Satanas Su Gobernashon Ta Frakasá Sigur
Satanas Su Gobernashon Ta Frakasá Sigur
“Lo no bai bon ku e hòmber malbado.”—EKL. 8:13.
1. Dikon Dios su huisio binidero riba e malbadonan ta un notisia alentador?
TARDI òf trempan Dios lo husga e malbadonan, pasobra nan tin ku duna kuenta i rason pa loke nan a hasi. (Pro. 5:22; Ekl. 8:12, 13) Esaki ta un notisia alentador, spesialmente pa esnan ku ta stima hustisia i ku a soportá inhustisia i maltrato na man di e malbadonan. E malbado prinsipal ku lo ser husgá ta e tata di maldat, Satanas e Diabel.—Juan 8:44.
2. Dikon tabatin mester di tempu pa resolvé e kuestion ku a lanta den Edén?
2 Den Edén, Satanas tabata sintié asina importante ku el a influensiá hende pa nan rechasá Yehova su manera di goberná. Esei a pone ku nos promé mayornan a uni kuné den desafiá Yehova su outoridat komo Gobernante legítimo i a bira pekadó den Su bista. (Rom. 5:12-14) Ta klaru ku Yehova tabata sa kon nan rebelion i falta di rèspèt lo a afektá nan. Sinembargo, pa tur kriatura inteligente por a mira e resultado inevitabel ei tabatin mester di tempu. Sí, tempu pa resolvé e kuestion i demostrá sin ningun duda ku e rebeldenan tabata kompletamente robes.
3. Kiko ta nos posishon relashoná ku gobernashon humano?
3 Ya ku hende a rechasá Yehova su gobernashon, nan mester a establesé nan propio formanan di gobernashon. Ora apòstel Pablo a skirbi e rumannan na Roma, el a bisa nan ku nan mester someté nan mes na “outoridatnan [humano] ku ta goberná.” Den tempu di Pablo, e “outoridatnan” ei tabata prinsipalmente e gobièrnu di Roma ku Emperador Nero na kabes, kende a goberná di aña 54-68 di nos era. Pablo a bisa ku ta “Dios a establesé” e outoridatnan akí. (Lesa Romanonan 13:1 i 2.) Kiko esei ta nifiká? Akaso Pablo tabata rekomendá gobernashon humano en bes di esun di Dios? Di ningun manera. Mas bien, simplemente e tabata ke men ku tanten ku Yehova ta permití gobernashon humano, kristiannan mester respetá e areglo akí i aseptá e gobernantenan ei.
Un Kaminda Ku Ta Hiba na Desaster
4. Splika dikon gobernashon humano ta frakasá sigur.
4 Ta sierto ku nos tin ku respetá gobernantenan humano. Pero esei no ta kita ku gobernashon humano bou di influensia di Satanas ta frakasá sigur. Dikon? Pa kuminsá, e no ta basá riba sabiduria divino. Ademas, ta Yehova so tin sabiduria perfekto. P’esei, pa un gobernashon ta eksitoso, e mester di e guia konfiabel di Dios. (Jer. 8:9; Rom. 16:27) Distinto for di hende ku hopi biaha ta siña segun ku nan ta purba esaki i esaya, Yehova semper sa kua ta e mihó manera pa aktua. Kualke gobernashon ku no ta sigui su guia lo frakasá sigur. Pa e motibu ei nos sa ku Satanas su gobernashon mediante gobièrnunan humano lo a frakasá sigur. Un otro motibu pakiko su gobernashon lo frakasá sigur ta pasobra su motivashon ta basá riba egoismo.
5, 6. Kiko aparentemente a pone Satanas opta pa oponé Yehova?
5 Generalmente, un hende prudente lo no kuminsá ku un proyekto sabiendo ku esaki lo frakasá sigur. Si e insistí tòg, lo e hañ’é obligá ta rekonosé su eror. Bes tras bes, historia a demostrá ku no tin sentido pa oponé e Kreador todopoderoso. (Lesa Proverbionan 21:30.) Sinembargo, Satanas e Diabel siegá pa orguyo i arogansia a bira lomba pa Yehova. Pues, deliberadamente el a skohe un kaminda ku ta hiba na desaster sigur.
6 Mas despues, un gobernante di Babilonia a reflehá Satanas su aktitut arogante. El a broma: “Lo mi subi na shelu; lo mi hasi mi trono mas haltu ku e streanan di Dios, i lo mi sinta riba e seru di asamblea, na e partinan mas retirá di nort. Lo mi subi mas haltu ku e halturanan di e nubianan; lo mi hasi mi mes meskos ku e Haltísimo.” (Isa. 14:13-15) E gobernante ei a frakasá den su afan pa hasi su mes meskos ku Dios, i e dinastia di Babilonia a yega na un final humiante. Di mesun manera, pronto Satanas i su mundu lo sufri un derota total.
Dikon Dios A Permití Maldat?
7, 8. Menshoná algun benefisio di e echo ku Yehova a permití maldat eksistí temporalmente.
