Pakiko Dediká Bo Mes na Yehova?

“Awe nochi mes un angel di e Dios, na kende mi ta pertenesé, . . . tabata pará mi dilanti.”​—ECHO. 27:23.

1. Ki pasonan kandidatonan pa boutismo mester dal promé ku nan batisá, i ki pregunta esaki ta lanta?

“A BASE di e sakrifisio di Hesukristu, bo a repentí di bo pikánan i a dediká bo mes na Yehova pa hasi su boluntat?” Esaki ta ún di e dos preguntanan ku kandidatonan pa boutismo ta kontestá na final di e diskurso di boutismo. Pakiko kristiannan tin ku dediká nan mes na Yehova? Kon dedikashon na Dios ta benefisiá nos? Dikon nos tin ku dediká nos mes na Dios pa nos adorashon ta aseptabel p’e? Pa nos por haña kontesta pa e preguntanan ei, nos tin ku konsiderá promé kiko ta dedikashon.

2. Kiko ke men dediká bo mes na Yehova?

² Kiko ke men dediká bo mes na Dios? Laga nos wak kon apòstel Pablo a deskribí su relashon ku Dios. Dilanti hopi hende na bordo di un barku ku tabata den peliger, el a yama Yehova ‘e Dios na kende mi ta pertenesé.’ (Lesa Echonan 27:​22-24.) Sí, tur kristian berdadero ta pertenesé na Yehova. Na kontraste ku esei, mundu en general ta “bou di kontròl di e malbado.” (1 Juan 5:19) Kristiannan ta bira propiedat di Yehova ora nan dediká nan mes na dje den orashon na e manera ku e ta rekerí. E dedikashon ei ta un promesa solèm ku kada persona tin ku hasi pa nan mes. Despues di esei, nan ta batisá.

3. Kiko e boutismo di Hesus a simbolisá, i kon su siguidónan por imitá su ehèmpel?

³ Hesus a pone un ehèmpel pa nos ora el a tuma e desishon personal pa hasi Dios su boluntat. Hesus tabata dediká na Dios for di su nasementu, pasobra e tabata miembro dje nashon di Israel ku tabata dediká na Dios. Pero ku su boutismo, el a hasi mas di loke e Lei a rekerí. Segun e Palabra di Dios, el a bisa: “Mira, mi a bin . . . pa hasi bo boluntat, o Dios.” (Heb. 10:7; Luk. 3:21) P’esei, Hesus su boutismo a simbolisá e echo ku el a presentá su mes na Dios pa hasi e boluntat di su Tata. Hesus su siguidónan ta imitá su ehèmpel ora nan tuma e desishon pa batisá. Ma den nan kaso, boutismo den awa ta un demostrashon públiko ku nan a  hasi un dedikashon personal na Dios den orashon.

Kon Dedikashon na Dios Ta Benefisiá Nos?

4. Kiko e amistat entre David ku Jonatan ta siña nos tokante kompromiso?

⁴ Dedikashon kristian ta un asuntu serio. E ta mas ku djis un kompromiso. Pero kon dedikashon na Dios ta benefisiá nos? Pa ilustrá esaki, laga nos konsiderá kon kompromiso den un relashon ku otro hende ta benefisiá nos. Tuma, por ehèmpel, amistat. Pa bo por disfrutá di e privilegio di tin un amigu, bo tin ku aseptá e responsabilidat di ta un amigu. Esei ta enserá un kompromiso, esta, bo tin un obligashon di mustra interes den bo amigu. Ún di e amistatnan di mas sobresaliente ku Beibel ta deskribí ta esun di David ku Jonatan. Nan a asta sera un pakto ku otro basá riba nan amistat. (Lesa 1 Samuel 17:57; 18:​1 i 3.) Ounke tin masha poko amistat ku e grado di kompromiso ei, mayoria di amistat ta krese i bira algu bunita ora amigunan ta sinti ku nan tin sierto obligashon pa ku otro.​—Pro. 17:17; 18:24.

