E Speransa di Bida Eterno Riba Tera—Un Siñansa di Kristu?

“[Dios] lo seka tur lágrima kita for di nan wowo; i lo no tin morto mas.”—REV. 21:4.

1, 2. Kon nos por sa ku hopi hudiu den e promé siglo tabatin e speransa di haña bida eterno riba tera?

UN YÒNKUMAN riku i prominente a aserká Hesus, a kai na rudia su dilanti i a puntr’é: “Bon Maestro, kiko mi mester hasi pa heredá bida eterno?” (Mar. 10:17) E yònkuman a puntra kon e por haña bida eterno; pero bida eterno na unda? Manera nos a konsiderá den e artíkulo anterior, siglonan promé, Dios a duna hudiunan e speransa di resurekshon i di bida eterno riba tera. Den e promé siglo, hopi hudiu a sigui karga e speransa ei.

² Aparentemente, Marta, un amiga di Hesus, tabatin resurekshon riba tera na mente ora el a bisa di su ruman hòmber ku a muri: “Mi sa ku e lo lanta den e resurekshon riba e último dia.” (Juan 11:24) Ta sierto ku saduseonan di e tempu ei no tabata kere den resurekshon. (Mar. 12:18) Sinembargo, George Foot Moore a bisa den su buki Judaism in the First Centuries of the Christian Era (Hudaismo den e Promé Siglonan di e Era Kristian): “Obranan skirbí . . . di siglo 2 òf di un par di siglo promé ku nos era ta konfirmá ku hopi hende tabata kere ku na sierto momento den historia, hendenan ku a muri den pasado lo haña bida atrobe riba tera.”  P’esei, e hòmber riku ku a aserká Hesus kier a haña bida eterno riba tera.

3. Ki preguntanan nos lo konsiderá den e artíkulo akí?

³ Awendia, hopi religion i eksperto di Beibel ta bisa ku e speransa di bida eterno riba tera no ta un siñansa di Kristu. Hopi hende tin e speransa di sigui biba den e region di spiritu despues di morto. Pues, ora lektornan di e Skritura Griego Kristian lesa e ekspreshon “bida eterno,” hopi di nan ta kere ku semper e ta referí na bida den shelu. Pero, esei ta bèrdat? Kiko Hesus tabata ke men ora el a papia di bida eterno? Kiko su disipelnan tabata kere? E Skritura Griego Kristian ta siña ku nos por haña bida eterno riba tera?

Bida Eterno “den e Regenerashon”

4. Kiko lo tuma lugá “den e regenerashon”?

⁴ Beibel ta siña ku kristiannan ungí lo haña resurekshon pa nan goberná e tera for di shelu. (Luk. 12:32; Rev. 5:9, 10; 14:1-3) Sinembargo, ora Hesus a papia tokante bida eterno no ta tur biaha el a referí únikamente na e grupo ei. Por ehèmpel, konsiderá loke el a bisa su disipelnan despues ku e yònkuman riku a bai tristu pasobra Kristu a konseh’é pa bandoná tur su pertenensianan i bira siguidó di dje. (Lesa Mateo 19:28 i 29.) Hesus a bisa su disipelnan ku nan lo ta entre esnan ku lo goberná komo rei i husga “e diesdos tribunan di Israel,” esta, henter humanidat ku eksepshon di e personanan ku ta bai goberná den shelu. (1 Kor. 6:2) Ora el a bisa ku nan “lo heredá bida eterno,” el a papia di un rekompensa pa “tur hende” ku ta siguié. Tur e kosnan akí lo tuma lugá “den e regenerashon.”

5. Kon lo bo definí “e regenerashon” ku Hesus a papia di dje na Mateo 19:28?

⁵ Kiko Hesus tabata ke men ku “e regenerashon”? Beibel na papiamentu koriente ta tradusí e palabra ei komo “e era nobo.” Den The Jerusalem Bible e ta tradusí komo “ora tur kos bira nobo” i den e Tradukshon di Mundu Nobo komo “e re-kreashon.” Hesus a usa e palabra akí sin ningun splikashon adishonal. Pues, evidentemente el a referí na e speransa ku e hudiunan tabatin pa hopi siglo kaba, esta, ku lo bin un regenerashon òf re-kreashon di e situashon riba tera pa kosnan bira meskos ku nan tabata den e hòfi di Edén promé ku Adam ku Eva a peka. E regenerashon lo kumpli ku Dios su promesa di “krea shelunan nobo i un tera nobo.”—Isa. 65:17.

