Kiko Bo Orashonnan Ta Bisa di Bo?

“Abo ku ta skucha orashon, serka bo tur hende ta bin.”​—SAL. 65:2.

1, 2. Dikon sirbidónan di Yehova por aserk’é ku konfiansa den orashon?

YEHOVA nunka ta sera orea pa e petishonnan di su fiel sirbidónan. Nos por tin e konfiansa ku e ta tende nos. Asta si miónes di Testigu di Yehova ta hasi orashon na mes momento, pa ningun di nan lo e ta ‘okupá.’

² E salmista David tabatin konfiansa ku Dios lo a tende su súplikanan. P’esei mes el a kanta: “Abo ku ta skucha orashon, serka bo tur hende ta bin.” (Sal. 65:2) Yehova a kontestá David su orashonnan pasobra David tabata leal na dje. Pues, ta bon pa nos puntra nos mes: ‘Mi súplikanan ta demostrá ku mi tin konfiansa den Yehova i ku loke ta mas importante pa mi ta su adorashon puru? Kiko mi orashonnan ta bisa di mi?’

Aserká Yehova ku Humildat

3, 4. (a) Ku ki aktitut nos mester aserká Dios den orashon? (b) Kiko nos mester hasi ora “pensamentunan inkietante” relashoná ku un piká serio ta tormentá nos?

³ Pa Dios kontestá nos orashonnan, nos mester aserk’é na un manera humilde. (Sal. 138:6) Nos mester pidi Yehova saminá nos, meskos ku David a pidié ora el a bisa: “Skudriñá mi kompletamente, o Dios, i konosé mi kurason. Saminá mi, i konosé mi pensamentunan inkietante, i mira si tin den mi algun kaminda doloroso, i guia mi den e kaminda di tempu indefiní.” (Sal. 139:​23, 24, NW) Laga nos no solamente hasi orashon sino tambe permití Dios saminá nos i yuda nos obedesé e konseho di su Palabra. Yehova por guia nos riba “e kaminda di tempu indefiní,” es desir, yuda nos kana di un manera ku ta hiba na bida eterno.

⁴ Kiko nos mester hasi si “pensamentunan inkietante” relashoná ku un piká serio ta tormentá nos? (Lesa Salmo 32:​1-5.) Si nos purba ignorá un konsenshi ku ta molestiá nos, esei lo kaba ku tur nos energia meskos ku e kalor intenso di zomer ta seka un palu. David a pèrdè su goso i kisas asta a bira malu pa motibu di su piká. Pero ora el a konfesá su pika na Dios, el a haña un gran alivio. Imaginá bo David su goso ora el a sinti ku Yehova a ‘pordoná su transgreshon.’ Konfeshon di piká na Dios por trese alivio, i e yudansa di ansianonan kristian tambe lo yuda un persona ku a faya rekuperá spiritualmente.​—Pro. 28:13; Sant. 5:​13-16.

Supliká Dios i Gradisié

5. Kiko ta nifiká supliká Yehova?

⁵ Si pa un òf otro motibu nos ta sinti nos mes angustiá, nos mester sigui e konseho akí di Pablo: “No preokupá pa nada; ma den tur kos, pa medio di orashon i súplika ku gradisimentu, laga boso petishonnan ta konosí dilanti di Dios.” (Fil. 4:6) Supliká un persona ta nifiká rog’é na un manera humilde. Spesialmente ora nos ta den peliger òf ta enfrentá persekushon, nos mester supliká Yehova p’e yuda nos i guia nos.

6, 7. Ki motibunan nos tin pa ekspresá gradisimentu tambe den nos orashonnan?

⁶ Ma si nos ta hasi orashon solamente ora nos tin mester di algu, kiko esei lo bisa di nos motivashonnan? Pablo a bisa ku nos mester laga Dios sa kiko ta nos petishonnan pa medio di orashon huntu “ku gradisimentu.” I sigur nos tin hopi motibu pa ekspresá e mesun sintimentunan ku David tabatin ora el a bisa: “Di bo, o SEÑOR, ta e grandesa, e poder, e gloria,  e viktoria i e mahestat, di bèrdat, tur loke ta den shelu i riba tera; e dominio ta di bo, o SEÑOR, i abo ta halsa bo mes komo kabes riba tur kos. . . . Nos Dios, nos ta gradisí bo i ta alabá bo nòmber glorioso.”​—1 Kró. 29:​11-13.

