Hóbennan​—Laga Boso Progreso Ta Bisto

“[“Reflekshoná riba,” NW] e kosnan akí; sea dediká na nan, pa bo progreso por ta bisto pa tur hende.”​—1 TIM. 4:15.

1. Kiko Dios ta deseá pa e hóbennan?

“REGOSIHÁ, hóben, durante di bo hubentut, i laga bo kurason tin plaser durante di e dianan di bo adolesensia.” (Ekl. 11:9) Esei ta loke Rei Salomon di Israel di antigwedat a skirbi. Boso por tin sigur ku Yehova Dios, kende ta e Originador di e mensahe akí, ta deseá pa boso ta felis no solamente durante boso hubentut sino tambe ora boso bira mas grandi. Pero, hopi bes ta nèt durante hubentut un persona ta kometé erornan ku ta afektá su felisidat den futuro. Asta e hòmber fiel Jòb a lamentá ku el a ‘heredá konsekuensia di e inikidatnan di su hubentut.’ (Jòb 13:26) Durante adolesensia i e añanan di bida ku ta sigui, un kristian hóben hopi bes tin ku tuma desishonnan serio. Si e tuma desishon robes, esei por laga atras sikatris emoshonal profundo i krea problema ku lo afekt’é pa e restu di su bida.​—Ekl. 11:10.

2. Hóbennan por evitá di kometé erornan serio dor di apliká ki prinsipio bíbliko?

 ² Hóbennan mester usa sano huisio pa tuma bon desishon. Konsiderá e konseho ku apòstel Pablo a duna e korintionan. El a skirbi: “No sea mucha den boso pensamentu . . . Madurá den boso pensamentu.” (1 Kor. 14:20) Pues, loke por yuda hóbennan pa no kometé erornan serio ta si nan sigui e konseho pa desaroyá e abilidat di pensa i rasoná manera un persona madurá.

3. Kiko bo tin ku hasi pa alkansá madures?

³ Hóbennan, tene na mente ku boso tin ku hasi esfuerso si boso ke alkansá madures. Pablo a bisa Timoteo: “No laga ningun hende menospresiá bo hubentut, ma mas bien den palabra, kondukta, amor, fe i puresa, demostrá bo mes di ta un ehèmpel pa esnan ku ta kere. . . . Okupá bo mes ku lesamentu di Skritura, ekshortashon i siñamentu. . . . [Reflekshoná riba] e kosnan akí; sea dediká na nan, pa bo progreso por ta bisto pa tur hende.” (1 Tim. 4:​12-15) Hóbennan kristian tin ku progresá i laga e progreso ei ta bisto pa otro hende.

Kiko Progreso Ta Enserá?

4. Kiko hasi progreso spiritual ta enserá?

⁴ Hasi progreso ta nifiká bai dilanti, mehorá. Pablo a urgi Timoteo pa sigui hasi progreso den abla, kondukta, amor, fe i puresa, i tambe den e manera ku e ta kumpli ku su ministerio. E mester a hasi esfuerso pa por ta un bon ehèmpel pa otro hende. P’esei Timoteo mester a sigui hasi progreso spiritual.

5, 6. (a) Ki tempu Timoteo su progreso a kuminsá bira bisto? (b) Kon hóbennan djawe por hasi progreso manera Timoteo?

⁵ Tempu Pablo a skirbi e konseho akí entre aña 61 i 64 di nos era, ya Timoteo tabatin eksperensia komo ansiano kaba. No ta e ora ei el a kuminsá hasi progreso spiritual. Na aña 49 òf 50 di nos era, tempu ku Timoteo probablemente tabatin rònt di 20 aña, “e rumannan ku tabata na Listra i Ikonio tabata duna bon testimonio di dje,” ya ku nan a mira su progreso spiritual. (Echo. 16:​1-5) E tempu ei, ora Pablo a hasi su biahe komo misionero, el a bai ku Timoteo huntu kuné. Despues di opservá Timoteo su progreso pa algun luna, Pablo a mand’é Tesalónika pa e konsolá i fortalesé e kristiannan den e stat ei. (Lesa 1 Tesalonisensenan 3:​1-3 i 6.) Sin duda, Timoteo su progreso a bira bisto pa otronan ora e tabata yòn ainda.

