Haña Tesoronan Bon “Skondí” den Dje
Haña Tesoronan Bon “Skondí” den Dje
“Den [dje] tur e tesoronan di sabiduria i konosementu ta skondí.”—KOL. 2:3.
1, 2. (a) Ki ophetonan a keda deskubrí na aña 1922, i na unda nan ta awe? (b) Kiko e Palabra di Dios ta invitá tur hende pa hasi?
HOPI biaha e deskubrimentu di tesoronan skondí tabata tópiko di notisia. Por ehèmpel, na aña 1922, e arkeólogo britániko Howard Carter a hasi un deskubrimentu impreshonante despues ku el a traha diligentemente pa vários dékada den sirkunstansianan difísil. El a haña e graf kasi intakto di Fárao Tutankamon; e graf tabata kontené kasi 5.000 opheto.
2 Pa espektakular ku e deskubrimentu di Carter tabata, tòg awe mayoria di e ophetonan ku el a deskubrí ta den museo òf kolekshonnan privá. Podisé nan tin un balor históriko òf artístiko, pero nan no tin kasi ningun influensia riba nos bida di tur dia. Sinembargo, e Palabra di Dios ta invitá nos pa buska tesoro ku di bèrdat ta yuda nos ku algu. E invitashon akí ta konta pa tur hende, i e rekompensa ta bal muchu mas ku kualke tesoro material.—Lesa Proverbionan 2:1-6.
3. Kon e tesoronan ku Yehova ta urgi hende ku ta ador’é buska ta benefisiá nan?
3 Pensa riba e balor di e tesoronan ku Yehova ta urgi hende ku ta ador’é buska. Entre e tesoronan ei tin ‘temor di Yehova,’ lokual por ta un protekshon pa nos den e tempu peligroso akí. (Sal. 19:9) Ademas, nos por “deskubrí e konosementu di Dios,” i esei por hiba nos na e onor di mas grandi ku un hende por tin, esta, un relashon personal i íntimo ku e Haltísimo. Anto si nos tin e otro tesoronan ku Dios ta duna, manera sabiduria, konosementu i disernimentu, nos lo por trata ku e problema- i preokupashonnan di bida diario ku éksito. (Pro. 9:10, 11) Pero, kon nos por haña e tesoronan balioso ei?
Kon Nos Por Haña Tesoro Spiritual?
4. Kon nos por haña e tesoronan spiritual ku Dios ta primintí?
4 Hopi biaha, arkeólogonan i otro eksploradónan tin ku buska tur kaminda pa deskubrí un tesoro. Ma den nos kaso no ta asina. Nos sa presis unda nos por haña tesoro spiritual. E Palabra di Dios, meskos ku un mapa di tesoro, ta mustra nos presis na unda nos por haña e tesoronan ku Dios a primintí. Apòstel Pablo tabata referí na Kristu ora el a skirbi: “Den [dje] tur e tesoronan di sabiduria i konosementu ta skondí.” (Kol. 2:3) Ora nos lesa e palabranan ei, kisas nos ta puntra nos mes: ‘Pakiko nos mester buska e tesoronan ei? Den ki sentido nan ta “skondí” den Kristu? Anto kon nos ta haña nan?’ Pa haña e kontesta, laga nos analisá e palabranan di e apòstel.
5. Dikon Pablo a skirbi tokante tesoro spiritual?
5 Pablo a skirbi e palabranan ei na e rumannan kristian na Kolosas. El a bisa nan ku e tabata hiba un lucha pa nan ‘pa nan kurason por haña konsuelo, i pa nan por ta armoniosamente uní den amor.’ (Lesa Kolosensenan 2:1 i 2. *) Dikon Pablo tabata asina preokupá? Evidentemente, e tabata sa ku algun ruman einan tabata promové sierto filosofianan griego òf tabata boga pa bolbe kuminsá warda Lei di Moisés, i ku probablemente nan a influensiá e otro rumannan na Kolosas. El a duna e rumannan e spièrtamentu serio akí: “Mira pa ni un hende no kohe boso prezu dor di filosofia i engaño bano, segun tradishon di hende, segun e prinsipionan elemental di mundu, i no segun Kristu.”—Kol. 2:8.
