Demostrá “Zelo den Hasimentu di Bon Obra”!

“[Hesus] a duna su mes pa nos, pa e por redimí nos di tur inikidat i purifiká pa su mes un pueblo pekuliar, ku zelo den hasimentu di bon obra.”​—TITO 2:14.

1. Kiko ta sosodé ora Hesus yega den e área di tèmpel riba 10 di nisan di aña 33 di nos era?

IMAGINÁ bo e esena. Ta 10 di nisan, aña 33 di nos era, djis un par di dia promé ku e selebrashon di Pasku Hudiu. Tin un gran kantidat di adoradó den e área di tèmpel na Yerusalèm, sperando ansiosamente riba e selebrashon. Kiko lo sosodé ora Hesus yega? Tur tres eskritor di Evangelio—Mateo, Marko i Lukas—ta relatá ku pa di dos bes Hesus ta kore ku e bendedónan i kumpradónan for di e tèmpel. E ta bòltu e mesanan di e kambiadónan di plaka i e stulnan di esnan ku ta bende palomba. (Mat. 21:12; Mar. 11:15; Luk. 19:45) Hesus su zelo no a mengua kompará ku tres aña promé ora el a tuma un akshon similar.​—Juan 2:​13-17.

2, 3. Kon nos por sa ku no ta pa purifikashon di tèmpel so Hesus tabatin zelo?

² E relato di Mateo ta indiká ku no ta den e asuntu di purifikashon di tèmpel so Hesus tabatin zelo. Tambe el a kura hende siegu i koho ku tabata bin serka dje den tèmpel. (Mat. 21:14) E relato di Lukas ta referí na otro  trabou ku Hesus a logra hasi. “[Hesus] tabata siña hende tur dia den tèmpel.” (Luk. 19:47; 20:1) Pues anto, su zelo den e trabou di prediká tabata bisto.

³ Despues, apòstel Pablo a skirbi Tito i a splika ku Hesus “a duna su mes pa nos, pa e por redimí nos di tur inikidat i purifiká pa su mes un pueblo pekuliar, ku zelo den hasimentu di bon obra.” (Tito 2:14) Kon nos awe por demostrá “zelo den hasimentu di bon obra”? I kon e ehèmpelnan di algun bon rei di Huda por animá nos?

Zelo pa e Trabou di Prediká i Siña Hende

4, 5. Den ki manera kuater rei di Huda a demostrá zelo pa bon obra?

⁴ Tantu Asa, Josafat, Ezekias komo Josias a hiba kampañanan pa kaba ku idolatria den Huda. Asa “a kita e altarnan stranhero i e lugánan haltu, a basha e pilarnan sagrado abou, a kap e imágennan di Asera.” (2 Kró. 14:3) Motivá pa su zelo ardiente pa adorashon na Yehova, Josafat “a bolbe kita e lugánan haltu i e imágennan di Asera for di Huda.”​—2 Kró. 17:6; 19:3. *

⁵ Despues di e selebrashon solèm di Pasku Hudiu di shete dia ku Ezekias a organisá den Yerusalèm, “tur e israelitanan ku tabata presente a sali bai na e statnan di Huda, a kibra e pilarnan na pida-pida, a kap e imágennan di Asera bash’abou, i a basha e lugánan haltu i e altarnan den henter Huda i Benjamin abou, i tambe den Efrain i Manasés, te ora nan a destruí nan tur.” (2 Kró. 31:1) E hóben Josias a bira rei ora e tabatin apénas ocho aña di edat. E Skritura ta bisa: “Den e di ocho aña di su reinado, miéntras ku e tabata un hóben ainda, el a kuminsá buska e Dios di su tata David; i den e di diesdos aña el a kuminsá purifiká Huda i Yerusalèm i a kita e lugánan haltu, e imágennan di Asera, e imágennan grabá i e imágennan bashá.” (2 Kró. 34:3) Pues, tur e kuater reinan ei tabatin zelo pa bon obra.

