Dios Ta Primintí Bo Rikesa?

‘Dios ke pa bo ta riku—yen di outo i ku un negoshi próspero. Djis pone bo fe den dje, habri bo pòtmòni i dun’é tur loke bo por.’

SEGUN un korant imprimí na Brazil, esei ta e mensahe ku algun grupo religioso na Brazil ta promové. I e ta un mensahe ku hopi hende ta tuma na serio. Relashoná ku un enkuesta ku nan a tene na Merka entre hende ku ta bisa ku nan ta kristian, e revista Time a relatá: “Un grupo grandi, esta, 61% tabata kere ku Dios ke pa hende ta riku. Anto 31% . . . a bai di akuerdo ku si bo duna Dios bo plaka, Dios lo bendishoná bo ku mas plaka.”

Hopi bes hende ta yama e klase di kreensianan akí, teologia di prosperidat. Nan ta oumentá masha lihé spesialmente den paisnan na Latinoamérika, manera Brazil. I hopi hende ta basha bai iglesianan ku ta primintí hende ku nan lo haña bendishon di Dios den forma di plaka i kos material. Pero Dios realmente ta primintí hende ku ta sirbié rikesa? Ta tur Dios su sirbidónan den antigwedat tabata riku?

Ta bèrdat ku hopi biaha nos ta lesa den e Skritura Hebreo ku e personanan ku Dios a bendishoná tabata riku. Por ehèmpel, na Deuteronomio 8:18 nos ta lesa: “Kòrda SEÑOR bo Dios, pasobra ta e ta duna bo poder pa gana rikesa.” Esaki a duna e israelitanan e siguransa ku si nan a obedesé Dios, lo el a hasi nan un nashon próspero.

Kiko di sirbidónan individual di Dios? E hòmber fiel Jòb tabata masha riku. Ounke Satanas a pon’é bira pober, despues, el a bolbe bira riku pasobra Yehova a dun’é “dòbel” di loke e tabatin promé. (Jòb 1:3; 42:10) Abraham tambe tabata riku. Génesis 13:2 ta bisa ku e tabata “masha riku na bestia di kria, na plata i na oro.” Tempu ku e ehérsito kombiná di kuater rei di oriente a kapturá Abraham su subrino Lòt, Abraham a “mobilisá su hòmbernan entrená ku a nase den su kas, [esta,] tresshent’i diesocho” hòmber. (Génesis 14:14) Si Abraham tabatin 318 ‘hòmber entrená’ kapas pa karga arma, e mester tabatin un kantidat konsiderabel di hende den su kas. E echo ku e por a perkurá pa un famia asina grandi ta indiká ku e tabata un hòmber masha riku mes ku tabatin hopi tou di baka i di karné.

Sí, hopi di e sirbidónan fiel di Dios den antigwedat, manera por ehèmpel, Abraham, Isaak, Jakòb, David i Salomon tabata riku. Pero, esaki ke men ku Dios lo hasi tur hende ku ta sirbié riku? Di otro banda, e echo ku un hende ta pober ke men ku e no tin Dios su aprobashon? E siguiente artíkulo lo konsiderá e preguntanan akí.