Demostrá Zelo pa e Kas di Yehova!

“E zelo pa bo kas lo kaba ku mi.”​—JUAN 2:17.

1, 2. Na aña 30 di nos era, kiko Hesus a hasi den e tèmpel, i dikon?

PURBA visualisá e esena. Ta temporada di Pasku Hudiu, aña 30 di nos era. Seis luna promé, Hesus a kuminsá ku su ministerio riba tera. Awor e ta riba kaminda pa Yerusalèm. Ora Hesus yega na e tèmpel, riba e Plenchi pa Pagano e ta haña ‘esnan ku ta bende buey, karné i palomba, i e kambiadónan di plaka.’ Ku un zuip di kabuya e ta saka tur e bestianan afó, i outomátikamente e komersiantenan ta bai nan tras. Ademas, Hesus ta basha e plaka di e kambiadónan di plaka abou i ta bòltu nan mesanan. E ta manda esnan ku ta bende palomba pa rekohé nan kosnan i bai.​—Juan 2:​13-16.

² Loke Hesus a hasi ta mustra ku e tèmpel tabata hopi importante p’e. E ta ordená nan: “Stòp di hasi e kas di mi Tata un kas di negoshi.” Ora Hesus su disipelnan a mira loke a sosodé, nan a kòrda e palabranan ku e salmista David a skirbi algun siglo promé: “E zelo pa bo kas lo kaba ku mi.”​—Juan 2:​16, 17; Sal. 69:9.

3. (a) Kiko ta zelo? (b) Ki pregunta nos por hasi nos mes?

³ Ta Hesus su interes, su zelo, pa e kas di Dios ta loke a motiv’é pa aktua. Zelo ta un interes ferviente i profundo ku ta motivá bo na akshon. Den e siglo 21 akí, mas ku shete mion kristian ta demostrá interes ferviente den e kas di Dios. Pero, kada un di nos por puntra nos mes: ‘Kon mi por oumentá mi zelo pa e kas di Yehova?’ Pa yuda nos kontestá e pregunta ei, laga nos ban wak promé kiko presis e kas di Dios ta awendia. Despues nos lo konsiderá algun ehèmpel bíbliko di hòmbernan fiel ku a demostrá zelo pa e kas di Dios. Nan ehèmpel ta skirbí den Beibel “pa nos instrukshon” i esakinan por motivá nos pa demostrá mas zelo.​—Rom. 15:4.

E Kas di Dios​—Ántes i Awor

4. Dikon e tèmpel di Salomon a ser konstruí?

⁴ Den Israel di antigwedat, e tèmpel na Yerusalèm tabata e kas di Dios. Ta klaru ku Yehova no tabata biba den dje. El a bisa: “Shelu ta mi trono, i tera ta e banki pa mi pia. Unda e kas ta anto ku abo por traha pa mi? I unda tin un lugá pa mi sosegá?” (Isa. 66:1) No opstante, e tèmpel ku Salomon a konstruí durante su reinado a sirbi komo e lugá prinsipal pa adorá Yehova, kaminda hende tabata hasi orashon.​—1 Rei. 8:​27-30.

5. Kiko ta e kas di Yehova awe ku e tèmpel di Salomon a prefigurá?

⁵ Awe, e kas di Yehova no ta un edifisio trahá di blòki ni na Yerusalèm ni na ningun otro kaminda. Mas bien, esei ta e provishon pa por aserk’é den adorashon a base di e sakrifisio di reskate di Kristu. Tur Dios su sirbidónan fiel riba tera ta reuní pa adorá Yehova den e tèmpel spiritual akí.​—Isa. 60:​4, 8, 13; Echo. 17:24; Heb. 8:5; 9:24.

6. Kua tabata e reinan di Huda ku a demostrá gran zelo pa adorashon berdadero?

⁶ Despues ku e reino di Israel a parti na dos na aña 997 promé ku nos era, 4 di e 19 reinan di Huda, di e parti zùit, a demostrá gran zelo pa adorashon berdadero. Nan tabata Asa, Josafat, Ezekias i Josias. Ki lès importante nos por siña for di nan ehèmpel?

 Sirbishi di Henter Bo Kurason Ta Trese Bendishon

7, 8. (a) Ki sorto di sirbishi Yehova ta bendishoná? (b) Ora nos wak e ehèmpel di Rei Asa, ku kiko nos mester tene kuidou?

