Bo Ta Demostrá Apresio pa Loke Yehova A Hasi pa Liberá Bo?

“Bendishoná sea Señor Dios di Israel, pasobra el a bishitá nos i a trese [liberashon] pa su pueblo.”—LUK. 1:68.

1, 2. Kon nos por ilustrá e situashon serio ku nos ta aden, i ki preguntanan nos lo konsiderá?

IMAGINÁ bo ku bo a drenta hospital. Bo ta den un kamber huntu ku otro pashèntnan ku ta sufri di e mesun malesa, un enfermedat mortal ku no tin kura p’e ainda. Ora bo tende ku un dòkter ta hasiendo investigashon pa haña kura p’e malesa, bo ta kuminsá karga speransa. Bo ta ansioso pa tende di kualke progreso. Un dia, bo ta tende e bon notisia ku a haña kura p’e malesa. E dòkter ku a logra esaki a hasi masha hopi sakrifisio. Kon lo bo sinti bo? Sigur lo bo haña hopi apresio i rèspèt pa e persona ku a hasi posibel pa tantu abo komo hopi otro hende haña liberashon for di morto.

² Esaki por parse un eksagerashon, pero en realidat nos tur ta den un situashon asina. Nos tur ta den un situashon hopi mas serio ku e ehèmpel akí. Desesperadamente nos tin mester di un reskatadó. (Lesa Romanonan 7:24.) Yehova a hasi sakrifisio grandi pa liberá nos i su Yu tambe a hasi sakrifisio remarkabel. P’esei, laga nos konsiderá kuater pregunta básiko. Dikon nos tin mester di liberashon? Ki sakrifisio Hesus mester a hasi pa liberá nos? Ki sakrifisio Yehova mester a hasi? I kon nos por demostrá ku nos ta apresiá liberashon divino?

Dikon Nos Tin Mester di Liberashon?

3. Den ki sentido nos por kompará piká ku un pandemia?

³ Segun un kálkulo resien, un di e pandemianan  di mas teribel den historia tabata e grip spañó na 1918 ku a mata miónes di hende. Tin otro malesanan ku den un sentido ta mas mortífero. Ounke ménos hende ta haña e malesanan akí, tòg un porsentahe mas haltu di e hendenan akí ta muri. * Awor, kiko si nos kompará piká ku un pandemia asina? Pensa riba e palabranan na Romanonan 5:12: “Dor di ún hende piká a drenta den mundu, i morto dor di piká, i asina morto a pasa pa tur hende, pasobra tur a peka.” Tur hende a keda infektá ku piká, ya ku tur hende imperfekto ta peka. (Lesa Romanonan 3:23.) I kuantu hende ta muri debí na piká? Pablo a skirbi ku piká ta kousa morto “pa tur hende.”

4. Kiko ta Yehova su punto di bista di e largura di nos bida, i kon su punto di bista ta diferensiá for di hopi hende awe?

⁴ Awendia hopi hende ta konsiderá piká i morto komo algu normal. Nan ta preokupá ku loke nan ta yama morto prematuro, pero morto kousá pa e proseso di enbehesimentu nan ta konsiderá komo “natural.” Ta masha fásil pa hende lubidá e punto di bista di e Kreador. Aktualmente, nos bida ta hopi mas kòrtiku ku loke tabata Yehova su intenshon. Ningun hende no a biba ni sikiera “ún dia” desde e punto di bista di Yehova. (2 Ped. 3:8) P’esei, e Palabra di Dios ta bisa ku durashon di nos bida ta mes kòrtiku ku esun di yerba òf manera un rosea. (Sal. 39:5; 1 Ped. 1:24) Nos mester keda kòrda Dios su punto di bista. Dikon? Pasobra si nos komprondé kon grave e “malesa” ku nos ta sufri di dje ta, nos por mira e importansia di e “kura,” esta, nos liberashon.

5. Kiko no a bira posibel pa nos debí na piká?

⁵ Pa nos komprondé e gravedat di piká i su efektonan, nos mester purba komprondé kiko piká a hasi ku nos. Na promé instante esei lo por ta difísil pa komprondé pasobra nos promé mayornan tabatin algu ku nos nunka no tabatin. Na prinsipio Adam ku Eva tabatin un bida perfekto. Debí ku nan tabatin un mente i un kurpa perfekto, nan por a skohe pa dominá nan pensamentu, sintimentu i akshon. Pues, nan por a sigui desaroyá kualidatnan maravioso komo sirbidónan di Yehova Dios. En bes di esei, nan a benta nan regalo presioso afó. Nan a peka kontra Yehova, i p’esei ni nan ni nan desendientenan no a haña e bida ku Yehova tabata ke pa nan tin. (Gén. 3:16-19) Na mes momento, nan a pega ku e “malesa” teribel ku nos a menshoná kaba i nan a pega nos tambe kuné. Pues, Yehova tabatin bon motibu pa kondená nan. Pero na nos sí el a duna e speransa di liberashon.—Sal. 103:10.

