Mantené e Aktitut Mental di Kristu
Mantené e Aktitut Mental di Kristu
‘Ku boso haña e mesun aktitut mental ku Kristu Hesus tabatin.’—ROM. 15:5, NW.
1. Dikon nos tin ku hasi esfuerso pa imitá Kristu su aktitut mental?
HESUKRISTU a bisa: “Bin serka mi . . . Siña di mi, pasobra mi ta mansu i humilde di kurason; i boso lo haña sosiegu pa boso alma.” (Mat. 11:28, 29) E invitashon kaluroso akí ta deskribí na un manera kla e aktitut mental basá riba amor ku Hesus a desplegá. E ta e mihó ehèmpel ku nos por sigui. Ounke Hesus tabata e Yu di Dios i tabatin poder i outoridat, el a mustra empatia i ternura partikularmente na hende ku tabata sufri.
2. Kua aspektonan di Hesus su aktitut nos lo konsiderá?
2 Den e artíkulo akí i den e siguiente dosnan, nos lo konsiderá kon nos por kultivá i mantené e aktitut mental di Hesus i reflehá “e mente di Kristu” den nos bida. (1 Kor. 2:16) Nos lo analisá sinku aspekto: Hesus su mansedumbre i humildat, su bondat, su obedensia na Dios, su kurashi i su amor inkebrantabel.
Siña for di Kristu Su Mansedumbre
3. (a) Ki lès di humildat Hesus a siña su disipelnan? (b) Kon Hesus a reakshoná ora su disipelnan a demostrá ku nan tabata débil?
3 Hesus, e Yu perfekto di Dios, a bini boluntariamente na tera pa sirbi entre hende imperfekto i pekadó. Algun di e hendenan akí lo a mat’é despues. Apesar di esei, Hesus semper a mantené su goso i dominio propio. (1 Ped. 2:21-23) Si nos ta ‘fiha nos bista’ riba Hesus su ehèmpel, ora nos haña nos konfrontá ku fayo i imperfekshon di otro hende, nos por hasi meskos. (Heb. 12:2) Hesus a invitá su disipelnan pa bin bou di su yugo i asina siña for di dje. (Mat. 11:29) Kiko nan por a siña? Un kos ku nan por a siña ta ku Hesus tabata un persona mansu i ku e tabatin pasenshi ku su disipelnan apesar di nan erornan. E anochi promé ku Hesus a muri, el a laba pia di su disipelnan; asina el a siña nan un lès enkuanto ‘humildat di kurason,’ ku nunka nan lo no lubidá. (Lesa Juan 13:14-17.) Mas lat e dia ei, ora ku Pedro, Santiago i Juan no a “keda vigilá,” Hesus a rekonosé bondadosamente ku nan tabata débil. Despues di a puntra: “Simon, bo ta na soño?” El a bisa nan: “Keda vigilá i hasi orashon, pa boso no kai den tentashon; e spiritu ta boluntario, ma e karni ta débil.”—Mar. 14:32-38.
4, 5. Kon Hesus su ehèmpel por yuda nos trata ku fayo di otro hende?
4 Kon nos ta reakshoná si un ruman ta desplegá un spiritu di kompetensia, ta sinti su mes ofendí lihé òf ta tarda pa apliká konseho di e ansianonan òf di “e esklabo fiel i prudente”? (Mat. 24:45-47) Kisas nos no tin problema pa aseptá i pordoná imperfekshon di hende den e mundu di Satanas, pasobra nos ta ferwagt esei di nan. Pero ora ta trata di nos rumannan sí, podisé esei no ta bai dje fásil ei. Si fayo di nos rumannan ta molestiá nos lihé, nos tin ku puntra nos mes: ‘Kon mi por reflehá “e mente di Kristu” mas mihó?’ Purba tene na mente ku Hesus no a rabia ku su disipelnan ni ora nan a demostrá ku nan tabata un poko débil spiritualmente.
5 Konsiderá e kaso di apòstel Pedro. Ora Hesus a bisa Pedro pa sali for di e boto i kana riba awa bini serka dje, Pedro realmente a hasi esei pa un ratu. Pero despues, ora Pedro a mira kon fuerte bientu tabata supla, el a kuminsá senk. Akaso Hesus a rabia kuné i a bis’é: “Drechi pa bo! Esei ta pa siña bo”? Nò! “Mesora Hesus a saka su man gar’é i a bis’é: ‘O abo, hende di poko fe, pakiko bo a duda?’” (Mat. 14:28-31) Si nos tin ku trata ku un ruman ku aparentemente ta falta fe, nos lo saka un man pa yud’é oumentá su fe? Esei siguramente ta un bon lès ku nos por siña for di e manera suave ku Hesus a trata ku Pedro.
