Tene Alkohòl na Su Debido Lugá

TONY, menshoná den e promé artíkulo, lo por a hiba un bida hopi diferente si el a simplemente atmití ku e tabatin problema ku alkohòl. Sinembargo, debí ku e por a bebe hopi sin sinti nada, el a kere ku e tabatin kontròl riba su bida. Dikon e no por a mira su mes na un manera realístiko?

Bebementu di mas a afektá su sano huisio. Sea ku Tony a realisá esei òf nò, e órgano ku ta kontrolá su kondishon físiko, mental i emoshonal—su selebro—tabata traha malu ora el a bebe demasiado alkohòl. Mas el a bebe, ménos kapas su selebro tabata pa evaluá su kondishon na un manera korekto.

Un otro motibu ku a stroba Tony di mira su mes na un manera realístiko ta su deseo fuerte pa sigui ku su hábito di bebementu. Allen, menshoná den e artíkulonan anterior, a nenga na promé instante ku e tabatin problema ku alkohòl. “Mi tabata bebe na skondí,” el a atmití, “i mi tabata hustifiká mi bebementu i hasi komo si fuera esei no ta nada serio. Mi tabatin un meta: protehá mi bebementu.” Ounke otro hende por a mira ku alkohòl tabatin kontròl riba Tony i Allen, kada un tabata sigui bisa su mes ku tur kos ta bon. Ámbos mester a tuma akshon pa vense nan adikshon na alkohòl. Ki akshon nan mester a tuma?

Tuma Akshon!

Hopi hende ku a stòp di bebe di mas a aktua na armonia ku Hesus su palabranan:  “I si bo wowo drechi hasi bo trompeká, sak’é tir’afó, pasobra ta mihó pa bo ku un di e miembronan di bo kurpa bai pèrdí, i no henter bo kurpa wòrdu tirá den fièrnu.”​—Mateo 5:29.

Klaru ku Hesus no tabata rekomendá hende pa kòrta nan kurpa. Mas bien, den un sentido figurativo e tabata enfatisando ku nos mester ta dispuesto pa kòrta òf eliminá for di nos bida kualke kos ku por kousa daño na nos spiritualidat. Klaru ku e akshon ei por ta masha doloroso. Pero lo e protehá nos for di pensamentu- i situashonnan ku por pone nos bebe di mas. Pues, si otro hende a ekspresá nan preokupashon enkuanto bo konsumo di alkohòl, dal paso pa kontrol’é. * Si ta bisto ku bo no por kontrolá bo bebementu, keda dispuesto pa elimin’é for di bo bida. Esei por ta hopi doloroso, pero e ta kousa ménos doló ku ora bo bida ta ruiná.

Maske bo no ta un hende alkohóliko, bo tin tendensia di bebe di mas? Si ta asina, ki paso práktiko bo por dal pa yuda bo tene alkohòl na su debido lugá?

Kon Bo Por Haña Yudansa

1. Tene fe den e poder di orashon frekuente i sinsero. Beibel ta konsehá tur hende ku ke agradá Yehova Dios: “Den tur kos, pa medio di orashon i súplika ku gradisimentu, laga boso petishonnan ta konosí dilanti di Dios. I e pas di Dios, ku ta surpasá tur komprondementu, lo warda boso kurason i boso mente den Kristu Hesus.” (Filipensenan 4:​6, 7) Kon bo tin ku hasi orashon pa bo haña e pas mental akí?

Atmití onestamente ku bo tin problema ku alkohòl, un problema ku abo tin ku trata kuné. Bisa Dios den orashon loke bo tin pensá di hasi pa vense e problema akí i lo e bendishoná bo esfuerso pa haña alivio i pa evitá problema mas serio. “Esun ku skonde su pikánan lo no prosperá, ma esun ku konfesá i laga nan lo haña miserikòrdia.” (Proverbionan 28:13) Ademas, Hesus a bisa nos pa pidi: “No hiba nos den tentashon, ma libra nos for di e malbado.” (Mateo 6:13) Awor, kon bo por aktua na armonia ku e orashonnan ei, i na unda bo por haña kontesta pa bo súplikanan?