5. Kon un esklabo por a benefisiá permanentemente komo propiedat di un bon doño?

⁵ E Lei ku Dios a duna Israel ta deskribí un otro tipo di relashon ku a benefisiá hende ora nan a sera un kompromiso. Un esklabo por a bira propiedat di un bon doño pa semper. Si e tabata ke disfrutá di e siguridat ku e relashon akí a trese kuné, e mester a drenta un areglo permanente ku su doño. Pero, e areglo akí ta enserá sierto obligashonnan ku e esklabo tin ku kumpli kuné. E Lei a bisa: “Si e esklabo bisa bon kla: ‘Mi stima mi shon, mi esposa i mi yunan; mi no kier sali liber,’ e ora ei su shon mester hib’é dilanti di e huesnan. Despues e shon mester hib’é na e porta òf na e kozein-di-porta, i su shon mester bora su orea ku prim; i e esklabo mester sirbié pa semper.”​—Eks. 21:​5, 6.

6, 7. (a) Kon kompromiso ta benefisiá hende? (b) Kiko esei ta indiká tokante nos relashon ku Yehova?

⁶ Matrimonio ta un relashon ku ta rekerí un grado haltu di kompromiso. E no ta djis un areglo formal, sino un kompromiso ku un otro persona. Ora ún hende hòmber i ún hende muhé ta biba huntu sin ku nan ta kasá, nan no por tin berdadero siguridat nunka, i nan yunan tampoko. Pero, parehanan ku ta mará na otro den un matrimonio onorabel tin bon motibu bíbliko pa hasi esfuerso pa resolvé nan problemanan ku amor ora esakinan surgi.​—Mat. 19:​5, 6; 1 Kor. 13:​7, 8; Heb. 13:4.

⁷ Den tempu bíbliko, hende a benefisiá di kontraktnan permanente ku nan a sera relashoná ku asuntunan di negoshi i di trabou. (Mat. 20:​1, 2, 8) Esei ta e kaso awe tambe. Por ehèmpel, promé ku nos kuminsá un negoshi òf kuminsá traha pa un kompania, nos ta sera un areglo òf kontrakt por eskrito ku ta benefisiá nos. P’esei, si un kompromiso mes ta fortalesé e relashon entre doño di trabou i trahadó, entre amigunan i entre partnernan den un matrimonio, dedikashon sin reservá na Yehova lo benefisiá bo relashon kuné muchu mas. Laga nos wak kon dedikashon na Yehova Dios a benefisiá hende den pasado i den ki sentido nan dedikashon tabata hopi mas ku djis un kompromiso.

Kon Dedikashon na Dios A Benefisiá Israel?

8. Kiko dedikashon na Dios a nifiká pa e nashon di Israel?

⁸ Henter Israel a bira un nashon dediká na Yehova Dios ora nan a hasi un promesa solèm na dje. Yehova a manda nan reuní serka di Seru Sinaí, i el a bisa nan: “Si di bèrdat boso kier obedesé mi bos i warda mi aliansa, e ora ei boso lo ta un tesoro pekuliar [“propiedat spesial,” NW] riba tur pueblo.” Unánimamente e pueblo a kontestá: ‘Tur loke Yehova a bisa, nos lo hasi.’ (Eks. 19:​4-8) Ora e nashon di Israel a dediká nan mes na Dios, nan no a djis  sera un kompromiso pa kumpli ku un areglo. Nan dedikashon a nifiká ku nan tabata pertenesé na Yehova, i el a trata nan komo su “propiedat spesial.”

9. Kon dedikashon na Dios a benefisiá e nashon di Israel?

⁹ E israelitanan a benefisiá di e echo ku nan tabata pertenesé na Yehova. E tabata leal i a kuida nan manera un mayor amoroso ta kuida su yu. Dios a bisa Israel: “Un muhé por lubidá su yu ku e ta kria na pechu, i no tene kompashon ku e yu di su mondongo? Esakinan por lubidá, ma ami sí lo no lubidá bo.” (Isa. 49:15) Yehova a guia nan mediante e Lei, el a animá nan mediante su profetanan i a usa su angelnan pa protehá nan. Un salmista a skirbi: “E ta deklará su palabranan na Jakòb, su statutonan i su ordenansanan na Israel. E no a trata asina ku ningun otro nashon.” (Sal. 147:​19, 20; lesa Salmo 34:​7 i 19; 48:14.) Meskos ku Yehova a kuida e nashon ku tabata su propiedat den pasado, asina lo e perkurá tambe pa esnan ku dediká nan mes na dje awe.

Pakiko Nos Mester Dediká Nos Mes na Dios?

10, 11. Nos a nase den e famia universal di Dios? Splika.

