Un Grupo Chikitu Lo Goberná, Pero Hopi Hende Lo Benefisiá
Un Grupo Chikitu Lo Goberná, Pero Hopi Hende Lo Benefisiá
FOR di tempu di e apòstelnan, Dios a kuminsá skohe un grupo limitá di kristiannan fiel for di humanidat i el a adoptá nan komo yu. E kambio ku e yunan adoptá akí ta eksperensiá ta asina kompletu ku e Palabra di Dios ta bisa ku nan ta nase di nobo. E propósito di nasementu di nobo ta pa prepará e sirbidónan ei di Dios ku a nase di nobo pa bira gobernante den shelu. (2 Timoteo 2:12) Pa nan sirbi komo gobernante, Dios ta lanta nan for di morto i duna nan bida den shelu. (Romanonan 6:3-5) For di shelu, “nan lo reina riba tera” huntu ku Kristu.—Revelashon 5:10; 11:15.
Sinembargo, e Palabra di Dios ta bisa tambe ku otronan, fuera di e personanan ku nase di nobo, lo risibí salbashon eterno. Beibel (tantu e Skritura Hebreo komo e Skritura 1 Juan 2:2.
Griego Kristian) ta bisa ku Dios su propósito ta pa salba dos grupo di hende. Esakinan ta un grupo chikitu di gobernante ku lo biba den shelu i un grupo grandi di súpditonan di e Reino ku lo biba riba tera. Por ehèmpel, tuma nota di loke apòstel Juan a skirbi su rumannan den fe ku a nase di nobo. El a bisa relashoná ku Hesus: “E mes ta e propisiashon pa nos pikánan, i no pa di nos [e grupo chikitu] so, ma tambe pa esnan di henter mundu [e grupo grandi].”—Di mes manera, apòstel Pablo a skirbi: “E kreashon [e grupo grandi] ta spera ku gran antisipashon riba e revelashon di e yunan di Dios [e grupo chikitu].” (Romanonan 8:19-21) Kon nos mester komprondé e palabranan di apòstel Juan i apòstel Pablo? Asin’akí: E personanan ku nase di nobo lo bira parti di un gobièrnu selestial. Ku ki propósito? Pa trese benefisionan eterno pa miónes di hende, súpditonan di e gobièrnu di Dios ku lo biba riba tera. P’esei, Hesus a siña su disipelnan pa resa: “Ku bo reino bin. Ku bo boluntat sosodé na tera meskos ku den shelu.”—Mateo 6:10.
E Skritura Hebreo tambe ta menshoná dos grupo ku lo haña salbashon. Por ehèmpel, tuma nota di loke Yehova a bisa Abraham, e antepasado di Hesus: “Pa medio di bo simia [e grupo chikitu] tur nashon di tera [e grupo grandi] sigur lo bendishoná nan mes.” (Génesis 22:18, NW) Sí, e “simia” di Abraham lo trese bendishon pa hende di tur nashon.
Ken ta e “simia” òf desendiente ei? Hesukristu i e personanan ku a nase di nobo, e yunan adoptá di Dios, ta forma e simia. Apòstel Pablo a splika: “Si boso ta pertenesé na Kristu, e ora ei boso ta desendiente di Abraham.” (Galationan 3:16, 29) I kiko ta e bendishonnan ku e “simia” ta trese pa hende di tur nashon? E privilegio di ta personanan ku tin Dios su aprobashon i ku por gosa di bida pa semper den un paradeis riba tera. E salmista David a profetisá: “E hustunan lo heredá e tera, i lo biba den dje pa semper.”—Salmo 37:29; Isaias 45:18; Revelashon 21:1-5.
Sí, un grupo chikitu lo forma e gobièrnu den shelu, pero e benefisionan di e gobièrnu ei—bida eterno riba tera huntu ku tur su otro bendishonnan—lo ta disponibel pa hopi hende. Ohalá abo ku bo famia lo ta entre esnan ku lo risibí e benefisionan eterno ku e Reino di Dios lo trese.
[Plachi na página 10]
Miónes di hende lo ser bendishoná ku bida eterno riba tera. Abo lo ta entre nan?