Demostrá Ku Bo Ta un Berdadero Siguidó di Kristu

“Tur bon palu ta duna bon fruta; ma e palu malu ta duna mal fruta.”​—MAT. 7:17.

1, 2. Kon bo por distinguí berdadero siguidónan di Kristu for di esnan falsu, spesialmente den e tempu di fin akí?

HESUS a bisa ku bo por distinguí kristiannan berdadero for di esnan falsu na nan frutanan, esta, nan siñansanan i nan kondukta. (Mat. 7:​15-17, 20) Esei ta asina pasobra loke hende ta alimentá nan mente i kurason kuné tin influensia riba nan sigur. (Mat. 15:​18, 19) Pues, hende ku ta ser alimentá ku falsedat ta produsí “mal fruta” i esnan ku ta siña e bèrdat spiritual ta produsí “bon fruta.”

² Den e tempu di fin akí, ta fásil pa distinguí e dos tipo di frutanan ei for di otro. (Lesa Daniel 12:​3 i 10.) Kristiannan falsu tin un punto di bista trosí di Dios, i hopi bes nan ta aparentá di ta deboto na Dios. Di otro banda, kristiannan ku tin disernimentu spiritual ta adorá Dios “den spiritu i bèrdat.” (Juan 4:24; 2 Tim. 3:​1-5) Nan ta hasi esfuerso pa desplegá e kualidatnan ku Kristu a desplegá. Pero, kiko di kada un di nos? Segun ku bo ta konsiderá e siguiente sinku karakterístikanan ku ta identifiká kristiannan berdadero, puntra bo mes:  ‘Mi kondukta i loke mi ta siña otro hende ta na armonia ku e Palabra di Dios? Nan ta hasi e bèrdat atraktivo pa personanan ku ta busk’é?’

Biba na Armonia ku e Palabra di Dios

3. Kiko ta hasi Yehova kontentu, i kiko esaki ta enserá pa kristiannan berdadero?

³ Hesus a bisa: “No ta tur hende ku bisa mi: ‘Señor, Señor,’ lo drenta e reino di shelu; ma esun ku hasi e boluntat di mi Tata ku ta den shelu.” (Mat. 7:21) Sí, no ta ora nos bisa ku nos ta kristian nos ta hasi Yehova kontentu sino ora nos ta hasi loke un kristian tin ku hasi. Pa berdadero siguidónan di Kristu, ser un kristian ta enbolbé henter nan estilo di bida, inkluso nan aktitut pa ku plaka, trabou, entretenimentu, kustumber- i selebrashonnan mundano, matrimonio i otro relashonnan ku nan próhimo. Pero, kristiannan falsu ta adoptá e manera di pensa i di hasi kosnan di e mundu ku durante e último dianan akí ta birando mas i mas malbado.​—Sal. 92:7.

4, 5. Kon nos por apliká Yehova su palabranan na Malakias 3:18 den nos bida?

⁴ Relashoná ku e tópiko akí, profeta Malakias a skirbi: “Asina boso lo distinguí atrobe entre e hustu i e malbado, entre un ku ta sirbi Dios i un ku no ta sirbié.” (Mal. 3:18) Ora bo ta meditá riba e palabranan akí, puntra bo mes: ‘Mi ta meskos ku hende di mundu, òf mi ta diferente? Semper mi ta hasi esfuerso pa adaptá mi na mi kompañeronan na skol òf koleganan na trabou, pa nan aseptá mi? Òf mi ta para firme tras di prinsipionan bíbliko i asta defendé e bèrdat ora ta apropiá?’ (Lesa 1 Pedro 3:16.) Naturalmente, nos no ke aparentá di ta hustu den nos mes bista. Pero nos mester ta diferente for di hende ku no ta stima ni sirbi Yehova.

⁵ Si bo ta mira kaminda pa mehorá, hasi orashon tokante e asuntu i buska fortalesa spiritual mediante estudio di Beibel, orashon i asistensia na reunionnan riba un base regular. Mas bo apliká e Palabra di Dios, mas “bon fruta” lo bo produsí, inkluso “e fruta di lepnan ku ta duna gradisimentu na [Dios] su nòmber.”​—Heb. 13:15.

Prediká e Reino di Dios

6, 7. Relashoná ku e mensahe di Reino, kiko ta kontraste entre kristiannan berdadero i esnan falsu?