6. Dikon nos por kompará nos sirbishi ku e kampaña di e reinan fiel di Huda?

⁶ Awe, nos tambe ta partisipá den un kampaña pa yuda hende kita for di siñansanan religioso falsu, entre otro idolatria. Den nos sirbishi di kas pa kas nos ta topa tur sorto di hende. (1 Tim. 2:4) Un hobensita asiátiko ta kòrda kon su mama tabata hasi sierto rito dilanti di vários imágen na kas. El a rasoná ku ta imposibel ku tur e imágennan ei ta representá e Dios berdadero, i e tabata hasi orashon frekuentemente p’e haña sa ta ken ta e Dios berdadero. Un dia dos Testigu a bati na su porta, i nan tabata ansioso pa siñ’é ku e nòmber di e Dios berdadero ta Yehova. Esta gradisidu el a keda ku el a haña sa e bèrdat tokante imágen! Awor e ta partisipá diligentemente den sirbishi di vèlt yudando otro hende spiritualmente i e ta meresé elogio pa e zelo ku e ta demostrá.​—Sal. 83:18, NW; 115:​4-8; 1 Juan 5:21.

7. Kiko nos por hasi pa imitá e maestronan ku a pasa den e tera den tempu di Josafat?

⁷ Nos ta kubri nos teritorionan kabalmente ora nos ta partisipá den e sirbishi di kas pa kas? Ta interesante pa mira ku den e di tres aña di su reinado, Josafat a manda sinku prens, nuebe levita i dos saserdote pa pasa den tur e statnan pa siña e hendenan Yehova su leinan. Nan kampaña tabata asina efektivo ku e nashonnan rònt di nan a kuminsá haña teror di Yehova. (Lesa 2 Krónikanan 17:​9 i 10.) Dor di purba varia e ora- i dianan ku nos ta traha di kas pa kas, nos por logra papia ku vários miembro di un famia.

8. Kon nos por ekspandé nos ministerio?

 ⁸ Hopi sirbidó di Dios di nos tempu tabata dispuesto pa laga nan kas i muda bai kaminda tin mas nesesidat di Testigu zeloso. Abo por hasi esei? Algun di nos ku no por muda kisas por purba duna testimonio na hende ku ta biba den nos área pero ku ta papia un otro idioma. Debí ku Ron ta topa hende di diferente nashonalidat den su teritorio, el a disidí di siña kon pa saludá hende na 32 idioma, apesar ku e tin 81 aña di edat! Resientemente, el a topa un pareha afrikano riba kaya i a kumindá nan den nan idioma materno, yoruba. Nan a puntra Ron si el a yega di bai Afrika. Ora el a kontestá ku nò, nan a puntr’é ta kon bin e sa nan idioma anto. Asina el a haña un ekselente oportunidat pa duna testimonio. Gustosamente e pareha a tuma revista i a duna Ron nan adrès. Ron na su turno a pasa e adrès akí pa e kongregashon lokal pa e pareha por haña un estudio di Beibel.

9. Dikon ta importante pa lesa for di Beibel ora nos ta den sirbishi? Duna un ehèmpel.

⁹ E maestronan ku Josafat a pidi pa bai pasa den e tera tabatin ‘e buki di lei di Yehova’ huntu ku nan. Rònt mundu nos ta hasi esfuerso pa usa Beibel pa siña hende, ya ku esei ta e Palabra di Dios. Pa mustra e importansia di Beibel den nos ministerio, nos ta hasi esfuerso pa lesa direktamente for di dje, asina hende por mira pa nan mes kiko e ta bisa. Un doño di kas a splika Linda, un Testigu, ku su esposo a haña un atake selebral i ku e mester a kuid’é. E doño di kas a lamentá: “Mi no sa kiko mi a hasi ku Dios a laga e kos akí sosodé ku mi.” Linda a bis’é: “Permití mi mustra bo kiko Beibel ta bisa.” Despues el a lesa e palabranan di Santiago 1:13 i a sigui bisa: “Tur e sufrimentu ku nos i nos sernan kerí ta pasa aden no ta kastigu di Dios.” Despues, e doño di kas a kue Linda brasa. Linda ta remarká: “Mi por a usa Beibel pa konsol’é. Tin bes e tekstonan ku nos ta lesa for di Beibel ta tekstonan ku e doño di kas no a yega di tende nunka.” Komo resultado e señora a kuminsá studia Beibel regularmente.

