Kon pa Konserbá Amistat den un Mundu sin Amor
Kon pa Konserbá Amistat den un Mundu sin Amor
“Esaki mi ta ordená boso, pa boso stima otro.”—JUAN 15:17.
1. Dikon kristiannan di promé siglo mester a keda bon amigu di otro?
DURANTE Hesus su último anochi riba tera, el a animá su disipelnan fiel pa nan keda amigu di otro. Mas promé riba e anochi ei, el a bisa nan ku nan amor pa otro lo a identifiká nan komo su siguidónan. (Juan 13:35) Pa e apòstelnan por a soportá e pruebanan ku tabata spera nan i kumpli ku e trabou ku pronto Hesus lo a duna nan, nan mester a keda bon amigu di otro. Sí, e kristiannan di promé siglo a bira konosí pa nan deboshon inkebrantabel na Dios i nan lealtat na otro.
2. (a) Kiko nos ta determiná pa hasi, i dikon? (b) Ki preguntanan nos lo konsiderá?
2 Awe ta un plaser di por ta parti di un organisashon mundial di kua e miembronan ta sigui ehèmpel di e kristiannan di promé siglo. Nos ta determiná pa obedesé Hesus su mandato pa stima otro di kurason. Sinembargo, durante e último dianan akí, hende en general ta desleal i no tin amor pa otro. (2 Tim. 3:1-3) Hopi bes nan ta sera amistatnan superfisial, djis pa nan kumbinensia. Pa konserbá nos identidat komo kristian berdadero, nos no mester tin e aktitut ei. P’esei, laga nos konsiderá e siguiente preguntanan: Kiko ta e base pa berdadero amistat? Kon nos por haña bon amigu? Ki ora nos lo tin ku kibra un amistat? Kon nos por konserbá amistatnan edifikante?
Kiko Ta e Base pa Berdadero Amistat?
3, 4. Kiko ta e base pa e amistatnan di mas fuerte, i dikon?
3 E amistatnan di mas fuerte ta basá riba amor pa Yehova. Rei Salomon a skirbi: “Maske un hende por vense ún ku ta su so, dos sí por resistié. Un kordon lorá tripel no ta kibra lihé.” (Ekl. 4:12) Ora Yehova ta e di tres kordon, òf kabuya, den un amistat, e amistat ei lo dura.
4 Ta sierto ku hende ku no ta stima Yehova tambe por sera amistatnan ku ta bale la pena. Pero ora un amor mutuo pa Yehova ta atraé dos persona na otro, nan amistat lo tin un base sólido. Te na ora mes ku surgi desakuerdo, amigunan berdadero lo trata otro na un manera ku ta agradá Yehova. Si esnan ku ta kontra Dios purba di kousa divishon, e enemigunan akí lo ripará ku e amistat entre kristiannan berdadero ta inkebrantabel. Atraves di historia, sirbidónan di Yehova a duna prueba ku nan ta dispuesto pa muri en bes di traishoná otro.—Lesa 1 Juan 3:16.
5. Kon bin e amistat entre Ruth ku Noemí tabata asina fuerte i duradero?
5 Sin duda, e amistatnan ku por duna nos mas satisfakshon ta esnan ku nos tin ku personanan ku ta stima Yehova. Tuma por ehèmpel Ruth ku Noemí. Nan tabatin un di e amistatnan di mas atmirabel ku Beibel ta menshoná. Kon bin nan amistat tabata asina fuerte i duradero? Ruth a revelá e motibu ora el a bisa Noemí: “Bo pueblo lo ta mi pueblo, i bo Dios, mi Dios. . . . Ku SEÑOR hasi asina ku mi, i pió ainda, si kualke [otro kos ku no ta] morto trese separashon entre abo i ami.” (Ruth 1:16, 17) Ta bisto ku tantu Ruth komo Noemí tabatin un amor profundo pa Dios, i nan a laga e amor akí influensiá nan trato ku otro. I esei a pone ku Yehova a bendishoná nan tur dos.
Kon pa Haña Bon Amigu
6-8. (a) Kiko bo tin ku hasi pa haña amistatnan fuerte i duradero? (b) Kon bo por tuma inisiativa pa sera amistat?
