Mantené Bo Goso den Tempu Difísil

“Laga tur esnan ku ta tuma refugio den [Yehova] alegrá nan mes; laga nan kanta di alegria pa semper.”​—SAL. 5:11.

1, 2. (a) Kiko ta algun kos ku ta kousa hopi angustia awe? (b) Fuera di e kalamidatnan ku tur hende ta konfrontá, kiko kristiannan berdadero mester soportá?

TESTIGUNAN DI YEHOVA no ta skapa di e kalamidatnan ku ta afektá hende en general. Hopi sirbidó di Dios a yega di ta víktima di krímen, di guera i di otro inhustisia. Desasternan natural, pobresa, malesa i morto ta kousa hopi angustia. Ku rason apòstel Pablo a skirbi: “Nos sa ku henter e kreashon ta keha i ta sufri e dolónan di parto huntu, te awor.” (Rom. 8:22) Nos ta sinti tambe e konsekuensianan di nos imperfekshon. Meskos ku Rei David di pasado, kisas nos ta bisa: “Mi inikidatnan a pasa riba mi kabes; manera un karga pisá nan ta pisa muchu pa mi.”​—Sal. 38:4.

² Fuera di e kalamidatnan ku tur hende ta konfrontá, kristiannan berdadero ta karga tambe e staka di tormento figurativo. (Luk. 14:27, NW) Sí, hende ta odia i persiguí e disipelnan di Hesus meskos ku nan a hasi kuné. (Mat. 10:​22, 23; Juan 15:20; 16:2) Pues, pa sigui Kristu nos mester hasi esfuerso vigoroso i perseverá segun ku nos ta warda riba e bendishonnan di e mundu nobo.​—Mat. 7:​13, 14; Luk. 13:24.

3. Kon nos por sa ku kristiannan no tin nodi di hiba un bida di sufrimentu pa nan por agradá Dios?

³ Esei ke men ku kristiannan berdadero no por tin goso i felisidat den bida? Ta un bida di pena i tristesa so a keda nos te ora e fin yega? Ta bisto ku Yehova ke pa nos ta felis segun ku nos ta warda pa su promesanan kumpli.  Bes tras bes, Beibel ta deskribí berdadero sirbidónan di Dios komo hende felis. (Lesa Isaias 65:13 i 14.) Salmo 5:11 ta bisa: “Laga tur esnan ku ta tuma refugio den [Yehova] alegrá nan mes; laga nan kanta di alegria pa semper.” Sí, nos por tin gran goso, pas mental i satisfakshon asta ora nos ta pasando den kalamidat. Laga nos analisá kon Beibel por yuda nos wanta nos pruebanan i tòg keda ku goso.

Yehova Ta “e Dios Felis”

4. Kon Dios ta sintié ora su kreashon no ta hasi kaso di su boluntat?

⁴ Tuma por ehèmpel Yehova mes. Komo Dios Todopoderoso, henter e universo ta bou di su outoridat. Yehova no tin falta di nada ni e no tin mester di ningun persona. Pero, apesar di su poder inigualabel, lo e mester a sintié un poko desepshoná ora un di su yunan spiritual a rebeldiá i bira Satanas. Mas despues Dios lo mester a sintié tristu ora ku algun otro angel a djòin e rebelion. Pensa tambe riba e doló ku Dios a sinti ora Adam ku Eva, e obranan maestro di su kreashon físiko, a bira lomba p’e. Despues di esei, míles di miónes di nan desendientenan a rechasá Yehova su outoridat.​—Rom. 3:23.

5. Kiko spesialmente a hasi Yehova tristu?

⁵ E rebelion ku Satanas a kuminsá kuné ta sigui te ainda. Yehova tin mas o ménos 6.000 aña kaba ta mira aktonan di idolatria, di violensia, di matamentu i di inmoralidat seksual. (Gén. 6:​5, 6, 11, 12) Ademas, Yehova a tende tur tipo di mentira malisioso i blasfemia. Asta tabatin okashon ku Dios su propio adoradónan a kous’é doló. Beibel ta deskribí un di e kasonan ei ku e palabranan: “Kuantu biaha nan a bira rebelde kontra dje den e tera seku, i a hasié tristu den desierto! Bes tras bes nan a tenta Dios, i a provoká Esun Santu di Israel.” (Sal. 78:​40, 41) Yehova definitivamente ta sinti un gran doló ora hende rechas’é. (Jer. 3:​1-10) Pues, ta bisto ku kosnan malu ta tuma lugá i ku Yehova ta sintié hopi tristu ora e kosnan ei pasa.​—Lesa Isaias 63:9 i 10.