Ki Sakrifisio Hesus Mester A Hasi pa Liberá Nos?

6, 7. (a) Kon Yehova a mustra na prinsipio ku un gran sakrifisio tabata nesesario pa nos haña liberashon? (b) Kiko nos por siña for di e sakrifisionan ku Abel i e patriarkanan, ku a biba promé ku e Lei, a ofresé?

⁶ Yehova tabata sa ku un gran sakrifisio tabata nesesario pa liberá e desendientenan di Adam ku Eva. E profesia na Génesis 3:15 ta mustra kiko tabata nesesario pa nos haña liberashon. Yehova mester a perkurá pa un “simia,” un reskatadó, kende un dia lo destruí Satanas. Sinembargo, e reskatadó ei lo a sufri na kaminda, hañando un herida figurativo na su hilchi. Nos por komprondé ku un herida asina ta kousa hopi doló i ta limitá un hende su aktividat. Pero kiko esei ta nifiká den e kaso akí? Kiko eksaktamente Esun Skohí di Yehova lo mester a pasa aden?

⁷ Pa liberá humanidat for di piká, e reskatadó lo mester a proveé un medio pa hasi ekspiashon, un manera pa rekonsiliá hende ku Dios dor di kita e efekto di piká. Kiko esei lo a enserá? For di prinsipio ya tabatin indikashon kaba ku un sakrifisio tabata nesesario.  Ora e promé ser humano fiel, Abel, a ofresé sakrifisio di bestia na Yehova, el a haña Dios su aprobashon. Despues, patriarkanan manera Noe, Abraham, Jakòb i Jòb, kendenan a teme Dios, a ofresé sakrifisionan similar ku a agradá Dios. (Gén. 4:4; 8:20, 21; 22:13; 31:54; Jòb 1:5) Siglonan despues, e Lei di Moisés a hasi hende mas konsiente di e asuntu di sakrifisio.

8. Kiko e sumo saserdote tabata hasi riba e Dia di Ekspiashon anual?

⁸ E sakrifisionan mas importante ku tabata nesesario segun e Lei tabata entre otro esnan ku mester a tuma lugá riba e Dia di Ekspiashon anual. Riba e dia ei, e sumo saserdote tabata hasi un seri di akto simbóliko. E tabata ofresé sakrifisionan na Yehova pa proveé ekspiashon pa piká—promé pa e klase di saserdote, kaba pa e tribunan no-saserdotal. E sumo saserdote tabata drenta den e Santísimo di e tabernakel òf tèmpel, kaminda e so por a drenta un biaha pa aña riba e dia ei. E tabata sprengu sanger di e sakrifisionan dilanti di e arka di aliansa. Tin momento ku un nubia ku ta bria tabata aparesé riba e kaha sagrado ei, representando Yehova Dios su presensia.—Eks. 25:22; Lev. 16:1-30.

9. (a) Riba e Dia di Ekspiashon, ken e sumo saserdote a prefigurá, i kiko e sakrifisionan ku el a ofresé a representá? (b) Kiko e sumo saserdote su entrada den e Santísimo a representá?

⁹ Bou di inspirashon Pablo a revelá kiko e aktonan simbóliko ei a nifiká. El a mustra ku e sumo saserdote a prefigurá e Mesias, Hesukristu, miéntras ku e sakrifisionan a representá Kristu su bida ku el a duna komo sakrifisio. (Heb. 9:11-14) E sakrifisio perfekto ei lo proveé berdadero ekspiashon pa dos grupo di hende, esta, e klase saserdotal di 144.000 ruman di Kristu ku ta ungí ku spiritu i e “otro karnénan.” (Juan 10:16) Ora e sumo saserdote a drenta den e Santísimo, el a prefigurá Hesus su entrada den shelu pa presentá dilanti Yehova Dios e balor di e sakrifisio di reskate.—Heb. 9:24, 25.