6. Kiko Hesus a siña su apòstelnan tokante buskamentu di prominensia?
6 Pedro tambe tabata enbolbí den e diskushon kontinuo ku e apòstelnan tabatin tokante ken tabata mas importante. Santiago i Juan tabata kier pa Hesus a laga un di nan sinta na su man drechi den su Reino i e otro na su man robes. Ora Pedro i e otro apòstelnan a haña sa esei, nan a rabia. Hesus tabata sa ku probablemente nan a adoptá e spiritu di kompetensia akí for di e sosiedat den kua nan a lanta. P’esei, el yama nan serka dje i a bisa nan: “Boso sa ku e gobernantenan di e paganonan tin dominio riba nan, i nan shon grandinan ta ehersé outoridat riba nan. Entre boso no ta asina, ma ken ku kier bira grandi entre boso lo ta boso sirbidó, i ken ku kier ta esun di promé entre boso lo ta boso esklabo.” Despues, Hesus a señalá na su propio ehèmpel, bisando: “Meskos ku e Yu di Hende no a bin pa wòrdu sirbí, ma pa sirbi, i pa duna su bida komo preis di reskate pa hopi.”—Mat. 20:20-28.
7. Kon nos kada un por kontribuí na e union den e kongregashon?
7 Ora nos ta meditá riba Hesus su aktitut mental humilde, esaki por yuda nos komportá nos manera “esun di mas chikitu” entre nos rumannan. (Luk. 9:46-48) I un aktitut asina ta kontribuí na union. Meskos ku e tata di un famia grandi, Yehova ke pa su yunan “biba huntu den armonia,” esta, pa nan biba bon ku otro. (Sal. 133:1) Den orashon na su Tata, Hesus a pidi pa tur kristian berdadero ta uni. Dikon? El a bisa: “Pa mundu por sa ku ta abo a manda mi, i ku bo a stima nan, meskos ku bo a stima mi.” (Juan 17:23) Pues, nos union ta yuda identifiká nos komo siguidónan di Kristu. Pa nos por disfrutá di e union ei, nos tin ku mira imperfekshon di otro hende manera Kristu a mira nan. Hesus tabata kla pa pordoná, i el a siña nos ku ta si nos pordoná otro hende so nos por haña pordon.—Lesa Mateo 6:14 i 15.
8. Kiko nos por siña for di e ehèmpel di personanan ku tin hopi tempu ta sirbi Dios?
8 Nos por siña hopi tambe dor di imitá fe di personanan ku tin hopi aña kaba ta imitá Kristu. Meskos ku Hesus, generalmente e sirbidónan di Dios akí ta mustra komprondementu pa imperfekshon di otro hende. Nan a siña ku ora nos ta mustra kompashon manera Kristu, esaki no solamente ta yuda nos “soportá debilidatnan di esnan ku no ta fuerte,” sino ta kontribuí tambe na union. Ademas, esaki ta animá henter e kongregashon pa reflehá e aktitut mental di Kristu. Nan ke pa nan rumannan hasi meskos i optené e mesun resultado ku apòstel Pablo a deseá pa e kristiannan na Roma. El a bisa nan: “Laga e Dios ku ta duna perseveransia i konsuelo permití boso haña e mesun aktitut mental ku Kristu Hesus tabatin, afin ku di komun akuerdo boso por ku un solo boka glorifiká e Dios i Tata di nos Señor Hesukristu.” (Rom. 15:1, 5, 6, NW) Sí, nos adorashon komo un pueblo uní ta duna alabansa na Yehova.
9. Dikon nos tin mester di Dios su spiritu santu pa imitá Hesus su ehèmpel?
9 Hesus a konektá ‘humildat’ ku mansedumbre, òf suavedat, ku ta un aspekto di e fruta di spiritu santu di Dios. P’esei, pa nos por imitá Hesus korektamente, ademas di studia su ehèmpel, nos tin mester di Yehova su spiritu santu. Nos tin ku resa pidi Dios pa su spiritu santu i hasi esfuerso pa kultivá su fruta, esta, “amor, goso, pas, pasenshi, kariño, bondat, fieldat, mansedumbre, dominio propio.” (Gal. 5:22, 23) Anto ora nos ta sigui e ehèmpel di humildat i suavedat ku Hesus a pone, nos lo hasi nos Tata selestial, Yehova, kontentu.
