“TENE kuidou,” apòstel Pablo a skirbi e kristiannan ku tabata biba den e di dos mitar di promé siglo di nos era. Ku kiko nan mester a tene kuidou? ‘Pa niun hende no sedusí nan ku teorianan bashí i engañoso ku ta basá riba tradishon di hende.’​—Kolosensenan 2:8, BPK.

Apesar di Pablo su spièrtamentu, for di meimei di siglo 2 di nos era, algun kristian a kuminsá usa e konseptonan ku filósofonan di antigwedat tabata promové pa splika nan kreensianan. Pa ki motibu? Nan kier a haña aseptashon serka e klase eduká di e Imperio Romano i asina logra kombertí mas tantu hende posibel.

Segun Justino Mártir, un di e kristiannan di mas famoso di e grupo akí, e Bosero di Dios a manifestá su mes na filósofonan griego hopi tempu promé ku su binida na tera komo Hesus. Pa Justino i otro maestronan ku a sigui e tipo di konseptonan akí, e aporte ku filosofia i mitologia a duna kristianismo a hasi e religion akí berdaderamente universal.

E ‘kristianismo’ di Justino Mártir tabatin hopi éksito den kombertí hende. Sinembargo, aseptashon di un mito a hiba na kreashon di otro mitonan, i esei a produsí loke awor hopi hende ta kere ta doktrina kristian. Si bo ke sa kiko ta e bèrdat tras di e mitonan akí, kompará loke e siguiente obranan di konsulta ta bisa ku loke Beibel ta siña.