Famianan Kristian, Sigui e Ehèmpel di Hesus!
Famianan Kristian, Sigui e Ehèmpel di Hesus!
“Kristu . . . [a laga] un ehèmpel pa boso, pa boso sigui den su pasonan.”—1 PED. 2:21.
1. (a) Ki papel e Yu di Dios tabatin den kreashon? (b) Ki sintimentu Hesus tin pa humanidat?
ORA Dios a traha shelu i tera, su Yu primogénito tabata banda di dje “manera un trahadó eksperto.” E Yu di Dios akí a koperá tambe ku su Tata ora Yehova a diseñá i krea e gran variedat di bestia i mata ku tin riba tera i ora El a prepará e Paradeis ku lo a bira e hogar di hende trahá den e imágen i semehansa di Yehova. E Yu di Dios akí, ku despues a bira konosí komo Hesus, tabatin gran amor pa humanidat. “[Su] delisia tabata den e yunan di hende.”—Pro. 8:27-31; Gén. 1:26, 27.
2. (a) Kiko Yehova a duna humanidat imperfekto pa yuda nan? (b) Menshoná un área di bida pa kua Beibel ta perkurá instrukshon i guia.
2 Despues ku e promé pareha humano a peka, liberashon di humanidat pekaminoso a bira un aspekto importante di e propósito di Yehova. El a perkurá e sakrifisio di reskate di Kristu pa hasi e liberashon ei posibel. (Rom. 5:8) Ademas, Yehova a perkurá su Palabra, Beibel, i pa medio di dje e ta duna hende e guia ku nan mester pa lucha di e mihó manera ku nan imperfekshon heredá. (Sal. 119:105) Den su Palabra e ta duna instrukshon pa yuda hende mantené nan famia fuerte i felis. Relashoná ku matrimonio, e buki di Génesis ta bisa ku un hòmber mester ‘uni ku su esposa, i ku nan lo bira ún karni.’—Gén. 2:24.
3. (a) Kiko Hesus a siña hende tokante matrimonio? (b) Kiko nos lo trata den e artíkulo akí?
3 Durante e ministerio di Hesus riba tera, el a enfatisá ku matrimonio lo mester tabata un union permanente. El a siña hende sierto prinsipionan ku, si nan a apliká nan, lo a yuda miembronan di famia evitá aktitutnan i komportashon ku lo a menasá nan matrimonio òf e felisidat di nan famia. (Mat. 5:27-37; 7:12) E artíkulo akí lo trata kon e siñansanan di Hesus i e ehèmpel ku el a pone tempu e tabata riba tera por yuda esposo, esposa, mayor i yu hiba un bida felis i satisfecho.
Kon un Esposo Kristian Ta Onra Su Esposa?
4. Ki similaridat tin entre e papel di Hesus i e papel di esposonan kristian?
4 Dios a apuntá e esposo komo kabes di famia, meskos ku Hesus ta Kabes di e kongregashon. Apòstel Pablo a deklará: “E esposo ta kabes di e esposa, meskos ku Kristu tambe ta kabes di e iglesia, e mes siendo salbadó di e kurpa. Esposonan, stima boso esposa, meskos ku Kristu tambe a stima e iglesia i a entregá su mes p’e.” (Efe. 5:23, 25) Sí, e manera ku Hesus a trata su siguidónan ta un ehèmpel di e manera ku hòmber kristian tin ku trata nan esposa. Laga nos konsiderá algun di e maneranan ku Hesus a ehersé e outoridat ku Dios a dun’é.
5. Kon Hesus a ehersé su outoridat riba su disipelnan?
5 Hesus tabata “mansu i humilde di kurason.” (Mat. 11:29) Ma ora tabata nesesario, e tabata desididu pa aktua. Nunka el a neglishá su responsabilidatnan. (Mar. 6:34; Juan 2:14-17) El a konsehá su disipelnan na un manera bondadoso, asta bes tras bes, ora tabata nesesario. (Mat. 20:21-28; Mar. 9:33-37; Luk. 22:24-27) Sinembargo, Hesus no a zundra nan ni humiá nan, tampoko e no a laga nan sinti ku e no a stima nan òf ku nan no por a kumpli ku loke el a siña nan. Al kontrario, el a elogiá su disipelnan i a motivá nan pa hasi loke ta korekto. (Luk. 10:17-21) Pues, no ta un sorpresa ku e manera amoroso i yen di kompashon ku Hesus a trata nan a pone ku el a gana nan rèspèt!