6. Pakiko nos lo mester ta interesá den e konseho di Pablo?
6 Awe nos tambe ta haña nos ku e mesun tipo di influensianan ei for di Satanas i su mundu malbado. Loke ta determiná hende su manera di pensa, nan moralidat, meta i estilo di bida ta filosofia mundano, inkluso e teoria di evolushon i movementunan ku ta nenga eksistensia di Dios. Religion falsu ta hunga un papel importante den hopi selebrashon popular di dianan di fiesta. E meta di hopi programa di televishon, pelíkula, muzik i otro tipo di entretenimentu ta pa satisfasé e deseonan di e karni pekaminoso, i gran parti di loke tin riba Internet ta forma un berdadero peliger pa mucha i hende grandi. Si konstantemente nos ta den kontakto ku e desaroyonan mundano akí, lo ta fásil pa nan influensiá nos sintimentunan i nos aktitut pa ku e guia ku Yehova ta duna i esei por pone nos slèk e gara firme ku nos tin riba e bida berdadero. (Lesa 1 Timoteo 6:17-19.) Pues, ta bisto ku nos tin ku komprondé kiko Pablo tabata ke men ku e palabranan ku el a skirbi e kolosensenan i tuma nan na serio si nos no ke kai den e trampanan di Satanas.
7. Kiko ta e dos kosnan ku Pablo a bisa ku lo a yuda e kolosensenan?
7 Laga nos bai bèk na loke Pablo a bisa e kolosensenan. Nos ta ripará ku despues ku el a menshoná su preokupashon, el a hala atenshon na dos kos ku lo a yuda nan haña konsuelo i pa nan tabata uní den amor. Di promé, el a menshoná “un komprondementu kla i sigur.” Nan mester tabata plenamente konvensí ku nan komprondementu di e Skritura tabata korekto, di manera ku nan fe lo tabata basá riba un fundeshi sigur. (Heb. 11:1) Kaba el a menshoná “un konosementu eksakto di e sekreto sagrado di Dios.” Nan tabatin mester di mas ku djis un konosementu básiko di e bèrdat. Loke nan tabatin mester ta un komprondementu kla di e kosnan profundo di Dios. (Heb. 5:13, 14) Esta bon konseho pa e kolosensenan i pa nos awe! Pero kon nos por haña tal komprondementu sigur i tal konosementu eksakto? Pablo a duna nos e yabi pa esei den e siguiente deklarashon profundo tokante Hesukristu: “Den [dje] tur e tesoronan di sabiduria i konosementu ta skondí.”
Tesoronan “Skondí” den Kristu
8. Splika kiko e ekspreshon “skondí” den Kristu ke men.
8 Ora Pablo a bisa ku tur e tesoronan di sabiduria i di konosementu ta “skondí” den Kristu, e no tabata ke men ku nan ta será na yabi, fuera di alkanse di tur hende. Mas bien, esei simplemente ke men ku pa haña e tesoronan ei, nos tin ku hasi esfuerso diligente, i nos atenshon mester ta dirigí riba Hesukristu. Esaki ta na armonia ku loke Hesus mes a bisa tokante su mes: “Ami ta e kaminda, i e bèrdat, i e bida; ni un hende no ta bin serka e Tata, sino pa medio di mi.” (Juan 14:6) Sí, pa deskubrí e konosementu di Dios, nos tin ku hasi uso di e yudansa i guia ku Hesus ta perkurá.
9. Ki papelnan Dios a asigná Hesus?
9 Fuera di ta “e kaminda,” Hesus a bisa ku e ta “e bèrdat, i e bida.” Esaki ta indiká ku Hesus ta muchu mas ku djis e medio pa yega serka e Tata. Hesus ta hunga un papel importante tambe pa yuda hende haña komprondementu di e bèrdatnan di Beibel i pa yuda hende gana bida eterno. Pues, di bèrdat tin hoyanan spiritual di balor inkalkulabel skondí den Hesus. Nan ta einan, wardando pa hende ku ta studia Beibel kuidadosamente deskubrí nan. Laga nos analisá algun di e hoyanan akí ku ta influensiá nos speransa pa futuro i nos relashon ku Dios direktamente.
10. Kiko nos por siña tokante Hesus for di Kolosensenan 1:19 i 2:9?
10 “Den dje henter e plenitut di e Deidat [kualidat divino, NW] ta biba korporalmente.” (Kol. 1:19; 2:9) Komo ku Hesus a biba durante miónes di aña huntu ku su Tata selestial, e ta esun ku, mihó ku tur otro hende, konosé e boluntat di Dios i sa ki klase di persona e ta. Durante Hesus su ministerio riba tera, el a siña hende loke su Tata a siñ’é i pa medio di su akshonnan el a reflehá e kualidatnan ku su Tata a kultivá den dje. Ta p’esei Hesus por a bisa: “Esun ku a mira mi a mira e Tata.” (Juan 14:9) Tur e sabiduria i konosementu di Dios ta skondí, òf ta biba, den Kristu, i e mihó manera pa nos siña tokante Yehova ta dor di siña kuidadosamente tur loke nos por tokante Hesus.
