BO SA sinti bo asina desanimá ku bo ta haña gana di stòp di sirbi Yehova?​— * Hopi hende a yega di sinti asina. E hóben Jeremias tambe. Apesar di esei, e no a laga loke otro hende a bisa òf hasi pon’é stòp di sirbi Yehova. Jeremias tabata un persona spesial pa Yehova, tòg e tabatin gana di stòp di sirbi Yehova. Laga nos papia di esei.

Promé ku Jeremias a nase, e Dios berdadero, Yehova, a skoh’é pa bira profeta. E mester a spièrta e pueblo ku Dios no tabata kontentu ku loke nan tabata hasi. Bo sa kiko Jeremias a bisa Yehova algun aña despues?​— “Mi no sa kon pa papia, pasobra mi ta un mucha.”

Kiko bo ta kere Yehova a bisa Jeremias?​— Na un manera bondadoso pero firme, el a bis’é: “No bisa: ‘Mi ta un mucha,’ pasobra unda ku ami manda bo, lo bo bai, i tur loke ami manda bo papia, lo bo papia. No tene miedu.” Dikon Jeremias no mester tabatin miedu? Yehova a bis’é: “Ami ta ku bo pa libra bo.”​—Jeremias 1:​4-8.

Pero tòg, manera nos a lesa kaba, Jeremias a sintié desanimá. Bo sa dikon? Pasobra e hendenan tabata tent’é debí ku e tabata sirbi Dios. El a bisa: ‘Tur hende ta hari mi i tenta mi henter dia.’ P’esei, el a disidí ku e ta stòp di sirbi Yehova. E di: “Lo mi no kòrda riba [Yehova], ni papia mas den su nòmber.” Pero di bèrdat el a stòp di sirbi Yehova?

Jeremias a bisa: ‘E palabra di Yehova ta manera un kandela den mi kurason, será den mi wesunan, i mi ta kansá di ten’é paden.’ (Jeremias 20:​7-9) Ounke ku Jeremias tabatin miedu de bes en kuando, su amor pa Yehova a pone ku e no a bandoná Yehova. P’esei, Yehova a proteh’é. Laga nos wak kon.

Yehova a manda Jeremias bai spièrta e pueblo ku Yerusalèm lo ser destruí si nan no stòp di hasi malu i kuminsá hasi loke ta bon. Ora Jeremias a bisa nan esei, nan a rabia i a bisa: “Sentensiá e hòmber akí na morto.” Apesar di esei, Jeremias a roga nan pa ‘obedesé e bos di Yehova.’ Kaba el  a bisa nan: ‘Sea sigur ku si boso mata mi, boso ta mata un hende inosente, pasobra ta Dios a manda mi papia ku boso.’ Bo sa kiko a pasa e ora ei?—

Beibel ta bisa: “E ofisialnan i henter e pueblo a bisa e saserdotenan i e profetanan: ‘No sentensiá e hòmber akí na morto, pasobra el a papia ku nos den e nòmber di [Yehova] nos Dios.’” Pues, Yehova a protehá Jeremias pasobra ounke e tabatin miedu, e no a stòp di sirbi Yehova. Awor, laga nos wak kiko a pasa ku Urias, un otro profeta di Yehova, kende a aktua na un manera masha diferente.

Beibel ta bisa ku ‘Urias a usa palabranan kasi meskos ku esnan di Jeremias pa profetisá kontra Yerusalèm.’ Pero bo sa kiko Urias a hasi ora Rei Joakim a rabia kuné?— El a haña miedu. El a stòp di hasi e boluntat di Dios i a hui bai Egipto. P’esei, e rei a manda algun hòmber bai busk’é na Egipto i tres’é bèk. Anto bo sa kiko e rei malbado a hasi ora e hòmbernan a trese Urias?— El a mata Urias ku un spada.​—Jeremias 26:​8-24.

Awor, dikon Yehova a protehá Jeremias sí i Urias nò?— Pasobra ounke Jeremias tabatin miedu meskos ku Urias, e no a stòp di sirbi Yehova ni hui. E no a bandoná Yehova. Ki lès nos por siña for di e ehèmpel di Jeremias?— Ku ounke tin biaha nos por pensa ku ta difísil pa hasi loke Dios ta bisa, semper nos mester konfi’é i obedes’é.