá. (Juan 5:​28, 29) No tin duda, Hesus ta un Salbadó, nos Libertadó!​—Lesa Echonan 5:31; Tito 1:4; Rev. 7:10.

19, 20. (a) Ki influensia meditashon riba Hesus su papel komo e Moisés Mayor tin riba nos? (b) Kiko nos lo konsiderá den e siguiente artíkulo?

¹⁹ E echo ku nos ta konsiente ku nos por yuda hende benefisiá di loke Hesus a hasi pa salbá nos ta motivá nos pa partisipá den e trabou di prediká i siña. (Isa. 61:​1-3) Ademas, meditashon riba Hesus su papel komo e Moisés Mayor ta fortalesé nos konfiansa ku lo e libra su siguidónan ora e bini pa ehekutá huisio riba e malbadonan.​—Mat. 25:​31-34, 41, 46; Rev. 7:​9, 14.

²⁰ Sí, Hesus ta e Moisés Mayor. El a hasi hopi kos maravioso ku Moisés hamas lo por a hasi. Hesus su palabranan komo profeta i su akshonnan komo mediadó ta influensiá henter e famia humano. Komo libertadó, Hesus ta trese salbashon eterno pa humanidat i no un salbashon temporal. Sinembargo, hòmbernan fiel di antigwedat por siña nos mas kos tokante Hesus. Den e siguiente artíkulo nos lo konsiderá den ki sentido Hesus tabata e David i e Salomon Mayor.

Bo Por Splika?

Den ki sentido Hesus ta e Moisés Mayor

• komo profeta?

• komo mediadó?

• komo libertadó?

[Preguntanan di Estudio]

[Kuadro/​Plachi na página 26]

Mas Similaridat entre Hesus i Moisés

□ Nan tur dos a bandoná nan posishon haltu pa por sirbi Yehova i su pueblo.​—2 Kor. 8:9; Fil. 2:​5-8; Heb. 11:​24-26.

□ Nan tur dos a sirbi komo un persona ungí òf nombrá pa Yehova.​—Mar. 14:​61, 62; Juan 4:​25, 26; Heb. 11:26.

□ Nan tur dos a bini den nòmber di Yehova, esta, komo su representante.​—Eks. 3:​13-16, NW; Juan 5:43; 17:​4, 6, 26.

□ Nan tur dos tabata hende mansu òf humilde.—Num. 12:3; Mat. 11:​28-30.

□ Moisés tabata enbolbí den alimentá multitut di hende; Hesus a sirbi komo e pan di bida òf pan bibu pa multitut di hende.​—Eks. 16:12; Juan 6:​48-51.

□ Nan tur dos a sirbi komo hues i dunadó di lei.​—Eks. 18:13; Mal. 4:4; Juan 5:​22, 23; 15:10.

□ Dios a duna tur dos outoridat komo kabes di Su kas.​—Num. 12:7, NW; Heb. 3:​2-6.

□ Beibel ta deskribí tur dos komo fiel testigu di Yehova.​—Heb. 11:​24-29; 12:1; Rev. 1:5.

□ Despues ku Moisés a muri, Dios a sòru pa hende no haña su kurpa. Den kaso di Hesus, El a hasi meskos.​—Deu. 34:​5, 6; Luk. 24:​1-3; Echo. 2:31; 1 Kor. 15:50; Hudas 9.