Bo Tabata Sa?

Kiko tabata Dios su punto di bista di e práktika di astrologia di e israelitanan?

Astrologia ta e estudio di e moveshonnan di planeta, solo, luna i strea basá riba e kreensia ku e moveshonnan akí por tin un influensia riba bida di hende. Segun ku tera ta drei un biaha pa aña rònt di solo, mirá for di tera, ta parse ku e konstelashonnan òf gruponan di strea ta kambia di posishon. Desde antigwedat, hende a opservá e kambionan akí i a duna nan hopi nifikashon.

Probablemente, astrologia a originá serka e promé babilonionan, kendenan tabata adorá strea i konstelashon di strea. Ora ku e israelitanan a desviá for di adorashon berdadero, nan a kuminsá praktiká e forma di adorashon akí. Pa tempu ku Rei Josias di Huda a kuminsá goberná, nan tabata praktiká astrologia den henter e pais. Ma Dios su punto di bista riba e asuntu akí tabata masha kla. Siglonan promé, e Lei di Moisés a prohibí adorashon di strea, i esun ku a kibra e lei ei lo a haña kastigu di morto.​—Deuteronomio 17:​2-5.

Entre e medidanan ku Rei Josias a tuma pa restorá e adorashon di e habitantenan di Huda tabatin e prohibishon pa hasi sakrifisio na ‘solo, luna, signonan di zodiak i henter e ehérsito di shelu.’ Segun e relato di Beibel, e rei a tuma e medida akí pasobra e tabata ke ‘sigui Yehova i warda su mandamentunan.’ (2 Reinan 23:​3-5) Esei ta un ehèmpel asta pa hende awe ku ke adorá Dios “den spiritu i bèrdat.”​—Juan 4:24.

Ken tabata e “Rumannan Morocho” ku Echonan 28:11 ta menshoná?

Segun e buki bíbliko di Echonan, ora apòstel Pablo tabata rumbo pa Roma, el a nabegá for di Malta pa Puteoli riba un barku ku na e kabes di e barku tabatin e figura di e “Rumannan Morocho.” (Echonan 28:11) Uso di e figura ei tabata popular entre nabegante- i biaheronan di antigwedat.

Segun mitologia griego i romano, Leda ku Zeus (konosí tambe komo Júpiter) tabatin e yu hòmbernan ohochi, òf morocho, Kastor i Poluks. Hende tabata kere ku e “Rumannan Morocho” akí (òf Yunan di Zeus) tabata, entre otro, nabegantenan ábil ku tabatin poder riba bientu i ola di laman. P’esei, nan a kuminsá adorá nan komo patrono, òf dios-protektor, di nabegantenan. Biaheronan tabata ofresé sakrifisio na nan i roga nan pa protekshon durante di tormenta. Por lo general, hende tabata kere ku e diosnan ohochi akí tabata manifestá nan mes i nan poder protektivo den forma di e kandela di San Telmo, ku ta un lus ku algun biaha sa bria den mast di barku durante di tormenta.

Hopi griego i romano tabata adorá Kastor i Poluks, i un fuente antiguo ta menshoná spesífikamente ku hende den e área di Sirene, Nort Afrika, tambe tabata adorá nan. E barku ku Echonan ta menshoná a bini for di Alehandria, Egipto, ku tabata keda djis ei banda.

[Plachi na página 31]

piedra di babilonia ku rei nazimaruttash grabá riba dje i e konstelashonnan di strea

[Plachi na página 31]

moneda di denario ku kara di e “rumannan morocho,” aña 114-113 promé ku nos era

[Rekonosementu pa Potrèt na página 31]

Piedra: Réunion des Musées Nationaux/Art Resource, NY; moneda: Courtesy Classical Numismatic Group, Inc./cngcoins.com