E Privilegio di Pertenesé na Yehova Ta un Bondat Inmeresí

‘Ta na Yehova nos ta pertenesé.’​—ROM. 14:8, BPK.

1, 2. (a) Ki privilegio nos tin? (b) Ki preguntanan nos lo konsiderá?

YEHOVA a ofresé e nashon di Israel un privilegio presioso ora el a bisa nan: “Boso lo ta un tesoro pekuliar [“propiedat spesial,” NW] riba tur pueblo.” (Eks. 19:5) Awe, miembronan di e kongregashon kristian tambe tin e onor di pertenesé na Yehova. (1 Ped. 2:9; Rev. 7:​9, 14, 15) Esaki ta un privilegio ku por benefisiá nos pa semper.

² Pero, e no ta solamente un privilegio, e ta un responsabilidat tambe. Algun hende kisas ta puntra nan mes: ‘Lo mi por kumpli ku loke Yehova ta ferwagt di mi? Si un dia mi kai den piká, lo e rechasá mi? Si mi ta pertenesé na Yehova, lo mi pèrdè mi libertat?’ Ta bale la pena pa nos konsiderá e preguntanan ei. Pero promé ku esei, tin un otro pregunta ku meresé nos atenshon: Kiko ta e benefisionan ku nos ta saka ora nos ta pertenesé na Yehova?

E Privilegio di Pertenesé na Yehova Ta Hiba na Felisidat

3. Kon Rahab su desishon pa sirbi Yehova a benefisi’é?

³ Hende ku ta pertenesé na Yehova ta benefisiá di esaki? Laga nos konsiderá e kaso di Rahab, un prostituta ku a biba den Jeriko di antigwedat. Sin duda, for di chikitu el a lanta ku e kustumber di partisipá den adorashon degenerá di e diosnan di Kánaan. Sinembargo, ora el a tende di e viktorianan ku Yehova a duna Israel, el a realisá ku Yehova  ta e Dios berdadero. P’esei, el a riska su bida pa protehá e sirbidónan di e pueblo skohí di Dios. Di e manera ei, el a pone su futuro den nan man. Beibel ta bisa: “No ta na e mesun manera e prostituta Rahab a wòrdu hustifiká tambe pa medio di obranan, ora ku el a risibí e mensaheronan i a manda nan bai pa un otro kaminda?” (Sant. 2:25) Djis imaginá kuantu benefisio Rahab a haña ora el a bira parti di Dios su pueblo limpi, un pueblo ku mediante e Lei di Dios a siña kon pa desplegá amor i hustisia. Lo e mester a keda masha kontentu ku el a kambia su bida! El a kasa ku un israelita, i nan yu hòmber, Boaz, a bira un sirbidó sobresaliente di Dios.​—Jos. 6:25; Ruth 2:​4-12; Mat. 1:​5, 6.

4. Kon Ruth su desishon pa sirbi Yehova a benefisi’é?

⁴ Ruth di Moab tambe a tuma e desishon pa sirbi Yehova. Komo mucha, probablemente el a adorá e dios Kemos i e otro diosnan di Moab. Pero despues, el a siña konosé e Dios berdadero, Yehova, i a kasa ku un israelita ku a bai buska refugio na Moab. (Lesa Ruth 1:​1-6.) Mas despues, ora Ruth i Orfa tabata riba kaminda pa bai Bètlehèm huntu ku nan suegra Noemí, Noemí a urgi e dos biudanan hóben pa nan regresá nan kas, pasobra lo no tabata fásil pa nan establesé nan mes na Israel. Orfa “a bai bèk serka su pueblo i su diosnan,” pero Ruth sí a nenga. El a aktua a base di su fe i tabata sa na ken e kier a pertenesé. El a bisa Noemí: “No keda insistí pa mi bai laga bo, ni kita mi di sigui bo; pasobra unda ku bo bai, lo mi bai, i unda ku bo keda, lo mi keda. Bo pueblo lo ta mi pueblo, i bo Dios, mi Dios.” (Ruth 1:​15, 16) Debí ku Ruth a tuma e desishon pa sirbi Yehova, el a benefisiá di e areglo spesial ku e Lei tabatin pa biuda, hende pober i esnan ku no tabatin nan propio tereno. Serka Yehova, Ruth a haña felisidat, protekshon i siguridat.

5. Kiko bo a ripará di hende ku ta sirbi Yehova fielmente?

⁵ Probablemente bo konosé algun ruman ku hopi tempu pasá a dediká nan mes na Yehova i ku te ainda ta sirbié fielmente. Puntra nan ki benefisio nan a saka sirbiendo Yehova. Ounke tur hende tin nan problemanan, tin hopi evidensia ku ta konfirmá e palabranan di e salmista, kende a bisa: ‘Felis ta e pueblo ku nan Dios ta Yehova!’​—Sal. 144:15, BPK.