10. Segun profesia di Beibel, den kiko e Mesias lo a pasa?

¹⁰ Ta bisto ku un sakrifisio grandi tabata nesesario pa liberá e desendientenan di Adam ku Eva. E Mesias lo mester a sakrifiká su bida! E profetanan di e Skritura Hebreo a duna mas detaye di e bèrdat akí. Por ehèmpel, profeta Daniel a bisa direktamente ku “Mesias, e Prens,” lo ser “kòrtá kitá afó,” òf ehekutá, p’e “hasi ekspiashon pa inikidat.” (Dan. 9:24-26) Isaias a profetisá ku lo rechasá, persiguí i ehekutá, òf traspasá, e Mesias pa e karga piká di hende imperfekto.—Isa. 53:4, 5, 7.

11. Den ki maneranan Yehova su Yu a mustra ku e tabata dispuesto pa ofresé su mes pa nos haña liberashon?

¹¹ Promé ku Dios su Yu unigénito a bini na tera, e tabata konsiente ta kiko nos liberashon lo a rekerí di dje. Lo e mester a sufri masha hopi mes i despues nan lo a mat’é. El a hala tras òf rebeldiá ora su Tata a siñ’é e bèrdatnan ei? Al kontrario, boluntariamente el a aseptá loke su Tata a siñ’é tokante su ròl. (Isa. 50:4-6) Asina tambe, ora Hesus tabata riba tera, obedientemente el a hasi e boluntat di su Tata. Dikon? Wèl, el a kontestá ku e palabranan akí: “Mi ta stima e Tata.” I el a duna un otro  kontesta ora el a bisa: “Ni un hende no tin amor mas grandi ku esaki, ku un hende ta duna su bida pa su amigunan.” (Juan 14:31; 15:13) Pues, pa un gran parti, ta danki na e amor di Yehova su Yu ku nos por haña liberashon. Maske e mester a entregá su bida humano perfekto, gustosamente el a hasi esei pa nos por haña liberashon.

Ki Sakrifisio Yehova Mester A Hasi pa Liberá Nos?

12. E reskate ta un manifestashon di ken su boluntat, i dikon el a proveé e reskate?

¹² Hesus no tabata esun ku a determiná ku mester hasi e sakrifisio di reskate i kon mester hasié. Mas bien, e medio di liberashon akí tabata un parti prinsipal di Yehova su boluntat. Apòstel Pablo a indiká ku e altar den e tèmpel, kaminda tabata ofresé sakrifisio, a representá Yehova su boluntat. (Heb. 10:10) Pues, e liberashon ku nos ta haña mediante e sakrifisio di Kristu ta algu ku nos ta haña primeramente i prinsipalmente danki na Yehova. (Luk. 1:68) Esaki ta un manifestashon di su boluntat perfekto i di su gran amor pa hende.—Lesa Juan 3:16.

13, 14. Kon Abraham su ehèmpel por yuda nos komprondé i balorá loke Yehova a hasi pa nos?

¹³ Ki sakrifisio Yehova a hasi pa mustra su amor na nos den e manera akí? Esei ta algu difísil pa nos komprondé. Sinembargo, tin un relato bíbliko ku por yuda nos komprondé e asuntu akí mas mihó. Yehova a pidi e hòmber fiel Abraham pa hasi algu masha difísil mes, esta, pa ofresé su yu Isaak komo un sakrifisio. Abraham tabata un tata amoroso. Ta p’esei Yehova a bis’é ku Isaak ta “bo úniko yu, kende bo ta stima.” (Gén. 22:2) Tòg, Abraham tabata sa ku ta mas importante pa hasi e boluntat di Yehova ku stima Isaak. P’esei Abraham a obedesé Yehova. Sinembargo, Yehova no a laga Abraham hasi loke E sí lo a bai hasi un dia. Nèt ora ku Abraham tabata a punto di bai sakrifiká su yu, Dios a manda un angel pa stòp Abraham. Abraham tabata asina determiná pa obedesé Dios ku e tabata dispuesto pa ofresé su yu. El a pensa ku e úniko manera ku lo e por mira su yu atrobe ta mediante un resurekshon. Pero e tabatin pleno konfiansa ku Dios lo resusit’é. I en bèrdat, Pablo a bisa ku, “figurativamente bisá,” Abraham a risibí Isaak bèk den resurekshon.—Heb. 11:19.

¹⁴ No ta fásil pa nos imaginá kuantu doló Abraham a sinti ora e tabata prepará pa sakrifiká su yu. Den un sentido, Abraham su eksperensia ta duna nos un idea ta kuantu doló Yehova a sinti ora el a sakrifiká esun ku el a yama “mi Yu stimá.” (Mat. 3:17) Pero kòrda sí ku Yehova su doló probablemente tabata mas fuerte. E ku su Yu a pasa un par di miónes òf,  kisas asta míles di miónes di aña huntu. E Yu a traha yen di goso huntu ku su Tata komo su “trahadó eksperto” i komo su Bosero, “e Palabra.” (Pro. 8:22, 30, 31; Juan 1:1) Nos lo no por kaba di komprondé loke Yehova a soportá na momento ku nan a torturá su Yu, hasi chèrchè di dje i despues ehekut’é komo un kriminal. Yehova a hasi un sakrifisio hopi grandi pa nos por haña liberashon! Awor, kon nos por demostrá ku nos ta apresiá e liberashon ei?