2. Laga e Palabra di Dios fortalesé bo. “E palabra di Dios ta bibu i aktivo . . . i ta kapas pa husga e pensamentunan i intenshonnan di kurason.” (Hebreonan 4:12) Hopi hende ku tabata bebedó a haña yudansa ora nan a lesa i meditá diariamente riba versíkulonan di Beibel. Un salmista temeroso di Dios a skirbi: “Bendishoná ta e hende ku no ta kana den e konseho di malbadonan, . . . Ma su delisia ta den e lei di SEÑOR, i den su lei e ta meditá di dia i anochi. . . . Tur loke ku e hasi ta prosperá.”​—Salmo 1:​1-3.

Allen a haña e forsa pa vense su adikshon na alkohòl ora Testigunan di Yehova a studia Beibel kuné. El a bisa: “Mi ta konvensí ku si no ta pa Beibel i prinsipionan di Beibel ku a yuda mi stòp di bebe, lo mi ta morto.”

3. Kultivá dominio propio. Beibel ta bisa ku algun hende den e kongregashon kristian ku tabata bebedó a ser labá ku “e spiritu di nos Dios.” (1 Korintionan 6:​9-11) Kon asina? Un manera ku e spiritu santu di Dios a yuda nan pa stòp di bebe di mas i parandiá ta dor di kultivá dominio propio, un kualidat ku un hende por desaroyá ku yudansa di Dios su spiritu. “No bebe biña bira burachi, pasobra esei ta libertinahe, ma sea yená ku e spiritu.” (Efesionan 5:18; Galationan 5:​21-23) Hesukristu a primintí ku e “Tata selestial lo duna e spiritu santu na esnan ku pidié.” P’esei, sigui “pidi, i lo wòrdu duná na boso.”​—Lukas 11:​9, 13.

 Hende ku ta deseá di adorá Yehova na un manera aseptabel por kultivá dominio propio dor di lesa i studia Beibel i dor di hasi orashon sinsero riba un base regular. En bes di bira desanimá, aseptá e promesa akí ku tin den e Palabra di Dios: “Esun ku sembra pa e spiritu lo kosechá bida eterno for di e spiritu. I no laga nos kansa di hasi bon, pasobra na debido tempu nos lo kosechá, si nos no desmayá.”​—Galationan 6:​8, 9.

4. Skohe bon amigu. “Esun ku anda ku hende sabí lo ta sabí, ma un kompañero di hende bobo lo sufri daño.” (Proverbionan 13:20) Bisa bo amigunan ku bo a tuma desishon di kontrolá bo bebementu. Pero e Palabra di Dios ta spièrta ku ora bo stòp di hiba un bida di “buracheria [i] paranda,” algun di e hendenan ku tabata bo kompañero lo ‘keda sorprendí i nan lo kalumniá bo.’ (1 Pedro 4:​3, 4) Pues, unabes ku bo a determiná pa kontrolá bo bebementu, sea dispuesto pa stòp di asosiá ku hende ku ta kibra bo.

5. Pone límite. “No sea konforme e mundu akí, ma sea transformá pa medio di e renobamentu di boso mente, pa boso por komprobá kiko ta e bon i agradabel i perfekto boluntat di Dios.” (Romanonan 12:2) Si bo laga prinsipionan di e Palabra di Dios guia bo pa pone límite personal en bes di amigunan òf “e mundu akí,” lo bo disfrutá di un bida ku ta agradá Dios. Pero kon bo por determiná kiko ta un límite safe pa bo?

Asina ku loke bo a bebe ta stroba bo di pensa òf rasoná na un manera kla, bo a bebe di mas. P’esei, si bo disidí di bebe, ta sabí pa bo pone un límite fiho. Sea onesto ku bo mes i no skonde pa realidat ora bo ta evaluá bo kustumber di bebementu. Disidí di antemano kuantu ta e  kantidat ku ta kompletamente safe, pa no resultá ku bo ta bebe di mas.