¹⁰ Kisas algun persona ku ta konsiderando e pasonan di dedikashon i boutismo kristian ta puntra nan mes: ‘Dikon mi no por adorá Dios sin dediká mi mes na dje?’ Nos ta komprondé e motibu ora nos konsiderá e realidat di nos posishon aktual den bista di Dios. Kòrda ku nos tur a nase pafó di e famia di Dios debí na e piká di Adam. (Rom. 3:23; 5:12) Pa Dios aseptá nos den su famia universal, nos mester dediká nos mes na dje. Esei ta un rekisito esensial. Laga nos wak dikon.

¹¹ Nos niun no tin un tata ku por a duna nos bida manera mester ta, esta, un bida perfekto. (1 Tim. 6:19) Nos no a nase komo yunan di Dios pasobra ora e promé pareha humano a peka, e rasa humano a ser alehá for di nan Tata i Kreador amoroso. (Kompará ku Deuteronomio 32:5.) For di e tempu ei, e mundu di humanidat no tabata parti di e famia universal di Yehova mas, nan tabata alehá for di Dios.

12. (a) Kon hende imperfekto por bira miembro di e famia di Dios? (b) Ki pasonan nos tin ku dal promé ku nos batisá?

¹² Sinembargo, nos kada un por pidi Dios p’e aseptá nos den su famia di sirbidónan aprobá. * Kon esei ta posibel siendo ku nos ta pekadó? Apòstel Pablo a skirbi: “Tempu ku nos tabata enemigu, nos a wòrdu rekonsiliá ku Dios dor di morto di su Yu.” (Rom. 5:10) Mediante nos boutismo, nos ta pidi Dios pa un konsenshi limpi pa nos por ta aseptabel den su bista. (1 Ped. 3:21) Ma promé ku nos batisá, tin pasonan ku nos tin ku dal. Nos tin ku siña konosé Dios, siña konfi’é, repentí i kambia nos bida. (Juan 17:3; Echo. 3:19; Heb. 11:6) Pero tin algu mas ku nos tin ku hasi promé ku Dios aseptá nos den su famia. Kiko esei ta?

13. Dikon ta apropiá pa un persona dediká su mes, òf hasi un promesa solèm, na Dios pa e por bira miembro di Su famia di adoradónan aprobá?

¹³ Promé ku un persona ku ta alehá for di Dios por bira miembro di e famia di sirbidónan aprobá di Dios, e tin ku hasi un promesa solèm na Yehova. Pa bo por komprondé dikon mester ta asina, imaginá bo mes e siguiente situashon. Un tata ku bon reputashon ta mustra interes den un hóben huérfano, i e ke adoptá e mucha hòmber akí komo miembro di su famia. E tata ta konosí komo un bon hòmber. Ma promé ku e aseptá e hóben komo su yu, e ke pa e mucha primintié algu. P’esei, e hòmber ta bisa e mucha: “Promé ku mi aseptá bo komo yu, bo tin ku primintí mi ku lo bo stima mi i respetá mi komo bo tata.” Ta solamente si e hóben ta dispuesto pa hasi e promesa solèm ei, e hòmber lo asept’é den su  famia. Esei ta lógiko, no ta bèrdat? Di mes manera, Yehova ta aseptá den su famia solamente esnan ku ta dispuesto pa hasi un dedikashon, òf promesa solèm, na dje. Beibel ta bisa: “Ofresé boso mes kompletu na dje: un sakrifisio bibu, dediká i aseptabel p’e.”​—Rom. 12:1, The New English Bible.

Dedikashon Ta un Akto di Amor i Fe

14. Den ki manera dedikashon ta un ekspreshon di amor?

¹⁴ Nos dedikashon, òf promesa solèm, na Dios ta un ekspreshon di nos amor profundo pa Yehova. Den sierto sentido, e ta similar na un voto matrimonial. Un brùidehòm kristian ta ekspresá su amor primintiendo ku lo e keda leal na su brùit maske kiko ku pasa. E ta sera un kompromiso ku un persona, e no ta djis primintí di kumpli ku un areglo. Un brùidehòm kristian ta komprondé ku si e no hasi un voto matrimonial, e no por tin e privilegio di biba huntu ku su brùit. Di mes manera, si nos no dediká nos mes, òf hasi un promesa solèm, na Yehova, nos no por disfrutá plenamente di e benefisionan ku e miembronan di su famia tin. Pues, nos ta dediká nos mes na Dios pasobra, apesar di nos imperfekshon, nos ta deseá di pertenesé na dje i ta determiná pa keda leal na dje, maske kiko ku pasa.​—Mat. 22:37.