6 E ehèmpel di Ruth ku Noemí ta demostrá ku no ta pa kasualidat bo ta haña un bon amistat. E mester ta fundá riba amor mutuo pa Yehova. Pero pa bo tin amistat fuerte i duradero, bo tin ku traha duru i hasi sakrifisio. Asta yunan di famianan kristian ku ta adorá Yehova tin ku hasi esfuerso pa haña bon amigu. Pero, kon bo por haña bon amigu?
7 Tuma inisiativa. Apòstel Pablo a animá su amigunan den e kongregashon na Roma pa mustra òf ‘praktiká hospitalidat.’ (Rom. 12:13) Generalmente, ora bo ta praktiká algu, bo ta hasié regularmente. Di mes manera, pa bo ta hospitalario bo tin ku hasi vários kos chikitu riba un base regular. Niun hende no por mustra hospitalidat pa bo. (Lesa Proverbionan 3:27.) Un manera ku bo por mustra hospitalidat ta di kada bes invitá diferente ruman den kongregashon pa un komementu simpel. Bo por hasié un kustumber pa mustra hospitalidat regularmente na miembronan di bo kongregashon?
8 Un otro manera ku bo por tuma inisiativa pa sera amistat ta di invitá diferente publikadó pa traha huntu ku bo den e trabou di prediká. Ora bo ta pará na porta di un kas i bo tende bo kompañero papia di kurason tokante su amor pa Yehova, esaki sigur lo hala bo mas serka di e kompañero ei, no ta bèrdat?
9, 10. Ki ehèmpel Pablo a pone, i kon nos por imit’é?
9 Mustra mas amor i kariño. (Lesa 2 Korintionan 6:12 i 13.) Bo a yega di sinti ku den kongregashon no tin niun hende ku por ta bo amigu? Si ta asina, akaso bo normanan pa skohe amigu ta muchu estrikto? Apòstel Pablo a pone un bon ehèmpel den mustra kariño na mas i mas hende. Un tempu el a pensa ku nunka lo el a bira bon amigu di hende ku no tabata hudiu. Apesar di esei, el a bira “apòstel di e paganonan.”—Rom. 11:13.
10 Ademas, Pablo no a sera amistat ku hende di su edat so. Por ehèmpel, e ku Timoteo a bira bon amigu apesar di e diferensia di edat i sirkunstansia di bida. Awe, hopi hóben ta apresiá e amistatnan ku nan a sera ku e rumannan di mas edat den kongregashon. Vanessa, kende tin 20 i piku aña, a bisa: “Mi tin un amiga masha stimá di 50 i piku aña. Mi por bis’é tur loke mi por bisa mi amiganan di mi edat. E ta masha interesá den mi.” Kon bin nan e sera e amistat ei? Vanessa a bisa: “Pa mi a haña e amistat akí mi mester a hasi esfuerso, mi no por a sinta man krusá.” Abo ta dispuesto pa sera amistat ku hende ku no tin e mesun edat ku bo? Yehova siguramente lo rekompensá bo esfuersonan.
11. Kiko nos por siña for di e ehèmpel di Jonatan i David?
11 Sea leal. Salomon a skirbi: “Un berdadero kompañero ta stima na tur tempu, i ta un ruman ku a nase pa ora tin angustia.” (Pro. 17:17, NW) Ora Salomon a skirbi e palabranan ei, kisas e tabatin na mente e amistat ku su tata, David, tabatin ku Jonatan. (1 Sam. 18:1) Rei Saul tabata ke pa su yu Jonatan heredá e trono di Israel. Pero Jonatan a aseptá e echo ku ta David Yehova a skohe pa e privilegio ei. Distinto for di Saul, Jonatan no a envidiá David. E no a rabia pasobra e hendenan tabata elogiá David ni e no a kere e mentira ku Saul a plama tokante David. (1 Sam. 20:24-34) Nos ta manera Jonatan? Nos ta keda kontentu pa nos amigunan ora nan risibí privilegio den kongregashon? Ora nan tin problema, nos ta konsolá i apoyá nan? Si un persona bisa nos algu malu di nos amigu, nos ta ker’é mesora? Òf nos ta leal manera Jonatan i ta defendé nos amigu?
Ora Nos Tin Ku Kibra un Amistat
12-14. Ki desafio algun studiante di Beibel ta haña nan kuné, i kon nos por yuda nan?