6. Siña bisa nò. “Ma laga bo ‘Sí’ ta ‘Sí’, òf bo ‘Nò’ ta ‘Nò.’” (Mateo 5:37) Ora un anfitrion ku bon intenshon generosamente ta keda ofresé bo drinks, rechasá su oferta na un manera kortes. “Laga boso palabranan ta semper ku grasia, sasoná ku salu, pa boso por sa kon boso mester kontestá kada persona.”​—Kolosensenan 4:6.

7. Buska yudansa personal. Buska yudansa serka amigunan ku por apoyá bo desishon pa no bebe di mas i ku por duna bo yudansa spiritual. “Dos ta mihó ku ún, pasobra nan tin un bon pago pa nan trabou. Pasobra si un di nan kai, esun lo lanta su kompañero.” (Eklesiastés 4:​9, 10; Santiago 5:​14, 16) E Instituto Nashonal di Mal Uso di Alkohòl i Alkoholismo na Merka tambe ta konsehá: “Tin bes no ta fásil pa baha man na bebementu. Puntra bo famia i amigunan pa yuda bo alkansá bo meta.”

8. Pega na bo desishon. “Sea kumplidónan di e palabra i no solamente tendedónan ku ta gaña nan mes. Ma esun ku fiha su bista riba e lei perfekto, e lei di libertat, i ta permanesé den dje, sin bira un tendedó lubidadó, sino un kumplidó berdadero, e hende akí lo ta bendishoná den loke e ta hasi.”​—Santiago 1:​22, 25.

Kon pa Vense e Adikshon

No ta tur hende ku ta bebe di mas ta bira alkohóliko. Pero tin hende ta kuminsá bebe asina hopi—òf asina regularmente—ku nan ta bira adikto na alkohòl. Debí ku adikshon na alkohòl ta inkluí dependensia físiko i mental na un supstansia potente, e hendenan ei kisas tin mester di mas ku simplemente forsa di boluntat i yudansa spiritual pa vense nan adikshon na alkohòl. Allen ta kòrda: “Ora mi a stòp di bebe alkohòl, e doló físiko tabata inmenso. E ora ei mi a realisá ku fuera di e yudansa spiritual, mi tabatin mester di yudansa médiko tambe.”

Hopi bebedó mester di tratamentu médiko pa fortalesé nan den e bataya spiritual pa  kibra ku e adikshon i keda leu for di dje. * Tin di nan mester drenta hospital pa nan haña yudansa pa trata ku e síntomanan severo di apstinensia òf pa haña remedi pa redusí e deseo apnormalmente fuerte pa alkohòl i pa yuda nan sigui apstené di alkohòl. E Yu di Dios ku a hasi milager a remarká: “No ta esnan ku ta salú mester di dòkter, sino esnan ku ta malu.”​—Marko 2:17.

E Benefisionan di Sigui Instrukshon Divino

E konseho bíbliko sabí tokante alkohòl ta bini for di e Dios berdadero. E ke lo mihó pa nos—pa nos disfrutá no solamente di e bida akí sino tambe di bida pa semper. Bintikuater aña despues ku el a legumai alkohòl, Allen a bisa: “Ta maravioso pa sa ku ta posibel pa ta diferente, pa siña ku Yehova tabata ke yuda mi drecha mi bida, ku e . . .” Allen ta pousa pasobra el a bira emoshoná. “Ùm, . . . pa sa ku Yehova ta komprondé i ta interesá i ta perkurá pa bo haña e yudansa nesesario—esei ta algu grandi.”

P’esei, si bo ta bebe di mas òf si bo ta adikto na alkohòl, no sea lihé pa pèrdè pasenshi òf konkluí ku no tin speransa pa bo. Allen i hopi otro hende tabata kaminda abo ta awor i sea nan a baha man na bebementu òf a stòp di bebe alkohòl kompletamente. Nan no ta lamentá; abo tampoko lo no lamentá.

