Plaka Ta Duna Bo Berdadero Felisidat?

SONIA a nase na Spaña. Tempu ku e tabata mucha, e tabata asistí na e reunionnan di Testigunan di Yehova ku su mama. Pero ora el a bira grandi, el a bai biba na Lònden, Inglatera, i ku tempu el a kuminsá traha den e mundu finansiero komo un intermediario na un bolsa di balor.

Sonia tabata stima su trabou. E tabata gana hopi plaka i tabata manehá sumanan grandi pa su klientenan. Su trabou tabata fasinante, i e tabata bon den su trabou. Frekuentemente Sonia tabata traha 18 ora pa dia, i tin anochi e tabata drumi dos pa tres ora so. E tabata biba pa traha. Pero, diripiente su bida a kambia drástikamente. Sonia a haña un atake selebral fuerte, kisas debí na su manera di biba ku tabata dun’é hopi strès. E tabatin apénas 30 aña di edat.

Sonia a keda paralisá na un banda, i dòkternan no tabatin sigur ku lo e por a papia atrobe. Mesora su mama a bai Inglatera pa kuid’é. Ora Sonia a kuminsá kana atrobe, su mama a bis’é, “Mi ta bai reunion di kongregashon, i lo bo tin ku bai ku mi pasobra mi no por laga bo so na kas.” Sonia a bai di akuerdo. Kiko tabata e resultado?

Sonia a bisa, “Tur loke mi a tende tabata zona konvinsente. Tabata masha dushi mes. Ku muchu gustu mi a aseptá un estudio di Beibel serka un di e tantísimo hendenan ku a bin kuminda mi e promé dia ku mi a bai Salòn di Reino. Mi konosínan bieu a stòp di bishita mi, pero mi amigunan nobo tabata amoroso i tabata mustra interes den mi.”

Gradualmente, Sonia a kuminsá papia atrobe, i tambe el a hasi progreso spiritual rápidamente. Ménos ku un aña despues, el a batisá. Hopi di su amigunan nobo tabata den e ministerio kristian di tempu kompletu, i e por a mira kon felis nan tabata. ‘Ami tambe ke ta manera nan,’ Sonia a pensa. ‘Mi ke duna Yehova tur loke mi por!’ Awor Sonia ta den sirbishi di tempu kompletu.

Kiko Sonia a siña for di su eksperensia? “Maske mi tabata gana hopi plaka, mi tabata preokupá i infelis debí na e strès i insiguridat na trabou. Mi a realisá ku e kos di mas importante den bida ta pa mi tin un bon relashon ku mi Tata selestial, Yehova. Awor mi ta realmente felis.”

Apòstel Pablo a skirbi: “Amor pa plaka ta rais di tur sorto di maldat, i algun hende, dor di deseá esaki, a desviá for di e fe, i a traspasá nan mes ku hopi doló.” (1 Timoteo 6:10) Sonia por bisa di eksperensia ku e palabranan akí ta bèrdat.