11. Kiko ta e konekshon entre Hesus i profesianan di Beibel?
11 “Di dje tur e profetanan ta duna testimonio.” (Echo. 10:43) E palabranan ei ta indiká ku Hesus ta e personahe sentral den e realisashon di tantísimo profesia ku tin den Beibel. Hende por komprondé profesia di Beibel—for di e promé deklarashon profétiko ku Yehova a hasi na Génesis 3:15, te na e vishonnan glorioso di e buki Revelashon—solamente si nan tene kuenta ku e papel ku Hesus ta hunga en konekshon ku e Reino Mesiániko. Ta p’esei hende ku no ta aseptá Hesus komo e Mesias primintí no por komprondé mayoria di e profesianan ku tin den e Skritura Hebreo. Ta p’esei tambe den bista di hende ku no ta apresiá e balor di e Skritura Hebreo—ku ta kontené kantidat di profesia Mesiániko—Hesus tabata djis un gran hòmber. Konosementu di Hesus ta duna e pueblo di Dios e yabi pa por komprondé profesianan di Beibel ku mester kumpli ainda.—2 Kor. 1:20.
12, 13. (a) Den ki sentido Hesus ta “e lus di mundu”? (b) Ki obligashon e siguidónan di Kristu tin awor ku nan a keda librá di skuridat religioso?
12 “Ami ta e lus di mundu.” (Lesa Juan 8:12 i 9:5.) Hopi promé ku Hesus a nase riba tera, profeta Isaias a profetisá: “E pueblo ku ta kana den skuridat lo mira un gran lus; esnan ku ta biba den un tera skur, un lus lo lusa riba nan.” (Isa. 9:2) Apòstel Mateo a splika ku Hesus a kumpli ku e profesia ei ora El a kuminsá prediká i bisa: “Repentí, pasobra e reino di shelu ta serka.” (Mat. 4:13, 14, 16, 17) E ministerio di Hesus a trese lus spiritual pa e hendenan i tambe a libra nan for di sklabitut na siñansanan religioso falsu. Hesus a bisa: “Mi a bini komo lus den mundu, pa tur esnan ku kere den mi no keda den skuridat.”—Juan 1:3-5; 12:46.
13 Hopi aña despues, apòstel Pablo a bisa e rumannan kristian: “Ántes boso tabata skuridat, ma awor boso ta lus den Señor; kana komo yunan di lus.” (Efe. 5:8) Komo hende librá for di sklabitut na skuridat religioso, kristiannan tin e obligashon di kana komo yunan di lus. Esaki ta na armonia ku loke Hesus a bisa su siguidónan den e Sermon Riba Seru: “Laga boso lus bria dilanti di hende di tal manera ku nan por mira boso bon obranan i glorifiká boso Tata ku ta den shelu.” (Mat. 5:16) Abo tin asina tantu apresio pa e tesoronan spiritual ku bo a deskubrí den Hesus ku bo ta rekomendá nan na otro hende, tantu dor di papia tokante nan komo pa medio di bo bon kondukta kristian?
14, 15. (a) Ki papel karné i otro bestia a hunga den adorashon berdadero den tempu bíbliko? (b) Dikon Hesus ta un tesoro inkomparabel den su papel komo “e Lamchi di Dios”?
14 Hesus ta “e Lamchi di Dios.” (Juan 1:29, 36) Beibel ta siña nos ku karné a hunga un papel importante pa hende por a haña pordon di piká i pa por aserká Dios. Por ehèmpel, despues ku Abraham a demostrá ku e tabata dispuesto pa ofresé su yu Isaak, un angel a bis’é pa e no hasi Isaak daño i a sòru pa e haña un chubatu di karné pa e por a ofresé na lugá di Isaak. (Gén. 22:12, 13) Ora e israelitanan a ser librá for di Egipto, karné a bolbe hunga un papel importante, e biaha akí komo parti di ‘e Pasku di Yehova.’ (Eks. 12:1-13) Ademas, bou di Lei di Moisés e israelitanan mester a sakrifiká vários bestia, entre otro, karné i kabritu.—Eks. 29:38-42; Lev. 5:6, 7.
15 Ningun di e sakrifisionan ei—de echo, ningun sakrifisio ku hende a ofresé—por a trese liberashon permanente for di piká i morto. (Heb. 10:1-4) Di otro banda, Hesus ta “e Lamchi di Dios ku ta kita piká di mundu.” E echo akí so kaba ta hasi Hesus un tesoro ku ta surpasá tur otro tesoro material ku hende a yega di deskubrí. P’esei, ta bon pa nos tuma nos tempu pa studia e tópiko di reskate kuidadosamente i pone fe den e perkurashon maravioso ei. Si nos hasi esei, nos por tin e speransa di risibí gran bendishon i rekompensa, esta, gloria i onor huntu ku Kristu den shelu pa un “tou chikitu,” i bida eterno den Paradeis riba tera pa e “otro karnénan.”—Luk. 12:32; Juan 6:40, 47; 10:16.