⁷ Hesus a gradisí Dios pa e alimento ku e ta perkurá, inkluso pa e pan i biña ku el a usa durante e Sena di Señor. (Mat. 15:36; Mar. 14:​22, 23) Pa loke ta nos, ademas di ‘gradisí Yehova’ pa nos pan di kada dia, nos tin ku gradisié tambe pa “su maravianan,” pa su “ordenansanan hustu” i pa su palabra, òf mensahe, ku awe nos por haña den e Skritura.​—Sal. 107:15; 119:​62, 105.

Hasi Orashon pa Otro Hende

8, 9. Pakiko nos tin ku hasi orashon pa nos rumannan?

⁸ Ademas di hasi orashon pa nos mes, nos mester hasi orashon pa otronan tambe—asta pa rumannan ku nos no konosé pa nòmber. Ounke apòstel Pablo kisas no tabata konosé tur e kreyentenan na Kolosas, el a skirbi: “Nos ta duna gradisimentu na Dios, Tata di nos Señor Hesukristu, semper hasiendo orashon pa boso, komo ku nos a tende di boso fe den Kristu Hesus i e amor ku boso tin pa tur e santunan.” (Kol. 1:​3, 4) Pablo a resa tambe pa e kristiannan na Tesalónika. (2 Tes. 1:​11, 12) E tipo di orashonnan ei ta bisa hopi di nos i di e manera ku nos ta mira nos rumannan den fe.

⁹ E orashonnan ku nos ta hasi pa e kristiannan ungí i pa nan kompañeronan, e “otro karnénan,” ta demostrá kuantu interes nos tin den e organisashon di Dios. (Juan 10:16) Pablo a pidi su rumannan den fe pa supliká Dios pa e por a haña e kapasidat di papia ‘pa asina e por a duna di konosé e sekreto sagrado di e bon nobo.’ (Efe. 6:​17-20, NW) Nos tambe ta hasi orashon pa otro ruman?

10. Ki efekto e orashonnan ku nos ta hasi pa otro hende por tin riba nos?

¹⁰ Ora nos ta hasi orashon pa otro hende, esei por kambia nos aktitut pa ku nan. Por ehèmpel, si nos no ta gusta un persona mashá, pero ta hasi orashon p’e tòg, kon nos lo por keda sin stima e persona ei? (1 Juan 4:​20, 21) E tipo di orashonnan akí ta edifikante i ta hasi nos union mas fuerte. Ademas, esei ta un indikashon ku nos tin e amor ku Kristu tabatin. (Juan 13:​34, 35) E kualidat ei ta parti di e fruta di spiritu di Dios. Nos kada un por puntra nos mes: ‘Mi ta pidi Yehova duna mi spiritu santu i pa e yuda mi manifestá e fruta di amor, goso, pas, pasenshi, kariño, bondat, fieldat, mansedumbre i dominio propio?’ (Luk. 11:13; Gal. 5:​22, 23) Si ta asina, nos palabra- i akshonnan lo mustra ku nos ta kana i biba ‘segun spiritu.’​—Lesa Galationan 5:16 i 25.

11. Pakiko no ta malu pa pidi otro hende hasi orashon pa nos?

¹¹ Si nos ta na altura ku nos yunan ta haña nan ku e tentashon pa spik na skol, nos mester hasi orashon pa nan i tambe usa e Skritura  pa yuda nan pa ta onesto i pa no hasi nada malu. Pablo a bisa e kristiannan na Korinto: “Nos ta pidi Dios pa boso no hasi nada malu.” (2 Kor. 13:7) Orashonnan humilde manera esei ta agradá Yehova i ta bisa algu bon di nos. (Lesa Proverbionan 15:8.) Tambe, nos por pidi otro hende resa pa nos, meskos ku apòstel Pablo a hasi. El a skirbi: “Hasi orashon pa nos, pasobra nos ta sigur ku nos tin un bon konsenshi, ku deseo pa komportá nos mes den tur kos na un manera onorabel.”​—Heb. 13:18.

Nos Orashonnan Ta Revelá Asta Mas Kos

12. Kiko mester ta e tópikonan prinsipal di nos orashonnan?

¹² Nos orashonnan ta revelá ku Testigunan di Yehova ta hende kontentu i yen di entusiasmo? Nos súplikanan ta enfoká prinsipalmente riba kumplimentu di e boluntat di Dios, predikashon di e mensahe di Reino, vindikashon di e soberania di Yehova i santifikashon di su nòmber? Esakinan mester ta e tópikonan prinsipal di nos orashonnan. Hesus a indiká esei den su orashon modelo, ku ta kuminsá ku e palabranan: “Nos Tata ku ta den shelu, bo nòmber sea santifiká. Ku bo reino bin. Ku bo boluntat sosodé na tera meskos ku den shelu.”​—Mat. 6:​9, 10.