15. Dikon dedikashon ta un akto di fe?

¹⁵ Ora nos dediká nos mes na Dios, nos ta efektuá un akto di fe. Dikon nos ta bisa esei? Pasobra nos fe den Yehova ta duna nos e konfiansa ku ta bon pa nos hala serka Dios. (Sal. 73:28) Nos sa ku miéntras nos ta bibando meimei di “un generashon korumpí i pèrvèrso,” no ta tur biaha ta fásil pa kana ku Dios. Pero nos tin konfiansa ku Yehova lo kumpli ku su promesa pa sostené nos den nos intentonan. (Fil. 2:15; 4:13, NW) Nos sa ku nos ta imperfekto, ma nos tin konfiansa ku Yehova lo trata nos ku miserikòrdia asta ora nos kometé eror. (Lesa Salmo 103:​13 i 14; Romanonan 7:​21-25.) Nos tin fe ku Yehova lo rekompensá nos determinashon pa mantené nos integridat.​—Jòb 27:5.

Dedikashon na Dios Ta Hiba na Felisidat

16, 17. Dikon dedikashon na Yehova ta hiba na felisidat?

¹⁶ Nos dedikashon na Yehova ta hiba na felisidat pasobra e ta enserá duna di nos mes. Hesus a deklará un bèrdat básiko ora el a bisa: “Duna ta hasi hende mas felis ku risibí!” (Echo. 20:35, BPK) Hesus realmente a eksperensiá e felisidat di duna durante su ministerio riba tera. Ora tabata nesesario, el a keda sin sosegá òf kome i sin su komodidat pa e por a yuda otro hende haña e kaminda di bida. (Juan 4:34) Hesus tabatin goso den hasi e kurason di su Tata kontentu. El a bisa: “Semper mi ta hasi e kosnan ku ta agrad’é.”​—Juan 8:29; Pro. 27:11.

¹⁷ Pues, ora Hesus a bisa “si un hende kier bin mi tras, lag’é nenga su mes,” el a indiká su  siguidónan kua ta e manera di biba ku ta duna satisfakshon. (Mat. 16:24) Si nos sigui su konseho, nos ta hala mas serka Yehova. Akaso tin un otro persona ku nos por konfia i ku lo trata nos ku mas amor?

18. Dikon un bida na armonia ku nos dedikashon na Yehova ta hasi nos mas ku dedikashon na kualke kos òf kualke otro persona?

¹⁸ Si nos dediká nos mes na Yehova i biba na armonia ku e dedikashon ei hasiendo Su boluntat, nos por ta mas felis ku ora nos dediká nos mes na kualke kos òf kualke otro persona. Por ehèmpel, hopi hende ta usa nan bida pa kore tras di rikesa material sin logra berdadero felisidat i satisfakshon. Di otro banda, personanan ku dediká nan mes na Yehova sí ta haña felisidat duradero. (Mat. 6:24) Ta sierto ku e privilegio di sirbi komo “Dios su kolaboradónan” ta hasi nan felis. Pero nan dedikashon no ta na un trabou sino na nos Dios ku ta apresiá loke nos ta hasi. (1 Kor. 3:9) Ningun otro persona por tin mas apresio pa nan sakrifisio propio. Lo e asta yuda su sirbidónan leal rekuperá nan vigor di hubentut pa asina nan por benefisiá pa semper di su kuido.​—Jòb 33:25; lesa Hebreonan 6:10.

19. Ki privilegio personanan dediká na Yehova tin?

¹⁹ Ora nos dediká nos bida na Yehova, nos ta haña un relashon mas estrecho kuné. Beibel ta bisa: “Hala serka Dios i e lo hala serka boso.” (Sant. 4:8; Sal. 25:14) Den e siguiente artíkulo nos lo konsiderá dikon nos por tuma e desishon pa pertenesé na Yehova ku tur konfiansa.

[Nota]

Kon Lo Bo Kontestá?

• Kiko ke men dediká bo mes na Dios?

• Kon dedikashon na Dios ta benefisiá nos?

• Pakiko kristiannan tin ku dediká nan mes na Yehova?

[Preguntanan di Estudio]

[Plachi na página 14]

Ora nos ta biba na armonia ku nos dedikashon, nos ta haña felisidat duradero