⁶ Hóbennan den kongregashon, hasi esfuerso awor pa kultivá e kualidatnan spiritual nesesario pa boso progreso por ta bisto den boso manera di biba komo kristian i den boso abilidat di siña otro hende e bèrdatnan bíbliko. For di tempu ku Hesus tabatin 12 aña, e “tabata krese den sabiduria.” (Luk. 2:52) Ban wak tres aspekto di bo bida den kua bo por hasi progreso: (1) ora bo enfrentá problema, (2) segun ku bo ta prepará pa matrimonio i (3) segun ku bo ta hasi esfuerso pa bira “un bon sirbidó.”​—1 Tim. 4:6.

Enfrentá Problema ku “Sano Huisio”

7. Kon situashonnan difísil por afektá hóbennan?

⁷ Un kristian di 17 aña ku yama Carol a bisa: “Tabatin bes ku mi a sinti mi asina kansá emoshonalmente, físikamente i mentalmente ku mi no tabatin gana di lanta mainta.” * Dikon e tabata sintié asina kibrá? Wèl, ora Carol tabatin dies aña, su mayornan a divorsiá, i e mester a biba huntu ku su mama, kende a bandoná e normanan moral di Beibel. Kisas abo tambe ta konfrontando algun situashon hopi difísil ku no tin masha chèns di mehorá.

8. Ki problemanan Timoteo a enfrentá?

⁸ Timoteo tambe a enfrentá sirkunstansianan difísil miéntras e tabata hasi progreso  spiritual. Por ehèmpel, e tabata ‘enfermo frekuentemente’ pa motibu di su stoma. (1 Tim. 5:23) Ora Pablo a manda Timoteo Korinto p’e trata ku sierto problema kousá pa personanan ku a reta apòstel Pablo su outoridat, Pablo a pidi e kongregashon pa nan koperá pa asina Timoteo no tin nodi sinti “temor” ora e ta serka nan. (1 Kor. 4:17; 16:​10, 11) Ta parse ku Timoteo tabata tímido.

9. Kiko sano huisio ta enserá, i kiko ta e diferensia entre sano huisio i un spiritu di temor?

⁹ Pa yuda Timoteo, Pablo a rekord’é despues: “Dios no a duna nos un spiritu di temor, sino di poder i di amor i di sano huisio.” (2 Tim. 1:7) “Sano huisio” ta enserá pensa i rasoná na un manera sabí. E ta enserá tambe enfrentá kosnan manera nan ta i no manera abo lo deseá pa nan ta. Pero algun hóben ku no a madurá ainda tin un spiritu di temor i ta purba hui pa situashonnan ku ta kousa tenshon dor di drumi di mas, wak televishon di mas, bebe di mas, usa droga, bai fiesta konstantemente òf dor di kometé inmoralidat seksual. Beibel ta urgi kristiannan “pa renunsiá impiedat i deseonan mundano i pa biba huisioso, hustu i santu den e siglo presente.”​—Tito 2:12.

10, 11. Kon sano huisio ta fortalesé nos spiritualmente?

¹⁰ Beibel ta urgi “hòmbernan hóben pa ta [di sano huisio].” (Tito 2:6) Si bo sigui e konseho akí lo bo hasi orashon i dependé riba e forsa ku Dios ta duna ora bo enfrentá problema. (Lesa 1 Pedro 4:7.) Di e manera ei, lo bo haña berdadero konfiansa den “e forsa ku Dios ta duna.”​—1 Ped. 4:11.

¹¹ Sano huisio i orashon ta loke a yuda Carol. El a bisa: “E echo ku mi mester a tuma un posishon firme kontra mi mama su bida inmoral tabata un di e kosnan mas difísil ku mi mester a hasi. Pero orashon a ègt yuda mi. Mi sa ku Yehova ta ku mi, p’esei mi no tin miedu mas.” Kòrda, ora bo perseverá bou di prueba, esei por fortalesé bo i hasi bo un mihó persona. (Sal. 105:​17-19; Lam. 3:27) Sea loke sea bo pasa aden, nunka Dios lo bandoná bo. E lo “fortalesé bo.”​—Isa. 41:10.