⁷ Durante e reinado di Rei Asa, Yehova a manda profeta pa yuda Su pueblo keda fiel. Por ehèmpel, Beibel ta bisa nos ku Asa a skucha di profeta Azarias, yu di Oded. (Lesa 2 Krónikanan 15:​1-8.) E reformashon di Asa a uni e pueblo di Huda i un gran kantidat di hende di e reino di Israel ku a reuní masalmente na Yerusalèm. Huntu nan a deklará ku nan ta desididu pa adorá Yehova lealmente. Nos ta lesa: “Nan a hasi un huramentu na SEÑOR na bos haltu, ku gritamentu, ku tròmpèt i ku kachu. I henter Huda a regosihá tokante di e huramentu, pasobra nan a hura ku henter nan kurason i a busk’é sinseramente, i el a laga nan hañ’é. Asina SEÑOR a duna nan sosiegu na tur banda.” (2 Kró. 15:​9-15) Sin duda Yehova ta bendishoná nos tambe ora nos sirbié di henter nos kurason.​—Mar. 12:30.

⁸ Lamentablemente, despues Asa a sintié ofendí ora Hananí e miradó a korigié. (2 Kró. 16:​7-10) Kon nos ta reakshoná ora nos haña konseho òf instrukshon di Yehova mediante e ansianonan kristian? Nos ta kla pa tuma nan konseho bíbliko na pechu i evitá di kai den e trampa di sinti nos mes ofendí?

9. Josafat i e pueblo di Huda tabata bou di ki menasa, i kon nan a reakshoná?

⁹ Josafat tabata rei di Huda durante siglo 10 promé ku nos era. E ku henter Huda tabata bou di menasa di e forsanan armá di Amon, Moab i e pueblo di e region di Seru Seir ku a uni forsa. Apesar ku e rei tabatin miedu, kiko el a hasi? E i tur e hòmbernan di Huda, huntu ku nan esposanan i yunan, a reuní na e kas di Yehova pa hasi orashon. (Lesa 2 Krónikanan 20:​3-6.) Josafat a pidi Yehova algu similar na loke Salomon a pidi durante e dedikashon di e tèmpel. El a supliká Yehova: “O nos Dios, lo bo no husga nan? Pasobra nos ta sin forsa dilanti di e multitut grandi akí ku ta bini kontra nos; ni nos no sa kiko pa hasi, ma nos wowo ta riba bo.” (2 Kró. 20:​12, 13) Despues ku Josafat a kaba di hasi orashon, Yehova su spiritu a impulsá Jahaziel e levita, “meimei di e asamblea,” pa ekspresá palabranan di konsuelo ku a duna e pueblo konfiansa.​—Lesa 2 Krónikanan 20:​14-17.

10. (a) Kon Josafat i e reino di Huda a haña instrukshon? (b) Kon nos por mustra apresio pa e instrukshon ku Yehova ta duna nos awe?

¹⁰ Sí, e tempu ei, Josafat i e reino di Huda a haña instrukshon for di Yehova mediante Jahaziel. Awe, nos ta haña konsuelo i instrukshon mediante e esklabo fiel i prudente. Ta klaru ku semper nos mester ta kla pa koperá ku e ansianonan nombrá i mustra rèspèt pa nan, kendenan ta traha duru pa pastoriá nos i ta apliká e instrukshonnan di “e esklabo fiel i prudente.”​—Mat. 24:45; 1 Tes. 5:​12, 13.

11, 12. Ki lès nos por siña for di loke a pasa ku Josafat i Huda?

¹¹ Meskos ku Josafat i su pueblo a reuní pa buska Yehova su guia, laga nos tambe asistí huntu ku nos rumannan ku regularidat na e reunionnan di kongregashon pa haña su guia. Si nos haña nos den un situashon difísil, i nos no sa kiko pa hasi, laga nos sigui e bon ehèmpel di Josafat i e pueblo di Huda i akudí na Yehova den orashon ku pleno konfiansa den Dje. (Pro. 3:​5, 6; Fil. 4:​6, 7) Asta si nos ta isolá, nos petishonnan na Yehova lo pone nos sinti ku nos ta uní ku nos “rumannan den henter mundu.”​—1 Ped. 5:9.

¹² Josafat i su pueblo a sigui e instrukshon ku Dios a duna nan mediante Jahaziel. Kiko tabata e resultado? Nan a gana e bataya i a bolbe na e kas di Yehova na Yerusalèm “ku goso” i “ku arpa, salterio i tròmpèt.” (2 Kró. 20:​27, 28) Nos tambe ta respetá instrukshon ku Yehova ta duna nos mediante e esklabo fiel i prudente i ta reuní ku Su pueblo pa alab’é.