6. Kiko e ilustrashon tokante karné i kabritu ta siña nos tokante e speransa di bida eterno?

⁶ Den Hesus su diskurso tokante e konklushon di e sistema di kosnan, el a bolbe papia di bida eterno. (Mat. 24:1-3) El a bisa: “Ora ku e Yu di hende bin den su gloria, i tur e angelnan santu huntu kuné, e lo sinta riba e trono di su gloria. I tur e nashonnan lo  wòrdu tresí huntu su dilanti; i e lo separá nan un for di otro, manera wardadó ta separá karné for di kabritu.” Esnan ku haña un huisio desfaborabel “lo bai den kastigu eterno, ma e hustunan den bida eterno.” “E hustunan” kendenan lo risibí bida eterno ta personanan ku lealmente ta apoyá Kristu su “rumannan” ungí ku spiritu santu. (Mat. 25:31-34, 40, 41, 45, 46) Siendo ku e ungínan a ser skohí pa sirbi komo gobernante den e Reino selestial, “e hustunan” mester ta súpditonan terenal di e Reino ei. Beibel a profetisá ku Yehova su Rei lo tin súpditonan di laman pa laman i te na e finnan di tera. (Sal. 72:8) E súpditonan akí lo disfrutá di bida eterno riba tera.

Kiko e Evangelio di Juan Ta Mustra?

7, 8. Di kua dos speransa Hesus a papia ku Nikodemo?

⁷ Segun e Evangelionan di Mateo, Marko i Lukas, Hesus a usa e ekspreshon “bida eterno” na e dos okashonnan menshoná anteriormente. E Evangelio di Juan ta sita Hesus su palabranan relashoná ku bida eterno 17 biaha. Laga nos analisá algun di e okashonnan ei i wak kiko Hesus a bisa tokante e speransa di bida eterno riba tera.

⁸ Segun Juan, e promé bes ku Hesus a papia tokante bida eterno tabata ku un fariseo ku yama Nikodemo. El a bisa Nikodemo: “Si un hende no nase di nobo, e no por mira e reino di Dios.” Esnan ku ta drenta e Reino di shelu mester “nase di nobo.” (Juan 3:3-5) Pero no ta esei so Hesus a bisa. Despues el a papia di e speransa ku ta disponibel pa tur hende. (Lesa Juan 3:16.) Pues, akinan Hesus tabata referí na e speransa di bida eterno pa su siguidónan ungí ku lo biba den shelu i pa otro hende ku lo biba riba tera.

9. Tokante ki speransanan Hesus a papia ku un muhé samaritano?

⁹ Despues di a kòmbersá ku Nikodemo na Yerusalèm, Hesus a biaha bai nort den direkshon di Galilea. Na kaminda, el a topa un hende muhé na e pos di Jakòb serka di e stat di Sikar na Samaria. El a bis’é: “Ken ku bebe di e awa ku ami lo dun’é lo no haña set nunka, ma e awa ku ami lo dun’é lo bira den dje un fuente di awa ku ta brota pa bida eterno.” (Juan 4:5, 6, 14) E awa akí ta representá Dios su provishonnan pa yuda tur hende haña bida eterno, inkluso esnan ku lo biba riba tera. Den e buki di Revelashon Dios mes ta bisa: “Esun ku tin set, pòrnada lo mi dun’é di bebe for di e fuente di awa di bida.” (Rev. 21:5, 6; 22:17) Pues, Hesus a papia ku e muhé samaritano tokante bida eterno no solamente pa e herederonan ungí di e Reino, sino tambe pa humanidat kreyente ku tin speransa di biba riba tera.

10. Kiko Hesus a bisa e opositornan religioso tokante bida eterno despues ku el a kura un hòmber na e tanki di awa di Betèsda?