⁶ Hesus a bisa: “Mi mester prediká e reino di Dios na e otro statnan tambe, pasobra ta pa e propósito akí mi a wòrdu mandá.” (Luk. 4:43) Dikon Hesus a hasi e Reino di Dios e tema prinsipal di su ministerio? Pasobra e tabata sa ku é komo Rei di e Reino ei, huntu ku su rumannan ungí ku spiritu santu i ku lo haña resurekshon, lo eliminá e kousanan di sufrimentu humano, esta, piká i Diabel. (Rom. 5:12; Rev. 20:10) P’esei, el a manda su siguidónan proklamá e Reino te na fin di e sistema aktual di kosnan. (Mat. 24:14) Hende ku ta pretendé ku nan ta siguidó di Kristu no ta partisipá den e trabou akí. De echo, nan no por hasié tampoko. Dikon nò? Tin por lo ménos tres motibu: Di promé, nan no por prediká  tokante algu ku nan mes no sa kiko e ta. Di dos, mayoria di nan no tin e humildat ni e kurashi nesesario pa enfrentá mofa i oposishon ku nan por haña nan kuné ora di kompartí e mensahe di Reino ku nan próhimo. (Mat. 24:9; 1 Ped. 2:23) I di tres, kristiannan falsu no tin e spiritu di Dios.​—Juan 14:​16, 17.

⁷ Di otro banda, berdadero siguidónan di Kristu sí sa kiko e Reino di Dios ta i kiko lo e logra. Es mas, nan ta pone interesnan di Reino na promé lugá den nan bida, i rònt mundu nan ta prediká e Reino ku yudansa di e spiritu di Yehova. (Zak. 4:6) Bo ta partisipá regularmente den e trabou akí? Bo ta hasi esfuerso pa partisipá mas tantu den sirbishi òf pa ta mas efikas? Si ta asina, lo bo bira un mihó proklamadó di Reino. Algun ruman ta hasi esfuerso pa mehorá e kalidat di nan sirbishi hasiendo mihó uso di Beibel. Apòstel Pablo, kende tabatin e kustumber di rasoná for di e Skritura, a skirbi: “E palabra di Dios ta bibu i aktivo.”​—Heb. 4:12; Echo. 17:​2, 3.

8, 9. (a) Ki eksperensianan ta resaltá e balor di usa Beibel den nos ministerio? (b) Kon nos por bira mas ábil den uso di e Palabra di Dios?

⁸ Durante e trabou di kas pa kas, un ruman hòmber a lesa Daniel 2:44 pa un hòmber katóliko i a splik’é kon e Reino di Dios lo trese berdadero pas i siguridat. E hòmber su reakshon tabata: “Mi ta apresiá masha ku bo a habri Beibel i laga mi mira kiko e teksto ta bisa en bes di djis bisa mi.” Ora un ruman hòmber a lesa un teksto di Beibel pa un señora griego òrtodòks, e señora a hasi vários pregunta interesante. Den e kaso akí tambe, e ruman hòmber i su esposa a laga Beibel kontestá. Despues, e señora a bisa nan: “Boso sa dikon mi a papia ku boso? Pasobra boso a bini na mi porta ku Beibel i a lesa for di dje.”

⁹ Ta klaru ku nos literatura ta importante i ku nos mester ofresé nan den sirbishi. Sinembargo, nos hèrmènt prinsipal ta Beibel. Pues, si bo no tin kustumber di us’é regularmente den bo ministerio, pakiko no pone meta pa hasi esei? Podisé bo por skohe algun versíkulo klave ku ta splika kiko e Reino di Dios ta i kon lo e resolvé problemanan spesífiko ku ta preokupá hende den bo bisindario. I ora oportunidat presentá den e trabou di kas pa kas, lesa nan.

Karga e Nòmber di Dios ku Orguyo

10, 11. Relashoná ku e uso di e nòmber di Dios, ki kontraste tin entre Hesus i hopi hende ku ta pretendé di ta su siguidó?

¹⁰ Yehova a bisa su pueblo: “Boso ta mi testigunan . . . ‘I ami ta Dios.’” (Isa. 43:12) Pa Yehova su Testigu di mas importante, Hesukristu, tabata un onor pa karga e nòmber di Dios i hasié konosí na otronan. (Lesa Juan 17:6; Hebreonan 2:12.) De echo, ta pasobra Hesus a proklamá e nòmber di su Tata, Beibel a yam’é “e Testigu Fiel.”​—Rev. 1:5; Mat. 6:9.

¹¹ Kontrali na loke Hesus a hasi, hopi hende ku ta pretendé di representá Dios i su Yu a desplegá un aktitut bergonsoso pa ku e nòmber di Dios; nan a bai asina leu di sak’é for di nan vershonnan di Beibel. Resientemente, obispunan katóliko a haña un instrukshon ku ta reflehá un spiritu similar. Esaki a bisa “ku no mester usa ni pronunsiá e nòmber di Dios den forma di tetragrámaton YHWH” ora di adorá. * E manera di pensa ei ta hopi malu!