Yehova Ta Rasonabel den Loke E Ta Ferwagt di Nos

6. Dikon nos no mester tin miedu ku nos no por kumpli ku loke Yehova ta ferwagt di nos?

⁶ Kisas bo ta puntra bo mes si lo bo ta kapas pa kumpli ku loke Yehova ta ferwagt di bo. Ta fásil pa pensa ku pa bira un sirbidó di Dios, kumpli ku su leinan i papia den su nòmber ta un responsabilidat muchu pisá. Moisés, por ehèmpel, a sinti ku e no tabata kapas pa kumpli ku e mandato ku Dios a dun’é pa bai papia ku e israelitanan i e rei di Egipto. Pero Dios no tabata ferwagt algu irasonabel for di Moisés. Es mas, Yehova a ‘siñ’é kiko e mester a hasi.’ (Lesa Eksodo 3:11; 4:​1, 10 i 13-15.) I Moisés a aseptá e yudansa ku el a haña, i p’esei, el a eksperensiá e goso di kumpli ku Dios su boluntat. Di mes manera, Yehova ta rasonabel den loke e ta ferwagt di nos. E ta komprondé ku nos ta imperfekto, i e ke yuda nos. (Sal. 103:14) P’esei, ora nos ta sirbi Dios, siguiendo e ehèmpel di Hesus, esaki no ta un peso pa nos. Mas bien, e ta refreská nos, pasobra ora nos ta sirbi Yehova, nos ta benefisiá otro hende i ta hasi Yehova su kurason kontentu. Hesus a bisa: “Bin serka mi . . . i lo mi duna boso sosiegu [“refreská boso,” NW]. Tuma mi yugo riba boso, i siña di mi, pasobra mi ta mansu i humilde di kurason.”​—Mat. 11:​28, 29.

7. Dikon bo por tin konfiansa ku Yehova lo yuda bo kumpli ku loke e ta ferwagt di bo?

⁷ Tanten ku nos ta dependé riba Yehova pa  fortalesa, semper lo e duna nos e animashon ku nos tin mester. Por ehèmpel, Jeremias opviamente no tabata un persona ku di naturalesa tabatin kurashi pa papia. P’esei, ora Yehova a asign’é komo Su profeta, Jeremias a bisa: “Ai, Señor DIOS! Mira, mi no sa kon pa papia, pasobra mi ta un mucha.” I mas despues, el a asta bisa: ‘Lo mi no papia mas den su nòmber.’ (Jer. 1:6; 20:9) Sinembargo, ku e animashon di Yehova, Jeremias por a prediká un mensahe impopular durante 40 aña. Bes tras bes Yehova a anim’é ku e palabranan: “Ami ta ku bo pa salba bo i pa libra bo.”​—Jer. 1:​8, 19; 15:20.

8. Kon nos ta demostrá ku nos ta konfia den Yehova?

⁸ Meskos ku Yehova a fortalesé Moisés i Jeremias, e por yuda nos hasi loke e ta ferwagt di kristiannan awe. E faktor klave ta ku nos mester konfia den Dios. Beibel ta bisa: “Konfia den SEÑOR ku henter bo kurason, i no dependé riba bo mes komprondementu. Den tur bo kamindanan rekonos’é, i e lo dirigí bo bereanan.” (Pro. 3:​5, 6) Nos ta demostrá ku nos ta konfia den Yehova ora nos ta hasi bon uso di e yudansa ku e ta perkurá mediante su Palabra i e kongregashon. Si nos ta permití Yehova guia nos pasonan, no tin nada ku por stroba nos di keda fiel na dje.

Yehova Ta Kuida Kada Miembro di Su Pueblo

9, 10. Ki klase di protekshon Salmo 91 ta primintí?

⁹ Ora algun persona ta konsiderá si nan mester dediká nan mes na Yehova òf nò, kisas nan ta preokupá ku nan lo por kometé un piká grave i ku Yehova lo rechasá nan pasobra nan a bira indigno den su bista. Pero nos por ta kontentu ku Yehova ta duna nos tur loke nos tin mester pa protehá nos relashon balioso kuné. Laga nos wak kon Salmo 91 ta ekspresá esaki.