6. Kon Yehova ta trata ku situashonnan ku ta hasié tristu?

⁶ Sinembargo, Yehova no ta stòp di aktua pasobra e ta sintié tristu òf desepshoná. Ora a surgi difikultat, Yehova semper a dal paso mesora pa limitá e mal konsekuensianan. Tambe el a tuma medida di largu plaso pa asina tòg na final kumpli ku su propósito. En  bista di e pasonan positivo akí ku Yehova a tuma, e ta spera ku goso riba e tempu ora ku su soberania lo keda vindiká i riba e bendishonnan ku su sirbidónan fiel lo risibí komo resultado di esei. (Sal. 104:31) Sí, apesar di tur e reproche ku tin riba Yehova, e ta keda “e Dios felis.”​—1 Tim. 1:11, NW; Sal. 16:11.

7, 8. Ora kos bai malu, kon nos por imitá Yehova?

⁷ Ta bèrdat ku nos no por kompará nos mes ku Yehova pa loke ta nos kapasidat di solushoná problema. Pero sí nos por imit’é ora nos ta haña nos ku difikultat. Ta normal ku nos ta sinti nos un poko tristu ora kosnan bai malu, pero nos no tin nodi di keda tristu. Komo ku Yehova a krea nos den su imágen, nos tin nos kapasidat mental i sabiduria práktiko, i esakinan ta permití nos analisá nos problemanan i dal pasonan positivo ora ta posibel.

⁸ Un faktor importante ku por yuda nos trata ku e problemanan di bida ku éksito ta di rekonosé ku sierto kosnan simplemente ta fuera di nos kontròl. Si nos ta tormentá nos alma ku kosnan asina, esei por hiba na mas frustrashon i por kita e goso ku nos por saka for di vários rasgo di adorashon berdadero. Despues ku nos a tuma medidanan rasonabel pa solushoná un problema, e mihó kos ta pa laga e asuntu para i konsentrá riba aktividatnan mas produktivo. E siguiente relatonan di Beibel ta ilustrá e punto akí hopi bon.

Ta Masha Importante pa Nos Ta Rasonabel

9. Kon Ana a demostrá ku e ta rasonabel?

⁹ Laga nos konsiderá e ehèmpel di Ana, kende despues a bira mama di profeta Samuel. E tabata hopi kibrá pasobra e no por a haña yu. E otro esposa di Elkana (Erratum: Samuel) a tent’é i hasi bofon di dje pasobra e tabata steril. Tabatin biaha ku Ana tabata asina desanimá ku e tabata yora i keda sin kome. (1 Sam. 1:​2-7) Un di e biahanan ku el a bishitá e tèmpel di Yehova, “Ana, ku amargura di alma, a hasi orashon na SEÑOR i a yora mashá.” (1 Sam. 1:10) Despues ku Ana a deshogá su kurason serka Yehova, sumo saserdote Elí a bini serka dje i a bis’é: “Bai na pas; i ku e Dios di Israel duna bo bo petishon ku bo a hasi na dje.” (1 Sam. 1:17) Na e momento ei, Ana siguramente a realisá ku el a hasi tur loke e tabata por. Su infertilidat tabata fuera di su kontròl. Ana a demostrá ku e ta rasonabel i “a kohe su kaminda bai i a kome, i su kara no tabata tristu mas.”​—1 Sam. 1:18.

10. Ki aktitut realístiko Pablo a demostrá ora el a konfrontá un problema ku e no por a solushoná?

¹⁰ Apòstel Pablo a demostrá un aktitut similar ora el a konfrontá un problema. E tabatin un problema físiko òf mental ku tabata kous’é hopi angustia. El a asta yam’é “un sumpiña den karni.” (2 Kor. 12:7) Sea loke sea e problema ei tabata, Pablo a hasi loke e tabata por pa elimin’é i a pidi Yehova dun’é alivio. Kuantu biaha Pablo a supliká Yehova tokante e asuntu? Tres biaha. Despues di e di tres biaha, Dios a revelá na Pablo ku lo e no hasi un milager i kita e “sumpiña den karni.” Pablo a aseptá e echo akí i a bai konsentrá riba sirbi Yehova plenamente.​—Lesa 2 Korintionan 12:​8-10.

