A Bolbe Deskubrí e Speransa di Bida Eterno Riba Tera

“Daniel, tene e palabranan akí skondí . . . te na e tempu di e fin; hopi hende lo kore pariba-pabou, i konosementu lo oumentá.”—DAN. 12:4.

1, 2. Ki preguntanan nos lo trata den e artíkulo akí?

MIÓNES di hende awe ta komprondé bon kla kiko ta e base bíbliko pa e speransa di bida eterno den un paradeis riba tera. (Rev. 7:9, 17) Na prinsipio di historia humano, Dios a revelá ku el a krea hende, no pa biba un par di aña i despues muri, sino pa biba pa semper.—Gén. 1:26-28.

² E israelitanan tabatin e speransa ku humanidat lo ser restorá na e estado di perfekshon ku Adam a pèrdè. I e Skritura Griego Kristian ta splika ki medio Dios lo usa pa hende por biba pa semper den Paradeis riba tera. Siendo ku esei ta asina, pakiko mester a bolbe deskubrí e speransa di humanidat? Kon el a ser revelá i kon miónes di hende a haña sa di dje?

Un Speransa Ku A Ser Tapá

3. Dikon no ta un sorpresa ku humanidat su speransa di bida eterno riba tera a ser tapá?

³ Hesus a profetisá ku profetanan falsu lo korumpí su siñansanan i gaña mayoria di hende. (Mat. 24:11) Apòstel Pedro a spièrta kristiannan: “Lo tin tambe siñadónan falsu meimei di boso.” (2 Ped. 2:1) Apòstel Pablo a papia di un ‘tempu ku hende lo no a soportá doktrina sano mas; ma al kontrario, pa satisfasé nan mes deseonan, nan lo a akumulá pa nan mes siñadónan pa bisa nan loke nan orea ku ta kishikí kier tende.’ (2 Tim. 4:3, 4) Satanas ta gaña hende i ta usa kristiandat pa tapa e bèrdat konmovedor tokante Dios su propósito pa hende i e tera.—Lesa 2 Korintionan 4:3 i 4.

4. Ki speransa pa humanidat e lidernan religioso apóstata a rechasá?

⁴ E Skritura ta splika ku e Reino di Dios ta un gobièrnu den shelu ku lo aplastá i pone un fin na tur gobièrnu di hende. (Dan. 2:44) Durante Kristu su gobernashon di mil aña, Satanas lo ser será den abismo, e mortonan lo ser resusitá i humanidat lo ser elevá na perfekshon riba tera. (Rev. 20:1-3, 6, 12; 21:1-4) Sinembargo, lidernan religioso di kristiandat a adoptá i inkluí otro ideanan den nan propio siñansanan. Por ehèmpel, Orígenes di Alehandria, e Tata di Iglesia di siglo 3, a kondená hende ku tabata kere ku e Milenio lo trese bendishon riba tera. Segun The Catholic Encyclopedia, e teólogo katóliko Agustin di Hipo (aña 354-430 di nos era) “a apoyá e idea ku lo no tin un milenio.” *

5, 6. Dikon Orígenes i Agustin tabata kontra e kreensia den un milenio?

⁵ Dikon Orígenes i Agustin tabata kontra e kreensia den un milenio? Orígenes a  adoptá e idea di un alma inmortal for di tradishon griego. Segun e teólogo Werner Jaeger, debí ku Orígenes a ser influensiá fuertemente pa Plato su ideanan tokante alma, el “a inkorporá tur Plato su ideanan relashoná ku alma i su destino den e doktrina kristian.” Konsekuentemente, Orígenes a siña hende ku kualke bendishon ku e Milenio lo trese no por ta riba tera, sino den e region di spiritu.

⁶ Promé ku Agustin a bira “kristian” na edat di 33 aña, el a bira neoplatonista, esta, un fanátiko di un vershon di Plato su filosofia ku Plotino a desaroyá den siglo 3. Despues ku Agustin a kombertí, el a keda ku su pensamentunan neoplatóniko. The New Encyclopædia Britannica a bisa ku ‘el a hunga un papel krusial den mesklamentu di e siñansanan di e Tèstamènt Nobo ku e siñansanan di Plato.’ Segun The Catholic Encyclopedia, Agustin a splika ku e Reinado di Mil Aña ku Revelashon kapítulo 20 ta deskribí ta simplemente “un fábula.” E ta sigui bisa ku ‘teólogonan griego-romano ku a bin despues a adoptá e splikashon akí i ku hende no tabata kere mas den un milenio ku lo trese bendishon riba tera.’