Sea ku bo ta skohe personalmente pa bebe alkohòl na un manera moderá òf di no bebe niun tiki alkohòl, sigui Dios su súplika amoroso: “Mara bo a pone atenshon na mi mandamentunan! E ora ei bo pas lo tabata manera un riu, i bo hustisia manera ola di laman.”​—Isaias 48:18.

[Nota]

[Kuadro/Plachi na página 8]

 Alkohòl Tin Kontròl Riba Mi?

Puntra bo mes:

• Mi ta bebe mas alkohòl ku ántes?

• Mi ta bebe ku mas frekuensia awor?

• Mi ta bebe bibida mas stèrki awor?

• Mi ta bebe alkohòl pa baha strès òf pa skapa di problema?

• Un amigu òf miembro di famia a ekspresá su preokupashon tokante mi bebementu?

• Bebementu a kousa problema pa mi na kas, trabou òf ora mi ta ku fakansi?

• Ta duru pa mi pasa ún siman sin bebe?

• Mi ta sinti mi inkómodo ora otro hende ta apstené di alkohòl?

• Mi ta skonde pa otro hende e kantidat ku mi ta bebe?

Si bo kontestá sí na ún òf mas di e preguntanan akí, bo tin ku dal paso pa kontrolá bo bebementu.

[Kuadro/Plachi na página 9]

Tuma Desishon Sabí Tokante Alkohòl

Promé ku bo bebe alkohòl, konsiderá lo siguiente:

• Ta konsehabel pa mi bebe alkohòl, òf mi mester apstené?

Rekomendashon: Un hende ku no por kontrolá su bebementu mester apstené di alkohòl.

• Te kuantu mi por bebe?

Rekomendashon: Pone bo límite promé ku alkohòl afektá bo sano huisio.

• Ki ora lo mi bebe?

Rekomendashon: No bebe ora ku bo tin ku bai kore outo òf partisipá den kualke aktividat den kua bo mester ta alerta; ni tampoko promé ku aktividatnan religioso; no durante embaraso; ni tampoko ora bo ta tuma sierto remedi.

• Na unda lo mi bebe?

Rekomendashon: Den un ambiente sano; no den sekreto pa skonde bo bebementu; ni tampoko dilanti hende ku lo sinti nan ofendí pa motibu di alkohòl.

• Huntu ku ken lo mi bebe?

Rekomendashon: Ku amigunan i famianan ku por tin un influensia positivo riba bo; no ku hende ku tin problema ku bebementu.

[Kuadro/Plachi na página 10]

E Palabra di Dios A Yuda un Bebedó

Supot di Tailandia tabata un alkohóliko. Promé, e tabata bebe anochi so. Gradualmente, el a kuminsá bebe mainta i despues el a kuminsá bebe mèrdia tambe. Hopi bes e tabata bebe djis p’e bira burachi. Pero na dado momento el a kuminsá studia Beibel ku Testigunan di Yehova. Ora Supot a haña sa ku buracheria no ta algu aseptabel den bista di Yehova Dios, el a stòp di bebe. Pero despues di un tempu, el a bolbe kai den su bisio. Esaki a pone su famia sinti nan hopi kibrá.

Pero, Supot no a stòp di stima Yehova i tabata kier a ador’é debidamente. E amigunan di Supot a sigui yud’é i a animá su famia pa dediká mas tempu na dje i pa nan no stòp di yud’é. E deklarashon franko na 1 Korintionan 6:10 ku hende ‘buraché lo no heredá e reino di Dios’ a yuda Supot mira e tempu ei kon serio su situashon ta. El a realisá ku e mester hasi hopi esfuerso pa vense su problema ku alkohòl.

E biaha akí, Supot tabata determiná pa stòp di bebe alkohòl kompletamente. Finalmente, ku e poder di Dios su spiritu santu, e guia di e Palabra di Dios i e yudansa di su famia i e kongregashon, Supot a haña e forsa spiritual pa vense su deseo di bebe alkohòl. Su famia tabata masha kontentu ora el a simbolisá su dedikashon na Dios mediante boutismo. Awor Supot tin loke semper e tabata deseá: un relashon íntimo ku Dios. I e ta usa su tempu pa yuda otro hende spiritualmente.