11. Kon orashon i súplika por yuda nos trata ku kalamidat?

¹¹ Ku e ehèmpelnan akí nos no ke bisa ku nos mester stòp di papia ku Yehova tokante asuntunan ku ta angustiá nos. (Sal. 86:7) Al kontrario, e Palabra di Dios ta supliká nos: “No preokupá pa nada; ma den tur kos, pa medio di orashon i súplika ku gradisimentu, laga boso petishonnan ta konosí dilanti di Dios.” Kon Yehova lo reakshoná riba tal súplika i petishon? Beibel ta sigui bisa: “I e pas di Dios, ku ta surpasá tur komprondementu, lo warda boso kurason i boso mente den Kristu Hesus.” (Fil. 4:​6, 7) Sí, Yehova podisé no ta eliminá nos problema, ma komo reakshon riba nos orashonnan, e por warda òf protehá nos mente. Despues ku nos hasi orashon riba  un asuntu, nos mente lo ta mas trankil, i nos lo por mira mas kla kon peligroso ta pa laga preokupashon dominá nos.

Haña Goso den Hasi e Boluntat di Dios

12. Dikon un periodo largu di desanimashon por ta perhudisial?

¹² Proverbionan 24:10 ta rekonosé: “Si bo desmayá den e dia di angustia, bo forsa ta keda limitá.” Un otro proverbio ta bisa: “Ora ku e kurason ta tristu, e spiritu ta kibrá.” (Pro. 15:13) Tin algun kristian a bira asina desanimá te ku nan a stòp di lesa Beibel i di meditá riba e Palabra di Dios. Nan orashonnan a bira superfisial i mekániko, i kisas nan ta isolá nan mes for di nan rumannan den fe. Ta bisto ku si un hende ta abatí i tristu pa hopi tempu, esei por perhudik’é.​—Pro. 18:​1, 14.

13. Menshoná algun aktividat ku por yuda kore ku desanimashon i duna nos un grado di goso.

¹³ Di otro banda, un aktitut positivo lo yuda nos enfoká riba aspektonan di nos bida for di kua nos por saka delisia i goso. David a skirbi: “Pa hasi bo boluntat, o mi Dios, ta un delisia pa mi.” (Sal. 40:8) Ora kos ta bai malu den nos bida, e último kos ku nos mester hasi ta di stòp ku nos bon rutina di adorashon. De echo, un bon remedi pa tristesa ta di partisipá den aktividatnan ku por hasi nos felis. Yehova ta bisa nos ku nos por haña goso i felisidat ora nos ta lesa su Palabra i meditá riba dje ku regularidat. (Sal. 1:​1, 2; Sant. 1:25) Tantu for di e Santu Skritura komo for di e reunionnan kristian, nos ta haña “palabranan agradabel” ku por animá nos i hasi nos kurason kontentu.​—Pro. 12:25; 16:24.

14. Ki siguransa di Yehova ta hasi nos kontentu for di awor?

¹⁴ Dios ta duna nos hopi motibu pa ta kontentu. Por ehèmpel, su promesa di salbashon ta un di e kosnan prinsipal ku por hasi nos felis. (Sal. 13:5) Nos sa ku sin importá kiko ta pasando ku nos aworakí, na final di kuenta Dios lo rekompensá esnan ku ta busk’é ku un kurason sinsero. (Lesa Eklesiastés 8:12.) Profeta Habakuk a ekspresá e konvikshon ei masha bunita mes ora el a skirbi: “Maske e palu di figu no floria, i e matanan di wendrùif no  karga fruta, maske e kosecha di e palu di oleifi faya, i e kunukunan no produsí kuminda, maske e tou wòrdu kòrtá kitá for di e kurá, i no tin baka den e stalnan, tòg lo mi alegrá den SEÑOR, lo mi regosihá den e Dios di mi salbashon.”​—Hab. 3:​17, 18.

“Felis Ta e Pueblo Kende Su Dios Ta Yehova!”

