Balorá Bo Papel den Kongregashon

“Dios a pone e miembronan, kada un di nan, den e kurpa, manera ku e tabata deseá.”​—1 KOR. 12:18.

1, 2. (a) Kiko ta mustra ku nos tur por tin un papel balioso den kongregashon? (b) Ki preguntanan nos lo konsiderá den e artíkulo akí?

FOR di tempu di Israel di antigwedat, Yehova ta usa e kongregashon komo medio pa guia su pueblo i aliment’é spiritualmente. Por ehèmpel, despues ku e israelitanan a konkistá e stat Ai, Josué “a lesa tur e palabranan di e lei, e bendishon i e maldishon, konforme tur loke ta pará skirbí den e buki di lei . . . dilanti di henter e asamblea [òf, “kongregashon,” NW] di Israel.”​—Jos. 8:​34, 35.

² Den promé siglo di nos era, apòstel Pablo a bisa e ansiano kristian Timoteo ku e kongregashon kristian ta “e kas di Dios” i un “pilá i sosten di e bèrdat.” (1 Tim. 3:15) Awe, “e kas” di Dios ta e hermandat mundial di kristian berdadero. Den kapítulo 12 di Pablo su promé karta inspirá dirigí na e Korintionan, el a kompará e kongregashon ku un kurpa humano i a splika ku ounke kada miembro tin un funshon diferente, tur ta nesesario. Pablo a bisa ku ta “Dios a pone e miembronan, kada un di nan, den e kurpa, manera ku E tabata deseá.” Pablo a bai asina leu di mustra ku ta nèt ‘e miembronan di e kurpa ku nos ta kere ta di ménos onor, nos ta bisti ku mas onor.’ (1 Kor. 12:​18, 23) Di igual manera, e funshon, òf papel, ku un persona rekto tin den e kas di Dios no ta mas ni ménos importante ku esun di un otro kristian fiel. Kada un su papel ta simplemente diferente. Pues, kon nos por sa ki papel Dios a duna nos den e kongregashon i demostrá ku nos ta balor’é? Ki faktornan por determiná nos papel? I kiko nos por hasi pa nos “progreso por ta bisto pa tur hende”?​—1 Tim. 4:15.

Kon Nos Por Balorá Nos Papel?

3. Kiko por yuda nos haña sa ki papel nos tin den kongregashon i demostrá ku nos ta balor’é?

³ Nos por haña sa ki papel nos tin den kongregashon i demostrá ku nos ta balor’é ora nos ta kooperá ku “e esklabo fiel i prudente” i su Kuerpo Gobernante. (Lesa Mateo 24:​45-47.) Ta bon pa nos puntra nos mes si di bèrdat nos ta sigui e guia ku nos ta risibí di e “esklabo fiel.” Por ehèmpel, atraves di añanan, nos a haña konseho spesífiko relashoná ku bistimentu i areglo personal, entretenimentu i uso di Internet. Nos ta hasi kaso di e bon konsehonan akí pa nos mes protekshon spiritual? Kiko di e instrukshon pa tur siman dediká tempu na Adorashon Komo Famia? Nos a tuma e konseho ei na pechu i a pone un dia pa esei kaba? Si nos ta soltero, nos ta saka tempu pa estudio personal di e Skritura? Si nos sigui e guia di e “esklabo fiel,” Yehova lo bendishoná nos individualmente i komo famia.

4. Kiko nos tin ku tene kuenta kuné ora nos ta tuma desishon di índole personal?

⁴ Kisas algun ruman ta rasoná ku ta keda na kada ken pa disidí ku kiko e ta entretené su mes i kon e ta bisti i areglá su mes. Ma e kristian dediká ku ta balorá su papel den kongregashon no ta bai solamente tras di su gustu personal ora di tuma desishon.  E ta tene kuenta prinsipalmente ku e punto di bista di Yehova, lokual ta revelá den e Skritura. E mensahe ku e Palabra di Dios ta kontené mester ta ‘un lampi pa nos pia i un lus pa nos kaminda.’ (Sal. 119:105) Ta sabí tambe pa nos konsiderá ki efekto nos eskohonan relashoná ku asuntunan personal tin riba nos sirbishi i riba otro hende, tantu paden komo pafó di e kongregashon.​—Lesa 2 Korintionan 6:3 i 4.