7 Tin hende ta puntra nan mes dikon Yehova no a stroba hende di skohe pa Satanas i di establesé un forma di gobernashon ku lo a frakasá sigur. Komo e Dios Todopoderoso, e por a hasi esei sigur. (Eks. 6:3) Ma Dios no a hasié. Dikon? Debí na su sabiduria, e tabata sa ku e mihó solushon ta pa no intervení sino permití hende su rebelion dura temporalmente. Finalmente, lo ta bisto pa tur hende ku Yehova ta un Gobernante hustu i amoroso, i hende fiel lo benefisiá di Su desishon.
8 Humanidat por a skapa di hopi sufrimentu si hende a rechasá Satanas su oferta i nenga di buska independensia di Dios su gobernashon. Apesar di esei, e echo ku Yehova a permití hende goberná nan mes temporalmente tabatin su benefisionan. Esaki ta yuda hende sinsero komprondé bon kla ku ta sabí pa skucha Dios i konfia den dje. Atraves di siglonan, hende a eksperimentá ku hopi sorto di gobièrnu, pero ningun di nan no a resultá. E realidat akí ta konvensé e adoradónan di Yehova mas i mas ku Su gobernashon ta realmente esun mihó. Ta bèrdat ku humanidat, inkluso Yehova su fiel adoradónan, a sufri mashá debí ku el a permití Satanas su gobernashon malbado. Sinembargo, e fiel adoradónan akí a saka benefisio tambe di e echo ku Dios a permití maldat temporalmente.
Rebelion Ku A Sirbi pa Duna Gloria na Yehova
9, 10. Splika kon Satanas su gobernashon a yuda pa duna gloria na Yehova.
9 E echo ku Yehova a permití Satanas influensiá hende i a laga hende goberná nan mes, di ningun manera no ta nifiká ku Yehova su manera di goberná no ta bon. Al kontrario! Historia ta mustra ku loke Dios a inspirá Jeremias pa bisa tokante e inkapasidat di hende pa goberná nan mes ta korekto. (Lesa Jeremias 10:23.) Ademas, e rebelion di Satanas a duna Yehova un oportunidat pa demostrá Su ekselente kualidatnan na un manera mas remarkabel. Kon asina?
10 Kompará ku e resultado desastroso di Satanas su gobernashon, e kualidatnan perfekto di Yehova ta resaltá mas ku nunka. I esei ta engrandesé Dios den bista di esnan ku ta stim’é. Sí, pa straño ke e por zona, Satanas su manera di goberná realmente a yuda glorifiká Dios. El a enfatisá e manera ekselente ku Yehova a trata ku e kuestion relashoná ku su soberania. Pa ilustrá e bèrdat ei, laga nos konsiderá brevemente algun di Yehova su kualidatnan i mira kon Satanas su gobernashon malbado a pone ku Yehova a demostrá e kualidatnan akí den mas manera.
11. Den ki maneranan Yehova a demostrá su amor?
11 Amor. E Skritura ta bisa nos ku “Dios ta amor.” (1 Juan 4:8) E kreashon di hende so kaba tabata un ekspreshon di Dios su amor. Ademas, komo prueba di su amor, el a krea nos na un manera maravioso i inspirador di temor. Es mas, demostrando su amor, Yehova a perkurá un kas bunita pa hende ku tur loke nan tabatin mester pa ta felis. (Gén. 1:29-31; 2:8, 9; Sal. 139:14-16) Pero unabes e pareha humano a peka, Yehova a demostrá su amor den maneranan nobo. Kon el a hasi esei? Apòstel Juan a sita e palabranan di Hesus: “Dios a stima mundu asina tantu, ku el a duna su Yu unigénito, pa ken ku kere den dje no bai pèrdí, ma tin bida eterno.” (Juan 3:16) Sí, Dios a manda su Yu unigénito na mundu pa duna su bida komo reskate pa pekadó. Akaso tin un manera mas sobresaliente ku e por a demostrá su amor pa humanidat? (Juan 15:13) E gran demostrashon di amor akí ta sirbi tambe komo un ehèmpel pa hende; e ta duna nan e oportunidat pa imitá Hesus i asina reflehá Dios su amor di sakrifisio propio den nan bida diario.—Juan 17:25, 26.
12. Den ki manera Yehova a demostrá su poder?
12 Poder. Ta “Dios, e Todopoderoso,” so tin e poder di duna bida. (Rev. 11:17; Sal. 36:9) Ora un hende nase, e ta kuminsá, na moda di papia, manera un papel bashí. Pero ora e muri, e papel ei no ta bashí mas. Pasobra durante su bida, el a yen’é ku su desishonnan, akshonnan i eksperensianan ku a forma su personalidat. Yehova por warda tur e informashon ei den Su memoria. P’esei, na su debido tempu, Yehova por resusitá e persona ei ku e mesun personalidat i karakterístikanan. (Juan 5:28, 29) Pues, ounke morto no tabata forma parti di Yehova su propósito original pa hende, morto a dun’é e oportunidat pa demostrá ku e tin poder pa resusitá hende. Sí, Yehova en bèrdat ta ‘e Dios, Todopoderoso.’