Prepará pa un Matrimonio Eksitoso

12. Dikon un kristian ku kier kasa mester apliká e prinsipio ku tin na Proverbionan 20:25?

¹² Tin personanan hóben a kore kasa, pensando ku esei lo ta e solushon pa infelisidat, soledat, pa un bida laf i problema na kas. Sinembargo, e voto matrimonial ta un asuntu serio. Den tempu bíbliko tin hende a kore hasi un promesa òf voto sagrado òf santu sin analisá kuidadosamente kiko esei ta enserá. (Lesa Proverbionan 20:25.) Tin bes, personanan hóben no ta tuma tempu pa pensa seriamente riba e kosnan ku nan tin ku hasi pa e matrimonio por bai bon. Pero despues nan ta deskubrí ku esei ta enbolbé hopi mas kos ku nan a kere.

13. Esnan ku tin pensá di kuminsá namorá tin ku hasi nan mes ki pregunta, i ki konseho útil tin pa nan?

 ¹³ Pues promé ku bo kuminsá namorá, puntra bo mes: ‘Pakiko mi kier kasa? Kiko ta mi ekspektativanan? Esaki lo ta e persona bon pa mi? Realmente mi ta prepará pa kumpli ku mi responsabilidatnan matrimonial?’ Pa yuda bo hasi un eksaminashon profundo, “e esklabo fiel i prudente” a publiká artíkulonan spesífiko riba e tópiko akí. * (Mat. 24:​45-47) Mira e informashon ei komo konseho di Yehova. Evaluá kuidadosamente loke e informashon ta bisa i aplik’é. Nunka no bira “manera kabai òf manera mula, ku no tin komprondementu.” (Sal. 32:​8, 9) Madurá den bo pensamentunan pa loke ta trata e kosnan ku bo tin ku hasi pa e matrimonio por bai bon. Si bo ta pensa ku bo ta kla pa namorá, kòrda pa semper bo ta ‘un ehèmpel den puresa.’​—1 Tim. 4:12.

14. Ora bo imitá e personalidat di Kristu, kon esei lo yuda bo si bo kasa?

¹⁴ Madures spiritual ta trese felisidat durante matrimonio tambe. Un kristian madurá ta hasi esfuerso pa alkansá “e midí di e estatura di e plenitut di Kristu.” (Efe. 4:​11-14) E ta traha duru pa desaroyá e personalidat di Kristu. Kristu, nos Ehèmpel, “no a agradá su mes.” (Rom. 15:3) Ora tantu e esposo komo e esposa ta sigui buska no nan mes interes sino esun di e otro, pas i trankilidat lo reina den nan bida di famia. (1 Kor. 10:24) E esposo lo mustra amor di sakrifisio propio, i e esposa lo ta desididu pa keda sumiso na su esposo meskos ku Hesus ta sumiso na su Kabes.​—1 Kor. 11:3; Efe. 5:25.

“Kumpli ku Bo Ministerio Plenamente”

15, 16. Kon bo por laga bo progreso ta bisto den e ministerio?

¹⁵ Halando atenshon na Timoteo su asignashon importante, Pablo a skirbi: “Mi ta enkargá bo solemnemente dilanti Dios i Kristu Hesus, . . . prediká e palabra, okupá bo den dje urgentemente.” El a sigui bisa: “Hasi e trabou di un predikadó di evangelio, kumpli ku bo ministerio plenamente.” (2 Tim. 4:​1, 2, 5, NW) Pa kumpli ku e asignashon akí, Timoteo mester a ser “alimentá ku e palabranan di e fe.”​—Lesa 1 Timoteo 4:6.

¹⁶ Kon bo por ser “alimentá ku e palabranan di e fe”? Pablo a skirbi: “Okupá bo mes ku lesamentu di Skritura, ekshortashon i siñamentu. [Reflekshoná riba] e kosnan akí;  sea dediká na nan.” (1 Tim. 4:​13, 15) Pa un hende por mehorá, e mester ta diligente den su estudio personal. E ekspreshon “sea dediká” ta ser tradusí “sea intensamente okupá” den e Tradukshon di Mundu Nobo. Kon ta bai ku bo estudio personal? Bo ta intensamente okupá ku e kosnan ‘profundo di Dios’? (1 Kor. 2:10) Òf bo ta studia aribariba? Ora bo reflekshoná òf meditá riba loke bo ta studia, esei por motivá bo kurason.​—Lesa Proverbionan 2:​1-5.

