Yehova Su Gobernashon Ta Superior!
Yehova Su Gobernashon Ta Superior!
“E Haltísimo ta goberná e reino di hende.”—DAN. 4:17.
1, 2. Menshoná algun motibu pakiko gobernashon humano ta un frakaso
GOBERNASHON humano a frakasá! No tin duda den esei. Un di e motibunan prinsipal pa e frakaso ei ta ku hende no tin e sabiduria nesesario pa goberná nan mes ku éksito. Ademas, awe e frakaso di gobernashon humano ta mas bisto ku nunka pasobra hopi gobernante a demostrá ku nan ta ‘stimadó di nan mes, stimadó di plaka, gabadó, arogante, desleal, irekonsiliabel, hende ku mala lenga, sin dominio propio, grosero, odiadó di loke ta bon, traidó i sobèrbè.’—2 Tim. 3:2-4.
2 Hopi tempu pasá, nos promé mayornan a rechasá Dios su gobernashon. Kisas nan a pensa ku asina nan lo a bira independiente. Pero, en realidat nan a someté nan mes na Satanas su gobernashon. Seis mil aña di hende su mal maneho—bou di influensia fuerte di “e prens di e mundu akí,” Satanas—a hinka nos den e krísis aktual. (Juan 12:31) Den un komentario riba humanidat su situashon aktual, e buki The Oxford History of the Twentieth Century a bisa ku no tin sentido pa “buska un mundu perfekto.” Pasobra, el a splika, “nos no por hañ’é, i intentonan pa kre’é ta hiba na desaster, diktadura i gueranan masha desastroso.” Ki un manera franko pa rekonosé ku gobernashon humano ta un frakaso!
3. Kiko nos por bisa tokante e manera ku Dios lo a goberná si Adam ku Eva no a peka?
3 P’esei, ta lamentabel ku nos promé mayornan a rechasá e úniko gobernashon ku sí ta bon, esta, esun di Dios. Naturalmente, nos no sa eksaktamente kon Yehova lo a goberná e tera si Adam ku Eva lo a keda fiel na dje. Sinembargo, nos por ta sigur ku henter humanidat lo a aseptá Dios su gobernashon i ku e gobernashon akí lo tabata imparsial i basá riba amor. (Echo. 10:34; 1 Juan 4:8) Ademas, Dios tin sabiduria inkomparabel. P’esei, nos por tin sigur tambe ku si humanidat lo a keda bou di Yehova su gobernashon, hende por a evitá tur e fayonan ku e defensornan di gobernashon humano a kometé. Gobernashon di Dios, òf teokrasia, sí lo por a “satisfasé e deseo di tur ser bibu.” (Sal. 145:16) Ku poko palabra, lo e tabata un gobernashon perfekto. (Deu. 32:4) Lamentablemente, ta nèt e gobernashon ei hende a rechasá.
4. Te kon leu Dios ta permití Satanas goberná?
4 Apesar di esei, ta bon pa kòrda ku ounke Yehova a permití hende goberná nan mes, nunka el a renunsiá su derecho di goberná riba su kriaturanan. Asta e rei poderoso di Babilonia a hañ’é ta rekonosé ku na final di kuenta ta “e Haltísimo ta goberná e reino di hende.” (Dan. 4:17) Finalmente, mediante Dios su Reino, Su boluntat lo sosodé. (Mat. 6:10) Ta sierto ku Yehova ta permití Satanas aktua temporalmente komo “e dios di e mundu akí” pa asina duna un kontesta konvinsente riba e kuestionnan ku e opositor akí a lanta. (2 Kor. 4:4; 1 Juan 5:19) Sinembargo, Satanas nunka por bai mas leu di loke Yehova ta permití. (2 Kró. 20:6; kompará ku Jòb 1:11, 12; 2:3-6.) Semper tabatin hende ku a skohe pa someté nan mes na Dios, ounke nan tabata biba den un mundu goberná pa Dios su gran Atversario.