¹⁰ E siguiente aña, Hesus tabata na Yerusalèm atrobe. Einan, na e tanki di awa di Betèsda, el a kura un hòmber ku tabata malu. Hesus a splika e hudiunan ku a kritiká loke el a hasi ku “e Yu no por hasi nada di su mes, si no ta algu ku e ta mira e Tata hasi.” Despues ku Hesus a bisa nan ku e Tata “a duna tur huisio na e Yu,” el a bisa nan: “Esun ku tende mi palabra i kere esun ku a manda mi, tin bida eterno.” Hesus a bisa tambe: “E ora lo yega den kual tur ku ta den graf lo tende [e Yu di hende] su bos, i lo sali; esnan ku a hasi bon, pa un resurekshon di bida, esnan ku a kometé maldat, pa un resurekshon di huisio.” (Juan 5:1-9, 19, 22, 24-29) Ku e palabranan ei, Hesus a splika e hudiunan ku tabata persiguié ku e ta esun ku Dios a nombra pa kumpli ku e speransa ku hudiunan tabatin enkuanto bida eterno riba tera i ku lo e hasi esei dor di lanta e mortonan.

11. Kon nos por sa ku Hesus su palabranan registrá na Juan 6:48-51 ta inkluí e speransa di bida eterno riba tera?

¹¹ Na Galilea, míles di hende ku tabata ke  pa Hesus hasi milager i asina perkurá pan pa nan a kuminsá siguié. Hesus a papia ku nan tokante un otro klase di pan: “E pan di bida.” (Lesa Juan 6:40, 48-51.) El a bisa nan: ‘E pan ku lo mi duna ta mi karni.’ Hesus a duna su bida no solamente pa esnan ku lo goberná kuné den su Reino selestial sino tambe “pa bida di e mundu,” esta, hende ku por ser reskatá. “Si un hende kome di e pan akí,” esta, ehersé fe den e poder di reskatá di e sakrifisio di Hesus, e tin speransa di haña bida eterno. Sí, ora Hesus a papia di “biba pa semper,” el a referí tambe na e speransa ku hudiunan tabatin hopi tempu kaba, esta, e speransa di bida eterno riba tera durante e reinado di e Mesias.

12. Na ki speransa Hesus tabata referí ora el a bisa su opositornan ku ‘lo e duna bida eterno na su karnénan’?

¹² Despues, na e Fiesta di Dedikashon na Yerusalèm, Hesus a bisa su opositornan: “Boso no ta kere, pasobra boso no ta pertenesé na mi karnénan. Mi karnénan ta tende mi bos, i mi konosé nan, i nan ta sigui mi; i mi ta duna nan bida eterno.” (Juan 10:26-28) Ta di bida den shelu so Hesus tabata papia òf el a papia tambe di bida eterno den un paradeis riba tera? Algun tempu promé, Hesus a konsolá su disipelnan ku e palabranan akí: “No tene miedu, tou chikitu, pasobra a agradá boso Tata pa duna boso e reino.” (Luk. 12:32) Sinembargo, na e mesun Fiesta di Dedikashon akí, Hesus a bisa: “Mi tin otro karnénan ku no ta di e kurá akí; nan tambe mi mester trese.” (Juan 10:16) P’esei, ora Hesus a papia ku e opositornan ei, su palabranan a referí tantu na e speransa di bida selestial pa e “tou chikitu” komo e speransa di bida eterno riba tera pa miónes di ‘otro karné.’

Un Speransa Ku No Tabatin Mester di Splikashon

13. Kiko Hesus tabata ke men ora el a bisa: “Lo bo ta ku mi den Paradeis”?

¹³ Durante Hesus su agonia riba e staka di tormento, el a duna un konfirmashon irefutabel di humanidat su speransa. Un malechor ku tabata klabá na staka banda di dje a bis’é pa kòrda riba dje ora e drenta den Su reino. I Hesus a primintié: “Di bèrdat mi ta bisa bo awe: lo bo ta ku mi den Paradeis.” (Luk. 23:43, NW) Siendo ku opviamente e hòmber akí tabata un hudiu, e no tabatin mester di splikashon tokante Paradeis. E tabata  sa di e speransa di bida eterno riba tera den futuro.