Hesus A Trata Hende ku Bondat
10. Kon Hesus a desplegá bondat?
10 Bondat, òf amabilidat, tambe ta un aspekto di e fruta di spiritu. Konsistentemente Hesus a trata hende ku bondat. Tur hende ku a buska Hesus sinseramente a ripará ku el a “risibí nan amablemente.” (Luk. 9:11, NW) Kiko nos por siña for di e bondat, òf amabilidat, ku Hesus a desplegá? Un persona bondadoso, òf amabel, ta un persona amigabel, suave, komprensivo i kortes. Hesus tabata un persona asina. El a sinti kompashon pa hende “pasobra nan tabata kansá i plamá, manera karné sin wardadó.”—Mat. 9:35, 36.
11, 12. (a) Deskribí un okashon ku Hesus a demostrá su kompashon ku echo. (b) Kiko bo por siña for di e ehèmpel ku nos a kaba di konsiderá?
11 Ademas, Hesus su duele i kompashon no a keda na sintimentu so, el a hasi tambe loke e tabata por pa yuda hende. Laga nos konsiderá un ehèmpel di esaki. Tabatin un señora ku pa 12 aña largu tabatin bashamentu. E tabata sa loke e Lei di Moisés ta bisa, esta, ku debí na su kondishon, e tabata impuru i no tabatin mag di partisipá huntu ku otro hende den adorashon di Dios. Ademas, ken ku a mishi kuné tambe lo a bira impuru. (Lev. 15:25-27) Sinembargo, loke el a haña sa di Hesus su reputashon i di e manera ku e tabata trata hende lo mester a konvens’é ku Hesus tabatin e poder pa kur’é i ku lo el a hasié tambe. E señora a keda bisa su mes: “Si mi djis mishi ku su paña, lo mi bira bon.” P’esei, el a tuma kurashi i a mishi ku Hesus su paña, i mesora el a sinti ku el a ser kurá.
12 Hesus tabata konsiente ku un hende a mishi kuné, i el a wak rònt pa haña sa ta ken. E señora, probablemente yen di miedu pa Hesus no rabia kuné pasobra el a falta ku e Lei, a kai temblando na Hesus su pia i a bis’é tur e bèrdat. Hesus a reprendé e pober señora akí ku tabata sufriendo? Niun ora so! El a dun’é e siguransa: “Mi yu, bo fe a salba bo; bai na pas.” (Mar. 5:25-34) E palabranan ei lo tabata un berdadero konsuelo p’e, no ta bèrdat?
13. (a) Den ki sentido Hesus su aktitut tabata distinto for di esun di e fariseonan? (b) Kon Hesus a trata mucha?
13 Distinto for di e fariseonan ku kurason duru, Kristu nunka a usa su outoridat pa pone mas karga riba hende. (Mat. 23:4) Al kontrali, na un manera bondadoso i ku pasenshi, el a siña hende e kaminda di Yehova. Hesus tabata un kompañero komprensivo pa su siguidónan; manera un berdadero amigu, konsistentemente el a demostrá amor i bondat na nan. (Pro. 17:17; Juan 15:11-15) Asta mucha a sinti nan kómodo serka Hesus, i opviamente e tambe a sintié bon huntu ku nan. E no tabata muchu okupá pa stòp un ratu ku loke e tabata hasiendo p’e dediká tempu na e chikitinnan. Na un okashon, su disipelnan, kendenan ainda tabata pensa riba nan propio importansia meskos ku e lidernan religioso rònt di nan, a purba di stroba e hendenan di trese nan yunan serka Hesus p’e pone man riba nan. Hesus no a gusta loke su disipelnan a hasi. El a bisa nan: “Laga e muchanan bin serka mi; no stroba nan, pasobra e reino di Dios ta pertenesé na esnan manera esakinan.” Despues, el a usa e muchanan pa siña su disipelnan un lès importante. El a bisa nan: “Di bèrdat mi ta bisa boso, esun ku no risibí e reino di Dios manera un mucha lo no drenta den dje.”—Mar. 10:13-15.
14. Kon atenshon sano di otronan ta benefisiá muchanan?
14 Pensa un ratu kon algun di e muchanan ei lo a sinti nan hopi aña despues ora nan a bira hòmber- i muhénan adulto i a kòrda ku Hesukristu “a tuma nan den su brasa i a bendishoná nan.” (Mar. 10:16) Ku kariño muchanan djawe tambe lo kòrda riba ansiano- i otro hendenan den e kongregashon ku mustra un interes sano i inegoista den nan. Mas importante ainda, for di un edat yòn, muchanan ku ta haña e klase di atenshon ei den e kongregashon ta siña ku Yehova su spiritu ta riba su pueblo.