Hóbennan Ku Ta Sirbi Yehova ku Zelo

10. Dikon Josias ta un bon ehèmpel pa kristiannan hóben djawe?

¹⁰ Ban bèk na e ehèmpel di Josias. Nos por mira ku el a praktiká adorashon berdadero ora e tabata yòn i ku 20 aña el a kuminsá ku un kampaña ekstenso kontra idolatria. (Lesa 2 Krónikanan 34:​1-3.) Awe, un gran kantidat di hóben ta demostrá e mesun zelo den nan sirbishi.

11-13. Ki lès nos por siña for di e hóbennan di nos tempu ku ta sirbi Yehova ku zelo?

¹¹ Hannah di Inglatera tabatin 13 aña i e tabata siña franses na skol. El a haña sa ku nan a kaba di kuminsá ku un grupo di abla franses den un pueblo den serkania. El a pidi su tata pa bai reunion kuné  einan, i e tata a bai di akuerdo. Awor Hannah tin 18 aña i ta un pionero regular ku ta prediká ku zelo den e idioma franses. Abo tambe por siña un otro idioma i yuda mas hende siña tokante Yehova?

¹² Ora Rachel a wak e vidio Sigui Tras di Metanan Ku Ta Onra Dios, el a disfrutá masha hopi di dje. Komentando riba loke e tabata pensa ora el a kuminsá sirbi Yehova na aña 1995, el a bisa: “Mi a pensa ku mi tabata bai bon den e bèrdat.” Anto el a sigui bisa: “Despues ku mi a wak e drama ei, mi a realisá ku pa hopi aña mi a hasi djis e kosnan básiko so. Mi mester a lucha pa e bèrdat i mi mester a hasi esfuerso pa presta berdadero atenshon na mi sirbishi i estudio personal.” Awor Rachel ta haña ku e ta sirbi Yehova ku mas zelo. I kon e ta sintié awor? “Mi relashon ku Yehova a bira mas mihó. Mi orashonnan tin mas kontenido, mi estudio ta profundo i ta duna mi mas satisfakshon, i e relatonan bíbliko ta mas real pa mi. Tambe mi tin hopi goso den sirbishi i mi ta haña berdadero satisfakshon ora mi mira kon Yehova su palabra ta konsolá otro hende.”

¹³ E vidio Hóbennan Sa Puntra​—Kiko Lo Mi Hasi ku Mi Bida? a animá un hóben ku yama Luke. Despues di a wak e vidio akí, Luke a skirbi: “Mi a sinti mi impulsá pa pensa riba loke mi ta hasiendo ku mi bida.” E ta rekonosé: “Den pasado, mi tabata bou di hopi preshon pa sigui edukashon haltu pa logra siguridat finansiero promé, anto despues enfoká riba metanan spiritual. E preshon ei no ta yuda bo progresá spiritualmente; mas bien e ta debilitá bo spiritualmente.” Rumannan hóben, pakiko no wak kon boso por usa loke boso a siña na skol pa ekspandé boso ministerio meskos ku Hannah? I pakiko no imitá Rachel su bunita ehèmpel i sigui tras di metanan ku berdaderamente ta onra Dios? Sigui Luke su ehèmpel i evitá e peligernan ku a resultá di ta un trampa pa hopi hóben.

Hasi Kaso di Spièrtamentu

14. Ki sorto di adorashon Yehova ta aseptá, i dikon esei no ta fásil pa e pueblo di Dios awe?

¹⁴ Yehova su pueblo mester ta purifiká pa nan adorashon por ta aseptabel. Isaias ta spièrta: “Sali, sali, bai for di einan, no mishi ku nada impuru; sali for di meimei di dje [Babilonia], purifiká boso mes, boso ku ta karga e artíkulonan-di-uzo di SEÑOR.” (Isa. 52:11) Hopi aña promé ku Isaias a skirbi e palabranan ei, e bon Rei Asa a hiba un kampaña intenso pa kaba ku inmoralidat den Huda. (Lesa 1 Reinan 15:​11-13.) I siglonan despues, apòstel Pablo a bisa Tito ku Hesus a duna su mes pa purifiká su siguidónan i hasi nan ‘un pueblo pekuliar pa Su mes, ku zelo den hasimentu di bon obra.’ (Tito 2:14) Den e sosiedat djawe ku ta yen di bisio, no ta fásil—spesialmente pa hóbennan—pa keda moralmente limpi. Por ehèmpel, tur Dios su sirbidónan, grandi i chikí, mester lucha pa no laga imágennan erótiko òf pornográfiko riba bòrchinan di propaganda, na televishon, den pelíkula i prinsipalmente riba Internet kontaminá nan.