14. (a) Kiko ta mustra ku e apòstelnan tabatin difikultat pa komprondé Hesus su referensia na e speransa selestial? (b) Na ki tempu e siguidónan di Hesus a haña un komprondementu kla di e speransa selestial?

¹⁴ Sinembargo, loke sí tabatin mester di splikashon tabata Hesus su referensia na e speransa selestial. Ora el a bisa su disipelnan ku lo e bai shelu pa prepará un lugá pa nan, nan no a komprondé kiko e tabata ke men. (Lesa Juan 14:2-5.) Despues el a bisa nan: “Ainda mi tin hopi kos mas di bisa boso, ma boso no por soportá nan awor. Ma ora ku e, e spiritu di bèrdat, bin, e lo guia boso den tur bèrdat.” (Juan 16:12, 13) Ta te despues di Pentekòste di aña 33 di nos era, ora ku nan a ser ungí ku spiritu santu di Dios komo futuro reinan, e siguidónan di Hesus a komprondé ku nan trono lo ta den shelu. (1 Kor. 15:49; Kol. 1:5; 1 Ped. 1:3, 4) E speransa di un herensia selestial tabata un revelashon pa nan, i el a bira e tema prinsipal di e kartanan inspirá den e Skritura Griego Kristian. Pero kiko di e speransa di bida eterno riba tera? E kartanan akí ta konfirmá e speransa akí?

Kiko e Kartanan Inspirá Ta Bisa?

15, 16. Den ki manera e karta inspirá na e hebreonan i e palabranan di Pedro ta señalá na e speransa di bida eterno riba tera?

¹⁵ Den su karta na e hebreonan, apòstel Pablo a yama su kompañeronan den fe “rumannan santu, partisipantenan den un yamada selestial.” Sinembargo, el a bisa tambe ku Dios a someté “e mundu ku ta bin” na Hesus. (Heb. 2:3, 5; 3:1) Den e Skritura Griego Kristian, e palabra original na griego tradusí komo “e mundu ku ta bin” semper ta referí na e tera habitá ku hende. P’esei, “e mundu ku ta bin” ta referí na e binidero sistema di kosnan riba tera bou di e gobernashon di Hesukristu. E ora ei, Hesus lo kumpli ku Dios su promesa ku ta bisa: “E hustunan lo heredá e tera, i lo biba den dje pa semper.”—Sal. 37:29.

¹⁶ Apòstel Pedro tambe a ser inspirá pa skirbi tokante humanidat su futuro. El a skirbi: “E shelunan i e tera aktual pa medio di su palabra ta wòrdu reservá pa kandela, wardá pa e dia di huisio i destrukshon di hendenan impio.” (2 Ped. 3:7) Kiko lo remplasá e shelunan gubernamental i e sosiedat humano malbado ku ta eksistí aktualmente? (Lesa 2 Pedro 3:13.) Nan lo ser remplasá pa “shelunan nobo,” esta, Dios su Reino Mesiániko i “un tera nobo,” ku ta un sosiedat humano hustu di berdadero adoradónan.

17. Kon Revelashon 21:1-4 ta deskribí e speransa di humanidat?

¹⁷ E último buki di Beibel ta kontené un vishon di humanidat restorá na perfekshon ku ta konmové nos kurason. (Lesa Revelashon 21:1-4.) For di tempu ku e promé hòmber a peka den e hardin di Edén, hende ku tin fe den Dios i su promesanan a kuminsá karga e speransa akí. Hende hustu lo biba den Paradeis riba tera pa semper sin bira bieu. E speransa akí tin base sólido tantu den e Skritura Hebreo komo den e Skritura Griego Kristian. I te awe, e ta sigui fortalesé fiel sirbidónan di Yehova.—Rev. 22:1, 2.

Bo Por Splika?

• Kiko Hesus tabata ke men ku “e regenerashon”?

• Di kiko Hesus a papia ku Nikodemo?

• Kiko Hesus a primintí e malechor ku tabata klabá na staka banda di dje?

• Kon e karta na e hebreonan i e palabranan di Pedro ta konfirmá e speransa di bida eterno riba tera?

[Preguntanan di Estudio]

[Plachi na página 16]

Hende semehante di karné lo risibí bida eterno riba tera

[Plachinan na página 18]

Hesus a papia ku hende tokante bida eterno