 Kuida Nos Lugánan di Reunion Bon

13. Ki trabou Ezekias a inisiá na komienso di su reinado?

¹³ Durante e promé luna di su reinado, Ezekias a demostrá zelo pa e adorashon di Yehova dor di habri e tèmpel atrobe i kuminsá drech’é. Bou di su direkshon e saserdotenan i levitanan a purifiká e kas di Dios. Nan a logra hasi esei den 16 dia. (Lesa 2 Krónikanan 29:​16-18.) E esfuerso ku nan a hasi ta pone nos kòrda riba mantenshon i reparashon ku nos ta hasi na nos lugánan di reuní pa nan ta den un kondishon ku ta reflehá nos zelo pa adorashon di Yehova. Nunka bo no a yega di tende eksperensia ku ta mustra kon hende a keda impreshoná pa motibu di e zelo di nos rumannan ku ta hasi e tipo di trabounan ei? Sí, nan esfuerso ta trese alabansa pa Yehova.

14, 15. Ki trabou ta trese alabansa pa Yehova? Duna algun ehèmpel.

¹⁴ Den un stat den e parti nort di Inglatera, un hòmber ku ta biba nèt banda di un Salòn di Reino no a bai di akuerdo ku e trabounan di renobashon ku e rumannan tabatin pensá di hasi. E rumannan a trat’é bondadosamente. Nan a nota ku mester drecha e muraya entre e Salòn di Reino i e propiedat di e bisiña, i nan a ofres’é pa drecha e muraya pòrnada. Nan mester a traha duru ya ku nan no mester a djis drecha e muraya so, sino rekonstruí un gran parti dje. Nan a atendé e asuntu asina bon ku e aktitut di e bisiña a kambia. Awor e mes ta yuda ta tira bista riba e Salòn di Reino.

¹⁵ Yehova su pueblo ta partisipá den trabou di konstrukshon rònt mundu. Boluntarionan lokal huntu ku sirbidónan internashonal di tempu kompletu ta konstruí no solamente Salònnan di Reino sino tambe Salanan di Asamblea i kasnan di Bètel. Sam ta un ingeniero ábil riba tereno di kalefakshon (verwarming), ventilashon i air-conditioning. E ku su esposa, Ruth, a bai diferente pais na Europa i Afrika pa yuda ku proyektonan di konstrukshon. Unda ku nan bai, nan ta partisipá den sirbishi tambe huntu ku e kongregashon lokal. Sam ta splika kiko a motiv’é pa partisipá den proyektonan di konstrukshon internashonal: “Ta e rumannan ku a sirbi na kasnan di Bètel tantu aki komo na otro parti di mundu a animá mi. Djis  mirando nan zelo i goso realmente a duna mi e deseo di sirbi den e forma akí.”

Obedesé Instrukshon di Dios

16, 17. Dios su pueblo a partisipá ku entusiasmo den ki aktividat spesial, i ku ki resultado?

¹⁶ Fuera di restorá e tèmpel, Ezekias a rebibá e selebrashon di Pasku Hudiu ku Yehova a manda nan selebrá. (Lesa 2 Krónikanan 30:​1, 4 i 5.) Ezekias i e habitantenan di Yerusalèm a invitá henter e nashon—asta esnan di e reino di nort—pa bin selebr’é. Mensaheronan a kore parti e kartanan di invitashon den henter e pais.​—2 Kró. 30:​6-9.

¹⁷ Den añanan resien, nos a partisipá den kampañanan similar. Nos a usa invitashonnan atraktivo pa invitá hende den nos teritorio pa bin konmemorá e Sena di Señor huntu ku nos, manera Hesus a manda. (Luk. 22:​19, 20) Nos a haña instrukshon relashoná ku esaki na e Reunion di Sirbishi i nos a partisipá ku entusiasmo den e trabou akí. Anto Yehova a bendishoná nos esfuerso rikamente! Figura bo, aña pasá, alrededor di shete mion publikadó a parti invitashon, i un total di 17.790.631 hende a asistí!

18. Dikon zelo pa adorashon berdadero ta asina importante pa bo?

¹⁸ Beibel ta bisa di Ezekias: “E tabata konfia den SEÑOR, e Dios di Israel, asina ku despues di dje no tabatin ni ún manera é den tur e reinan di Huda, ni den esnan ku tabata promé kuné. Pasobra el a tene duru na SEÑOR; e no a laga di siguié, ma a warda su mandamentunan, ku SEÑOR a ordená Moisés.” (2 Rei. 18:​5, 6) Laga nos tambe sigui su ehèmpel. Nos zelo pa e kas di Dios lo yuda nos ‘tene duru na Yehova’ ku e speransa di biba pa semper.​—Deu. 30:16.