5. Pakiko nos mester tene masha kuidou ku e spiritu di independensia?

⁵ “E spiritu ku ta obra awor den e yunan di desobedensia” ta tur kaminda; e ta manera e aire ku nos ta respirá. (Efe. 2:2) E spiritu ei, òf aktitut, por pone nos pensa ku nos no tin mester di e guia di Yehova su organisashon. Nos sigur no ke ta manera Diótrefes, kende no tabata ‘risibí nada for di apòstel Juan ku rèspèt.’ (3 Juan 9, 10, NW) Nos mester tene masha kuidou pa nos no desaroyá un spiritu di independensia i yega asina leu di bisa òf hasi algu ku ta kuestioná e kanal di komunikashon ku Yehova ta usando awe. (Num. 16:​1-3) Mas bien, nos mester balorá e privilegio di por kooperá ku e “esklabo fiel.” I nos mester ta obediente i sumiso tambe na esnan ku ta dirigí nos kongregashon.​—Lesa Hebreonan 13:7 i 17.

6. Dikon nos tin ku analisá nos sirkunstansianan personal?

⁶ Ta bon tambe pa nos analisá nos sirkunstansianan personal kuidadosamente i hasi tur loke nos por pa ‘glorifiká nos ministerio’ i onra Yehova. (Rom. 11:13, NW) Esei ta un otro manera ku nos por demostrá ku nos ta balorá nos papel den kongregashon. Algun ruman ta traha komo pionero regular. Otronan ta sirbi komo misionero, superintendente biahero i miembro di famia di Bètel. Hopi ta yuda ku konstrukshon di Salòn di Reino. E gran mayoria di sirbidónan di Yehova ta hasiendo nan bèst pa perkurá pa e nesesidatnan spiritual di nan famia i ta sali tur siman ku entusiasmo den sirbishi di vèlt. (Lesa Kolosensenan 3:23.) Nos por ta sigur ku ora nos ta sirbi Dios di buena gana i ta hasi nos bèst den su sirbishi ku henter nos alma, semper lo e tin un lugá pa nos den su organisashon.

Faktornan Determinante

7. Kon nos sirkunstansianan por determiná e papel ku nos tin den kongregashon?

⁷ Ta importante pa nos kada un analisá nos sirkunstansianan pasobra, te na sierto grado, esakinan ta determiná kiko nos por hasi den kongregashon. Por ehèmpel, e papel ku un ruman hòmber tin den kongregashon ta un poko diferente for di esun di un ruman muhé. Edat, salú i otro faktornan tambe ta determiná kiko nos por hasi den Yehova su sirbishi. Proverbionan 20:29 ta bisa: “Gloria di hende yòn ta nan forsa, i onor di hende bieu ta nan kabei blanku.” E rumannan mas yòn, pa motibu di nan vigor hubenil, lo por hasi físikamente mas, miéntras ku esnan di mas edat ta benefisiá e kongregashon mashá ku nan sabiduria i eksperensia. Nos tin ku kòrda tambe ku tur loke nos por hasi den e organisashon di Yehova ta dependé di su grasia, òf bondat inmeresí.​—Echo. 14:26; Rom. 12:​6-8.

8. Ki influensia nos deseo por tin riba nos papel den kongregashon?

⁸ Un otro faktor ku por determiná e papel ku nos tin den kongregashon ta sali na kla den e siguiente ilustrashon. Pensa riba dos ruman muhé karnal. Ámbos a kaba skol sekundario i nan sirkunstansianan tabata idéntiko. Nan mayornan a hasi nan bèst pa animá tur dos pa pone komo meta e sirbishi di pionero regular despues di nan graduashon. Ora nan a kaba skol, un di nan a bira pionero miéntras ku e otro a bai traha fultaim. Kiko a hasi e diferensia? Esei tabata nan propio deseo. Al fin i al kabo, kada un  a hasi loke é tabata deseá. I esei ta e kaso ku mayoria di nos tambe, no ta bèrdat? Nos tin ku pensa seriamente kiko nos ke hasi den sirbishi di Dios. Nos por ta mas aktivo den su sirbishi, asta si esei ta nifiká ku nos tin ku hasi kambio den nos sirkunstansianan personal?​—2 Kor. 9:7.

9, 10. Kiko nos mester hasi si nos no tin e motivashon pa ta mas aktivo den Yehova su sirbishi?

