Spiritu Santu​—Un Forsa Ku Bo Tin Mester den Bo Bida

“NO TIRA mi for di bo presensia, i no kita bo spiritu santu for di mi.” (Salmo 51:11) Esaki tabata loke Rei David a pidi den un orashon ferviente ku el a hasi despues ku el a kometé un piká serio.

David a eksperensiá e poder di spiritu santu hopi biaha durante su bida. Ora e tabata un teenager ainda, spiritu santu a yud’é derotá Goliat—un sòldá ku ta duna bo miedu ora bo mir’é. (1 Samuel 17:​45-50) Tambe, spiritu santu a dun’é poder pa skirbi algun di e salmonan di mas bunita ku hende a yega di komponé. David a splika: “E spiritu di SEÑOR a papia pa medio di mi, i su palabra tabata riba mi lenga.”​—2 Samuel 23:2.

Hesukristu mes a konfirmá ku spiritu santu a hunga un ròl den David su bida. Na un okashon, Hesus a bisa su oyentenan: “Pasobra David mes a bisa pa medio di spiritu santu: ‘SEÑOR a bisa mi Señor: “Sinta na mi man drechi, te ora mi pone bo enemigunan bou di bo pianan.”’” (Marko 12:36; Salmo 110:1) Hesus tabata sa ku David a skirbi su salmonan bou di guia di spiritu santu. Nos tambe por haña yudansa di spiritu santu?

“Pidi, i Lo Wòrdu Duná na Boso”

Kisas nunka lo bo no skirbi un salmo. Pero lo bo por haña bo ta enfrentá opstákulonan grandi manera e gigante Goliat.  Por ehèmpel, konsiderá e kaso di Isabel. * Su kasá a bai lag’é pa un hende mas yòn. El a lag’é tambe ku un debe grandi, i e no tabata dun’é sosten finansiero pa kria e dos yu muhénan. Isabel a bisa: “Mi a sinti mi traishoná i ku mi a ser tratá manera basura. No opstante, desde ku el a bai laga mi, mi ta sinti ku e spiritu santu di Dios a sostené mi.”

Isabel a spera di risibí spiritu santu sin hasi esfuerso? Nò, tur dia e tabata roga Dios pa su spiritu santu. E tabata sa ku e tabatin mester di Dios su forsa p’e enfrentá futuro ku kurashi, p’e perkurá pa su yunan debidamente i p’e haña e sentido di balor propio atrobe. El a tuma na pechu loke Hesus a bisa: “Pidi, i lo wòrdu duná na boso; buska, i boso lo haña; bati, i lo wòrdu habrí pa boso.”​—Mateo 7:7.

Roberto tambe a sinti ku e tabatin mester di Dios su spiritu santu pero pa un otro motibu. E tabata adikto na tabako ku hash i tabata huma esakinan konstantemente. Pa dos aña largu el a purba kita for di su adikshon, i a keda haña rekaida un par di biaha. Roberto ta splika: “Bo ta sinti ansiedat ora bo stòp di usa droga. Bo kurpa ta sigui pidi p’e dia aden dia afó.”

Roberto ta sigui bisa: “Pero mi tabata determiná pa kambia mi bida pa mi por sirbi Dios na un manera aseptabel. Mi a purba yena mi mente ku pensamentunan positivo di Beibel. Mi tabata hasi orashon fervientemente tur dia, pidiendo Dios pa duna mi forsa pa mi pone mi bida na armonia ku Beibel. Mi tabata sa ku mi no por a logra esei riba mi mes. I mi a mira kon Yehova a kontestá mi orashonnan, spesialmente ora mi tabata sinti mi desanimá pa motibu ku mi a haña rekaida. Mi ta kere ku ta Dios su spiritu santu a duna mi forsa atrobe; sin su spiritu nunka lo mi por a kita for di mi adikshon.”​—Filipensenan 4:​6-8.