Dios Su Gobernashon Riba Israel
5. Ki kompromiso Israel a sera ku Dios?
5 For di tempu di Abel te na e patriarkanan, tabatin vários persona fiel ku a adorá Yehova i obedesé su mandamentunan. (Heb. 11:4-22) Den tempu di Moisés, Yehova a sera un pakto ku e desendientenan di e patriarka Jakòb, i nan a bira e nashon di Israel. Sí, na 1513 promé ku nos era, e israelitanan a sera un kompromiso ku Yehova ku a enbolbé nan desendientenan tambe. Nan a primintí ku nan lo a obedesé Yehova komo nan Gobernante ora nan a bisa: ‘Tur loke Yehova a bisa, nos lo hasi.’—Eks. 19:8.
6, 7. Kiko tabata e karakterístikanan di Dios su gobernashon riba Israel?
6 Yehova tabatin un motibu pakiko el a skohe e israelitanan komo su pueblo. (Lesa Deuteronomio 7:7 i 8.) Su motibu a enserá mas ku djis e bienestar di e israelitanan. E tabatin di haber tambe ku asuntunan muchu mas importante, esta, Dios su nòmber i su soberania. E pueblo di Israel mester a sirbi komo un testigu di e echo ku Yehova ta e úniko Dios berdadero. (Isa. 43:10; 44:6-8) P’esei, Yehova a bisa e nashon ei: ‘Bo ta un pueblo santu na Yehova bo Dios i Yehova a skohe bo pa ta un pueblo pekuliar pa su mes for di tur e pueblonan ku tin riba superfisie di tera.’—Deu. 14:2.
7 Ounke, e manera ku Dios a goberná e israelitanan a mustra ku el a tene kuenta ku nan tabata imperfekto, su leinan tabata perfekto i a reflehá e kualidatnan di nan Dunador. E mandamentunan ku Yehova a duna e pueblo mediante Moisés a enfatisá bon kla ku Yehova ta santu, ku e ta stima hustisia, ku e tin pasenshi i ku e ta kla pa pordoná. Mas despues, den e tempu di Josué i su generashon, e nashon a obedesé Yehova su mandamentunan i a gosa di pas i hopi bendishon. (Jos. 24:21, 22, 31) E periodo ei den e historia di Israel ta un prueba ku Yehova su gobernashon ta eksitoso.
Gobernashon Humano Tin Su Konsekuensia
8, 9. Ki petishon bobo Israel a hasi, i kiko tabata e konsekuensia?
8 Pero ku transkurso di tempu, bes tras bes e israelitanan tabata bira lomba pa Dios su gobernashon i a pèrdè su protekshon. Finalmente, mediante profeta Samuel, Israel a eksigí un rei visibel, esta, un rei humano. Yehova a manda Samuel duna nan loke nan a pidi. Sinembargo, Yehova a agregá: “No ta abo nan a rechasá, sino ta ami nan a rechasá di ta rei riba nan.” (1 Sam. 8:7) Ounke Yehova a permití pa Israel tin un rei visibel, el a spièrta nan ku gobernashon di un rei humano lo tin su konsekuensia.—Lesa 1 Samuel 8:9-18.
9 Historia a mustra ku Yehova su spièrtamentu tabata na su lugá. Ora Israel tabatin rei humano, nan a haña nan ku problema serio, spesialmente ora e rei tabata infiel. E ehèmpel di Israel ta yuda nos komprondé dikon atraves di siglonan gobernashon den man di hende ku no konosé Yehova no por a trese benefisio duradero. Ta sierto ku algun polítiko ta pidi Dios bendishoná nan esfuersonan pa logra pas i felisidat. Pero kon Dios por bendishoná esnan ku no ta someté nan mes na su gobernashon?—Sal. 2:10-12.
