Kristu Su Amor Ta Motivá Nos pa Stima
Kristu Su Amor Ta Motivá Nos pa Stima
‘Hesus a mustra esnan di dje ku tabata den mundu ku el a stima nan te na fin.’—JUAN 13:1.
1, 2. (a) Kiko ta hasi Hesus su amor asina remarkabel? (b) Ki áreanan pa mustra amor nos lo konsiderá den e artíkulo akí?
HESUS a pone e ehèmpel perfekto di amor. Den tur sentido el a demostrá esei, den su manera di papia, su kondukta, su manera di siña i den e echo ku el a duna su bida komo sakrifisio. Te na fin di su bida riba tera, Hesus a demostrá amor na tur hende ku el a topa i spesialmente na su disipelnan.
2 Hesus su ehèmpel sobresaliente di amor ta sirbi komo un norma haltu ku su siguidónan tin ku pega na (Erratum: nan) dje. Ademas, su ehèmpel ta motivá nos pa mustra un amor similar na nos rumannan den e kongregashon i tambe na otro hende. Den e artíkulo akí nos lo konsiderá loke ansianonan di kongregashon por siña for di Hesus enkuanto kon pa mustra amor na rumannan ku a hasi malu, sin importá e gravedat di nan eror. Nos lo konsiderá tambe kon Hesus su amor a motivá kristiannan pa mustra amor na nan rumannan den fe i na otronan den tempu di difikultat ekonómiko, desaster natural i malesa.
3. Ounke Pedro a kometé un eror grave, kon Hesus a trat’é?
3 Riba e último anochi promé ku Hesus su morto, su propio apòstel, esta, Pedro, a neng’é tres biaha. (Mar. 14:66-72) Sinembargo, unabes Pedro a repentí di su eror, Hesus a pordon’é. I despues di esei, el a konfia Pedro ku responsabilidatnan pisá. (Luk. 22:32; Echo. 2:14; 8:14-17; 10:44, 45) Kiko nos ta siña for di Hesus su aktitut pa ku hende ku a kometé eror grave?
Desplegá Kristu Su Aktitut Mental pa ku Esnan Ku A Hasi Malu
4. Den ki situashon spesialmente nos tin ku desplegá Kristu su aktitut mental?
4 Tin hopi situashon den kua nos tin ku desplegá Kristu su aktitut mental. Ún di nan ku spesialmente ta rekerí esaki ta ora di trata ku eror grave di un miembro di famia òf di e kongregashon. E situashon akí por kousa hopi tristesa i doló. Lamentablemente, segun ku e último dianan di e sistema di Satanas ta yegando nan kulminashon, e spiritu di mundu ta afektando mas i mas hende, asta e pueblo di Dios. E mundu su aktitut malisioso òf indiferente relashoná ku loke ta bon i malu por afektá tantu hóben komo bieu i debilitá nan determinashon pa sigui kana riba e kaminda smal. Den e promé siglo, tabatin rumannan ku mester a ser ekspulsá for di e kongregashon kristian i otronan ku a ser reprendé. Awendia tambe esei ta e kaso. (1 Kor. 5:11-13; 1 Tim. 5:20) Sinembargo, ora ansianonan ku ta trata e asuntunan akí demostrá amor manera Kristu, esaki por tin un efekto profundo riba e publikadó ku a hasi malu.
5. Kon ansianonan mester imitá Kristu su aktitut pa ku esnan ku a hasi malu?
5 Meskos ku Hesus, semper ansianonan tin ku pega na Yehova su normanan hustu. Hasiendo asina, nan ta imitá Yehova su suavedat, bondat i amor. Ora un persona repentí di bèrdat i ta desplegá un “kurason kibrá” i un “spiritu abatí” pa motibu di su eror, kisas no ta difísil pa e ansianonan “restorá un hende asina den un spiritu di mansedumbre.” (Sal. 34:18; Gal. 6:1) Pero kon nan tin ku trata ku un persona ku ta rebelde i ku ta mustra masha poko òf asta niun tiki remordimentu?
6. Kiko ansianonan tin ku evitá ora nan ta trata ku hende ku a hasi malu, i dikon?
6 Ansianonan òf otronan por sinti nan indigná ora un persona den e kongregashon ku a hasi malu ta rechasá konseho bíbliko òf ta purba tira kulpa riba otro hende pa su eror. Sabiendo kuantu daño e persona ei a hasi kaba, nan por haña gana di ekspresá nan propio sintimentunan tokante e aktonan i kondukta di e persona. Sinembargo, rabia ta kousa daño i no ta reflehá “e mente di Kristu.” (1 Kor. 2:16; lesa Santiago 1:19 i 20.) Ounke Hesus a usa palabranan masha kla pa spièrta algun hende den su tempu, nunka el a bisa algu ku a reflehá odio òf pa kousa otro hende doló. (1 Ped. 2:23) Mas bien su manera di papia i aktua a laga esnan ku a hasi malu komprondé bon kla ku nan por a repentí i bolbe haña Yehova su aprobashon. De echo, un di e motibunan prinsipal pakiko Hesus a bini na mundu ta pa “salba pekadó.”—1 Tim. 1:15.