6. (a) Kiko un esposo por siña for di e manera ku Hesus a trata su disipelnan? (b) Kiko Pedro a animá esposonan pa hasi?
6 E ehèmpel di Hesus ta siña esposonan ku pa nan imitá su outoridat komo kabes, nan no mester dominá nan esposa na un manera severo, sino, mas bien, nan mester trata nan ku rèspèt i ku amor ku ta reflehá sakrifisio propio. Apòstel Pedro a konsehá esposonan pa imitá e manera amoroso di Hesus dor di mustra komprenshon na nan esposa i ‘onra nan.’ (Lesa 1 Pedro 3:7.) Pues anto, kon un esposo por ehersé su outoridat i a la bes trata su esposa komo un persona digno di onor?
7. Den ki manera un esposo por onra su esposa? Duna un ehèmpel.
7 Un manera ku un esposo por onra su kasá ta dor di tene kuenta ku e esposa su punto di bista i sintimentunan promé ku e tuma desishon ku lo afektá e famia. Podisé mester tuma un desishon pa muda òf pa kambia di trabou òf relashoná ku asuntunan di tur dia, manera unda pa bai ku fakansi òf kon pa redusí e gastunan di famia pa asina por trata ku subida di kosto di bida. Komo ku eseinan ta kosnan ku lo afektá e famia, lo ta bon i un muestra di bondat di parti di e esposo pa e tene kuenta ku e opinion di su esposa, ya ku esei lo por yuda e esposo tuma un desishon balansá ku ta demostrá konsiderashon, i lo ta mas fásil pa e esposa apoy’é. (Pro. 15:22) Esposonan kristian ku ta onra nan esposa ta gana no solamente e amor i rèspèt di nan esposa, sino, mas importante ainda, e aprobashon di Yehova.—Efe. 5:28, 29.
Kon un Esposa Ta Mustra Rèspèt Profundo pa Su Esposo?
8. Pakiko ta bon pa evitá e ehèmpel di Eva?
8 Hesus ta un ehèmpel perfekto pa esposanan kristian den loke ta sumishon na outoridat. Ki un diferensia grandi tin entre Hesus su punto di bista di outoridat i e aktitut ku e promé esposa humano a desplegá! Eva no tabata un bon ehèmpel pa esposanan. E tabatin un kabes ku Yehova a asigná riba dje i pa medio di ken Yehova tabata dun’é instrukshon. Sinembargo, Eva no a respetá e areglo akí. E no a aseptá e instrukshon ku Adam a transmití na dje. (Gén. 2:16, 17; 3:3; 1 Kor. 11:3) Ta bèrdat ku Satanas a gaña Eva; ma Eva lo mester a konsultá ku su esposo pa wak si tabata bon pa kere e bos ku a pretendé di bis’é loke “Dios sa.” En bes di hasi esei, el a tribi di tuma e responsabilidat di su esposo pa dirigí e famia.—Gén. 3:5, 6; 1 Tim. 2:14.
9. Ki ehèmpel di sumishon Hesus ta pone?
9 Hesus, en kambio, a duna nos e ehèmpel perfekto di ta sumiso na su Kabes. Hesus su aktitut i manera di biba ta mustra ku e “no a konsiderá igualdat ku Dios algu pa tene na dje.” Al kontrario, ‘el a bandoná su mes gloria, i a tuma forma di un sirbidó.’ (Fil. 2:5-7) Awe, komo Rei entronisá, Hesus a keda ku e mesun aktitut. Humildemente e ta someté su mes na su Tata den tur kos i ta apoyá e Tata su outoridat komo Kabes.—Mat. 20:23; Juan 5:30; 1 Kor. 15:28.
10. Kon un esposa lo por apoyá e outoridat ku su esposo tin komo kabes?
10 Ta bon pa un esposa kristian imitá Hesus dor di apoyá e outoridat ku su esposo tin komo kabes. (Lesa 1 Pedro 2:21 i 3:1, 2.) Laga nos konsiderá un situashon kaminda e esposa tin chèns di hasi esaki. Su yu hòmber ta bin pidié pa lag’é hasi algu pa kua e mester tin pèrmit di su mayornan. Komo ku e mayornan no a yega di papia riba e asuntu ei promé, lo ta na su lugá pa e mama puntr’é: “Bo a pidi bo tata?” Si e yu no a hasi esei, e mama lo mester trata e asuntu ku su esposo promé ku e tuma un desishon. Ademas, un esposa kristian siguramente lo no kontradisí su esposo òf kuestioná su opinion dilanti di e muchanan. Si e no ta di akuerdo ku su esposo tokante algu, e mester papia ku e esposo ora nan ta nan so.—Efe. 6:4.