13, 14. Kiko nos orashonnan ta bisa di nos?

¹³ Nos orashonnan ta revelá kiko nos motivashon-, interes- i deseonan ta. Yehova sa ki tipo di hende nos ta di paden. Proverbionan 17:3 ta bisa: “Wea pa dirti metal ta pa plata, i fòrnu ta pa oro, ma ta SEÑOR ta sonda kurason.” Dios ta mira kiko tin den nos kurason. (1 Sam. 16:7) E sa kiko nos ta pensa di nos reunionnan, nos sirbishi i nos rumannan spiritual. Yehova ta na altura di loke nos ta pensa di e “rumannan” di Kristu. (Mat. 25:40) E sa perfektamente si realmente nos ta deseá loke nos ta pidi òf si nos ta djis ripití e mesun palabranan kada bes. Hesus a bisa: “Ora bo ta hasi orashon, no keda ripití palabranan bano manera e paganonan ta hasi, pasobra nan ta kere ku nan lo wòrdu tendí pa motibu di nan kantidat di palabra.”​—Mat. 6:7.

¹⁴ Loke nos ta ekspresá den orashon ta revelá tambe kuantu konfiansa nos tin den Dios. David a bisa: “Abo [Yehova] tabata un refugio pa mi, un toren fuerte kontra e enemigu. Laga mi biba den bo tènt pa semper; laga mi tuma refugio bou di e protekshon di bo alanan.” (Sal. 61:​3, 4) Ora Dios, na moda di papia, ‘span su tènt riba nos,’ nos ta haña su protekshon i un sintimentu di siguridat. (Rev. 7:15, NW) P’esei, ora nos ta pasa den un òf otro prueba di fe, ta un konsuelo pa hala serka Yehova den orashon ku e konvikshon ku e ta ‘ku nos.’​—Lesa Salmo 118:​5-9.

15, 16. Kiko orashon por yuda nos saka afó tokante nos motivashonnan pa alkansá privilegionan di sirbishi?

¹⁵ Orashon sinsero ta yuda nos saka afó si nos motivashonnan ta puru òf no. Por ehèmpel, suponé ku nos tin masha gana di sirbi komo superintendente den e pueblo di Dios. E gana ei ta brota realmente di un deseo humilde pa sirbi i pa hasi tur loke ta na nos alkanse pa promové interesnan di Reino? Òf kisas esei ta pasobra nos ke ta na “promé” lugá i ta gusta e idea di manda riba otro hende? Den e pueblo di Yehova no tin lugá pa e tipo di kosnan ei. (Lesa 3 Juan 9 i 10; Lukas 22:​24-27.) Si nos tin deseonan ku no ta sano, orashon franko por saka nan na kla i Yehova por yuda nos hasi kambio promé ku nan saka rais den nos kurason.

 ¹⁶ Podisé un esposa kristian ta deseá mashá pa su kasá bira un sirbidó ministerial i kisas ku tempu un superintendente, òf ansiano. Ta bon pa e ruman muhé akí obra na armonia ku e sintimentunan ku e ta ekspresá den su orashonnan hasiendo esfuerso pa komportá su mes na un manera ehemplar. Esaki ta importante pasobra abla i kondukta di un hòmber su famia tambe ta influensiá e opinion ku e kongregashon tin di dje.

Kon Nos Tin Ku Representá Otronan den Orashon Públiko?

17. Pakiko nos tin ku buska momentonan ku nos por ta nos so pa hasi orashon?

¹⁷ Hopi bes Hesus a alehá for di multitut di hende pa e por tabata su so i asina resa na su Tata. (Mat. 14:13; Luk. 5:16; 6:12) Nos tambe tin ku buska momentonan ku nos por ta nos so. Un orashon trankil den un ambiente ketu ta duna nos chèns di tuma desishonnan ku ta agradá Yehova i ku ta yuda nos keda spiritualmente fuerte. Ma Hesus a hasi orashon den públiko tambe, i ta bon pa nos konsiderá kon nos por hasi esaki na un manera apropiá.

