Bo Por Haña Pas den e Mundu Turbulento Akí?

BO TIN pas den bo bida? Hopi hende lo bisa ku nò i e motibu ta bisto. Nan ta biba den áreanan asotá pa guera, instabilidat polítiko, violensia étniko òf terorismo. Asta si bo no ta pasando den e situashonnan ei, otro kosnan manera kriminalidat, hende problemátiko i desakuerdo entre sosio di negoshi òf bisiña por kita bo trankilidat. Den hopi famia ta reina tambe un ambiente di pleitamentu en bes di pas.

Hopi hende ta deseá di por tin pas mental. Kisas nan ta buska esei den religion, den seminarionan di meditashon òf den gruponan ku ta praktiká yoga. Otronan ta kere ku nan por haña pas den naturalesa—nan ta bai ku fakansi, ta subi seru, kana den mondi òf bishitá lugánan kaminda tin fuente di awa mineral. Te na ora e hendenan akí logra haña un tiki pas mental, nan ta ripará umbes ku e pas ei ta superfisial i no ta dura mashá.

Pues, unda bo por haña berdadero pas? E fuente di pas ta nos Kreador, Yehova Dios. Pakiko nos por bisa asina? Pasobra e ta e “Dios di pas.” (Romanonan 15:33) Bou di e gobernashon di su Reino ku lo yega pronto, lo tin “abundansia di pas.” (Salmo 72:7; Mateo 6:9, 10) Esaki lo ta muchu mas ku un simpel tratado di pas ku hende por sera. Hopi bes e akuerdonan ei ta nifiká djis un interupshon temporal den un konflikto. Pero e pas di Dios lo eliminá tur kousa di guera i konflikto. De echo, ningun hende lo siña mas di guera. (Salmo 46:8, 9) Por fin, nos tur lo haña berdadero pas!

Ma pa bunita ku e speransa akí ta, tòg lo bo tin gana di tin maske ta un tiki pas for di aworakí. Tin  un manera ku bo por haña e pas mental ku por yuda bo den e tempu turbulento akí? Sí, i nos por ta kontentu ku Beibel ta mustra nos e kaminda. Tuma nota di algun konseho ku apòstel Pablo a skirbi den kapítulo 4 di su karta na e Filipensenan. Nos ta invitá bo pa lesa versíkulo 4 pa 13 den bo mes Beibel.

“E Pas di Dios”

Na versíkulo 7 nos ta lesa: “E pas di Dios, ku ta surpasá tur komprondementu, lo warda boso kurason i boso mente den [“pa medio di,” NW] Kristu Hesus.” Bo no ta haña e pas akí dor di djis meditá òf hasi esfuerso pa mehorá bo personalidat. Mas bien, e ta bini di Dios. E pas akí ta asina poderoso ku e ta “surpasá tur komprondementu.” Nos por ta sigur ku e ta surpasá tur nos temornan, nos konosementu limitá i nos rasonamentu ku sa ta defisiente. Kisas nos no ta mira kon nos lo sali for di nos problemanan, pero e pas di Dios por yena nos ku e speransa bon fundá ku un dia tur nos difikultatnan lo pasa pa historia.

Esei ta imposibel? Pa hende sí; ma ‘pa Dios, tur kos ta posibel.’ (Marko 10:27) Fe i konfiansa den Dios ta yuda nos dominá nos pensamentu pa nos no bira demasiado preokupá. Pensa riba un mucha chikitu ku ta pèrdè den un pakus grandi. Un kos e sa sigur. Tur loke e tin ku hasi ta di haña su mama i tur kos lo kaba bon. Ora ku finalmente e mama hañ’é, e mama ta bras’é i konsol’é. Meskos tambe, nos por tin e konfiansa ku Dios, na moda di papia, lo brasa nos. Lo e trankilisá nos i finalmente yuda nos eliminá tur nos ansiedatnan.