12 Ora un studiante di Beibel kuminsá hasi kambio den su estilo di bida, su amistatnan por bira un berdadero desafio p’e. Kisas e tin kompañeronan ku e ta gusta asosiá kuné, pero nan no ta sigui e normanan di Beibel. Kisas den pasado e tabata pasa hopi tempu huntu ku nan. Sinembargo, awor e ta ripará ku nan aktividatnan por tin un mal influensia riba dje, i e ta sinti ku e tin ku limitá su kontakto ku e kompañeronan ei. (1 Kor. 15:33) Pero asina mes, kisas e ta pensa ku si e stòp di asosiá ku nan, e ta bira desleal na nan.
13 Si bo ta un studiante di Beibel ku ta den e situashon akí, kòrda ku un berdadero amigu lo ta kontentu ku bo ta trata di drecha bo bida. Kisas e ke asta djòin bo pa e tambe siña di Yehova. Di otro banda, mal amigunan lo ‘kalumniá bo’ pasobra bo no ta anda “den e mesun diluvio di libertinahe” ku nan. (1 Ped. 4:3, 4) P’esei, den un kaso asina no ta abo ta desleal na nan, sino ta nan ta desleal na bo.
14 Ora studiantenan di Beibel kibra amistat ku nan amigunan di ántes ku no ta stima Dios, miembronan di e kongregashon por yena e bashí ei. (Gal. 6:10) Abo personalmente konosé algun studiante di Beibel ku ta asistí na e reunionnan? Bo por perkurá pa asosiashon saludabel pa nan de bes en kuando?
15, 16. (a) Kon nos mester reakshoná si un amigu di nos stòp di sirbi Yehova? (b) Kon nos por demostrá nos amor pa Dios?
15 Pero kiko si un amigu den e kongregashon disidí di bandoná Yehova, i kisas asta mester ser ekspulsá? E situashon ei por ta masha tristu. Un ruman muhé, kende su amiga a stòp di sirbi Yehova, a deskribí su reakshon ku e siguiente palabranan: “Ta komo si fuera algu den mi a muri. Mi a kere ku mi amiga tabata bon ankrá den e bèrdat, pero no tabata asina. Mi a puntra mi mes si e tabata sirbi Yehova djis pa komplasé su famia. Anto esei a pone mi kuminsá analisá mi propio motivashonnan. Mi tabata sirbi Yehova pa e motibunan korekto?” Kon a bai ku e ruman muhé akí? El a bisa: “Mi a tira mi karga riba Yehova. Mi ta determiná pa mustra Yehova ku mi ta stim’é pa e klase di Dios ku e ta, i no djis pasobra e ta perkurá pa mi tin amiga den su organisashon.”
16 Si nos tin amistat ku hende ku ta skohe pa ta amigu di mundu, nos no por ferwagt ku nos ta keda amigu di Dios. Disipel Santiago a skirbi: “Boso no sa ku amistat ku mundu ta enemistat pa ku Dios? P’esei, ken ku kier ta amigu di mundu ta hasi su mes enemigu di Dios.” (Sant. 4:4) Nos por demostrá nos amor pa Dios ora nos ta konfia ku lo e yuda nos trata ku pèrdida di un amigu si nos keda fiel na dje. (Lesa Salmo 31:23.) E ruman muhé ku nos a sita den e paragraf anterior a resumí e asuntu asin’akí: “Mi a siña ku nos no por obligá un hende stima Yehova òf stima nos. Al fin i al kabo, esei ta keda na dje.” Pero kiko nos por hasi pa konserbá nos amistat ku esnan ku ta keda den kongregashon?
Kon pa Konserbá Berdadero Amistat
17. Kon bon amigu ta papia ku otro?
17 Bon komunikashon ta masha importante den un amistat. Ora bo lesa e relatonan di Beibel tokante Ruth ku Noemí, David ku Jonatan i Pablo ku Timoteo, lo bo ripará ku bon amigu ta papia ku rèspèt i habrí ku otro. Pablo a bisa kon nos mester komuniká ku otro hende, ora el a skirbi: “Laga boso palabranan ta semper ku grasia, sasoná ku salu.” Aki Pablo tabata referí spesífikamente na e manera ku nos mester papia ku esnan “di pafó,” esta, ku hende ku no ta nos ruman kristian. (Kol. 4:5, 6) Awor, si nos tin ku papia ku rèspèt ku hende ku no ta Testigu, nos tin mas motibu ainda pa papia ku rèspèt ku nos amigunan di kongregashon.