17, 18. (a) Ki abilidat bo mester hasi esfuerso pa desaroyá? (b) Si bo kultivá e mesun disposishon ku Timoteo, kon esei lo yuda bo den sirbishi?

¹⁷ Un pionero hóben ku yama Michelle a bisa: “Pa mi por ta realmente efektivo den sirbishi, mi tin un bon programa di estudio personal, i mi ta asistí regularmente na reunion. Komo resultado, mi ta progresando spiritualmente ketu bai.” Sin duda, e trabou di pionero lo yuda bo bira mas ábil den usa bo Beibel den sirbishi i yuda bo hasi progreso spiritual. Hasi esfuerso pa bo por ta un bon lesadó i duna komentarionan edifikante na e reunionnan kristian. Komo un hóben spiritual, ora bo haña un parti di studiante den e Skol di Ministerio Teokrátiko, lo bo kier hasi bon preparashon pa e por ta instruktivo, hasiendo bon uso di e informashon asigná.

¹⁸ ‘Hasi e trabou di un predikadó di evangelio’ ta enserá bira mas efektivo den bo sirbishi i yuda otro hende haña salbashon. Pa bo logra esaki ta nesesario pa bo desaroyá e “arte di siña.” (2 Tim. 4:2, NW) Dor di traha den sirbishi ku esnan ku tin eksperensia den e trabou di prediká, lo bo por opservá kon nan ta siña otro hende i bo por siña di nan meskos ku Timoteo a siña for di Pablo ora nan a traha huntu. (1 Kor. 4:17) Papiando di esnan ku el a yuda, Pablo a bisa ku e no solamente a kompartí e bon nobo ku nan sino tambe el a duna su “mes bida,” es desir, el a usa su bida pa yuda nan, pasobra nan a bira masha stimá p’e. (1 Tes. 2:8) Pa sigui Pablo su ehèmpel den e ministerio, bo mester tin e mesun disposishon ku Timoteo, kende tabata interesá sinseramente den otro hende i a traha duru pa e adelanto di e “evangelio.” (Lesa Filipensenan 2:​19-23.) Bo ta demostrá e spiritu di sakrifisio propio akí den bo sirbishi?

Progreso Ta Duna Berdadero Satisfakshon

19, 20. Dikon progreso spiritual ta duna goso?

¹⁹ Un hende ku kier hasi progreso spiritual tin ku hasi esfuerso. Si bo desaroyá bo abilidat di siña otro hende, ku tempu, lo bo tin e privilegio di ‘hasi hopi hende riku’ spiritualmente, i nan lo bira bo “goso òf korona di gloria.” (2 Kor. 6:10; 1 Tes. 2:19) Fred, un sirbidó di tempu kompletu, a splika: “Awor mas ku nunka, mi ta dediká mas tempu na yuda otro hende. Mi no por nenga ku tin mas felisidat den duna ku tin den risibí.”

²⁰ Daphne, un ruman muhé hóben ku ta pionero, a eksperensiá goso i satisfakshon segun ku e tabata krese spiritualmente. El a bisa: “Mi a desaroyá un relashon mas íntimo ku Yehova segun ku mi a siña mas tokante dje. Ora bo agradá Yehova plenamente segun bo abilidat, bo ta sinti bo hopi bon—ègt satisfecho!” Maske no ta tur ora hende ta rekonosé bo progreso spiritual, Yehova sí semper ta mir’é i balor’é. (Heb. 4:13) Kristiannan hóben, sin duda, boso por duna gloria i alabansa na nos Tata selestial. Sigui alegrá su kurason segun ku boso ta laga boso progreso ta bisto.​—Pro. 27:11.

[Nota]

Kiko Bo A Siña?

• Kiko progreso spiritual ta enserá?

• Kiko bo por hasi pa bo progreso ta bisto . . .

ora bo ta enfrentá problema?

ora di prepará pa matrimonio?

den e ministerio?

[Preguntanan di Estudio]

[Plachi na página 17]

Orashon por yuda bo trata ku problema ku éksito

[Plachi na página 18]

Kon publikadónan hóben por desaroyá métodonan efektivo di siña otro hende?