Mustra Bondat den un Mundu sin Bondat
15. Dikon e falta di bondat djawe no mester sorprendé nos?
15 Awendia, hopi hende ta pensa ku nan ta muchu okupá pa mustra bondat na otro hende. P’esei, diariamente e pueblo di Yehova ta haña nan konfrontá ku e spiritu di mundu akí na skol, na trabou, ora nan ta di biahe i den nan ministerio. Kisas e falta di bondat akí ta desapuntá nos, pero e no mester sorprendé nos. Yehova a inspirá Pablo pa spièrta nos ku bida den e “último dianan” trabahoso akí lo pone kristiannan berdadero den kontakto ku hende ku ta ‘stimadó di nan mes i ku ta sin amor.’—2 Tim. 3:1-3.
16. Kon nos por promové e bondat ku Kristu a desplegá den e kongregashon?
16 Di otro banda, e ambiente ku ta reina den e berdadero kongregashon kristian ta un kontraste refreskante kompará ku loke tin den e mundu sin bondat. Nos kada un por kontribuí na e ambiente sano akí dor di imitá Hesus. Kon nos por hasi esei? Pa kuminsá, hopi ruman den e kongregashon tin mester di nos yudansa i animashon pasobra nan ta konfrontá problema ku salú òf otro kontratempu. Ounke e problemanan akí kisas ta sigui oumentá durante e “último dianan” akí, nan no ta nada nobo. Den tempu bíbliko, kristiannan a haña nan ku problemanan similar. P’esei, loke a yuda e kristiannan ku a biba den e tempu ei ta útil pa nos awe tambe. Por ehèmpel, Pablo a konsehá kristiannan pa “enkurashá esnan ku ta falta ánimo, yuda e débilnan, tene pasenshi ku tur hende.” (1 Tes. 5:14) Esaki ta enserá imitá Kristu su bondat mediante nos echonan.
17, 18. Menshoná algun manera ku nos por imitá Hesus su bondat.
17 Kristiannan tin e responsabilidat di ‘risibí nan rumannan bondadosamente’ i trata nan manera Kristu lo a trata nan. Esei ta nifiká mustra berdadero interes den esnan ku kisas nos konosé pa hopi aña i tambe den esnan ku podisé nos a kaba di konosé. (3 Juan 5-8, NW) Hesus a tuma e inisiativa pa mustra kompashon na otro hende, i semper e personanan ei a sinti nan mes refreská den su kompania. Nos mester hasi meskos.—Isa. 32:2; Mat. 11:28-30.
18 Nos kada un tambe por desplegá bondat dor di hasi algu pa mustra otro hende ku nos ta interesá den nan i ta komprondé nan problemanan. Laga nos hasi esfuerso sinsero i buska oportunidat pa yuda. Pablo a urgí kristiannan pa “stima otro ku amor fraternal; duna preferensia na otro den onor.” (Rom. 12:10) Trata otro hende ku kariño i bondat i siña mustra “amor berdadero,” sin hipokresia. Esei ta nifiká sigui Kristu su ehèmpel. (2 Kor. 6:6) Pablo a deskribí e klase di amor ei ku Kristu a desplegá ku e palabranan akí: “Amor tin pasenshi, amor ta kariñoso i no ta yalurs; amor no ta gaba, i no ta arogante.” (1 Kor. 13:4) En bes di warda renkor kontra nos rumannan, laga nos hasi kaso di e konseho akí: “Sea kariñoso ku otro, miserikòrdioso, pordonando otro, meskos ku Dios den Kristu tambe a pordoná boso.”—Efe. 4:32.
19. Ki bon resultado nos ta optené dor di desplegá bondat manera Kristu?
19 Ora nos ta hasi esfuerso pa kultivá i imitá Kristu su bondat tur ora i bou di tur sirkunstansia, nos lo haña hopi bendishon. Yehova su spiritu lo obra abundantemente den e kongregashon i lo yuda tur hende kultivá e fruta di spiritu. Ademas, ora nos ta sigui e ehèmpel ku Hesus a laga i ta yuda otro hende hasi meskos, nos lo adorá Dios felis i uní, i esei lo hasi Dios kontentu. P’esei, laga nos hasi esfuerso konstantemente pa reflehá Hesus su mansedumbre i bondat den nos trato ku otro hende.
Bo Por Splika?
• Kon Hesus a mustra ku e ta “mansu i humilde di kurason”?
• Kon Hesus a desplegá bondat?
• Menshoná algun manera ku nos ta imitá Kristu, desplegando mansedumbre i bondat den e mundu imperfekto akí.
[Preguntanan di Estudio]
[Plachi na página 11]
Ora un ruman su fe tambaleá, manera tabata den kaso di Pedro, nos lo saka un man pa yud’é?
[Plachi na página 13]
Kon bo por kontribuí na un ambiente di bondat den e kongregashon?