¹⁰ E ta kuminsá asin’akí: “Ken ku ta biba den e lugá sekreto dje Haltísimo lo perkurá pa su mes posada bou dje sombra dje Todopoderoso. Lo mi bisa Yehova: ‘Bo ta mi refugio i mi fortalesa, mi Dios, den ken lo mi konfia.’ Pasobra e mes lo libra bo for di e trampa dje yagdó di para.” (Sal. 91:​1-3, NW) Tuma nota ku Dios ta primintí di protehá esnan ku ta stim’é i konfia den dje. (Lesa Salmo 91:​9 i 14.) Ki klase di protekshon Yehova a referí nan dje? Wèl, Yehova a yega di protehá bida di algun di su sirbidónan di pasado; den algun kaso el a hasi esei pa protehá e liña di desendensia ku a hiba na e Mesias primintí. Sinembargo, tin hopi otro sirbidó fiel ku a ser enkarselá, torturá i matá den intentonan kruel pa kibra nan fieldat na Dios. (Heb. 11:​34-39) Nan a haña e kurashi nesesario pa perseverá pasobra Yehova a protehá nan spiritualmente, i asina nan a mantené nan integridat. P’esei, nos por komprondé ku Salmo 91 ta referí na protekshon spiritual.

11. Kiko ta “e lugá sekreto di e Haltísimo,” i ken ta haña protekshon di Dios den dje?

¹¹ Pues, “e lugá sekreto dje Haltísimo” ku e salmista a menshoná ta un lugá figurativo di protekshon spiritual. Den e lugá akí, tur esnan ku ta huéspet di Dios ta ser protehá kontra tur kos i tur hende ku ta un peliger pa nan fe i nan amor pa Dios. (Sal. 15:​1, 2; 121:5) E ta un lugá sekreto pasobra personanan ku no ta adoradó di Yehova no sa di dje. Den e lugá figurativo akí, Yehova ta protehá hende ku de echo ta bisa: ‘Bo ta mi Dios den ken lo mi konfia.’ Si nos keda den e lugá di refugio akí nos no tin ku preokupá demasiado ku nos lo kai den trampa di Satanas, e “yagdó di para” i asina pèrdè e aprobashon di Dios.

12. Ki peligernan ta menasá nos relashon ku Dios?

¹² Ki peligernan ta menasá nos presioso relashon ku Dios? E salmista a menshoná vários peliger; entre nan tabatin “e pèst ku ta kana den skuridat . . . [i] e destrukshon ku ta destruí na ora di mèrdia.” (Sal. 91:​5, 6) “E yagdó di para” a usa deseo egoista pa independensia komo as pa kohe hopi hende den trampa. (2 Kor. 11:3) Den kaso di otronan e ta usa golosidat, orguyo i materialismo pa gara nan. Tin otronan tambe ku e ta gaña ku filosofianan manera patriotismo, evolushon i religion falsu.  (Kol. 2:8) Ademas, hopi a kai den e trampa di relashon seksual inapropiá. E plaganan akí a perhudiká miónes di hende spiritualmente i a pone nan pèrdè nan amor pa Dios.​—Lesa Salmo 91:​7-10; Mat. 24:12.

Kon pa Protehá Bo Amor pa Dios

13. Kon Yehova ta protehá nos di peligernan ku ta menasá nos bienestar spiritual?

¹³ Kon Yehova ta protehá su pueblo di e peligernan spiritual akí? E salmo ta bisa: “E lo duna su angelnan enkargo tokante di bo, pa warda bo den tur bo kamindanan.” (Sal. 91:11) Angelnan di Dios ta guia i protehá nos pa nos por prediká e bon notisia. (Rev. 14:6) Ademas di e angelnan, nos tin ansianonan kristian, kendenan ta sigui e Skritura kuidadosamente ora nan ta duna siñansa. Di e manera ei, nan ta protehá nos pa nos no bai tras di rasonamentu falsu. Ademas, kualke ruman individual ku ta lucha pa vense aktitutnan mundano por haña yudansa personal serka nan. (Tito 1:9; 1 Ped. 5:2) Nos tin tambe “e esklabo fiel i prudente” ku ta perkurá kuminda spiritual pa protehá nos kontra e siñansa di evolushon, e trampa di deseonan inmoral, korementu tras di rikesa i prominensia i vários otro deseo i influensia perhudisial. (Mat. 24:45) Kiko a yuda bo resistí algun di peligernan ei?

14. Kon nos por hasi bon uso di e protekshon ku Dios ta duna?

¹⁴ Kiko nos tin ku hasi pa keda den “e lugá sekreto” di protekshon di Dios? Meskos ku nos tin ku protehá nos mes konstantemente di peligernan manera aksidente, infekshon òf hende kriminal, nos tin ku protehá nos mes kontinuamente di peligernan ku ta perhudiká nos spiritualmente. P’esei, regularmente nos tin ku hasi bon uso di e guia ku Yehova ta duna nos mediante nos publikashonnan, reunionnan di kongregashon i asambleanan. Ademas, nos ta buska konseho serka ansianonan. Es mas, nos ta benefisiá di e vários kualidatnan ku nos rumannan kristian ta desplegá, no ta bèrdat? Sí, nos asosiashon ku e kongregashon ta yuda nos bira sabí.​—Pro. 13:20; lesa 1 Pedro 4:10.