Un Nashon Nobo bou di Dios Su Gobernashon
10. Dikon Dios a remplasá Israel, su pueblo skohí?
10 E nashon di Israel no tabata dispuesto pa sirbi Yehova fielmente. Finalmente, ora nan a rechasá Dios su Mesias nombrá, Yehova a rechasá nan i a disidí di remplasá nan ku un grupo di hende ku a forma un nashon nobo. Komo resultado di esei, na aña 33 di nos era, e kongregashon kristian di adoradónan ungí di Yehova a nase. E kongregashon ei ta un nashon nobo ku Yehova ta goberná. Pablo a yam’é “e Israel di Dios.”—Gal. 6:16.
11, 12. Relashoná ku supervishon, ki similaridat tin entre e nashon di Israel i “e Israel di Dios”?
11 Tin tantu diferensia komo similaridat entre e nashon original di Israel i e “Israel di Dios.” Distinto for di Israel di antigwedat, e kongregashon kristian no tin un rei humano ni e no tin ku hasi sakrifisio di bestia na fabor di pekadónan. Un similaridat entre e nashon di Israel i e kongregashon kristian ta e areglo di ansiano. (Eks. 19:3-8) E ansianonan ei no ta goberná riba e tou. Mas bien, nan ta pastoriá e kongregashon i diligentemente ta hiba delantera den aktividatnan kristian. Nan ta trata kada miembro di e kongregashon ku amor, demostrando onor i dignidat na tur.—2 Kor. 1:24; 1 Ped. 5:2, 3.
12 Ora miembronan di e “Israel di Dios” i nan kompañeronan, e “otro karnénan,” meditá riba e manera ku Dios a trata ku Israel, nan ta haña mas apresio pa Yehova i su gobernashon. (Juan 10:16) Por ehèmpel, historia ta mustra ku gobernantenan humano di Israel tabatin hopi influensia riba nan súpditonan, sea pa bon òf pa malu. E bèrdat ei mester yuda esnan ku ta hiba delantera entre kristiannan komprondé ku—ounke nan no ta gobernante manera e reinan di antigwedat—ta masha importante pa nan semper pone un bon ehèmpel den fe.—Heb. 13:7.
Kon Yehova Ta Goberná Awe
13. Ki suseso importante a tuma lugá na 1914?
13 Awe, kristiannan ta proklamá rònt mundu ku fin di gobernashon humano ta aserkando. Na 1914, Yehova a establesé su Reino den shelu ku Hesukristu komo su Rei nombrá. Na e tempu ei, el a duna Hesus outoridat pa sali “konkistando i pa konkistá.” (Rev. 6:2) Dios a bisa e Rei resien entronisá: “Goberná meimei di bo enemigunan.” (Sal. 110:2) Ta di lamentá ku bes tras bes, e nashonnan a nenga di someté nan mes na Yehova su gobernashon. Nan a sigui aktua komo si fuera “no tin Dios.”—Sal. 14:1.
14, 15. (a) Kon e Reino di Dios ta goberná nos awe, i en bista di esei ki pregunta nos mester hasi nos mes? (b) Ki prueba tin ku Dios su gobernashon ta superior asta den nos tempu?
14 Ainda tin algun miembro ungí di e “Israel di Dios” riba tera, i komo rumannan di Hesus nan ta sigui sirbi komo “embahadornan pa Kristu.” (2 Kor. 5:20) Nan a ser nombrá komo un esklabo fiel i prudente pa perkurá kuminda spiritual pa e ungínan i pa e multitut di kristian ku ta oumentando mas i mas. Aktualmente, e multitut akí ta konsistí di miónes di hende ku tin e speransa di biba pa semper riba tera. (Mat. 24:45-47; Rev. 7:9-15) Yehova su bendishon riba e areglo ei ta bisto na e prosperidat spiritual ku e adoradónan berdadero ta gosa di dje awe.