7. Ki kreensia falsu a debilitá hende su speransa di bida eterno riba tera, i kon esaki a sosodé?

⁷ Humanidat su speransa di bida eterno riba tera a ser debilitá dor di e kreensia ku a prevalesé den Babilonia di antigwedat i ku a plama rònt mundu, esta, e kreensia ku hende tin un alma òf spiritu inmortal den nan. Ora ku kristiandat a adoptá e kreensia ei, teólogonan a trose e Skritura pa laga parse ku tekstonan ku ta deskribí e speransa selestial ta siña ku tur bon hende ta bai shelu. Segun e kreensia akí, hende su bida riba tera ta algu temporal—un prueba pa determiná si e ta digno di haña bida den shelu. Algu similar a pasa ku e speransa di bida eterno riba tera ku hudiunan tabatin originalmente. Segun ku e hudiunan gradualmente a adoptá e idea griego di ku hende tin un alma inmortal, nan speransa original di bida eterno riba tera a disparsé. E kreensia akí ta masha distinto for di loke Beibel ta bisa di hende. Hende ta un kriatura di karni i wesu, e no ta un spiritu. Yehova a bisa e promé hòmber: “Stòf bo ta.” (Gén. 3:19) Hende su lugá di biba pa semper ta riba tera i no den shelu.—Lesa Salmo 104:5; 115:16.

Bèrdat Ta Bria den Skuridat

8. Kiko algun erudito rònt di añanan 1600 a bisa di hende su speransa?

⁸ Ounke mayoria di religion ku ta pretendé di ta kristian ta rechasá e speransa di bida eterno riba tera, no ta semper Satanas a logra tapa e bèrdat. Atraves di siglonan, algun lesadó kuidadoso di Beibel a mira  rayonan dje lus di e bèrdat segun ku nan a komprondé algun aspekto di e manera ku Dios lo restorá humanidat na perfekshon. (Sal. 97:11; Mat. 7:13, 14; 13:37-39) Rònt di añanan 1600, tradukshon i imprenta di Beibel a pone ku hopi mas hende por a haña e Skritura Santu. Na 1651, un erudito a skirbi ku mediante Kristu “tur hende lo haña bida riba Tera,” pasobra ta “Paradeis i Bida Eterno riba Tera” nan a pèrdè pa motibu di Adam. (Lesa 1 Korintionan 15:21 i 22.) Un poëta ingles ku ta famoso mundialmente, John Milton (1608-1674), a skirbi e obra Paradeis Pèrdí i su kontinuashon Paradeis Rekobrá. Den su obranan, Milton a referí na e rekompensa ku hende fiel lo risibí den un paradeis riba tera. Ounke Milton mes a dediká hopi tempu di su bida na estudio di Beibel, el a atmití ku ta te na e presensia di Kristu hende lo komprondé e bèrdat di e Skritura kompletamente.

9, 10. (a) Kiko Isaac Newton a skirbi tokante humanidat su speransa? (b) Dikon e presensia di Kristu a parse asina leu den futuro pa Newton?

⁹ E famoso matemátiko Sir Isaac Newton (1642-1727) tambe tabata masha interesá den Beibel. El a komprondé ku e santunan lo haña resurekshon pa biba den shelu i ku nan lo goberná na un manera invisibel huntu ku Kristu. (Rev. 5:9, 10) Relashoná ku e súpditonan di e Reino, el a skirbi: “Despues di e dia di huisio, hende lo sigui biba riba tera no pa 1000 aña so sino asta pa semper.”