15. Dikon bo por tin konfiansa ku Yehova por protehá bo di kualke kos ku por pone bo pèrdè su aprobashon?

¹⁵ Nos no tin ningun motibu pa duda ku Yehova por protehá nos di kualke kos ku por pone nos pèrdè su aprobashon. (Rom. 8:​38, 39) El a protehá e kongregashon di enemigunan religioso i polítiko poderoso ku por lo general tabatin e meta, no pa mata nos, sino pa alehá nos for di nos Dios santu. Yehova a kumpli ku su promesa: “Ningun arma ku wòrdu formá kontra bo lo no prosperá.”​—Isa. 54:17.

Ken Ta Duna Nos Libertat?

16. Dikon mundu no por duna nos libertat?

¹⁶ Nos ta pèrdè nos libertat ora nos ta pertenesé na Yehova? Nò. Mas bien, ta ora nos ta parti di mundu nos ta pèrdè nos libertat, pasobra e mundu ta alehá di Yehova i ta ser goberná pa un dios kruel ku ta sklabisá hende. (Juan 14:30) Por ehèmpel, e sistema di kosnan di Satanas ta usa preshon ekonómiko pa kita hende su libertat. (Kompará ku Revelashon 13:​16 i 17.) Piká tambe tin un poder engañoso pa sklabisá hende. (Juan 8:34; Heb. 3:13) P’esei, personanan ku no ta adoradó di Yehova por primintí nos libertat si nos sigui e estilo di bida ku nan ta promové. Pero siendo ku esaki no ta kuadra ku e siñansanan di Yehova, kualke persona ku bai nan tras lo ripará masha lihé ku nan a bira esklabo di un estilo di bida inmoral i degradá.​—Rom. 1:​24-32.

17. Ki klase di libertat Yehova ta ofresé nos?

 ¹⁷ Di otro banda, si nos pone tur nos konfiansa den Yehova, lo e libra nos di kualke kos ku por hasi nos daño. Den sierto sentido, nos situashon ta meskos ku un persona ku a pone su bida den man di un bon siruhano ku por kur’é di un malesa ku ta pone su bida na peliger. Ta komo si fuera nos tur tin un malesa ku ta pone nos bida na peliger, pasobra nos tur a heredá piká. Ta solamente si nos pone tur nos konfiansa den Yehova, a base di Kristu su sakrifisio, nos por tin speransa di ser librá di e efektonan di piká i biba pa semper. (Juan 3:36) Meskos ku nos konfiansa den un siruhano por krese segun ku nos haña sa mas tokante su reputashon, asina nos konfiansa den Yehova ta krese segun ku nos ta sigui siña di dje. P’esei, nos ta sigui studia e Palabra di Dios kuidadosamente, ya ku esei lo yuda nos stim’é di tal manera ku nos amor p’e lo kore ku kualke miedu ku nos por tin di pertenesé na dje.​—1 Juan 4:18.

18. Ki resultado esnan ku ta pertenesé na Yehova lo optené?

¹⁸ Yehova ta duna tur hende e libertat di skohe. Su Palabra ta bisa: “Skohe bida pa bo biba, abo i bo desendientenan, dor di stima SEÑOR bo Dios.” (Deu. 30:​19, 20) E ke pa nos mes tuma e desishon pa sirbié i asina demostrá nos amor p’e. Ora nos ta pertenesé na e Dios ku nos ta stima, nos no ta pèrdè nos libertat. Mas bien, esaki siguramente ta hasi nos felis i ta yuda nos keda felis.

19. Dikon e privilegio di pertenesé na Yehova ta un bondat inmeresí?

¹⁹ Komo ku nos ta pekadó, nos no meresé di pertenesé na un Dios perfekto. Ta únikamente mediante e grasia, òf bondat inmeresí, di Dios esaki ta posibel. (2 Tim. 1:9) P’esei, Pablo a skirbi: ‘Si nos biba, ta pa Yehova nos ta biba i si nos muri ta pa Yehova nos ta muri. Ke men, sea ku nos biba òf muri, ta na Yehova nos ta pertenesé.’ (Rom. 14:8, BPK) Nos por tin e siguransa ku nunka nos lo lamentá ku nos a skohe òf tuma e desishon pa pertenesé na Yehova.

Kon Lo Bo Kontestá?

• Kiko ta e benefisionan ku nos ta saka ora nos ta pertenesé na Yehova?

• Dikon nos por kumpli ku loke Dios ta ferwagt di nos?

• Kon Yehova ta protehá su sirbidónan?

[Preguntanan di Estudio]