Rikesa Ku Ta Bini di Dios

DIOS lo bendishoná bo ku rikesa si bo ta fiel na dje? Kisas, pero tin hopi chèns ku bo no ta haña e klase di rikesa ku bo ta spera. Konsiderá e ehèmpel di Maria, mama di Hesus. Angel Gabriel a aparesé na dje i a bis’é ku e ta “altamente faboresí” den bista di Dios i ku lo e duna lus na e Yu di Dios. (Lukas 1:28, 30-32) Apesar di esei, Maria no tabata un hende riku. Despues ku Hesus a nase, ora Maria a bai pa ofresé un sakrifisio, el a duna “dos tòrteldùif òf dos pichon.” Esei ta loke hende pober tabatin kustumber di ofresé na Yehova.—Lukas 2:24; Levítiko 12:8.

E echo ku Maria tabata pober a nifiká ku e no tabatin Dios su bendishon? Al kontrario, ora el a bai bishitá Elisabèt, un famia di dje, “Elisabèt a wòrdu yená ku spiritu santu. I el a grita na bos haltu i a bisa: ‘Bendishoná bo ta entre muhénan, i bendishoná ta e fruta di bo barika!’” (Lukas 1:41, 42) Maria a haña e privilegio di bira e mama terenal di Dios su Yu stimá.

Hesus mes no tabata un hòmber riku. El a nase den un ambiente pober, a wòrdu lantá dor di mayornan pober i a keda pober durante henter su bida riba tera. Na un okashon, el a bisa un hòmber ku kier a bira su disipel: “Zoro tin kueba i para di shelu tin nèshi, ma e Yu di Hende no tin ningun lugá pa pone su kabes.” (Lukas 9:57, 58) Sinembargo, e echo ku Hesukristu a bini na tera a habri kaminda pa su disipelnan haña gran rikesa. Apòstel Pablo a skirbi: “Pa boso motibu el a bira pober, pa boso dor di su pobresa por a bira riku.” (2 Korintionan 8:9) Ki klase di rikesa Hesus a duna su disipelnan? I ki klase di rikesa nos tin awe?

Ki Klase di Rikesa?

Hopi biaha, rikesa material ta stroba hende di ehersé fe, pasobra un hende riku kisas ta konfia den su plaka en bes di Dios. Hesus a bisa: “Ki difísil lo ta pa esnan ku ta riku drenta e reino di Dios!” (Marko 10:23) Pues, ta opvio ku e rikesa ku Hesus a ofresé su siguidónan no tabata rikesa material.

De echo, mayoria di kristian den e promé siglo tabata pober. Ora un hòmber ku a nase lam a pidi plaka, Pedro a respondé: ‘Plata i oro mi no tin, ma loke mi tin mi ta duna bo: Den e nòmber di Hesukristu di Názarèt, kana!’—Echonan 3:6.

Loke disipel Santiago a bisa tambe ta indiká ku e kongregashon kristian tabata konsistí básikamente di hende pober. El a skirbí: “Skucha, mi rumannan stimá: Dios no a skohe e pobernan di e mundu akí pa ta riku den fe i pa ta herederonan di e reino ku el a primintí esnan ku ta stim’é?” (Santiago 2:5) Es mas, apòstel Pablo a bisa tambe ku entre esnan ku a ser yamá pa bira parti di e kongregashon kristian, no tabatin hopi hende “sabí segun karni,” ni “hopi hende poderoso,” ni hopi hende di nasementu “noble.”—1 Korintionan 1:26.

 Awor, si e rikesa ku Hesus a duna su siguidónan no tabata rikesa material, ta ki klase di rikesa el a duna nan anto? Den un karta ku Hesus a manda pa e kongregashon na Smirna, el a bisa nan: “Mi konosé bo tribulashon i bo pobresa sinembargo, bo ta riku.” (Revelashon 2:8, 9) Ounke e kristiannan na Smirna tabata pober, nan tabatin un rikesa ku a bal muchu mas ku plata òf oro. Nan tabata riku debí na nan fe i nan integridat na Dios. “No ta tur [hende] tin fe,” p’esei e ta algu balioso. (2 Tesalonisensenan 3:2) Esnan ku no tin fe ta realmente pober den bista di Dios.—Revelashon 3:17, 18.

Rikesa Ku Ta Resultado di Fe

Pero, den ki sentido fe ta algu balioso? Hende ku tin fe den Dios ta benefisiá for di “e rikesa di [Dios] su kariño, toleransia i pasenshi.” (Romanonan 2:4) Nan ta haña tambe “pordon di [nan] pikánan” debí na nan fe den e sakrifisio di reskate di Hesus. (Efesionan 1:7) Ademas, nan tin e klase di sabiduria ku hende ku tin fe ta haña debí na “e palabra di Kristu.” (Kolosensenan 3:16) Segun ku nan ta hasi orashon na Dios ku fe, “e pas di Dios ku ta surpasá tur komprondementu” ta protehá nan kurason i mente i ta duna nan satisfakshon i felisidat.—Filipensenan 4:7.

Fuera di tur e benefisionan ei, esnan ku ehersé fe den Dios mediante su Yu, Hesukristu, tin e speransa maravioso di bida eterno. E palabranan akí di Hesukristu ta bon konosí: “Pasobra Dios a stima mundu asina tantu, ku el a duna su Yu unigénito, pa ken ku kere den dje no bai pèrdí,  ma tin bida eterno.” (Juan 3:16) Ora un hende haña konosementu eksakto di e Tata i di e Yu, e speransa presioso ei ta bira mas fuerte, pasobra Hesus a bisa tambe: “Esaki ta bida eterno, ku nan por konosé bo, e úniko Dios berdadero, i Hesukristu, kende bo a manda.”—Juan 17:3.