¹⁰ Newton a pensa ku Kristu su presensia lo a kuminsá masha leu den futuro. Segun e historiadó Stephen Snobelen: “Un motibu pakiko Newton a mira e Reino di Dios asina leu den futuro tabata pasobra e tabata masha pesimista debí na e siñansa apóstata di trinidat ku e hendenan rònt di dje tabata kere.” Ainda e bon nobo tabata tapá. I Newton no a mira ningun grupo ku tabata bisa ku nan ta kristian ku por a prediká e bon nobo. El a skirbi: “Ta te na e tempu di fin hende lo por komprondé e profesianan di Daniel i Juan [e último akí a ser registrá den e buki di Revelashon].” Newton a splika ku “Daniel a bisa ku ‘hopi hende lo kore pariba-pabou, i konosementu lo oumentá.’ Pasobra e Evangelio mester ser prediká den tur nashon promé ku e tribulashon grandi i e fin di mundu. E multitut di hende ku rama di palma den nan man, ku ta sali for di e tribulashon grandi, lo no por ta un kantidat inkontabel for di tur e nashonnan, a ménos ku nan a oumentá asina tantu debí na e trabou di prediká e Evangelio ku a tuma lugá promé ku e tribulashon ei kuminsá.”—Dan. 12:4; Mat. 24:14; Rev. 7:9, 10.

11. Dikon humanidat su speransa a keda tapá pa mayoria di hende den e tempu di Milton i Newton?

¹¹ Den e tempu di Milton i Newton, tabata peligroso pa ekspresá ideanan ku tabata kontrali na e doktrina ofisial di iglesia. P’esei, hopi di e kosnan ku nan a skirbi relashoná ku nan investigashonnan di Beibel a wòrdu publiká te despues di nan morto. E Reformashon di siglo 16 no a reformá òf korigí e siñansa di alma inmortal. I mayoria di e iglesianan protestant ku tabatin mas influensia a sigui siña hende e idea di Agustin, esta, ku e Milenio lo no ta den futuro sino ku el a tuma lugá kaba. Konosementu a oumentá den tempu di fin?

Berdadero “Konosementu Lo Oumentá”

12. Na ki tempu berdadero konosementu a oumentá?

¹² Daniel a profetisá di un desaroyo masha  positivo relashoná ku “e tempu di e fin.” (Lesa Daniel 12:3, 4, 9 i 10.) Hesus tambe a profetisá algu similar, el a bisa: “E ora ei e hustunan lo bria manera solo.” (Mat. 13:43) Kon berdadero konosementu a oumentá den e tempu di fin? Laga nos konsiderá algun desaroyo históriko den e dékadanan promé ku 1914, e aña ku e tempu di fin a kuminsá.

13. Kiko Charles Taze Russell a skirbi despues ku el a analisá e tópiko tokante restorashon di humanidat na perfekshon?

¹³ Den e último parti di añanan 1800, un grupo di personanan sinsero tabata hasi esfuerso pa komprondé “e ehèmpel di palabranan sano.” (2 Tim. 1:13) Ún di nan tabata Charles Taze Russell. Na 1870, é i algun otro hende ku tabata buska e bèrdat a forma un grupo di estudio di Beibel. Na 1872, nan a analisá e tópiko enkuanto restorashon di humanidat na e perfekshon ku Adam tabatin. Despues, Russell a skirbi: “Promé ku e tempu ei, nos no tabatin un bista kla di e gran distinshon ku tin entre e rekompensa [selestial] di e iglesia [e kongregashon di kristiannan ungí] ku awor ta bou di prueba i e rekompensa di e fielnan di humanidat en general.” E rekompensa di e últimonan akí lo ta “restorashon na e perfekshon humano ku nan antepasado Adam a disfrutá di dje den Edén.” Russell a atmití ku tabatin otro hende ku a yud’é den su estudio di Beibel. Ken e hendenan akí tabata?

14. (a) Kon Henry Dunn a komprondé Echonan 3:21? (b) Segun Dunn, ken lo biba pa semper riba tera?

¹⁴ Henry Dunn tabata ún di nan. El a skirbi tokante e “restorashon di tur kos, di kual Dios a papia pa medio di boka di su profetanan santu for di antigwedat.” (Echo. 3:21) Dunn tabata sa ku e restorashon akí ta enserá ku hende lo ser elevá na perfekshon riba tera durante e Reinado di  Mil Aña di Kristu. Ademas, Dunn a analisá un pregunta ku hopi hende tabata hasi nan mes, esta, ken ta e hendenan ku lo biba pa semper riba tera? El a splika ku miónes di hende lo haña resurekshon, lo siña e bèrdat i haña oportunidat pa ehersé fe den Kristu.