18, 19. Kon nos mester mira kualke konseho ku nos risibí di un amigu kristian? (b) Ki ehèmpel e ansianonan di Efeso a pone pa nos?
18 Bon amigu ta duna balor na opinion di otro, p’esei nan mester komuniká ku otro na un manera franko i kariñoso. E rei sabí Salomon a skirbi: “Ungwento i perfume ta hasi kurason kontentu, meskos ku dulsura di konseho, ku ta sali for di kurason di un amigu, ta hasi.” (Pro. 27:9) Ta asina abo ta pensa di kualke konseho ku bo ta risibí di un amigu? (Lesa Salmo 141:5.) Kon bo ta reakshoná ora un amigu di bo ekspresá su preokupashon pa algu ku bo ta hasiendo? Bo ta mira su komentarionan komo un akto di bondat amoroso òf bo ta sinti bo ofendí?
19 Apòstel Pablo tabatin un bon relashon ku e ansianonan di e kongregashon na Efeso. Probablemente e tabata konosé algun di e hòmbernan ei for di tempu ku nan a bira kristian. Apesar di esei, na final di su último bishita serka nan, el a duna nan algun konseho franko. Kon nan a reakshoná? Pablo su amigunan no a sinti nan ofendí. Mas bien, nan a apresiá e interes ku el a mustra den nan, i nan a asta yora ora nan a pensa ku kisas nan lo no a bai mir’é mas.—Echo. 20:17, 29, 30, 36-38.
20. Kiko un amigu amoroso lo hasi?
20 Un bon amigu no solamente ta aseptá konseho sabí, ma e ta duna konseho sabí tambe. Klaru ku nos tin ku diserní sí ki ora nos tin ku ‘atendé ku nos mes asuntu.’ (1 Tes. 4:11) Ademas, nos tin ku realisá ku nos kada un ‘lo duna kuenta na Dios’ pa loke nos ta hasi. (Rom. 14:12) Pero ora ta nesesario, un amigu amoroso lo rekordá su amigu bondadosamente riba Yehova su normanan. (1 Kor. 7:39) Por ehèmpel, kiko lo bo hasi si bo ripará ku bo amigu soltero a kuminsá un relashon ku un persona ku no ta Testigu? Lo bo keda sin ekspresá bo preokupashon djis pa boso keda bon amigu? Òf kiko lo bo hasi si bo amigu ignorá bo konseho? Un bon amigu lo buska yudansa di ansianonan amoroso pa yuda un kompañero ku a dal un paso robes. Bo mester tin kurashi pa hasi esei. Asta ora bo amigu tuma bo na malu, si boso amistat ta basá riba amor pa Yehova, lo e no keda rabiá ku bo pa semper.
21. Kiko nos tur lo hasi de bes en kuando, i pakiko ta masha importante pa nos konserbá amistatnan fuerte den kongregashon?
21 Lesa Kolosensenan 3:13 i 14. Lo tin okashonnan ku nos lo duna nos amigunan motibu pa ‘keha’ kontra nos, i nan tambe lo hasi òf bisa kosnan ku lo molestiá nos. Santiago a skirbi: “Nos tur ta trompeká na hopi manera.” (Sant. 3:2) Ma loke ta determiná kon bon amigu nos ta ku un persona no ta e kantidat di biaha ku nos ta peka kontra otro, sino te kon leu nos ta pordoná otro su fayonan. Pa nos por tin amistatnan fuerte ta masha importante pa nos papia habrí ku otro i pordoná otro libremente. I ora nos ta desplegá e klase di amor ei, lo e bira “e laso perfekto di unidat.”
Kon Lo Bo Kontestá?
• Kon nos por haña bon amigu?
• Ki ora nos lo tin ku kibra un amistat?
• Kiko nos tin ku hasi pa konserbá amistatnan fuerte?
[Preguntanan di Estudio]
[Plachi na página 25]
Kiko tabata e base pa e amistat fuerte i duradero entre Ruth ku Noemí?
[Plachi na página 26]
Abo ta mustra hospitalidat regularmente?