Hopi adoradó di Yehova a sinti e pas di Dios durante e pruebanan di mas pisá. Tuma por ehèmpel Nadine, kende tabata na estado i a pèrdè e yu. El a konta: “Tabata difísil pa mi papia di mi sintimentunan, i semper mi a purba hasi duru. Pero di paden mi tabata kibrá. Kasi tur dia mi tabata deshogá mi na Yehova den orashon i rog’é pa e yuda mi. Mi a sinti ku orashon a yuda mi hopi, pasobra ki ora ku mi tabata den mi momentonan di mas difísil i tabata pensa ku mi no por a sigui mas, mi tabata haña un trankilidat i pas mental. Anto esei a duna mi un sintimentu di siguridat.”

Protekshon pa Bo Kurason i Mente

Laga nos ban bèk na Filipensenan 4:7. E ta bisa ku e pas di Dios lo warda nos kurason i mente. Meskos ku un sòldá ta tene warda na su pòst, asina e pas di Dios ta protehá nos kurason pa no laga ideanan materialista, ansiedat innesesario i normanan mundano drenta den dje. Pensa riba e ehèmpel akí.

Hopi hende den e mundu turbulento akí ta kere ku pa nan por sinti nan felis i sigur, nan tin mester di hopi plaka òf propiedat. Riba konseho di ekspertonan, kisas nan ta invertí parti di nan plaka di spar den un negoshi. Nan lo sinti nan realmente na pas e ora ei? No nesesariamente. Kisas tur dia nan ta chèk e negoshi ansiosamente, puntrando nan mes si nan tin ku bende nan parti den e negoshi òf laga e plaka ku nan a invertí den dje. Ora e negoshi kuminsá bai malu, tal bes nan ta drenta pániko. Klaru ku Beibel no ta kondená hasimentu di invershon, pero e ta duna sí e konseho sabí akí: “Esun ku ta stima plaka lo no keda satisfecho ku plaka, ni esun ku ta stima abundansia, ku su entrada. Esaki tambe ta banidat. Soño di e hòmber trahadó ta dushi, sea ku e ta kome poko òf hopi. Ma barika yen di e hòmber riku no ta lag’é drumi.”—Eklesiastés 5:10, 12.

Filipensenan 4:7 ta konkluí bisando ku e pas di Dios ta warda òf protehá nos kurason i mente “pa medio di Kristu Hesus.” Ki konekshon tin entre Kristu Hesus i e pas di Dios? Hesus ta hunga un papel klave den kumplimentu di e propósito di Dios. Hesus a duna su bida di manera ku nos por ser librá di piká i morto. (Juan 3:16) Tambe e ta e Rei entronisá di e Reino di Dios. E echo ku nos sa ki papel Hesus ta hunga por kontribuí hopi na nos pas mental i trankilidat di kurason. Kon asina?

Si nos repentí sinseramente di nos pikánan i pidi Dios pordon a base di e sakrifisio di Hesus, Dios lo pordoná nos, i esei ta kontribuí  na nos pas mental. (Echonan 3:19) Unabes nos realisá ku nos no por disfrutá plenamente di bida sino te ora ku e Reino di Kristu bini, nos ta evitá di hiba un bida deskabeyá komo si fuera e bida akí ta tur loke tin. (1 Timoteo 6:19) Klaru ku nos no ta keda liber di tur problema, pero nos por haña konsuelo den e speransa sigur ku e mihó bida ta na kaminda.

Kon Bo Por Haña e Pas di Dios?

