Laga Tur Hende Mira Bo Progreso

“[“Reflekshoná riba,” NW] e kosnan akí; sea dediká na nan, pa bo progreso por ta bisto pa tur hende.”​—1 TIM. 4:15.

1, 2. Kiko nos sa di e hubentut di Timoteo i di e kambio ku a tuma lugá ora e tabatin rònt di 20 aña?

E HÓBEN Timoteo a lanta den e provinsia romano di Galasia, konosí awe komo Turkia. Vários kongregashon a ser establesé einan den e dékadanan despues di e morto di Hesus. Den e periodo ei, e hóben Timoteo a aseptá kristianismo huntu ku su mama i su wela i a bira aktivo den un di e kongregashonnan. (2 Tim. 1:5; 3:​14, 15) Timoteo sigur tabata disfrutá di su bida komo un hóben kristian meimei di e ambiente konosí ei. Sinembargo, dado momento kos a kuminsá kambia.

² Tur kos a kuminsá ora apòstel Pablo a bishitá e área pa di dos biaha. E tempu ei Timoteo kisas tabatin rònt di 20 aña. Pablo a tuma nota durante su bishita, probablemente na Listra, ku e rumannan den e kongregashonnan lokal “tabata duna bon testimonio” di Timoteo. (Echo. 16:2) Pues, e hóben Timoteo lo mester a demostrá ku e tabata hopi madurá pa su edat. Anto, bou di guia di spiritu santu, Pablo i e kuerpo lokal di ansiano a pone nan man riba Timoteo, i asina nan a apart’é pa un obra spesial den kongregashon.​—1 Tim. 4:14; 2 Tim. 1:6.

3. Ki privilegio di sirbishi ekstraordinario Timoteo a haña?

³ Timoteo a haña un invitashon ekstraordinario, esta, pa bira kompañero di biahe di apòstel Pablo! (Echo. 16:3) Nos por imaginá kon sorprendí i emoshoná Timoteo lo mester tabata! Djei padilanti, pa años Timoteo a biaha huntu ku Pablo i algun biaha huntu ku otro hende, kumpliendo ku vários asignashon ku el a haña di e apòstel- i ansianonan. Pablo ku Timoteo a sirbi den e trabou biahero i asina a kontribuí mashá na e edifikashon spiritual di e rumannan. (Lesa Echonan 16:4 i 5.) Pues, Timoteo tabata bon konosí serka hopi kristian pa su progreso spiritual. Despues ku Pablo tabatin mas o ménos 10 aña ta traha huntu ku Timoteo, el a skirbi den un karta na e filipensenan: “Mi no tin ni un otro hende di e mesun spiritu [ku Timoteo] ku lo preokupá sinseramente pa boso bienestar. . . . Boso tin prueba di su fieldat, ku el a sirbi huntu ku mi, manera un yu ku su tata, den e trabou di evangelio.”​—Fil. 2:​20-22.

4. (a) Pablo a enkargá Timoteo ku ki responsabilidat pisá? (b) Kiko nos por puntra relashoná ku loke Pablo a bisa na 1 Timoteo 4:15?

⁴ Rònt di e tempu ku Pablo a skirbi e filipensenan, el a enkargá Timoteo ku e responsabilidat pisá di nombra ansiano i sirbidó ministerial den e kongregashonnan. (1 Tim. 3:1; 5:22) Tabata bisto ku Timoteo a bira un superintendente kristian konfiabel. Sinembargo, den e mesun karta, Pablo a urgi Timoteo pa ‘laga tur hende mira su progreso.’ (1 Tim.  4:15) Akaso Timoteo su progreso no tabata bisto kaba, anto na un grado ekstraordinario? Pues, kiko Pablo tabata ke men ku e palabranan ei, i kon nos por benefisiá di su konseho?

Laga Tur Hende Mira Nos Kualidatnan Spiritual

5, 6. Kiko tabata forma un peliger pa e puresa spiritual di e kongregashon di Efeso, i kon Timoteo por a protehá e kongregashon?

