Bo Tin un Ora Fiho pa Studia Beibel?

AÑA pasá, Kuerpo Gobernante a anunsiá ku lo hasi un ahuste den e programa di reunion di kongregashon pa famianan por tin mas tempu pa estudio i kòmbersashon bíbliko. Si bo ta un kabes di famia, perkurá pa studia Beibel riba un base regular i na un manera signifikativo ku bo esposa i yunan. Parehanan kasá sin yu lo ke usa e tempu akí pa nan studia Beibel huntu. Rumannan soltero ku no tin responsabilidat di famia lo por usa e tempu akí bon pa estudio personal di Beibel.

Hopi ruman a ekspresá apresio pa e areglo di Adorashon Komo Famia parti anochi. Por ehèmpel, Kevin, un ansiano, a skirbi: “E palabra ‘danki’ no ta sufisiente fuerte pa ekspresá loke nos kongregashon ta sinti. Komo ansiano, nos a papia riba kon nos ta usa e anochi liber pa hasi eksaktamente loke Kuerpo Gobernante a pidi, esta, pa studia ku nos famia.”

Jodi, kende ta kasá ku un ansiano, a skirbi: “Nos tin tres yu muhé, un di 15, un di 11 i un di 2 aña. Resientemente nos a muda bai un kongregashon di idioma di seña. Hopi tempu i esfuerso ta bai na preparashon pa e reunionnan. Awor, ku e ahuste akí, nos tin un anochi èkstra pa nos por konsentrá riba adorashon komo famia!”

John ku JoAnn, un pareha kasá ku ta sirbi komo pionero regular, a skirbi: “Nos estudio di Beibel di famia tabata iregular pasobra nos mester a purba hink’é un kaminda entre nos aktividatnan di kongregashon. E areglo nobo akí ta un regalo di Yehova ku ta refreská nos spiritualmente—si nos usa e tempu manera mester ta.”

Tony, un ruman hòmber soltero ku tin 20 i piku aña di edat, a pone djamars anochi komo e anochi fiho pa hasi su estudio personal. Durante e restu di siman e ta prepará pa e reunionnan di kongregashon. Sinembargo, Tony ta bisa, “Mi ta anhelá spesialmente pa djamars yega.” Dikon? Tony ta splika: “E anochi ei ta e tempu ku mi ta dediká spesialmente na Yehova. Pa mas o ménos dos ora mi ta studia temanan ku ta fortalesé mi relashon ku Yehova. E echo ku mi tin mas tempu pa studia ta duna mi oportunidat pa meditá riba tekstonan di Beibel ku mi lesa.” Ku ki resultado? “Kompará ku ántes, Yehova su konseho ta baha mas profundo den mi kurason.” E por duna un ehèmpel? “Den e buki Perspikasia mi a lesa tokante e amistat entre David i Jonatan. Mi a haña sa hopi tokante Jonatan su spiritu di sakrifisio propio. Su ehèmpel a yuda mi mira mas mihó kiko ta nifiká ser un berdadero amigu. Sinseramente mi ta anhelá pa deskubrí mas hoya spiritual riba djamars anochi!”

No tin duda, tur Yehova su sirbidónan lo benefisiá masha hopi ora nan hasi bon uso di e tempu èkstra ku ta disponibel pa estudio benefisioso di Beibel i adorashon komo famia.