15. Kiko George Storrs a komprondé tokante resurekshon?

¹⁵ Na 1870, George Storrs tambe a yega n’e konklushon ku lo tin hende inhustu ku lo haña resurekshon i un oportunidat pa biba pa semper. Tambe el a komprondé for di e Skritura ku si un persona ku haña resurekshon no hasi bon uso di e oportunidat akí, ‘e pekadó ei “lo muri” ounke e tin e “edat di shen aña.”’ (Isa. 65:20) Storrs a biba na Brooklyn, New York, i tabata editor di un revista ku tabata yama Bible Examiner.

16. Kiko a distinguí e Studiantenan di Beibel for di kristiandat?

¹⁶ Russell a komprondé for di Beibel ku e tempu a yega pa hende rònt mundu haña sa e bon nobo. P’esei, na 1879 el a kuminsá publiká E Toren di Vigilansia di Sion i Anunsiante dje Presensia di Kristu, ku awor yama E Toren di Vigilansia Anunsiando e Reino di Yehova Dios. Anteriormente, ta masha poko hende tabata komprondé e bèrdat tokante e speransa di humanidat. Pero e tempu ei, gruponan di Studiantenan di Beibel den hopi pais tabata risibí i studia E Toren di Vigilansia. E kreensia ku ta solamente un poko hende ta bai shelu, miéntras ku miónes di hende lo haña bida perfekto riba tera a distinguí e Studiantenan di Beibel for di mayoria iglesia di kristiandat.

17. Kon berdadero konosementu a oumentá?

¹⁷ Na aña 1914, e “tempu di fin” ku Beibel a profetisá a kuminsá. Berdadero konosementu tokante e speransa di humanidat a oumentá? (Dan. 12:4) Promé i durante 1913, Russell su diskursonan tabata wòrdu imprimí den 2.000 korant ku un kobertura total di 15.000.000 lektor. Na fin di 1914, mas ku 9.000.000 hende riba tres kontinente a mira e “Foto-Drama di Kreashon”—un kombinashon di pelíkula i ‘slide’ ku a duna splikashon di Kristu su Reinado di Mil Aña. For di 1918 te na 1925, sirbidónan di Yehova rònt mundu a presentá e diskurso “Miónes di Hende na Bida Awor Lo No Muri Nunka,” den mas ku 30 idioma. E diskurso akí a splika e speransa di bida eterno riba tera. Durante 1934, Testigunan di Yehova a realisá ku esnan ku tin speransa di biba pa semper riba tera mester batisá. E komprondementu akí a renobá nan zelo pa e trabou di prediká e bon nobo di Reino. Awe, e speransa di biba pa semper riba tera ta yena kurason di miónes di hende ku sintimentunan di gratitut pa Yehova.

“Libertat Glorioso” Ta Serka!

18, 19. Ki klase di bida e profesia di Isaias 65:21-25 ta deskribí?

¹⁸ Yehova a inspirá profeta Isaias pa skirbi tokante e klase di bida ku Su pueblo lo disfrutá di dje riba tera. (Lesa Isaias 65:21-25.) Evidentemente, te ainda tin algun palu ku tabata eksistí un 2.700 aña pasá tempu ku profeta Isaias a skirbi e palabranan ei. Bo por imaginá bo mes ta biba asina tantu tempu yen di forsa i bon di salú?

¹⁹ Nos bida lo no ta kòrtiku. Mas bien, nos lo tin tur oportunidat pa konstruí, planta i siña. Pensa riba e amistatnan ku lo bo por sera. E relashonnan ei, ku ta basá riba amor, lo dura pa semper. E ora ei sí “e yunan di Dios” lo disfrutá di “libertat glorioso” riba tera!—Rom. 8:21.

[Nota]

Bo Por Splika?

• Kon humanidat su speransa di bida riba tera a ser tapá?

• Kiko algun lektor di Beibel a komprondé den añanan 1600?

• Kon e berdadero speransa di humanidat a bira mas kla segun ku 1914 tabata aserkando?

• Kon konosementu tokante e speransa di bida riba tera a oumentá?

[Preguntanan di Estudio]

[Plachinan na página 21]

E poëta John Milton (man robes) i e matemátiko Isaac Newton (man drechi) tabata sa di e speransa di bida eterno riba tera

[Plachinan na página 23]

E promé Studiantenan di Beibel a komprondé for di e Skritura ku tabata tempu pa hende rònt mundu haña sa di e berdadero speransa di humanidat