16, 17. Dikon ta masha importante pa nos komprondé e papel ku Hesus ta hunga komo “e Agente Prinsipal i Perfekshonadó di nos fe”?
16 Hesus ta “e Agente Prinsipal i Perfekshonadó di nos fe.” (Lesa Hebreonan 12:1 i 2. *) Na Hebreonan kapítulo 11, nos ta haña e manera maestral ku Pablo a konsiderá e asuntu di fe, ku a inkluí un definishon breve i al kaso di fe i un lista di hòmber- i muhénan ehemplar ku a biba segun fe, manera Noe, Abraham, Sara i Rahab. Ku tur esei na mente, Pablo a urgi e rumannan kristian pa “mira atentamente na e Agente Prinsipal i Perfekshonadó di nos fe, Hesus.” Dikon?
17 Ounke e hòmber- i muhénan fiel menshoná na Hebreonan kapítulo 11 tabatin fe firme den e promesa di Dios, nan no tabata sa tur detaye di e manera ku Dios lo a kumpli ku su promesa pa medio di e Mesias i e Reino. Den e sentido ei, nan fe tabata inkompletu. De echo, asta esnan ku Yehova a usa pa skirbi e tantísimo profesianan Mesiániko no a kapta plenamente e nifikashon di loke nan a skirbi. (1 Ped. 1:10-12) Solamente dor di komprondé e papel di Hesus, spesialmente kon el a kumpli ku profesia, fe por ser perfekshoná, òf hasí kompletu. Pues anto, ta masha importante pa nos komprondé bon e papel ku Hesus tin komo “e Agente Prinsipal i Perfekshonadó di nos fe,” i rekonosé e papel ei!
Sigui Buska
18, 19. (a) Menshoná otro hoyanan spiritual skondí den Kristu. (b) Dikon nos tin ku sigui buska tesoro spiritual serka Hesus?
18 Nos a konsiderá djis algun di e papelnan balioso ku Hesus ta hunga den e propósito di Dios pa salba humanidat. Tin mas hoya spiritual skondí den Kristu. Nos lo haña goso i benefisio si nos deskubrí nan. Por ehèmpel, apòstel Pedro a yama Hesus “e Prens di bida” i “e strea di mardugá” ku ta sali. (Echo. 3:15; 5:31; 2 Ped. 1:19) Anto Beibel a apliká e ekspreshon “Amèn” na Hesus. (Rev. 3:14) Bo sa kiko ta e nifikashon i importansia di e papelnan akí? Manera Hesus a bisa, “buska i boso lo haña.”—Mat. 7:7.
19 No tin ni ún hende den historia kende su bida tabatin asina tantu nifikashon i tabata asina estrechamente ligá ku nos bienestar eterno manera e bida di Hesus. Den dje tin tesoro spiritual ku ta fásilmente na alkanse di esnan ku sinseramente ta buska nan. Nos ta spera ku lo bo tin e goso i bendishon di deskubrí e tesoronan bon “skondí” den dje.
[Nota]
^ par. 5 Kolosensenan 2:1, 2 (NW): “Pasobra mi ke pa boso realisá ki un lucha grandi mi ta hibando pa boso i pa e rumannan na Laodisea i pa tur esnan ku no a mira mi personalmente. Mi ta hasi esei pa nan kurason por haña konsuelo, pa nan por ta armoniosamente uní den amor i asina alkansá gran rikesa—un komprondementu kla i sigur—i tambe un konosementu eksakto di e sekreto sagrado di Dios, esta, Kristu.”
^ par. 16 Hebreonan 12:1, 2 (NW): “Pues anto, dor ku nos tin un nubia asina grandi di testigu rònt di nos, laga nos tambe kita tur karga i e piká ku fásilmente ta kohe nos den trampa, i laga nos kore e kareda ku ta poné dilanti nos ku awante, miéntras nos ta mira atentamente n’e Agente Prinsipal i Perfekshonadó di nos fe, Hesus. P’e goso ku a ser poné su dilanti el a wanta un staka di tormento, despresiando bèrgwensa, i a sinta na man drechi dje trono di Dios.”
Bo Ta Kòrda?
• Beibel ta urgi kristiannan pa buska ki tesoro?
• Dikon e konseho di Pablo dirigí na e kolosensenan ta bon pa nos awe tambe?
• Menshoná algun tesoro spiritual “skondí” den Kristu i splika nan.
[Preguntanan di Estudio]
[Plachinan na página 13]
Beibel ta manera un mapa di tesoro ku ta guia nos na e rikesanan “skondí” den Kristu