⁹ Kiko nos por hasi si gewon nos no tin e motivashon pa ta mas aktivo den Yehova su sirbishi i ta inkliná pa djis hasi lo mínimo den kongregashon? Pablo a skirbi e filipensenan: “Dios ta esun ku, debí na su agrado, ta obrando den boso pa asina boso por deseá i tambe aktua.” Sí, Yehova por obra den nos i influensiá nos boluntat òf deseonan.​—Fil. 2:13, NW; 4:13, NW.

¹⁰ P’esei, nos mester pidi Yehova yuda nos haña e deseo di hasi su boluntat. I esei ta netamente loke Rei David di Israel di antigwedat a hasi. El a pidi Yehova: “Hasi mi konosé bo kamindanan, o SEÑOR; siña mi bo bereanan. Guia mi den bo bèrdat i siña mi, pasobra ta abo ta e Dios di mi salbashon; riba bo mi ta spera henter dia.” (Sal. 25:​4, 5) Nos tambe por resa pidi Yehova duna nos e deseo pa hasi loke ta agrad’é, no ta bèrdat? Yehova Dios i su Yu ta balorá mashá loke nos ta hasi pa sirbi nan interesnan. Ora nos meditá riba esei, nos kurason no ta yena ku apresio pa nan? (Mat. 26:​6-10; Luk. 21:​1-4) E sintimentu di gratitut ei por impulsá nos pa supliká Yehova p’e yuda nos haña e deseo di progresá spiritualmente. Nos por imitá profeta Isaias su bon aktitut. Ora el a tende Yehova puntra: “Ken lo mi manda i ken lo bai pa nos?” el a respondé: “At’ami akí! Manda ami!”​—Isa. 6:8.

Kon Bo Por Progresá?

11. (a) Pakiko ta nesesario pa ruman hòmbernan hasi esfuerso pa asumí responsabilidat den kongregashon? (b) Kiko un ruman hòmber por hasi pa alkansá privilegionan di sirbishi?

¹¹ En bista di e 289.678 personanan ku a batisá rònt mundu durante e aña di sirbishi 2008, ta opvio ku tin un gran nesesidat di ruman hòmber pa dirigí. Mirando e nesesidat akí, kiko un ruman hòmber por hasi? Básikamente, e mester hasi esfuerso pa kumpli ku e rekisitonan bíbliko pa sirbidó ministerial i ansiano. (1 Tim. 3:​1-10, 12, 13; Tito 1:​5-9) Anto kiko e esfuerso ei ta enserá? Entre otro, e mester ta aktivo den sirbishi di vèlt, kumpli diligentemente ku su asignashon den kongregashon, traha duru pa mehorá e kalidat di su komentarionan na reunion i mustra interes personal den e rumannan. Asina un ruman hòmber ta mustra ku e ta balorá su papel den kongregashon.

12. Kon hóbennan por demostrá ku nan ta stima e bèrdat?

 ¹² Kiko ruman hòmbernan mas yòn, spesialmente e adolesentenan, por hasi pa progresá den kongregashon? Nan por hasi esfuerso pa haña mas “sabiduria spiritual i komprondementu” segun ku nan ta siña konosé e Skritura. (Kol. 1:9) Algu ku sigur por yuda nan logra esei ta ora nan ta studia e Palabra di Dios diligentemente i partisipá aktivamente na reunionnan di kongregashon. Nan por hasi esfuerso tambe pa kumpli ku e rekisitonan ku ta permití nan drenta e “porta pa hasi un gran trabou” den vários tipo di sirbishi di tempu kompletu. (1 Kor. 16:9, BPK) Rumannan ku ta sigui un karera den sirbishi di Yehova ta hiba un bida yen di bendishon i ku ta duna berdadero satisfakshon.​—Lesa Eklesiastés 12:1.

13, 14. Den ki manera ruman muhénan por demostrá ku nan ta duna gran balor na nan papel den kongregashon?

¹³ Ruman muhénan tambe por demostrá ku nan ta balorá e privilegio ku nan tin di por toka parti den kumplimentu di Salmo 68:11 (BPK), ku ta bisa: “Señor ta laga un òrdu sali, kantidat di muhé ta plama e bon notisia.” Ruman muhénan por demostrá ku nan ta apresiá nan papel den kongregashon prinsipalmente ora nan ta aktivo den e trabou di hasi disipel. (Mat. 28:​19, 20) P’esei, ku nan pleno partisipashon den sirbishi i e sakrifisionan boluntario ku nan ta hasi pa e trabou ei, nan ta demostrá ku nan ta balorá nan papel den kongregashon.