7, 8. Kiko mester guia ansianonan ora di trata asuntunan hudisial?
7 Kon e ehèmpel di Hesus mester influensiá e manera ku nos ta trata esnan ku mester haña disiplina den e kongregashon? Kòrda ku e areglo bíbliko pa tuma akshon hudisial den e kongregashon ta pa protehá e kongregashon i kisas motivá e persona ku a hasi malu i ku a haña disiplina pa repentí. (2 Kor. 2:6-8) Lamentablemente, algun kristian no ta repentí, i p’esei mester ekspulsá nan. Sinembargo, ta alentador pa sa ku un gran kantidat di e personanan ei ta bolbe despues na Yehova i su kongregashon. Ora ansianonan ta imitá e aktitut di Kristu, nan ta pone ku ta bira mas fásil pa e persona repentí despues i ku tempu bolbe den e kongregashon. Den futuro, algun di e personanan akí ku a ser ekspulsá por laga di kòrda tur e konsehonan bíbliko ku e ansianonan a duna nan, pero loke nan lo kòrda sigur ta ku e ansianonan a respetá nan dignidat i a trata nan ku amor.
8 P’esei, ansianonan tin ku desplegá e “fruta di e spiritu,” prinsipalmente amor manera Kristu, asta bou di sirkunstansianan difísil. (Gal. 5:22, 23) Nunka nan mester ta lihé pa ekspulsá un kristian ku a hasi malu for di e kongregashon. Nan tin ku demostrá ku nan ke yuda e persona ku a faya bolbe na Yehova. P’esei, ora un pekadó repentí despues, manera hopi di nan ta hasi, lo e por keda masha gradisidu na Yehova i tambe na e “donnan den hende” ku a pone ku tabata mas fásil pa e bolbe den e kongregashon.—Efe. 4:8 [NW], 11, 12.
Kon pa Desplegá Amor Manera Kristu den Tempu di Fin
9. Duna un ehèmpel ku ta mustra kon Hesus a demostrá su amor pa su disipelnan ku echo.
9 E Evangelio di Lukas ta menshoná un okashon sobresaliente ku Hesus a demostrá su amor ku echo. Hesus tabata sa ku lo a yega e tempu ku sòldánan romano lo a rondoná Yerusalèm, e stat kondená na destrukshon, di manera ku niun hende no por a hui. P’esei, demostrando su amor, el a spièrta su disipelnan: “Ora boso mira Yerusalèm rondoná dor di ehérsitonan, rekonosé anto ku su desolashon ta serka.” Kiko nan mester a hasi? Di antemano, Hesus a duna nan instrukshon kla i spesífiko. El a bisa nan: “E ora ei laga esnan ku ta na Hudea hui bai na e serunan, i laga esnan ku ta meimei di e stat sali bai, i no laga esnan ku ta den kunuku bai den stat; pasobra esakinan ta dianan di vengansa, pa tur kos ku ta pará skirbí keda kumplí.” (Luk. 21:20-22) Despues ku e ehérsito romano a rondoná Yerusalèm na aña 66 di nos era, i djis despues a retirá, e disipelnan obediente a sigui e instrukshonnan akí.
10, 11. Kon un konsiderashon di e huida for di Yerusalèm di e promé kristiannan por yuda nos prepará pa e ‘tribulashon grandi’?
10 Durante e kristiannan su huida for di Yerusalèm, nan mester a mustra amor manera di Kristu pa otro meskos ku Kristu a mustra amor na nan. Sin duda, nan mester a kompartí tur loke nan tabatin ku otro. Pero e profesia di Hesus tabatin un kumplimentu muchu mas grandi ku e destrukshon di Yerusalèm. Pasobra, el a profetisá: ‘Lo tin un tribulashon grandi, manera nunka tabatin for di prinsipio di mundu te awor aki, i ku lo no tin nunka mas tampoko.’ (Mat. 24:17, 18, 21) Promé i durante e ‘tribulashon grandi’ ei, ku tin ku tuma lugá ainda, nos tambe lo por haña nos ku difikultat òf den nesesidat. Si nos tin e aktitut mental di Kristu, esaki lo yuda nos soportá e kosnan akí.