18. Kiko ta algun punto ku ruman hòmbernan mester tene na mente ora nan ta representá un kongregashon den orashon?

¹⁸ Na nos reunionnan, ruman hòmbernan fiel ta representá e kongregashon den orashon. (1 Tim. 2:8) Na final di un orashon asina, nos rumannan mester por bisa “amèn,” ku ta nifiká “sea asina.” Pero, pa nan por bisa “amèn,” nan mester ta di akuerdo ku loke nan a tende. Den Hesus su orashon modelo no tin nada ofensivo òf inapropiá. (Luk. 11:​2-4) Ademas, e no a bai den detaye di tur e nesesidatnan òf problemanan di kada hende ku tabata skuch’é. Pues, ta bon pa menshoná kosnan di índole personal den orashonnan privá, i no públiko. I ora nos ta representá un grupo den orashon, nos mester evitá di inkluí asuntunan konfidensial.

19. Kon nos mester komportá nos mes ora un otro ruman ta representá nos den orashon?

¹⁹ Ora un otro ruman ta representá nos den orashon, nos mester mustra un ‘temor [respetuoso] pa Dios.’ (1 Ped. 2:17) Tin kosnan ku ta normal pa nos hasi otro ora i na otro lugá pero ku na un reunion kristian sí ta inapropiá. (Ekl. 3:1) Por ehèmpel, suponé ku un ruman pidi tur hende den un grupo tene otro su man durante un orashon asina. Esaki lo por ofendé òf distraí algun persona, inkluso bishitantenan ku no tin e mesun kreensianan ku nos. Pensa tambe riba e siguiente situashon: Kisas algun pareha kasá ta tene man diskretamente durante orashon públiko. Pero si nan brasa otro, un hende ku wak nan por haña e impreshon ku e pareha ta mas enfoká riba nan relashon romántiko ku riba nan relashon ku Dios.  Pues, ku rèspèt profundo pa Yehova, laga nos “hasi tur [kos] pa e gloria di Dios” i evitá un komportashon inapropiá ku por distraí otro hende i pone nan trompeká.​—1 Kor. 10:​31, 32; 2 Kor. 6:3.

Ora Nos No Sa Kiko pa Pidi den Orashon

20. Kon lo bo splika Romanonan 8:26 i 27?

²⁰ Tin biaha nos no sa kiko nos tin ku bisa den nos orashonnan personal. Pablo a skirbi: “Nos no sa kiko nos mester pidi den orashon, ma e spiritu [santu] mes ta boga pa nos ora nos ta keña sin ekspresá palabra. Sinembargo, esun [esta, Dios,] ku ta skudriñá kurason sa kiko ta propósito di e spiritu.” (Rom. 8:​26, 27, NW) Yehova a laga registrá hopi orashon di su sirbidónan den su Palabra. E ta aseptá e petishonnan inspirá akí komo si fuera ta for di nos mes nan a sali i p’esei e ta kontestá nan. Dios konosé nos i sa tambe kiko tin tras di e kosnan ku el a pone su spiritu papia pa medio di eskritornan di Beibel. Yehova ta kontestá nos súplikanan ora e spiritu ta “boga,” òf intersedé, pa nos. Pero segun ku nos ta familiarisá nos mes mas i mas ku e Palabra di Dios, loke nos mester pidi ta bini mas lihé na nos mente.

21. Kiko nos lo analisá den e siguiente artíkulo?

²¹ Manera nos a siña, nos orashonnan ta bisa hopi di nos. Por ehèmpel, nan por revelá kuantu nos a hala serka Yehova i kon bon nos konosé su Palabra. (Sant. 4:8) Den e siguiente artíkulo, nos lo analisá algun orashon i ekspreshon den forma di orashon ku tin registrá den Beibel. Ki efekto un análisis asina di e Skritura lo por tin riba e orashonnan ku nos ta hasi?

Kon Lo Bo Kontestá?

• Ku ki aktitut nos mester aserká Yehova den orashon?

• Pakiko nos tin ku hasi orashon pa nos rumannan den fe?

• Kiko nos orashonnan por revelá tokante nos mes i nos motivashonnan?

• Kon nos mester komportá nos mes durante orashon públiko?

[Preguntanan di Estudio]

[Plachi na página 11]

Bo ta alabá i gradisí Yehova regularmente?

[Plachi na página 13]

Nos komportashon durante orashon públiko semper mester onra Yehova