E Ehèmpel Ku Hesus A Pone pa Mayornan
11. Ki ehèmpel Hesus a pone pa mayornan?
11 Maske Hesus no a kasa ni haña yu, e ta un ekselente ehèmpel pa mayornan kristian. Kon asina? Ku amor i pasenshi, el a siña su disipelnan pa medio di su palabra i ehèmpel. El a mustra nan kon pa kumpli ku e enkargo ku el a duna nan. (Luk. 8:1) E manera ku Hesus a trata su disipelnan i e aktitut ku e tabatin pa ku nan a siña nan kon nan mester a trata otro.—Lesa Juan 13:14-17.
12, 13. Kiko ta nesesario pa mayornan lanta yunan ku ta teme Dios?
12 Yu tin e tendensia di imitá nan mayornan, sea den kos bon òf malu. P’esei, mayornan, puntra boso mes: ‘Kiko nos yunan ta siña di nos ehèmpel pa loke ta e kantidat di tempu ku di un banda nos ta dediká na televishon i entretenimentu, i di otro banda, na estudio di Beibel i partisipashon den sirbishi di vèlt? Kiko realmente ta e prioridatnan di nos famia? Nos ta poniendo un bon ehèmpel dor di laga nos bida i nos desishonnan drei rònt di adorashon berdadero?’ Si mayornan ke lanta yunan ku ta teme Dios, e lei di Dios mester ta den nan mes kurason promé.—Deu. 6:6.
13 Ora mayornan ta hasi esfuerso pa apliká prinsipionan di Beibel den asuntunan di tur dia, nan yunan sigur lo no keda sin ripará esaki. E ora ei loke e mayornan ta papia ku e yunan i siña nan lo tin peso. Sinembargo, si e muchanan ta mira ku nan mayornan mes no ta sigui e normanan ku e mayornan ta pone pa nan komo yu, nan lo por yega na e konklushon ku prinsipionan di Beibel no ta realmente importante òf práktiko. Anto esei por pone ku e muchanan lo ta mas inkliná na entregá na preshon di mundu.
14, 15. Ki norma- i balornan mayornan mester kultivá den nan yunan, i kon nan por hasi esaki?
14 Mayornan kristian ta realisá ku kriansa di un yu ta enserá mas ku djis perkurá pa su nesesidatnan material. P’esei, lo no ta niun tiki sabí pa siña un mucha bai tras di metanan ku lo dun’é solamente bentaha material. (Ekl. 7:12) Hesus a siña su disipelnan pa biba segun norma- i balornan spiritual i pa pone aktividatnan spiritual na promé lugá den nan bida. (Mat. 6:33) P’esei, meskos ku Hesus, mayornan kristian mester hasi esfuerso pa kultivá den nan yunan e deseo pa alkansá metanan spiritual.
15 Un manera ku mayornan por hasi esaki ta dor di buska oportunidatnan pa nan yunan asosiá ku rumannan ku ta den sirbishi di tempu kompletu. Pensa ki un gran animashon tinernan por haña ora nan siña konosé e pioneronan òf e superintendente di sirkuito i su kasá. Misioneronan ku ta di bishita, bètelitanan i rumannan ku ta partisipá den e trabou internashonal di konstrukshon por papia ku entusiasmo tokante e goso di sirbi Yehova. E bishitantenan ei probablemente tin eksperensianan interesante pa konta. Nan ehèmpel di sirbishi ku ta desplegá sakrifisio propio por ta un gran yudansa pa boso yunan por tuma desishonnan sabí, pone metanan digno di elogio ku ta relashoná ku nan sirbishi na Dios i haña e edukashon apropiá pa medio di kua nan lo por mantené nan mes den sirbishi di tempu kompletu.
Muchanan, Kiko Lo Yuda Boso Sigui e Ehèmpel di Hesus?