⁵ Ban analisá e konteksto di 1 Timoteo 4:15. (Lesa 1 Timoteo 4:​11-16.) Promé ku Pablo a skirbi e palabranan ei, el a biaha bai Masedonia, ma el a pidi Timoteo pa keda na Efeso. Dikon? Pasobra tabatin hende den e stat ei ku a trese siñansanan falsu den e kongregashon i kousa divishon, i Timoteo mester a protehá e puresa spiritual di e kongregashon. Kon lo e mester a hasi esaki? Entre otro kosnan, e mester a pone un bon ehèmpel ku otronan por a imitá.

⁶ Pablo a skirbi Timoteo: “Den palabra, kondukta, amor, fe i puresa, demostrá bo mes di ta un ehèmpel pa esnan ku ta kere.” Anto el a agregá: “[“Reflekshoná riba,” NW] e kosnan akí; sea dediká na nan, pa bo progreso por ta bisto pa tur hende.” (1 Tim. 4:​12, 15) E progreso akí ku Pablo a menshoná tabatin di haber ku e kualidatnan spiritual di Timoteo i no ku un sierto puesto di outoridat. Esaki ta e tipo di progreso ku tur kristian lo ke pa hende mira den nan.

7. Kiko mester ta bisto di tur hende den kongregashon?

⁷ Awe tambe, meskos ku den tempu di Timoteo, tin vários puesto di responsabilidat den kongregashon. Tin ruman ta sirbi komo ansiano òf sirbidó ministerial. Algun ta sirbi komo pionero. Otronan tin asignashon den e trabou biahero, den sirbishi di Bètel òf komo misionero. Ansianonan ta partisipá den vários programa pa duna siñansa, manera na asamblea i kongreso. Sinembargo, tur kristian—hòmber, muhé i mucha—tin e potensial pa laga hende mira nan progreso spiritual. (Mat. 5:16) De echo, meskos ku den e kaso di Timoteo, asta kristiannan ku tin puesto di responsabilidat spesial tin ku laga tur hende mira nan kualidatnan spiritual.

Sea un Ehèmpel den Palabra

8. Ki efekto loke nos ta papia tin riba nos adorashon?

⁸ Un di e aspektonan den kua Timoteo mester tabata un ehèmpel tabata den palabra. Kon nos por laga hende mira nos progreso riba e tereno ei? Loke nos ta papia ta revelá ki klase di hende nos ta. Hesus a bisa korektamente: “For di abundansia di kurason boka ta papia.” (Mat. 12:34) Santiago, mitar ruman di Hesus, tambe a rekonosé ku loke nos ta papia por tin un efekto riba nos adorashon. El a skirbi: “Si un hende ta kere ku e ta religioso i tòg no ta frena su lenga, ma ta gaña su mes kurason, e hende akí su religion ta sin balor.”​—Sant. 1:26.

9. Den ki maneranan e loke nos ta papia mester ta un ehèmpel pa otronan?

⁹ Loke nos ta papia por laga e rumannan den kongregashon mira te na ki grado nos a hasi progreso spiritual. P’esei, en bes di papia kosnan inapropiá, negativo, krítiko òf ofensivo, kristiannan maduro ta hasi esfuerso pa laga nan palabranan edifiká, konsolá i animá otro hende. (Pro. 12:18; Efe. 4:29; 1 Tim. 6:​3-5, 20) Ademas, nos ta revelá nos deboshon na Dios ora nos ta kla pa sali na defensa di e normanan moral haltu di Dios i papia tokante nos deseo pa biba na armonia ku nan. (Rom. 1:​15, 16) Personanan di bon kurason sigur lo tuma nota di e manera ku nos ta usa nos don di papia i lo por sigui nos ehèmpel.​—Fil. 4:​8, 9.

