Nos Lektornan Ta Puntra

Tur Kurashon Milagroso Ta Bini di Dios?

No tin duda ku Yehova Dios tin e poder pa kura hende. Nos no tin duda tampoko ku e por duna e poder ei na su adoradónan. Por ehèmpel, den tempu di e apòstelnan, e abilidat pa hasi kurashon milagroso tabata un di e donnan spesial di Dios su spiritu santu. Apòstel Pablo a skirbi: “Na kada un e manifestashon di e spiritu ta wòrdu duná na bienestar di tur. Pasobra na esun ta wòrdu duná e palabra di sabiduria dor di e spiritu, . . . na un otro donnan di kura hende dor di e mesun spiritu, . . . na un otro profesia,  . . . i na un otro vários sorto di lenga.”​—1 Korintionan 12:​4-11.

Sinembargo, den e mesun karta na e korintionan, Pablo a skirbi ku e donnan milagroso di Dios su spiritu santu lo yega na un fin. El a bisa: “Pa loke ta donnan di profesia, nan lo wòrdu kitá; pa loke ta lenganan, eseinan lo stòp; pa loke ta konosementu, esei lo wòrdu kitá.”​—1 Korintionan 13:8.

Durante e promé siglo, Hesukristu i su apòstelnan a hasi kurashonnan milagroso. Tempu ku e kongregashon kristian tabata resien establesí, e donnan di spiritu santu, inkluso e abilidat di hasi kurashon, a sirbi pa duna gloria na Dios. Ademas, nan tabata un indikashon di Yehova su aprobashon i bendishon riba e kongregashon kristian resien establesí. Pero, unabes e kongregashon kristian a keda kompletamente establesí, lo e no a sigui usa donnan spesial komo prueba di Dios su aprobashon. Mas bien, e kristiannan lo a mustra esei mediante fe, speransa i amor inkebrantabel. (Juan 13:35; 1 Korintionan 13:13) Pues, rònt di aña 100 di nos era, e abilidat di hasi kurashon milagroso no tabata sirbi mas komo prueba di Dios su aprobashon. *

Pero, kisas bo ta puntra bo mes: ‘Dikon mi ta tende notisia di kurashonnan milagroso te ainda?’ Por ehèmpel, un informe den un korant a relatá tokante un hòmber ku supuestamente tabatin kanser. E tabatin tumor den kabes, na su nirnan, i asta den wesu. Su futuro tabata pinta skur, te ora ku Dios “a papia” kuné. Segun e relato, algun dia despues, su kanser a disparsé.

Ora bo tende di un kaso asina, ta bon pa bo puntra bo mes: ‘Esei ta algu ku a sosodé di bèrdat? Tin prueba médiko bon dokumentá pa apoyá e ponensia ei? I asta si ta parse ku e kurashon ei a sosodé, Beibel ta siña ku Dios ta responsabel pa tur kurashon ku ta parse di a sosodé milagrosamente?’

E kontesta riba e último pregunta ei ta masha importante. Pasobra Hesus a spièrta su siguidónan: “Tene kuidou ku profeta falsu .  . . Hopi lo bisa mi den e dia ei: ‘Señor, Señor, nos no a profetisá den bo nòmber, i den bo nòmber a saka demoño, i den bo nòmber a hasi hopi milager?’ E ora ei lo mi deklará na nan: ‘Nunka mi no a konosé boso; bai for di mi, boso ku ta hasi inikidat.’”​—Mateo 7:​15, 21-23.

Ta klaru anto ku e asina yamá kurashon milagroso por bini di un fuente ku no ta Dios. Pa evitá ku nos ta ser gañá pa hende ku ta pretendé di hasi obranan milagroso den nòmber di Dios, nos tin ku haña konosementu eksakto di Dios. Ademas, nos mester usa nos abilidat ku Dios a duna nos pa rasoná i tambe siña kon pa identifiká esnan ku sí ta hasi e boluntat di Dios.​—Mateo 7:​16-19; Juan 17:3; Romanonan 12:​1, 2.

[Nota]