11 Promé i durante e ‘tribulashon grandi,’ nos tin ku imitá Hesus su ehèmpel di amor inegoista. Relashoná ku esaki, Pablo a konsehá: “Laga kada un di nos agradá su próhimo pa su bon, pa su edifikashon. Pasobra ni Kristu no a agradá su mes . . . Awor, ku e Dios di perseveransia i di enkurashamentu konsedé pa boso [“haña e mesun aktitut mental ku Kristu Hesus tabatin,” NW].”—Rom. 15:2, 3, 5.
12. Ki klase di amor nos tin ku kultivá awor, i dikon?
12 Di mes manera, Pedro, kende a benefisiá di Hesus su amor, a urgi kristiannan pa kultivá “amor sinsero” pa otro i desplegá “obedensia na e bèrdat.” Kristiannan mester “stima otro fervientemente di kurason.” (1 Ped. 1:22) Awe mas ku nunka, nos mester kultivá e kualidatnan ei ku Kristu tambe a desplegá. Ya kaba e preshon riba henter Dios su pueblo ta birando mas fuerte. Manera e káos ku a surgi resientemente den e sistema finansiero di mundu a demostrá bon kla, nos no mester pone nos konfiansa den ningun elemento di e mundu bieu akí. (Lesa 1 Juan 2:15-17.) Mas bien, segun ku e fin di e sistema akí ta yega serka, nos tin ku hala mas serka Yehova i nos rumannan den e kongregashon dor di kultivá berdadero amistatnan. Pablo a konsehá: “Stima otro di kurason, ku amor di ruman i sea esun promé pa respetá otro.” (Rom. 12:10, BPK) I Pedro a pone mas énfasis riba e punto akí ora el a bisa: “Riba tur kos, keda ferviente den boso amor pa otro, pasobra amor ta kubri un multitut di piká.”—1 Ped. 4:8.
13-15. Kon algun ruman a desplegá amor manera Kristu despues di desaster natural?
13 Rònt mundu, Testigunan di Yehova ta konosí komo personanan ku ta desplegá amor manera Kristu. Konsiderá e ehèmpel di Testigunan ku a reakshoná riba e yamada pa duna un man despues ku tormenta i orkan a destruí áreanan grandi den e parti zùit di Merka na aña 2005. Motivá pa e ehèmpel di Hesus, mas ku 20.000 Testigu—di kua hopi a bandoná nan kas konfortabel i trabou sigur—a ofresé nan mes komo boluntario pa yuda nan rumannan ku a ser afektá.
14 Den un área, e awa di laman a subi tera te na un distansia di 80 kilometer i a forma olanan grandi manera un muraya di un haltura di te ku 10 meter. Ora ku e awa a hala bai bèk, un tersera parti di e kasnan i otro edifisionan ku tabata den su kaminda a keda totalmente destruí. Testigunan boluntario—algun ku e abilidatnan nesesario—for di vários pais a bini ku hèrmènt i material di konstrukshon i tabata dispuesto pa hasi kualke trabou nesesario. Dos biuda, ku ta ruman muhé karnal di otro, a paketá nan pertenensianan den un pikòp i kore mas ku 3.000 kilometer pa bai yuda. Un di e ruman muhénan akí a keda den e área; i te ainda e ta yuda e komité lokal di ousilio i ta sirbi ala bes komo pionero regular.
15 E rumannan a rekonstruí òf drecha mas ku 5.600 kas di Testigu i di otro hende den e region. Kon e Testigunan lokal a sinti ora nan a risibí e tremendo demostrashon di amor akí? Un ruman muhé, kende su kas a ser destruí, a bai biba den un trailer chikitu ku tabatin un dak ku ta lèk i un stof kibrá. E rumannan a traha un kas modesto pero kómodo p’e. Ora e tabata pará dilanti su kas nobo i bon trahá, el a yora di gratitut na Yehova i su rumannan. Den hopi otro kaso, Testigunan lokal ku mester a muda temporalmente a keda biba den nan kasnan temporal pa un aña òf mas despues ku nan kas a ser rekonstruí. Dikon? Pa nan kasnan nobo por tabata na disposishon di e trahadónan boluntario. Esta un bunita ehèmpel di e aktitut mental di Kristu!
Desplegá Kristu Su Aktitut pa ku Hende Enfermo
16, 17. Den ki maneranan nos por desplegá e aktitut mental di Kristu pa ku e hende enfermo?