¹⁴ Ora Pablo a skirbi Tito, el a bis’é: “Muhénan di edat mester ta reverente den nan komportashon, . . . siñando loke ta bon, pa nan enkurashá e muhénan hóben pa stima nan esposo, pa stima nan yunan, pa ta huisioso, puru, bon ama di kas, kariñoso, siendo sumiso na nan mes esposo, pa e palabra di Dios no wòrdu desonrá.” (Tito 2:​3-5) Sí, ruman muhénan maduro por tin un bon influensia riba e kongregashon! Nan ta respetá e rumannan ku ta dirigí e kongregashon i ta tuma desishon sabí relashoná ku bistimentu, areglo personal i entretenimentu. Di e manera ei nan ta pone un bon ehèmpel pa otronan i ta demostrá ku nan ta duna gran balor na nan papel den kongregashon.

15. Kiko un ruman muhé soltero por hasi pa trata ku soledat?

¹⁵ Tin biaha no ta fásil pa un ruman muhé soltero komprondé kiko ta su papel den kongregashon. Un ruman muhé ku tabatin poko problema ku esaki a bisa: “Komo soltero, de bes en kuando, bo por sinti bo so.” Ora a puntra e ruman muhé akí kon e ta trata ku e situashon, el a bisa: “Orashon i estudio di Beibel ta yuda mi komprondé atrobe kiko ta mi papel. Mi ta studia informashon ku ta laga mi kòrda kon Yehova ta mira mi. Anto mi ta trata di ta útil pa otro rumannan den kongregashon. Esaki ta yuda mi stòp di pensa muchu riba mi mes so.” Segun Salmo 32:8, Yehova a bisa David: “Lo mi konsehá  bo; mi wowo ta riba bo.” Sí, Yehova ta interesá den tur su sirbidónan, inkluso ruman muhénan soltero, i lo e yuda tur komprondé ki papel nan tin den kongregashon.

Sigui Kumpli ku Bo Papel!

16, 17. (a) Dikon e mihó desishon ku nos por a tuma ta di aseptá e invitashon di bira parti di Yehova su organisashon? (b) Kon nos por sigui kumpli ku nos papel den e organisashon di Yehova?

¹⁶ Den Yehova su gran amor, el a hala kada un di su sirbidónan serka dje pa forma un relashon estrecho kuné. Hesus a bisa: “Ni un hende no por bin serka mi, si no ta e Tata ku a manda mi a hal’é.” (Juan 6:44) Di tur e míles di miónes di hende ku ta biba riba tera, Yehova a invitá nos pa bira parti di su organisashon awe. E mihó desishon ku nos por a tuma ta di aseptá e invitashon akí. Esei a duna nos un propósito den bida. Ademas, nos papel den kongregashon ta duna nos goso i satisfakshon.

¹⁷ E salmista a bisa: ‘O Yehova, mi ta stima e kas kaminda bo ta biba.’ Despues el a agregá: ‘Mi pia ta para riba un lugá lizu; den e kongregashonnan lo mi bendishoná Yehova.’ (Sal. 26:​8, 12) E Dios berdadero tin un papel pa kada un di nos den su organisashon. Pues, sigui òrdu teokrátiko i keda aktivo den su sirbishi. Hasiendo esei, bo por sigui kumpli ku e papel presioso ku Yehova a duna bo den su organisashon.

Bo Ta Kòrda?

• Dikon ta rasonabel pa konkluí ku tur kristian tin un papel den kongregashon?

• Kon nos por demostrá ku nos ta balorá nos papel den e organisashon di Dios?

• Ki faktornan por determiná e funshon ku nos tin den kongregashon?

• Kon hóben- i adultonan kristian por demostrá ku nan ta balorá nan papel den e kongregashon di Dios?

[Preguntanan di Estudio]

[Plachi na página 21]

Kon ruman hòmbernan por traha pa alkansá privilegionan den kongregashon?

[Plachi na página 22]

Kon ruman muhénan por demostrá ku nan ta balorá nan papel den kongregashon?