Hasi Kaso di Instrukshon Mesora

19. Ki esfuerso spesial nos ta hasi durante temporada di Memorial?

¹⁹ Tempu Josias a reina komo rei, e tambe a perkurá pa e pueblo selebrá Pasku Hudiu i a hasi preparashon kuidadoso pa esei. (2 Rei. 23:​21-23; 2 Kró. 35:​1-19) Nos tambe ta hasi esfuerso spesial pa prepará bon pa kongreso di distrito, asamblea di sirkuito, dia spesial di asamblea i pa Memorial. Den algun pais, e rumannan ta riska nan bida pa asistí na e konmemorashon di e morto di Kristu. Ansianonan zeloso ta perkurá pa no lubidá riba ningun hende den e kongregashon. Esnan di edat avansá i esnan enfermo ta haña yudansa pa nan por ta presente na e okashon.

20. (a) Kiko a sosodé durante e reinado di Rei Josias, i kon el a reakshoná? (b) Ki lès nos ke pensa seriamente riba dje?

²⁰ Durante e trabounan di restorashon ku Josias a organisá, Sumo Saserdote Hilkias “a haña e buki di lei di SEÑOR, duná pa medio di Moisés.” El a dun’é na Safan sekretario di e rei, kende na su turno a kuminsá les’é pa Josias. (Lesa 2 Krónikanan 34:​14-18.) Kiko tabata e efekto? Mesora, e rei a sker su paña debí na tristesa i a duna instrukshon pa e hòmbernan konsultá Yehova. Mediante profetisa Hulda, Dios a duna un mensahe ku a kondená algun di e práktikanan religioso ku tabata tuma lugá na Huda. Sinembargo, e tremendo esfuerso ku Josias a hasi pa eliminá idolatria a keda bisto, i el a mantené e fabor di Dios apesar di e  kalamidatnan ku a ser profetisá pa e nashon den su totalidat. (2 Kró. 34:​19-28) Kiko esei ta siña nos? Sin duda, nos tambe ke tin e mesun deseo ku Josias. Nos ke hasi kaso mesora di Yehova su instrukshon i nos ke pensa seriamente riba loke por pasa si nos laga apostasia i infieldat interferí ku nos adorashon na Yehova. I nos por tin konfiansa ku Yehova lo mira ku nos tin zelo pa adorashon berdadero i e lo keda kontentu ku esei, meskos ku den e kaso di Josias.

21, 22. (a) Dikon nos mester demostrá zelo pa e kas di Yehova? (b) Kiko nos lo konsiderá den e siguiente artíkulo?

²¹ E kuater reinan di Huda ei—Asa, Josafat, Ezekias i Josias—a pone un bon ehèmpel pa nos den demostrá zelo pa e kas di Dios i den nan manera di adorá Dios. Nos zelo mester motivá nos tambe pa konfia den Yehova i pa hasi esfuerso pa ador’é. Sin duda ta sabí di nos parti pa obedesé instrukshon di Dios i reakshoná na un manera faborabel ora e kongregashon i su ansianonan ta mustra interes amoroso i ta duna korekshon, ya ku esei ta hiba na felisidat.

²² E siguiente artíkulo lo enfoká riba kon nos por demostrá zelo pa sirbishi di vèlt i lo animá hóbennan pa sirbi nos Tata amoroso ku zelo. Ademas, nos lo konsiderá kon nos por evitá un di Satanas su influensianan di mas dañino. Segun ku nos ta hasi kaso di tur e rekordatorionan ei di Yehova, nos ta siguiendo e ehèmpel di Yehova su Yu, Hesus, di kende Beibel ta bisa: “Zelo pa bo kas a kaba ku mi.”​—Sal. 69:9; 119:​111, 129, NW; 1 Ped. 2:21.

Bo Ta Kòrda?

•Ki sorto di sirbishi Yehova ta bendishoná, i dikon?

•Kon nos por demostrá konfiansa den Yehova?

•Kon zelo por motivá nos pa obedesé instrukshon di Dios?

[Preguntanan di Estudio]

[Plachi na página 16]

Kon Asa, Josafat, Ezekias i Josias a demostrá zelo pa e kas di Yehova?