Pues, kon bo por haña e pas di Dios? Filipensenan 4:4 i 5 [NW] ta duna nos algun tep. E ta bisa: “Semper alegrá den Señor. Un bes mas lo mi bisa: Alegrá! Laga tur hende sa ku boso ta rasonabel. Señor ta serka.” Ora Pablo a skirbi e palabranan ei, e tabata será inhustamente den prizòn na Roma. (Filipensenan 1:13) En bes di lamentá e manera inhustu ku nan a trat’é, el a animá su rumannan kristian pa semper alegrá den Señor. Ta bisto ku su goso no a dependé di su sirkunstansianan, sino di su relashon ku Dios. Nos tambe tin ku siña sirbi Dios sea kual sea nos sirkunstansianan. Mas mihó nos konosé Yehova i mas plenamente nos ta hasi su boluntat, mas goso nos lo tin den sirbié. Esei, na su turno, lo duna nos satisfakshon i pas mental.

Ademas, Beibel ta animá nos pa nos ta rasonabel. Si nos kultivá e kualidat di ser rasonabel, nos lo no eksigí demasiado di nos mes. Nos sa ku nos no ta perfekto; nos no por ta e mihó den tur kos. Pues, pakiko pèrdè soño pensando riba kon nos por ta perfekto òf, por lo ménos, mihó ku tur otro hende? Nos lo no eksigí di otro hende tampoko pa nan ta perfekto. P’esei, nos por keda kalmu ora nan hasi algu ku ta iritá nos. Un otro tradukshon di e palabra griego original tradusí komo “ser rasonabel” ta “ser dispuesto pa sede.” Si nos sede den kosnan ku tin di haber ku gustu personal, nos ta evitá pleitamentu, lokual hopi biaha no ta yuda ku nada. Pleitamentu por pone ku temporalmente nos ta pèrdè nos relashon pasífiko ku otro hende i tambe nos pas mental.

E siguiente deklarashon na Filipensenan 4:5, esta, ku “Señor ta serka,” por parse di no ta pas den e konteksto. Pronto Dios lo remplasá e sistema di kosnan bieu akí ku un sistema nobo bou di su Reino. Pero for di aworakí e por ta “serka” di tur hende ku ta hala serka dje. (Echonan 17:27; Santiago 4:8) E echo ku nos ta konsiente di ku e ta serka nos ta yuda nos alegrá, ser rasonabel i no keda demasiado preokupá ku e problemanan aktual òf ku futuro, manera versíkulo 6 ta trese dilanti.

Ora nos wak versíkulo 6 i 7, nos ta mira mesora ku e pas di Dios ta un resultado direkto di orashon. Algun hende ta mira orashon djis komo un forma di meditashon, pensando ku kualke forma di orashon por yuda nan haña mas trankilidat mental. Ma Beibel ta papia di berdadero komunikashon ku Yehova, un komunikashon mes íntimo ku ora un mucha ta papia ku un mayor amoroso tokante su goso- i su preokupashonnan. Ta un gran konsuelo pa sa ku nos por aserká Dios “den tur kos.” Kiko ku nos por tin na mente òf den fondo di nos kurason, nos por papia di dje ku nos Tata selestial ku tur konfiansa.

Versíkulo 8 ta animá nos pa konsentrá riba kosnan positivo. Ma esei no ta sufisiente sí. Manera versíkulo 9 ta splika, tambe nos tin ku pone e bon konseho di Beibel na práktika. Ora nos hasi esei, nos por tin un konsenshi limpi. I di bèrdat manera e dicho ta bisa: Un konsenshi limpi ta e mihó kusinchi!

Sí, bo por haña pas mental. E ta bini di Yehova Dios, kende ta duna tur hende ku hala serka dje i ku ke sigui su guia e pas ei. Ora bo analisá su Palabra, Beibel, bo por siña konosé su pensamentunan. No ku ta semper fásil pa apliká su instrukshonnan, ma esei sigur lo ta bale la pena pasobra “e Dios di pas lo ta ku boso.”—Filipensenan 4:9.

[Komentario na página 20]

“E pas di Dios . . . lo warda boso kurason.”​—FILIPENSENAN 4:7

[Komentario na página 22]

Ta un gran konsuelo pa sa ku nos por aserká Dios “den tur kos”