16 Masha poko di nos a yega di haña nos den desasternan natural serio. Pero práktikamente tur hende mester trata ku problema ku salú, sea di nan mes òf di miembronan di famia. Hesus su aktitut mental pa ku hende enfermo ta sirbi komo un ehèmpel pa nos. Debí na su amor, el a sinti kompashon pa nan. Ora e multitut a trese nan enfermonan serka dje, el “a kura tur ku tabata malu.”—Mat. 8:16; 14:14.
17 Awendia, kristiannan no tin e poder ku Hesus tabatin pa kura hende, pero nan tin e mesun kompashon ku Hesus tin pa ku hende enfermo. Kon nan ta demostrá esaki? Un manera ku ansianonan ta demostrá ku nan tin e aktitut mental di Kristu ta dor di hasi areglo pa e personanan enfermo den e kongregashon haña yudansa i hasi sigur tambe ku esaki ta sosodé. Asina nan ta sigui e prinsipio menshoná den Mateo 25:39 i 40. * (Lesa nan.)
18. Kon dos ruman muhé kristian a desplegá berdadero amor pa un otro ruman muhé, i kiko tabata e resultado?
18 Klaru ku bo no mester ta un ansiano pa bo hasi bon na otro hende. Konsiderá e kaso di Charlene. Ku su 44 aña di edat, e tabatin kanser i dòkter a bis’é ku ta dies dia di bida so e tabatin. Ora ku dos ruman muhé kristian, Sharon i Nicolette, a mira e nesesidat di Charlene i ku su kuido tabata eksigí hopi di su fiel esposo, nan a ofresé nan mes pa dun’é tur e kuido nesesario durante su último dianan di bida. E dianan ei a ekstendé te na seis siman, pero e dos ruman muhénan akí a demostrá nan amor te na final. Sharon a bisa: “E situashon ta duru ora bo sa ku un persona lo no rekuperá mas. Sinembargo, Yehova a fortalesé nos. E eksperensia ei a hala nos mas serka dje i mas serka otro.” Charlene su esposo a bisa: “Semper lo mi keda kòrda e manera bondadoso ku e dos ruman muhénan akí a yuda nos. Nan motivashon puru i aktitut positivo a hasi e último prueba akí mas fásil pa Charlene, mi esposa fiel. Ademas, nan a duna mi e yudansa físiko i emoshonal ku mi tabatin masha mester di dje. Semper lo mi keda gradisidu na nan. Nan sakrifisio propio a fortalesé mi fe den Yehova i mi amor pa henter nos asosiashon di ruman.”
19, 20. (a) Menshoná e sinku aspektonan di e aktitut mental di Kristu ku nos a konsiderá. (b) Kiko bo ta determiná pa hasi?
19 Den e seri di tres artíkulo akí, nos a konsiderá sinku aspekto di e aktitut mental di Hesus i kon nos por imitá su manera di pensa i di aktua. Laga nos ta “mansu i humilde di kurason” manera Hesus tabata. (Mat. 11:29) Ademas, laga nos hasi esfuerso pa trata otro hende bondadosamente, asta ora nan ta desplegá nan imperfekshon- i debilidatnan. Ku kurashi, laga nos obedes’é tur Yehova su rekisitonan, asta ora nos ta bou di prueba.
20 Finalmente, laga nos demostrá amor manera Kristu na tur nos rumannan, meskos ku Kristu mes a hasi, “te na fin.” E klase di amor ei ta identifiká nos komo Hesus su berdadero siguidónan. (Juan 13:1, 34, 35) Sí, “laga amor di ruman kontinuá.” (Heb. 13:1) No keda sin despleg’é! Usa bo bida pa alabá Yehova i yuda otro hende! Yehova lo bendishoná bo esfuersonan sinsero.
[Nota]
^ par. 17 Wak e artíkulo “Hasi Mas ku Djis Bisa: ‘Tene Bo Kurpa Kayente i Yena Bo Barika’” den La Atalaya di 15 di òktober 1986.
Bo Por Splika?
• Kon ansianonan por desplegá e aktitut mental di Kristu pa ku esnan ku a hasi malu?
• Dikon ta importante pa nos imitá e amor di Kristu spesialmente den e tempu di fin akí?
• Kon nos por desplegá e aktitut mental di Kristu pa ku hende enfermo?
[Preguntanan di Estudio]
[Plachi na página 20]
Ansianonan ke pa personanan ku faya bolbe na Yehova
[Plachi na página 21]
Kon e kristiannan ku a bandoná Yerusalèm a desplegá e aktitut mental di Kristu?
[Plachi na página 22]
Testigunan di Yehova ta konosí komo personanan ku ta desplegá amor manera Kristu