13. Kon Hesus su sakrifisio a demostrá Yehova su hustisia perfekto?
13 Hustisia. Yehova no ta gaña ni e no ta aktua na un manera inhustu. (Deu. 32:4; Tito 1:2) Semper e ta tene su mes na e normanan di mas haltu di bèrdat i hustisia, asta ora ta parse ku esaki no ta kumbinié. (Rom. 8:32) Por ehèmpel, e mester a mira Hesus, su Yu stimá, muri na un staka di tormento, komo si fuera e tabata un blasfemadó infiel. Esta doloroso esei lo tabata! Sinembargo, debí na su amor pa hende imperfekto, Yehova tabata dispuesto pa permití e suseso doloroso ei tuma lugá pa por kumpli ku su propio norma perfekto di hustisia. (Lesa Romanonan 5:18-21.) Un mundu yen di inhustisia a duna Yehova e oportunidat pa demostrá ku e ta e ehèmpel perfekto di hustisia.
14, 15. Menshoná algun manera ku Yehova a manifestá su sabiduria i su pasenshi sobresaliente.
14 Sabiduria. Djis despues ku Adam i Eva a peka, Yehova a revelá kon lo e bai deshasí di tur daño ku nan rebelion a kousa. (Gén. 3:15) E akshon inmediato ei i tambe e manera progresivo ku el a revelá e detayenan di su propósito na su sirbidónan a demostrá e sabiduria di Yehova bon kla. (Rom. 11:33) Nada no por stroba Dios di atendé asuntunan eksitosamente. Un mundu yen di inmoralidat, guera i hende irasonabel, desobediente, sin miserikòrdia, parsial i hipókrita ta duna Yehova hopi oportunidat pa demostrá su kriaturanan kiko ta berdadero sabiduria. E disipel Santiago a bisa: “E sabiduria di ariba primeramente ta puru, despues pasífiko, suave, rasonabel, yen di miserikòrdia i bon fruta, imparsial, sin hipokresia.”—Sant. 3:17.
15 Pasenshi. Yehova tabata dispuesto pa trata ku imperfekshon, piká i debilidat di hende. Si no tabata pa esei, su pasenshi lo no tabata asina notabel. Pero e echo ku Yehova a desplegá e kualidat maravioso akí pa míles di aña, ta demostrá ku su pasenshi ta perfekto. P’esei, ku rason, apòstel Pedro a bisa ku nos mester “konsiderá e pasenshi di nos Señor komo salbashon.”—2 Ped. 3:9, 15.
16. Dikon e echo ku Yehova ta kla pa pordoná ta duna goso?
16 E Ta Kla pa Pordoná. Nos tur ta pekadó i nos tur ta trompeká hopi biaha. (Sant. 3:2; 1 Juan 1:8, 9) Nos mester ta masha gradisidu ku Yehova ta kla pa pordoná “abundantemente.” (Isa. 55:7) Konsiderá e detaye akí tambe: Debí ku nos a nase imperfekto i ta hasi piká, nos por disfrutá di un goso profundo ora nos sinti ku Dios ta pordoná nos erornan. (Sal. 51:5, 9, 17) Ora nos sinti esei, e ta konmové nos kurason, oumentá nos amor pa Yehova i animá nos pa sigui su ehèmpel den nos trato ku otronan.—Lesa Kolosensenan 3:13.
Dikon Mundu Ta Enfermo
17, 18. Den ki maneranan Satanas su gobernashon a frakasá?
17 Atraves di siglonan, henter e sistema mundial di Satanas, ku ta un produkto di su gobernashon, a frakasá bes tras bes. Na 1991, e korant The European a bisa: ‘E mundu ta enfermo? Sí, definitivamente. Pero esei no ta un obra di Dios. Mas bien, ta mundu su habitantenan mes ta kousa su enfermedat.’ Esei ta bèrdat! Bou di influensia di Satanas, nos promé mayornan a skohe gobernashon humano en bes di esun di Yehova. Di e manera ei, nan a introdusí un gobernashon ku lo a frakasá sigur. E dolónan i miseria ku hende rònt mundu ta pasa aden ta prueba ku gobernashon humano a frakasá kompletamente.
18 Satanas su gobernashon ta probechá di nos inklinashonnan egoista. Sinembargo, egoismo nunka por vense amor, e base di Yehova su gobernashon. Satanas su gobernashon no por a perkurá stabilidat, felisidat ni siguridat. Yehova su gobernashon ta superior! Nos tin evidensia di esaki den nos tempu? Sí, i nos lo mira esei den e siguiente artíkulo.
Kiko Nos A Siña Tokante Gobernashon ora Nos A Lesa . . .
[Preguntanan di Estudio]
[Plachi na página 25]
Satanas su gobernashon nunka a benefisiá humanidat
[Rekonosementu]
U.S. Army photo
WHO photo by P. Almasy
[Plachi na página 26]
Yehova tin poder pa resusitá hende