15. Kiko por yuda nos siña odia loke ta malu?

¹⁵ Ora nos ta hasi kaso mesora di Dios su spièrtamentu, esei lo por yuda nos siña odia loke ta malu. (Sal. 97:10; Rom. 12:9) Nos tin ku aboresé pornografia pa “libra nos mes di  e atrakshon fuerte akí,” manera un ruman a bisa. Pa kita dos pida magnet for di otro, bo tin mester di un forsa ku ta mas fuerte ku e atrakshon ku ta tene nan huntu. Asina tambe, pa un hende por resistí e tentashon di pornografia, e tin ku hasi hopi esfuerso. Pero ora nos komprondé kuantu daño pornografia por hasi nos, esei por yuda nos haña asko p’e. Un ruman hòmber a hasi esfuerso vigoroso pa vense e mal kustumber di bishitá sitenan pornográfiko riba Internet. El a pone su kòmpiuter kaminda tur e otro miembronan di famia por a mir’é. Fuera di esei, e tabata mas desididu ku nunka pa purifiká su mes i pa ta zeloso pa bon obra. El a tuma un otro medida tambe. Debí ku e mester a usa Internet pa su negoshi, el a disidí di us’é solamente den presensia di su esposa.

Dikon un Bon Kondukta Ta Importante

16, 17. Ki efekto nos bon kondukta por tin riba hende ku ta opservá nos? Duna un ehèmpel.

¹⁶ E aktitut ekselente di e hóbennan ku ta sirbi Yehova ta impreshoná hende ku ta opservá nan. (Lesa 1 Pedro 2:12.) Despues ku un persona a keda henter un dia na e Bètel di Lònden pa hasi trabou di mantenshon riba un mashin di imprenta, su punto di bista tokante Testigunan di Yehova a kambia kompletamente. Su esposa, kende tabata studia Beibel ku un Testigu lokal, a ripará ku e aktitut di su esposo a kambia. Anteriormente, e no tabata ke pa e Testigunan bini su kas. Pero despues di e trabou ku el a hasi na Bètel, el a elogiá nan mashá pa e manera bondadoso ku nan a trat’é. El a bisa ku ningun hende no ta papia palabra malu. Tur hende tin pasenshi, i ku pas ta reina. I loke a impreshon’é mas ta ku e hóbennan ta traha ku zelo apesar ku nan ta traha sin pago; mas bien nan ta usa nan tempu i energia boluntariamente pa yuda publiká e bon nobo.

¹⁷ Di e mesun manera, rumannan ku ta traha pa kuida nan famia ta ekselente trahadónan. (Kol. 3:​23, 24) Komo resultado, nan no ta pèrdè nan trabou asina-asina, ya ku nan ta trahadónan diligente i nan doño di trabou ta konsiderá nan balioso i no ke pèrdè nan.

18. Kon nos por demostrá nos “zelo den hasimentu di bon obra”?

¹⁸ Nos konfiansa den Yehova, nos obedensia na su instrukshonnan i e manera ku nos ta kuida e lugánan kaminda nos ta reuní ta algun di e maneranan ku nos ta demostrá nos zelo pa e kas di Yehova. Fuera di esei, nos kier hasi tur loke ta na nos alkanse den e trabou di prediká e Reino i hasi disipel. Sea ku nos ta hóben òf hende grandi, si nos hasi nos máksimo esfuerso pa adorá Dios segun su normanan limpi, nos lo haña hopi benefisio. I nos lo keda ku nos reputashon komo hendenan ku ta demostrá “zelo den hasimentu di bon obra.”​—Tito 2:14.

[Nota]

Kiko bo a siña for di Beibel i ehèmpelnan di nos tempu tokante

• kon pa demostrá zelo den e trabou di prediká i siña hende?

• kon hóbennan kristian por demostrá “zelo den hasimentu di bon obra”?

• kon pa kibra ku mal hábito?

[Preguntanan di Estudio]

[Plachi na página 20]

Bo ta usa Beibel regularmente den sirbishi?

[Plachi na página 22]

Si bo siña un otro idioma ora bo ta na skol, esei por yuda bo ekspandé bo sirbishi