15 Nos kada un mester puntra nos mes: ‘Mi ta bon konsiente di mi responsabilidatnan den e kongregashon kristian? Mi ta apoyá Yehova su gobernashon manera mester ta? Mi ta orguyoso di ta un súpdito di Yehova su Reino ku ta na mando? Mi ta determiná pa hasi tur loke ta na mi alkanse pa sigui prediká tokante e Reino di Dios?’ Komo grupo, boluntariamente nos ta someté nos mes na e guia di e Kuerpo Gobernante i ta kooperá ku e ansianonan nombrá den e kongregashonnan. Di e manera ei, nos ta demostrá ku nos ta aseptá Dios su gobernashon. (Lesa Hebreonan 13:17.) Sumishon boluntario ta resultá den union mundial, algu úniko den e mundu dividí akí. Ademas, e ta produsí pas i hustisia i ta trese gloria na Yehova, demostrando ku su gobernashon ta muchu mas mihó ku kualke otro gobernashon.
Yehova Su Gobernashon Ta Triunfá
16. Ki desishon kada persona mester tuma awe?
16 E tempu pa resolvé e kuestionnan ku a lanta den Edén ta aserkando rápidamente. P’esei, awor ta tempu pa hende tuma un desishon. Kada persona mester disidí si e lo aseptá Yehova su gobernashon òf si lo e sigui tene duru na gobernashon humano. Nos tin e privilegio di yuda hende humilde tuma e desishon korekto. Pronto, na Armagedón, Yehova su gobernashon lo remplasá gobièrnunan humano bou di influensia di Satanas pa semper. (Dan. 2:44; Rev. 16:16) Gobernashon humano lo terminá, i Dios su Reino lo goberná henter e tera. E ora ei, lo keda probá ku Yehova su gobernashon ta superior den tur sentido.—Lesa Revelashon 21:3-5.
17. Ki faktornan lo yuda hende humilde tuma un bon desishon relashoná ku gobernashon?
17 Esnan ku no a tuma un desishon definitivo ainda na banda di Yehova, mester hasi orashon pidié yuda nan mira e benefisionan ku Su gobernashon lo trese pa humanidat. Gobernashon humano no ta kapas pa resolvé problema relashoná ku krímen ni terorismo. Dios su gobernashon lo kaba ku tur hende malbado for di riba tera. (Sal. 37:1, 2, 9) Gobernashon humano a hiba na guera kontinuo, pero gobernashon di Dios lo hasi “gueranan stòp te na e fin di tera.” (Sal. 46:9) Dios su gobernashon lo asta restorá pas entre hende i bestia! (Isa. 11:6-9) Bou di gobernashon humano, konsistentemente ta reina hamber i pobresa, pero Dios su gobernashon lo eliminá e kosnan akí. (Isa. 65:21) Ounke tin gobernantenan humano ku bon intenshon, nan no por kita malesa i morto. Pero bou di Dios su gobernashon, hende di edat avansá i hende enfermo lo alegrá ora nan bolbe haña nan vigor di hubentut. (Jòb 33:25; Isa. 35:5, 6) Sí, e tera lo bira un paradeis kaminda asta e mortonan lo haña resurekshon.—Luk. 23:43; Echo. 24:15.
18. Kon nos por demostrá ku nos ta kere ku Dios su gobernashon ta esun mihó?
18 Sí, Dios su gobernashon lo deshasí di tur e daño ku Satanas a kousa ora el a influensiá nos promé mayornan pa bira lomba pa nan Kreador. I pensa riba esaki: Satanas a kousa hopi daño durante 6.000 aña, pero mediante Kristu, Dios lo deshasí di tur e daño ei denter di 1.000 aña! Esei ta realmente un prueba palpabel ku Dios su gobernashon ta superior! Komo Testigunan pa nos Dios, nos ta aseptá é komo nos Gobernante. P’esei, laga nos demostrá tur dia, sí tur ora, ku nos ta adoradónan di Yehova, súpditonan di su Reino, i ku nos ta orguyoso di ta su Testigunan. I laga nos probechá di tur oportunidat pa konta ken ku ke skucha ku Yehova su gobernashon ta esun mihó!
Kiko Nos A Siña Tokante Dios Su Gobernashon ora Nos A Lesa . . .
[Preguntanan di Estudio]
[Plachi na página 29]
Yehova semper a goberná