Sea un Bon Ehèmpel den Kondukta i Puresa

10. Ki klase di fe ta masha importante pa nos progreso spiritual?

¹⁰ Pa un kristian ta un bon ehèmpel, e mester hasi mas ku papia kosnan edifikante so. Si  un hende ta papia loke ta korekto ma no ta hasi loke ta korekto, e ta un hipókrita. Pablo tabata bon na haltura di e hipokresia di e fariseonan i di e daño ku nan a kousa ku nan komportashon. Mas ku un biaha el a spièrta Timoteo pa tene kuidou ku tal fingimentu i aktitut insinsero. (1 Tim. 1:5; 4:​1, 2) Ma Timoteo sí no tabata un hipókrita. Pablo a skirbi den su di dos karta na Timoteo: ‘Mi ta trese na memoria e fe sinsero ku ta den bo.’ (2 Tim. 1:5) Pero tòg, Timoteo mester a laga otro hende mira su sinseridat komo kristian. E mester tabata un ehèmpel den kondukta.

11. Kiko Pablo a skirbi Timoteo relashoná ku rikesa?

¹¹ Pablo a duna konseho franko riba vários aspekto di kondukta den su dos kartanan na Timoteo. Por ehèmpel, Timoteo mester a evitá di kore tras di rikesa. Pablo a skirbi: “Amor pa plaka ta rais di tur sorto di maldat, i algun hende, dor di deseá esaki, a desviá for di e fe, i a traspasá nan mes ku hopi doló.” (1 Tim. 6:10) Amor pa rikesa ta un señal di debilidat spiritual. Na kontraste ku esei, kristiannan ku ta keda kontentu ku un bida simpel—“ku kuminda i paña pa bisti”—ta laga hende mira nan progreso spiritual.​—1 Tim. 6:​6-8; Fil. 4:​11, 12; Sal. 121:​1, 2.

12. Kon nos progreso por ta bisto den nos bida personal?

¹² Pablo a bisa Timoteo ku ta masha importante pa hende muhé kristian “dòrna nan mes ku bistí apropiá, desente i moderá.” (1 Tim. 2:9) Hende muhé ku ta desente i moderá tantu den nan manera di bisti i di peña komo den otro aspektonan di nan bida ta pone un bon ehèmpel. (1 Tim. 3:11) E prinsipio akí ta apliká na hende hòmber kristian tambe. Pablo a konsehá superintendentenan pa nan ta “moderá, prudente, respetabel.” (1 Tim. 3:2) Ora nos ta desplegá e kualidatnan akí den nos aktividatnan di tur dia, nos progreso lo ta bisto pa tur hende.

13. Kon nos por ta un ehèmpel den puresa meskos ku Timoteo?

 ¹³ Timoteo mester tabata ehemplar tambe den puresa. Usando e palabra “puresa,” Pablo a referí na un aspekto spesífiko di kondukta, esta, moralidat seksual. Foral ora di trata ku hende muhé, Timoteo su kondukta mester tabata ireprochabel. E mester a trata “muhénan mas bieu manera mama, e muhénan mas hóben manera ruman muhé, den tur puresa.” (1 Tim. 4:12; 5:2) Dios ta na haltura asta di aktonan di inmoralidat ku podisé ta parse sekreto, i ku tempu siguramente otro hende tambe lo haña sa di nan. Pero un kos tambe ta sigur: e bon obranan di un kristian no por keda skondí. (1 Tim. 5:​24, 25) Tur miembro di kongregashon tin e oportunidat di laga hende mira nan progreso den kondukta i puresa.

Amor i Fe Ta Esensial

14. Kon e Skritura ta enfatisá ku nos mester tin amor entre nos?

¹⁴ Un rasgo prinsipal di kristianismo berdadero ta amor. Hesus a bisa su disipelnan: “Na esaki tur hende lo sa ku boso ta mi disipel, si boso tin amor un pa otro.” (Juan 13:35) Kon nos ta manifestá tal amor? E Palabra di Dios ta supliká nos pa ‘soportá otro den amor,’ pa ta “kariñoso ku otro, miserikòrdioso, pordonando otro” i tambe pa ta hospitalario. (Efe. 4:​2, 32; Heb. 13:​1, 2) Apòstel Pablo a skirbi: “Stima otro ku amor fraternal.”​—Rom. 12:10.

