“Te Ki Tempu . . . Lo Mi Sklama pa Yudansa?”

Ku awa na wowo, Jayne a bisa: “Mi no ke sufri mas!” E tabatin kanser, i esaki tabata plamando den henter su kurpa. Su famia- i amigunan tabatin masha deseo di por a kita su malesa i alivi’é di su agonia. Nan a resa pidi Dios yud’é. Dios a skucha nan orashon? E tabata interesá den Jayne?

DIOS ta konsiente di loke hende ta pasa aden, pasobra su Palabra ta bisa: ‘Henter e kreashon ta keha i ta sufri e dolónan huntu.’ (Romanonan 8:22) Tur dia, miónes i miónes di hende ta sufri meskos ku Jayne; i Dios sa esei. Nan tin doló sea físiko, emoshonal òf mental. Ademas, Dios ta mira e 800 mion hendenan ku ta bai drumi ku hamber tur anochi, e miónes di otronan ku ta víktima di violensia doméstiko i e gran kantidat di mayornan ku ta preokupá tokante e futuro i bienestar di nan yunan. Bo a yega di puntra bo mes si Dios lo hasi algu pa solushoná e problemanan akí? Si nos mes ku ta hende ke yuda nos sernan kerí, no ta lógiko ku Dios lo ke yuda e famia humano ku é a krea?

Si abo a yega di meditá riba preguntanan similar, bo no ta e úniko. Mas ku 2.600 aña pasá, Habakuk, un hòmber fiel ku tabata sinti meskos ku hopi hende awe, a puntra Dios: “Te ki tempu, o SEÑOR, lo mi sklama pa yudansa, i abo no ta tende? Mi ta sklama na bo: ‘Violensia!’ Tòg bo no ta salba. Pakiko bo ta hasi mi mira inikidat, i ta hasi mi mira maldat? Sí, destrukshon i violensia ta mi dilanti; tin desunion i pleitu.” (Habakuk 1:​2, 3) Habakuk, e profeta hebreo, tabata testigu di aktonan spantoso di violensia i agreshon sin sentido ku tabata tuma lugá den su tempu. Awe, e tipo di aktonan ei ta notisia di tur dia i ta disgustá hende kompasivo.

Dios a tuma Habakuk su preokupashon na serio? Sí. El a skucha Habakuk su preguntanan sinsero i despues a konsolá i animá e hòmber afligí akí. Yehova Dios a primintí Habakuk ku lo E bai kaba ku sufrimentu, i esaki a fortifiká Habakuk su fe. Dios su mensahe di speransa por ta un animashon pa nos tambe, meskos ku e tabata pa Jayne i su famia. E siguiente artíkulonan lo kontestá e preguntanan akí: Kon nos por ta sigur ku Dios ta realmente interesá den nos? Kiko Dios lo hasi pa kaba ku sufrimentu, i na ki tempu lo e hasié?