12. Kon e sirbidónan di Yehova a ser identifiká mas estrechamente ku Yehova na aña 1931?

¹² Imitando Hesukristu i e gran “nubia di testigu” ku tabat’ei promé kuné, kristiannan berdadero ta usa e nòmber di Dios ku orguyo. (Heb. 12:1) De echo, na aña 1931, Dios su sirbidónan a ser identifiká mas estrechamente ku Yehova ora nan a aseptá e nòmber Testigunan di Yehova. (Lesa Isaias 43:10a. *) Pues, den un sentido masha spesial, e berdadero siguidónan di Kristu a bira un pueblo “yamá na [Dios su] nòmber.”​—Echo. 15:​14, 17.

13. Kon nos por kumpli ku e nòmber ku Dios a duna nos?

 ¹³ Kon nos kada un por kumpli ku nos nòmber úniko? Na promé lugá, nos tin ku duna testimonio fielmente di Yehova. Pablo a skirbi: “Ken ku invoká e nòmber di SEÑOR lo ta salbá. Kon anto nan lo invoká esun, den kende nan no a kere? I kon nan lo kere den esun, di kende nan no a tende? I kon nan lo tende sin un predikadó? I kon nan lo prediká si nan no wòrdu mandá?” (Rom. 10:​13-15) Ademas, ku takto nos tin ku eksponé falsedatnan religioso ku ta kalumniá nos Kreador. Ún di nan ta e doktrina di fièrnu di kandela ku ta laga hende pensa ku e Dios di amor ta kruel manera Diabel.​—Jer. 7:31; 1 Juan 4:8; kompará ku Marko 9:​17-27.

14. Kon algun hende a reakshoná ora nan a haña sa e nòmber personal di Dios?

¹⁴ Bo ta sinti bo orguyoso di por karga e nòmber di bo Tata selestial? Bo ta yuda otro hende konosé e nòmber santu ei? Despues ku un señora na Paris, Fransia, a tende ku Testigunan di Yehova sa e nòmber di Dios, el a pidi e promé Testigu ku el a topa pa mustr’é e nòmber ei den su propio Beibel. Ora el a lesa Salmo 83:18, esaki tabatin un impakto profundo riba dje. El a kuminsá studia Beibel, i awor e ta un ruman muhé fiel ku ta sirbi den un otro pais. E promé bes ku un señora katóliko na Oustralia a mira e nòmber di Dios den Beibel, el a yora di alegria. Awor, e tin hopi aña ta sirbi komo pionero regular. Un poko tempu pasá, ora Testigunan na Jamaica a mustra un señora e nòmber di Dios den su propio Beibel, lágrima di alegria a basha for di su wowo. Pues, imitá Hesus i sea orguyoso ku bo por karga e nòmber di Dios i hasi e nòmber presioso akí konosí na tur hende.

“No Stima Mundu”

15, 16. Kon kristiannan berdadero ta mira e mundu, i ki pregunta nos mester hasi nos mes?

¹⁵ “No stima mundu, ni e kosnan ku tin den mundu. Si un hende ta stima mundu, e amor di e Tata no ta den dje.” (1 Juan 2:15) Mundu i su spiritu karnal ta na oposishon ku Yehova i su spiritu santu. P’esei, berdadero siguidónan di Kristu no ta djis evitá di ta parti di mundu. Nan ta nenga di stima mundu pasobra nan sa ku disipel Santiago a skirbi ku “amistat ku mundu ta enemistat pa ku Dios.”​—Sant. 4:4.

¹⁶ Den un mundu ku tin asina tantu tentashon por ta un desafio pa nos hasi kaso di e palabranan di Santiago. (2 Tim. 4:10) P’esei, Hesus a hasi orashon pa su siguidónan i a bisa: “Mi no ta pidi bo pa saka nan for di mundu, ma pa bo warda nan di e malbado. Nan no ta di mundu, meskos ku ami no ta di mundu.” (Juan 17:​15, 16) Awor puntra bo mes: ‘Mi ta hasi esfuerso pa mi no ta parti di mundu? Otro hende sa mi punto di bista tokante selebrashon- i kustumbernan no-bíbliko, asta esnan ku kisas no tin un orígen pagano pero ku klaramente ta reflehá e spiritu di mundu?’​—2 Kor. 6:17; 1 Ped. 4:​3, 4.