15. Pakiko amor ta un kualidat importante pa tur hende, foral pa superintendentenan kristian?

¹⁵ Si Timoteo lo a trata su rumannan kristian na un manera brutu i sin bondat, esei lo a daña tur e bon ku el a logra komo maestro i superintendente. (Lesa 1 Korintionan 13:​1-3.) Di otro banda, Timoteo su ekspreshonnan di kariño sinsero pa su rumannan, kompañá pa aktonan di hospitalidat i bon obra na nan fabor, siguramente a laga su progreso spiritual resaltá. Pues, tabata na su lugá anto ku ora apòstel Pablo a skirbi Timoteo, el a menshoná spesífikamente ku amor ta un di e kualidatnan ku Timoteo mester tabata ehemplar den dje.

16. Dikon Timoteo mester a demostrá ku e tabatin un fe fuerte?

¹⁶ Timoteo su fe a ser poné na prueba durante su estadia na Efeso. Tabatin hende ta promové doktrinanan ku no tabata na armonia ku bèrdat kristian. Otronan tabata plama kuenta falsu òf “fábulanan,” òf tabata investigá asuntunan ku no a kontribuí ku nada na e spiritualidat di e kongregashon. (Lesa 1 Timoteo 1:3 i 4.) Pablo a deskribí personanan asina komo hende ‘orguyoso ku no ta komprondé nada; ma ku tin un opseshon enkuanto preguntanan kontroversial i pleitamentu tokante palabra.’ (1 Tim. 6:​3, 4) Akaso Timoteo por a sikiera riska konsiderá e ideanan perhudisial ku tabata infiltrá den e kongregashon? Nò! Pasobra Pablo a urgi Timoteo pa “lucha e bon lucha di fe” i pa alehá for di “papiamentu profano i bano, i e argumentonan kontradiktorio ku ta bini di loke falsamente ta wòrdu yamá ‘konosementu.’” (1 Tim. 6:​12, 20, 21) No tin duda ku Timoteo a sigui e konseho sabí di Pablo.​—1 Kor. 10:12.

17. Kon nos fe por ser poné na prueba awe?

¹⁷ Ta bon pa nota ku Pablo a bisa Timoteo ku den “periodo di tempu despues algun lo kai for di e fe, prestando atenshon na ekspreshonnan inspirá engañoso i siñansanan di demoño.” (1 Tim. 4:1) Tur hende den kongregashon, inkluso esnan den puesto di responsabilidat, mester ta manera Timoteo i demostrá fe fuerte i firme. Ora nos tuma un posishon fuerte i rechasá apostasia mesora i  na un manera desididu, nos progreso lo ta bisto i nos lo ta un ehèmpel den fe.

Hasi Esfuerso pa Tur Hende Mira Bo Progreso

18, 19. (a) Kon bo por laga tur hende mira bo progreso? (b) Kiko nos lo konsiderá den e siguiente artíkulo?

¹⁸ Ta bisto anto ku e progreso spiritual di un kristian berdadero no tin di haber ku su aparensia personal, abilidatnan natural ni prominensia. Tampoko e no ta nesesariamente mará na e kantidat di aña di sirbishi ku e tin den kongregashon. Mas bien, berdadero progreso spiritual ta bisto na e echo ku nos ta obedesé Yehova den pensamentu, palabra i kondukta. (Rom. 16:19) Nos mester kumpli ku e mandamentu pa stima otro i kultivá fe fuerte. Pues, laga nos meditá riba e palabranan ku Pablo a skirbi Timoteo i laga nos ta intensamente okupá ku nan pa asina nos progreso por ta bisto pa tur hende.

¹⁹ Un otro kualidat ku ta bisto den nos progreso spiritual i madures kristian ta goso, lokual ta parti di e fruta di Dios su spiritu santu. (Gal. 5:​22, 23) E siguiente artíkulo lo trata kon nos por kultivá goso i manten’é durante tempu difísil.

Kon Lo Bo Kontestá?

• Kiko loke nos ta papia ta revelá tokante nos?

• Kon nos progreso por ta bisto den nos kondukta i puresa?

• Dikon kristiannan mester ta un bon ehèmpel den amor i fe?

[Preguntanan di Estudio]

[Plachi na página 11]

E hóben Timoteo a demostrá ku e tabata hopi madurá pa su edat

[Plachi na página 13]

Bo progreso ta bisto pa tur hende?