Ounke e bendishonnan ku hende ta haña di Dios básikamente ta den e sentido spiritual, tin benefisio físiko i emoshonal tambe. Tuma por ehèmpel, Dalídio na Brazil. Promé ku el a haña konosementu eksakto di Dios su propósito, e tabatin problema ku bebementu. E bisio akí tabatin un efekto destruktivo riba su bida di famia. Ademas, su situashon finansiero tabata prekario. Despues, el a kuminsá studia Beibel ku Testigunan di Yehova i a hasi un kambio remarkabel.

Loke Dalídio a siña for di Beibel a pon’é stòp ku su mal kustumbernan. El a progresá asina tantu debí ku el a apliká prinsipionan bíbliko ku el a bisa: “Ántes mi tabata kana di bar pa bar; awor mi ta kana di kas pa kas.” El a bira un predikadó di tempu kompletu di e Palabra di Dios. E kambio ei no solamente a benefisiá su salú, sino tambe su situashon finansiero. Dalídio a bisa: “Awor mi ta usa e plaka ku mi tabata gasta na bebementu pa kumpra loke mi tin mester òf pa yuda otro hende den nesesidat.” Es mas, dor di asosiá ku hende ku tin e mesun punto di bista spiritual kuné el a haña hopi berdadero amigu. Awor Dalídio tin un pas mental i felisidat ku ta surpasá tur loke e por a imaginá promé ku el a konosé Dios.

Pa un otro eksperensia ku ta mustra kon bida di hende ta wòrdu enrikesé ora nan kultivá fe den Yehova Dios, konsiderá e kaso di Renato. Awe, ora bo mira su kara felis i sonriente, ta difísil pa kere ku e tabatin tur motibu pa sinti ku na prinsipio di su bida el a haña un trato masha inhustu. Ora e tabata resien nasí, su mama a bandon’é. Nan a pon’é den un saku bou di un banki; su kurpa tabata tur maltratá i su kabuya di lombrishi no tabata kòrtá. Dos hende muhé ku a kana pasa a ripará ku e saku bou di e banki tabata move. Na promé instante, nan a kere ku ta un yu di pushi un hende a laga den e saku. Pero ora nan a habri e saku i a mira ku tabata un beibi resien nasí, mesora nan a hib’é na un hospital den serkania pa e haña tratamentu.

Un di e señoranan tabata un Testigu di Yehova, i el a konta Rita, un otro Testigu, tokante e beibi. Vários biaha ku Rita tabata na estado, e yunan a nase morto, i e tabatin solamente un yu muhé. E tabatin masha gana di un yu hòmber. P’esei, el a disidí di adoptá Renato.

For di tempu ku Renato tabata mucha, Rita a bis’é ku e no tabata su berdadero mama. Pero, Rita a kuid’é ku amor i masha kariño i a hasi hopi esfuerso pa siñ’é prinsipionan bíbliko. Segun ku e tabata bira grandi, el a kuminsá mustra interes den Beibel. Renato su apresio pa e manera inkreibel ku el a ser reskatá tambe a  oumentá. Tur biaha su wowonan ta yena ku awa ora e lesa e palabranan akí di e salmista David: “Maske mi tata i mi mama bandoná mi, SEÑOR lo rekohé mi.”—Salmo 27:10.

Komo muestra di su apresio pa tur loke Yehova a hasi p’e, Renato a batisá na aña 2002, i e siguiente aña, el a bira un minister kristian di tempu kompletu. Te ainda e no sa ken ta su berdadero mayornan i kisas nunka lo e haña sa esei. Sinembargo, segun Renato un di e regalonan di mas presioso ku el a haña ta ku e por a siña konosé i ehersé fe den Yehova komo su Tata amoroso ku ta interesá den dje.

Kisas bo ta deseá di tin un relashon estrecho ku Dios, ku siguramente lo enrikesé bo bida. E oportunidat di haña un relashon asina ku Yehova Dios i ku su Yu, Hesukristu, ta habrí pa tur hende, sea ku nan ta riku òf pober. Kisas esaki lo no trese rikesa material, pero lo e resultá den pas mental i felisidat ku tur e plaka na mundu no por kumpra. Sí, manera e teksto di Proverbionan 10:22 ta bisa: ‘Ta e bendishon di Yehova ta hasi riku, i e no ta agregá tristesa na dje.’

Yehova Dios ta masha interesá den hende ku ta aserk’é, el a bisa: “Mara bo a pone atenshon na mi mandamentunan! E ora ei bo pas lo tabata manera un riu, i bo hustisia manera ola di laman.” (Isaias 48:18) Ademas, e ta primintí ku esnan ku aserk’é ku e motivashon i aktitut korekto lo ser bendishoná rikamente. Sí, Beibel ta bisa: “E rekompensa di humildat i e temor di SEÑOR ta rikesa, onor i bida.”—Proverbionan 22:4.

[Komentario na página 6]

Fe den Dios ta resultá den pas, satisfakshon i felisidat

[Plachi na página 5]

Ounke Hesus su famia terenal tabata pober, Dios a bendishoná nan rikamente