17. Kiko por motivá hende di kurason onrado pa tuma un posishon na banda di Yehova?

¹⁷ Un kos ta sigur, nos posishon basá riba Beibel lo no yuda nos haña aprobashon di mundu. Pero kisas e ta lanta kuriosidat di hende di kurason onrado. Sí, ora e personanan ei mira ku nos fe ta firmemente ankrá den e Skritura i ku e ta enbolbé henter nos estilo di bida, na moda di papia, nan por bisa e ungínan: “Laga nos bai ku boso, pasobra nos a tende ku Dios ta ku boso.”​—Zak. 8:23.

Demostrá Berdadero Amor Kristian

18. Kiko ta enserá stima Yehova i nos próhimo?

¹⁸ Hesus a bisa: “Stima SEÑOR bo Dios ku henter bo kurason, i ku henter bo alma, i ku henter bo mente.” I “stima bo próhimo manera bo mes.” (Mat. 22:​37, 39) E klase di amor ei (a·gá·pe na griego) ta un amor basá riba loke ta rekto, ku ta tene kuenta ku un persona su obligashonnan i ku ta aktua na armonia ku prinsipio- i normanan di kondukta aseptabel. Pero hopi bes, e ta enserá emoshonnan fuerte. P’esei, e por ta kaluroso i ferviente. (1 Ped. 1:22) E ta kompletamente kontrali di egoismo, pasobra  e ta ser desplegá den palabra- i echonan inegoista.​—Lesa 1 Korintionan 13:​4-7.

19, 20. Relatá algun eksperensia ku ta mustra ku amor kristian ta poderoso.

¹⁹ Debí ku amor ta un produkto di e spiritu santu di Dios, e ta yuda kristiannan berdadero hasi loke otro hende no por. Por ehèmpel, kristiannan berdadero por vense barera rasial, kultural i polítiko. (Lesa Juan 13:​34 i 35; Gal. 5:22) Ora hende semehante di karné mira kon kristiannan berdadero ta desplegá e klase di amor ei, esaki ta konmové nan kurason. Por ehèmpel, ora un yònkuman hudiu na Israel a asistí na un reunion kristian pa promé bes, el a keda asombrá di mira rumannan hudiu i arabir ta adorá Yehova huntu. Esei a pone ku el a kuminsá asistí regularmente na e reunionnan i a aseptá un estudio di Beibel. Abo tambe ta mustra amor sinsero na bo rumannan? I bo ta hasi esfuerso pa ekstendé un bonbiní kaluroso na hende interesá ku bishitá boso Salòn di Reino, sin importá nan nashonalidat, koló òf posishon sosial?

²⁰ Komo kristiannan berdadero, nos ta hasi esfuerso pa demostrá amor na tur hende. Un publikadó hóben na El Salvador tabata studia Beibel ku un señora katóliko di 87 aña di edat ku tabata masha pegá na su religion. Un dia, e señora a bira hopi malu i a bai hospital. Ora ku el a sali for di hospital, pa un luna largu, Testigunan a bishit’é i hiba kuminda p’e. Pero niun hende di su religion no a bishit’é. Kiko tabata e resultado? El a deshasí di su imágennan, bandoná su religion i a bolbe kuminsá ku su estudio di Beibel. Sí, amor kristian ta poderoso! Nos amor kristian tin mas chèns di konmové kurason di hende ku nos palabranan ora nos djis prediká.

21. Kiko nos tin ku hasi pa nos por tin un futuro sigur?

²¹ Pronto, Hesus lo bisa esnan ku ta pretendé di siguié: “Nunka mi no a konosé boso; bai for di mi, boso ku ta hasi inikidat.” (Mat. 7:23) P’esei, laga nos produsí fruta ku ta duna onor na e Tata i e Yu. Hesus a bisa: “Ken ku tende e palabranan akí di mi, i hasi nan, lo wòrdu kompará ku un hòmber sabí ku a traha su kas riba baranka.” (Mat. 7:24) Sí, si nos demostrá ku nos ta berdadero siguidónan di Kristu, nos lo haña Dios su aprobashon i nos lo tin un futuro sigur, komo si fuera fundá riba baranka!

[Nota]

Bo Ta Kòrda?

• Kon bo por distinguí berdadero siguidónan di Kristu for di esnan falsu?

• Menshoná algun “fruta” ku ta identifiká kristiannan berdadero.

• Ki metanan bo por pone pa produsí fruta kristian?

[Preguntanan di Estudio]

[Plachi na página 20]

Bo tin e kustumber di usa Beibel regularmente den bo ministerio?

[Plachi na página 23]

Otro hende sa bo punto di bista tokante selebrashonnan no-bíbliko?