16. Kon Hesus a onra su mayornan riba tera i su Tata den shelu?
16 Muchanan, Hesus a pone un bon ehèmpel pa boso tambe. Hosé ku Maria a haña e tarea di kuida Hesus, i el a obedesé nan. (Lesa Lukas 2:51.) Hesus a rekonosé ku Dios a duna nan e responsabilidat di kuid’é, apesar di nan imperfekshonnan, i p’esei e mester a onra nan. (Deu. 5:16; Mat. 15:4) Komo adulto, Hesus semper a hasi loke a agradá su Tata selestial. Esei a nifiká ku e mester a resistí tentashon. (Mat. 4:1-10) Hóbennan, kisas tin biaha boso ta sinti e tentashon pa desobedesé boso mayornan. Kiko por yuda boso sigui e ehèmpel di Hesus?
17, 18. (a) Ki tipo di preshon hóbennan ta haña nan kuné na skol? (b) Kiko hóbennan por kòrda riba dje pa yuda nan resistí prueba?
17 Kasi sigur mayoria di boso kompañeronan di skol no tin masha rèspèt pa e normanan di Beibel. Nan lo por purba pone preshon riba boso pa boso hasi malu i hasi chèrchè di boso si boso nenga di bai nan tras. Boso kompañeronan di skol a yega di duna boso nòmbernan ofensivo pasobra boso a nenga di partisipá den sierto aktividatnan huntu ku nan? Si ta asina, kon boso a reakshoná? Boso sa ku si boso laga nan intimidá boso i boso hasi loke mayoria di mucha ta hasi, boso lo desepshoná boso mayornan i tambe Yehova. Kiko lo para di boso si boso bai tras di boso kompañeronan di skol? Podisé boso a pone sierto metanan pa boso mes, por ehèmpel, bira pionero òf sirbidó ministerial, bai sirbi kaminda tin mas nesesidat di publikadó di Reino òf bira bètelita. Boso kompañeronan di skol lo yuda boso alkansá e metanan ei si boso ta anda ku nan?
18 Hóbennan den e kongregashon kristian, boso a yega di haña boso mes den situashonnan ku a pone boso fe na prueba? Kon boso a reakshoná? Pensa riba boso ehèmpel, Hesus. El a nenga di entregá na tentashon i a para firme pa loke e tabata sa ta korekto. Si boso kòrda riba esaki, boso lo haña e fortalesa pa bisa boso kompañeronan di skol bon kla ku boso no ke djòin nan den hasi algu ku boso sa ta malu. Meskos ku Hesus, keda ku boso bista fihá riba e speransa di sirbi i obedesé Yehova ku goso pa e restu di boso bida.—Heb. 12:2.
E Yabi pa un Bida di Famia Felis
19. Ki manera di biba ta duna hende berdadero felisidat?
19 Yehova Dios i Hesukristu ke lo mihó pa humanidat. Asta den nos kondishon imperfekto, nos por disfrutá di un sierto grado di felisidat. (Isa. 48:17, 18; Mat. 5:3, NW) Hesus a siña bèrdatnan religioso ku ta forma un base pa e felisidat di humanidat, pero no ta esei so el a siña su disipelnan. Tambe el a siña nan e mihó manera di biba. Es mas, el a laga un ehèmpel práktiko di kiko ta un bida balansá i un aktitut balansá. Nos tur, sin importá kiko ta nos papel den famia, por benefisiá si nos sigui su ehèmpel. Pues anto, esposo, esposa, mayor i yu, sigui e ehèmpel di Hesus! Realmente, e yabi pa gosa di un bida di famia felis, ku ta duna satisfakshon, ta pa aseptá e siñansanan di Hesus i imitá su ehèmpel.
Kon Lo Bo Kontestá?
• Kon esposonan mester ehersé e outoridat ku Dios a duna nan?
• Kon un esposa por imitá e ehèmpel di Hesus?
• Kiko mayornan por siña for di e manera ku Hesus a trata su disipelnan?
• Kiko hóbennan por siña for di e ehèmpel di Hesus?
[Preguntanan di Estudio]
[Plachi na página 16]
Kiko un esposo amoroso lo hasi promé ku e tuma un desishon ku lo afektá su famia?
[Plachi na página 17]
Ki situashon ta duna un esposa un bon chèns pa apoyá e outoridat ku su esposo tin komo kabes?
[Plachi na página 18]
Muchanan ta imitá e bon kustumbernan di nan mayornan