Bula “ku Ala Manera Águila”

Meskos ku Isabel i Roberto, miónes di Testigu di Yehova a eksperensiá e poder di spiritu santu den nan bida. Abo tambe por haña yudansa di Yehova su forsa aktivo—loke el a usa pa krea henter e universo—si bo ta deseá esei. Dios ta dispuesto i ansioso pa kompartí su spiritu santu ku bo si bo pidié ku fervor. Pero pa bo haña su spiritu santu, ta nesesario pa bo siña e bèrdat tokante dje i purba sinseramente pa hasi su boluntat.​—Isaias 55:6; Hebreonan 11:6.

Spiritu santu por duna bo e forsa pa sirbi Dios ku éksito i pa enfrentá kualke desafio ku presentá den bo bida. Beibel ta duna nos e siguransa akí: “[Yehova] ta duna forsa na esun kansá, i e ta oumentá poder pa esun ku ta falta poder. . . . Esnan ku spera riba SEÑOR lo haña forsa renobá; nan lo bula bai ariba ku hala manera águila, nan lo kore sin bira fatigá, nan lo kana sin kansa.”​—Isaias 40:​28-31.

[Nota]

[Komentario na página 8]

‘Mi tabata hasi orashon fervientemente tur dia, pidiendo Dios pa duna mi forsa. Mi tabata sa ku mi no por a logra esei riba mi mes. I mi a mira kon el a kontestá mi orashonnan’

 [Kuadro/​Plachinan na página 7]

SPIRITU SANTU DEN AKSHON

Dios a usa spiritu santu pa krea tera i e restu di universo. “O SEÑOR, ki numeroso bo obranan ta! Ku sabiduria bo a traha tur; tera ta yen di loke bo a krea,” e salmista a bisa. “Bo ta manda bo spiritu, nan ta wòrdu kreá.”​—Salmo 104:​24, 30; Génesis 1:2; Jòb 33:4.

Spiritu santu a inspirá hendenan deboto pa skirbi Beibel. “Tur Skritura ta inspirá pa Dios i ta útil,” apòstel Pablo a skirbi. (2 Timoteo 3:16) E palabra griego tradusí “inspirá pa Dios” literalmente ta nifiká “mediante rosea di Dios.” Yehova su rosea, òf spiritu, a guia pensamentu di e eskritornan di Beibel, di manera ku nan por a transmití “e palabra di Dios.”​—1 Tesalonisensenan 2:13.

Spiritu santu a duna Dios su sirbidónan poder pa profetisá ku eksaktitut loke lo pasa den futuro. Apòstel Pedro a splika: “Ningun profesia di Skritura no ta un asuntu di interpretashon personal, pasobra nunka profesia no a wòrdu duná pa medio di e boluntat di hende, ma hòmbernan santu di Dios a papia, inspirá dor di spiritu santu.”​—2 Pedro 1:​20, 21; Joel 2:28.

Spiritu santu a yuda tantu Hesus komo hòmbernan di fe pa prediká e bon nobo di e Reino di Dios i pa hasi milager. Hesus a bisa: “E spiritu di SEÑOR ta riba mi, pasobra el a ungi mi pa prediká evangelio na e pobernan; el a manda mi pa proklamá libertat na e prezunan, i restorashon di bista na e siegunan.”​—Lukas 4:18; Mateo 12:28.

 [Kuadro/​Plachinan na página 9]

MANERANAN KU SPIRITU SANTU POR YUDA NOS

Spiritu santu por duna bo forsa pa resistí tentashon i vense hábitonan perhudisial. Apòstel Pablo a bisa: “Dios ta fiel, kende lo no permití pa boso wòrdu tentá mas ku boso por soportá, ma huntu ku e tentashon e lo proveé salida tambe, pa boso por soportá.”​—1 Korintionan 10:13.

Spiritu santu por yuda bo kultivá kualidatnan ku ta agradá Dios. “Fruta di e spiritu ta amor, goso, pas, pasenshi, kariño, bondat, fieldat, mansedumbre, dominio propio.”​—Galationan 5:​22, 23.

Spiritu santu por fortalesé bo pa perseverá bou di prueba. “Pa tur kos mi tin e forsa mediante esun ku ta duna mi poder.”​—Filipensenan 4:13, NW.