15, 16. Menshoná algun regalo di Dios ku nos por disfrutá di dje segun ku nos ta warda riba e bendishonnan di futuro.

¹⁵ E boluntat di Yehova ta pa segun ku nos ta warda riba e futuro maravioso ku e tin prepará pa nos, nos disfrutá di e kosnan bon ku e ta duna nos. Beibel ta bisa: “Mi sa ku no tin nada mihó pa hende, ku regosihá i hasi bon den su bida, i tambe ku tur hende por kome i bebe i mira e bon ku tin den tur su trabou—esaki ta e regalo di Dios.” (Ekl. 3:​12, 13) “Hasi bon” ta enserá hasi bon obra na fabor di otro hende. Hesus a bisa ku tin mas felisidat den duna ku tin den risibí. E obranan di bondat ku nos ta hasi pa ku nos kasá, nos yunan, nos mayornan i otro miembronan di famia ta duna nos un gran satisfakshon. (Pro. 3:27) Un otro kos ku tambe ta resultá den hopi goso i ta agradá Yehova ta ora nos ta kariñoso i hospitalario ku nos rumannan spiritual i ta kla pa pordoná nan. (Gal. 6:10; Kol. 3:​12-14; 1 Ped. 4:​8, 9) Ademas, nos ta sinti un berdadero satisfakshon ora nos ta kumpli ku nos sirbishi ku un spiritu di sakrifisio propio.

¹⁶ E palabranan di Eklesiastés sitá ariba ta menshoná algun plaser simpel den bida, manera kome i bebe. Sí, asta ora nos ta pasa den prueba, nos por haña goso den kualke regalo material ku nos risibí for di Yehova. Ademas, un bahada di solo espektakular, un paisahe impreshonante, e kenshinan ku yu di bestia ta hasi i otro maravianan di naturalesa no ta kosta nada, i tòg nan por yena nos ku atmirashon i goso. Segun ku nos ta reflekshoná riba kosnan asina, nos amor pa Yehova ta krese, pasobra e ta Esun ku ta duna tur kos bon.

17. Kiko lo duna nos alivio kompletu for di problema, i kiko ta duna nos konsuelo turesten?

¹⁷ Na final di kuenta, nos amor pa Dios, nos obedensia na su mandamentunan i nos fe den e sakrifisio di reskate lo tin komo resultado ku nos ta haña alivio kompletu for di e problemanan ku nos bida imperfekto ta trese kuné i lo duna nos goso eterno. (1 Juan 5:3) Pero turesten, nos konsuelo ta ku Yehova ta bon konsiente di tur e kosnan ku ta pone nos sufri. David a skirbi: “Lo mi regosihá i keda kontentu den bo miserikòrdia, pasobra bo a mira mi aflikshon; bo tabata sa di e angustianan di mi alma.” (Sal. 31:7) E amor ku Yehova tin pa nos lo motiv’é pa reskatá nos for di kalamidat.​—Sal. 34:19.

18. Dikon goso mester predominá den e pueblo di Dios?

¹⁸ Segun ku nos ta warda riba kumplimentu di e promesanan di Yehova, e Dios felis, laga nos imit’é. No laga sintimentunan negativo stroba nos di sigui den nos sirbishi. Ora surgi problema, laga nos kapasidat di pensa i sabiduria práktiko guia nos. Yehova lo yuda nos kontrolá nos emoshonnan i dal e pasonan ku lo por limitá e mal efektonan di susesonan desastroso. Laga nos haña goso den e bon kosnan ku ta bini di Yehova, tantu kosnan material komo spiritual. Si nos pega na e banda di Dios, nos lo por alegrá pasobra “felis ta e pueblo kende su Dios ta Yehova!”​—Sal. 144:15, NW.

Kiko Bo A Siña?

• Kon nos por imitá Yehova ora nos haña nos ku problema?

• Kon un aktitut rasonabel por yuda nos trata ku problema?

• Kon nos por haña delisia den hasi e boluntat di Dios den tempu di angustia?

[Preguntanan di Estudio]

[Plachi na página 16]

E kosnan malu ku ta pasando ta hasi Yehova hopi tristu

[Rekonosementu]

© G.M.B. Akash/Panos Pictures

[Plachi na página 18]

Yehova a duna nos loke nos mester pa nos mantené nos goso