Kon Bo Por Demostrá Ku Bo Ta Apresiá e Liberashon?

15. Kon Hesus a kompletá e gran akto di ekspiashon, i kiko a bira posibel debí na esei?

¹⁵ Hesus a kompletá su gran akto di ekspiashon despues ku el a subi na shelu. Ora e tabata huntu ku su Tata stimá atrobe, el a presentá e balor di su sakrifisio na Dje. Esei a trese gran bendishon kuné. Pordon kompletu a bira disponibel, promé pa piká di e rumannan ungí di Kristu, i despues pa “henter mundu.” E sakrifisio ei a hasi posibel ku awe tur hende ku arepentí sinseramente di nan pikánan i bira berdadero siguidónan di Kristu por tin un relashon íntimo ku Yehova Dios. (1 Juan 2:2) Kon esaki ta apliká na bo?

16. Duna un ehèmpel ku ta mustra dikon nos mester apresiá e liberashon ku Yehova a hasi posibel pa nos.

¹⁶ Laga nos ban bèk na e ehèmpel menshoná na prinsipio. Suponé ku e dòkter ku a haña kura pa e malesa ta aserka e pashèntnan den bo kamber ku e siguiente oferta: Tur pashènt ku aseptá e tratamentu i siguié lo kura. Kiko si mayoria di e otro pashèntnan keha ku ta un molèster pa tuma e remedi òf pa sigui e tratamentu i ta nenga di sigui instrukshon di e dòkter? Lo bo hasi meskos ku nan, ounke bo tin prueba konvinsente ku e tratamentu realmente ta funshoná? Di ningun manera! Sin duna lo bo gradisí e dòkter ku el a logra haña kura p’e malesa i despues lo bo sigui su instrukshon al pie de la letra, kisas asta lo bo bisa otro hende tokante bo eskoho. Kada un di nos mester ta mas ansioso ainda pa mustra Yehova kuantu nos ta apresiá e liberashon ku el a hasi posibel pa nos mediante e sakrifisio di reskate di su Yu.—Lesa Romanonan 6:17 i 18.

17. Kon nos por mustra apresio pa loke Yehova a hasi pa liberá nos?

¹⁷ Si nos ta apresiá loke Yehova i su Yu a hasi pa liberá nos for di piká i morto, nos lo demostrá esei. (1 Juan 5:3) Nos lo lucha kontra nos inklinashon pa peka. Nunka nos lo no ke kuminsá praktiká piká i hiba un bida dòbel. Si nos hiba un bida asina, nos ta bisando, na moda di papia, ku nos no ta haña e reskate importante òf ku nos no tin apresio p’e. Mas bien, nos lo mustra apresio trahando duru pa nos tin un bon relashon ku Dios. (2 Ped. 3:14) Nos lo mustra apresio dor di kompartí nos maravioso speransa di liberashon ku otro hende, pa asina nan tambe por tin un bon relashon ku Yehova i e speransa di biba pa semper. (1 Tim. 4:16) No kabe duda ku Yehova i su Yu ta meresé pa nos usa tur e tempu i energia ku ta posibel pa alabá nan! (Mar. 12:28-30) Imaginá bo! Nos por antisipá e tempu ora nos lo ta kompletamente kurá di piká. Nos por biba manera tabata Dios su propósito, nos lo ta perfekto i nos lo biba pa semper danki na loke Yehova a hasi pa liberá nos!—Rom. 8:21.

[Nota]

Kon Lo Bo Kontestá?

• Dikon bo tin gran nesesidat di liberashon?

• Ki efekto e sakrifisio ku Hesus a hasi tin riba bo?

• Kon bo ta sinti bo ora bo pensa riba Yehova su regalo di reskate?

• Loke Yehova a proveé pa liberá bo ta motivá bo pa hasi kiko?

[Preguntanan di Estudio]

[Plachi na página 30]

Riba Dia di Ekspiashon, e sumo saserdote di Israel a prefigurá e Mesias

[Plachi na página 31]

E echo ku Abraham tabata dispuesto pa ofresé su yu ta siña nos hopi tokante e sakrifisio muchu mas grandi ku Yehova a hasi